Ahkolah Inkacnek
Finne elos oasr ke kain in kunohkohn ac wal lalos sienna, Aaronic Pristut uh ac Melchizedek Pristut uh tiacna kuhpahsr fahsrelihk se ke orekma luhn molwelah uh.
Ke nga yac 30 matwac, nga muhtwacwacack orekma ke sie kampihni srihsrihk fin acn France. Sie lwen ah prestuhn luhn kampihni sac, sie mwet na wowo ke sie pacna alu, pahngonyuc nuh ke ohfohs lal. Siyuck lal ahklutyeyuc: “Nga tuhfahna etwacack lah kom prist se ke alu lom an. Kuh pwacye?”
Nga topuk, “Ahok, pwacye ma sacn. Nga sruok pristut.”
Nga kuh in liye lah el lut ke top luhk, na el siyuck, “Kuh kom lutlut ke sie seminacri luti ke mwe luti luhn alu?”
“Ahok,” Nga topuk, “inmahsrlon yac 14 ac 18, ac nga lutlut ke lesin luhn seminacri apkuhran in lwen nuh kwewa!” El apkuhran na in puhtatlac liki siah lal ah.
Nga lut na pwacye ke wik ekahsr tohkoh ke el pahngonyuc in fohlohk nuh ke ohfohs lal in use sie orekma in kol ke sie kampihni ke u sac. Nga lut ac ahkkahlwemye elyah luhk muh nga fuhsr laclac ac suhfal in sruok kain kunohkohn yohk srihpac se inge. Ke sie isracsr kuhlwacng, el fahk, “Sahp pwacye ma sacn, wacngihn ma kac. Nga etuh ohiyac lom an, ac nga etuh ma kom lotwelah ke alu lom an. Nga enenwekom.”
Pwacye sel ke ma nga tuh lotwelah ke Alu ac. Yac tohkohyang ingacn upac, ac nga tiac etuh lah nga ac kuh in oraclah wo fin wacngihn etuh se luhk ma nga tuh eis ke kuhlwacnsap ke Alu uh nekena pacl se nga tuh sie mwet fuhsr ah.
Nga ahkinsewowoyeyuck in kapwack ke sie pracns srihk. Mweyen mempucr na ekahsr ke pracns sac, mwet fuhsr ah tuh pahng in oaru wi oruh ohiyac nuh kwewa ke pracns sac. Nga tuh kahfofo ac luhngse puhla yohk srihpac uh. Ke Sacnri nga kuhlwacnsap ke tepuh in sackracmacn, kuhlwacnsap ke u in pristut luhk, ac oruh kain in kuhlwacnsap sahyac. Lwen ke wik an nga wacna wi pahpah tuhmuhk ac kuhtuh mwet mahtuh sruok pristut som oruh luti in sucu yurin mempucr, ahkwoye mwet mas ac kweok, ac kahsruh elos suc enenuh. Oacna in wacngihn na mwet nuhnkuh muh nga allac fuhsr lac in kuhlwacnsap kuh finne in kol. Sihk, oacna ma nuh kwewa in wona ac fal.
Kuhlwacnsap nga oruh ke matwac fuhsr ah kahsrweyuc muhsaheack luhlahlfongi luhk ac kawuckkihnyac kuh moul luhk ke wosasuc uh. Nga tuh rauniyucklac ke mwet wo ac pahkotwen ma esaclosyang in orekmakihn pristut lalos in ahkinsewowoye moul luhn kuhtuh mwet. Nga tuh kena in oacna elos. In kuhlwacnsap weluhlos, yohk likina nga akihlen pacl sac, nga lotwelah in sie mwet kol ke Alu ac oacyacpac fin facluh.
Oasr mwet fuhsr pucspucs liye kuh lohng tuhkweni se ofong inge suc sruok Aaronic Pristut. Ke nga ngwetoht ke un mwet se inge, nga liye puhs suwos muhta sisken mwet mahtuh, sahp pahpah tomowos, pahtmahtuh tomowos, tamuhlwel mahtuh wiyowos, kuh mwet kol ke pristut lowos—mwet sruok Melchizedek Pristut kwewa. Elos luhngse kowos, ac arulacna yohk, elos tuhkuh nuh inge ofong in wi kowos.
Fahsrweni luhn mwet sruok pristut use ngwetngwet na kahto se ke ma sefanna ac in tamuhlwel ma oasr inmahsrlon pristut luo luhn God uh. Finne elos oasr ke kain in kunohkohn ac wal lalos sienna, Aaronic Pristut uh ac Melchizedek Pristut uh tiacna kuhpahsr fahsrelihk se ke orekma luhn molwelah uh. Elos tuhkweni na ke oruh nuh kwewa ac yohk enenweyacn sie sin sie lalos.
Srihkasrak na wowo se ke kuhpahsr fototo ma oasr inmahsrlon pristut luo uh konweyuckyak ke oruh se inmahsrlol Jisus ac John Pacptais ac. Kuh oasr mwet kuh in nuhnkuh kacl John Pacptais elan tiac nuhnkuh kacl Jisus? Ac fuhkah fuhfahsryucsr se luhn Mwet Lahngo ah fin wacngihn ahkolah se ma orek sel John ah?
Ituckyang nuh sel John Baptist sie sin fuhfahsryucsr na fuhlwact ma tuhfahna liyeyuck: “in ahkolah inkacnek luhn Leum,”1 in Pacptaisel ke kof, ac in ahkoelah mwet uh in Esacl. Mwet “suwos … ac … mutal se inge,”2 suc tuh akmuhsralah nuh ke pristut srihsrihk sac sin lihpufacn se luhn God pacl se el tuh lwen alkosr matwac ah, tuh ke suwos el etuh ke kwewana ke yohk srihpac ac kuhiyacn fuhfahsryucsr lal ac wal lal.
Mwet uh lahlweni nuh yohrohl John in lohngohl ac in pacptaislac sel. Mwet uh suhnakuhnuhl ac ahkfuhlwactyacl mweyen el sie mwet luhn God. Tuhsruhk ke Jisus el sikyak, ke puhsisacl esaclwacng nuh sin Sie yohk luhkwel sifacna ac fahk, “Nga baptais ke kof tusruktu oasr sie su muta inmasrlowos … El tuku tukuk tusruktu nga kupansuwol in tulala ah losyen fahluk lal.”3
Nuh ke ip Lal, Jisus Kraist, Wen sefanna nuhtin Pahpah, suc sruok pristut fuhlwact sac, ke mongfihsracsr akihlen kuh lal John. Kacl, Mwet Lahngo el fahk, “Inmasrlon mwet ma isusla sin mutan wangin sie suc yok lukel John Baptist.”4
Srihke nuhnkuh lah meac ac sikyak ke u luhn pristut lasr uh fin kuhpahsr inmahsrlon mwet sruok pristut luo inge moklweyuck ke atac se akwucki sel Jisus ac John Baptist ac. Mukul fuhsr wiyuck ke Aaronic Pristut, oacna John, ip kunom pa in ahkolah inkacnek uh5 nuh ke orekma yohk se luhn Melchizedek Pristut. Kowos oruh ma se inge ke kain in inkacnek puhs. Kowos kuhlwacnsuhpuh akwuck ke pacptais ac sackracmacn. Kowos kahsruh ahkoelah mwet nuh sin Leum ke luti wosasuc uh, ke muhtwacta ke lohm sin kais sie mempucr,6 ac ke liyacacng alu uh.7 Kom sang kahsruh nuh sin mwet suhkahsruhp ac enenuh ke oracni mwe sang luhn lalo, ac kom wi in karihngihn lohm in tuhkweni luhn Alu uh ac kuhtuh pac ohiyac in kahsruh. Ip kunom uh yohk srihpac, enenweyuck, ac muhtahl.
Mukul mahtuh wiyuck, lah kowos pahpah, pisap, mwet in kahsruh luhn mwet fuhsr, kuh mwet sruok Melchizedek Pristut na, kowos kuh in ukwe srihkasrak luhn Mwet Lahngo in nuhnkuh ke tamuhlwel wiom ma sruok pristut srihsrihk an ac solwaclos in wi kowos orekma. Pwacyeiyac uh, solsol se inge tuhkuh sin Leum sifacna. El fahk lah mwet sruok Melchizedek Pristut uh enenuh in usaclos ma akmuhsralah nuh ke pristut srihsrihk sacn in weluhlos, ac suhpwacloslac met in oraclah pacl, in ahkoelah inkacnek, ac in som ke pacl oreklac ma elos (mwet sruok Melchizedek Pristut) sifacna koflah in som nuh kac uh.8
Ke kom suli mukul fuhsr wiyowos in ahkoelah inkacnek uh, kom kahsrwelos in akihlen ac ahkfuhlwactye kuh muhtahl se elos sruok uh. In oruh ohinge, kom kahsrwelos ahko inkacnek lalos sifacna ke elos ahko lwen se ma elos ac eis ac orekmakihn pristut luhlahp sacn.
Lwelah ngan akacsruhi sramsram pwacye soko kacl Alex uh, prist fuhsr okak, etuh nuhnak, ac lahlmwetmwet se. Sie Sacnri ac pisap lal Alex ac konwaclwack el muhkwena lun sie rum in lutlut ac luhman suhpwacr na atacl. Mwet fuhsr sac fahk luhpan upaciyac nuh sel in wi alu a pahpah tuhmwacl tiac weluhl, suc soenna mempucr. Na el fahk ke emtucng muh sahp ac wo nuh sel in tilac wi Alu uh.
Ke nuhnak pwacye ke mwet fuhsr se inge, pisap sac silahklahk na sang kaunsucl luhn ward in mukwilac in kahsrwel Alex. Plwacn se lal ah fihsrwacsr: in oruh Alex elan wi na alu ac kahsrwel in muhsaheack sie luhlahlfongi loal ke wosasuc uh, elos enenuh in “raunwellah ke mwet wowo ac sang nuh sel ma yohk srihpac in oruh.”
Sana mukul ke pristut ac mempucr nuh kwewa ke ward esacni kuhiyaclos in kahsrwel Alex ac ahkkahlwemye puhla ac taptap lalos. Mwet kol ke u luhn prist fuhlwact, sie mukul ma fokoko luhlahlfongi ac luhngse la, tuh sollac in pa mwet se el wi ke luti in sucu uh. Mempucr ke pisaprik sifacpacna tahpuhkuhl ac oracl tuh in mwet se elos fototo nuh se emet.
Pisap el fahk: “Kuht oruh Alex elan kahfofo. El kahsruh ke macruht, kahsruh ke mas, kahsrweyuc ke kihsaci kuclyuck, pacptaiselah kuhtuh mwet sasuc, akmuhsraelah mukul fuhsr nuh ke ohfohs luhn Aaronic Pristut, luti lesin luhn mwet fuhsr, wi misineri lutlut, ikacslah lohm nuh ke kanfracns, ac kaliyac lohm alu ke fong tukun kanfracns. El oruh kuhlwacnsap in kahsruh, wiyuc ke muhtwacta nuh yurin mwet mahtuh kahsrweyuck ke ono, sramsram ke tuhkweni luhn sackracmacn, kuhlwacnsuhpuh sackracmacn nuh sin mwet mas lohm ono uh kuh lohm selos, ac eklac sie sin u na srihsrihk ke mwet ma nga kuh in lihksreni na epacl nuh se ekihn pisap se uh.”
Kais kuhtuh na, Alex el eklac. Luhlahlfongi lal ke Leum yohkwelihk. El eis luhlahlfongi kuh sel sifacna ac ke kuh luhn pristut ma el sruok. Pisap el ahksahfye: “Alex el tuh sie mwet na ac fah pacl nuh kwewa sie sin mwe insewowo yohk ke pacl luhk ekihn pisap uh. Sie pacl na wowo ke nga tuh kuhpahsryang nuh sel ah. Nga luhlahlfongi na pwacye lah wacngihn mwet fuhsr nuh som nuh ke misin ma yohk ahkolah la ma ke kuhlwacnsap ke pristut lal.”9
Pisap sacohk luhk, kowos eis, in weacng akmuhsra ac srisrilac lowos ekihn pisap ke ward lowos an, kunohkohn muhtahl se in kuhlwacnsap ekihn prestuhn luhn Aaronic Pristut ac u luhn prist an. Nga akihlen ma toasr kom us an, tuhsruhk kom enenuh in oruh kunohkohn lom nuh sin mwet fuhsr an in sie sin ma fuhlwact emet uh sum. Kom tiac kuh in suhnuhnkuhi kuh sang ip kunom ke kunohkohn se inge nuh sin mwet sahyac.
Nga suli kom in nuhnkuh ke kais sie mwet fuhsr sruok Aaronic Pristut ke ward lom an. Wacngihn selos enenuh in puhla sriyucklac kuh wacngihn srihpac. Oacna oasr mukul fuhsr ma kom ac kuhtuh pac mukul ke pristut uh kuh in kahsruh? Solwacl elan wi kom kuhlwacnsap. Kuht wacna ahkwoye mukul fuhsr lasr uh ac fuhlwelah na elos in liye na ma orek uh likina in wi kuhlwacnsap ke pristut uh suc luhlahlfongi ac luhngse lalos ke wosasuc uh kuh in yohkwelihk wo ke ahkpwacyeyucklac kunohkohn lalos ke pristut uh. In oaru wi orekma luhn molwelah, elos ac kuhpahsryang nuh inkuhsrao ac elos ac eis etuh se ke kuh oasr nuh selos lucng me uh.
Aaronic Pristut el yohk likina in pa na u ke matwac se, prokracm in luti kuh mukwikwi se, kuh finne sie kahs in srihsrngiyac mukul fuhsr ke Alu uh. Pa kuh ac wal in wi orekma yohk se ke molwelah moul uh—kwewana moul luhn mukul fuhsr ingacn ma sruok an ac moul luhn mwet ma elos kuhlwacnsuhpuh an. Kuht enenuh in akiyac Aaronic Pristut ke ip na pwacye la uh, sie acn sollac—sie acn in kuhlwacnsap, ahkolah, ac ahksahfyeyuck nuh sin mukul nuh kwewa ke Alu uh.
Mukul sacohk wiyuck ke Melchizedek Pristut, Nga suli kowos in ahkkweyelah kuhpahsr enenuh se ma oracni pristut luo luhn God uh. Ahkfokokoye mwet fuhsr lowos ke Aaronic Pristut in ahkolah inkacnek met liki kowos. Fahk nuh selos ke luhlahlfongi, “Nga enenwekowos.” Nuh suwos mwet fuhsr sruok Aaronic Pristut, nga pruhe tuh ke kowos kuhlwacnsap wi mukul mahtuh wiyowos, kowos ac lohng puhsren Leum fahk nuh suwos lah kowos ahkinsewowoyeyuck, mweyen kowos ac oruh ma yohk. Na lah kowos suhpweyuckme, finne oacna John, in ahkolah inkacnek met liki Leum.10 Ke inen Jisus Kraist, amen.