Kuh Nguhn Muhtahl ac Kahsrwe Kom Fuhkah?
Nguhn Muhtahl sensenkackihn, Nguhn Muhtahl ahkkweye, ac Nguhn Muhtahl fahkwack luhlahlfongi.
Pacl fototo somlah ke sie ekuhn Mante ah, muhtwacn kiyuck, Lesa, ac nga som muhtwacta yurin sie sucu fuhsr ke pohloh acn kuht muhta we ah. Ke kuht muhtwacta we ah, sucu sac suli kuht in muhta weluhltahl ke ekuhn sucu laltahl, fahk lah mukul yac yuc se nahtuhltahl pa ac oruh mwe luti ke ekuh sac. Ahok, oruh kuht muhta!
Tukun on in ikacslah, pruhe, ac sramsram ke pisnis luhn sucu, tuhlihk yac yuc sac sramtweack mwet luti lal ke el riti sie kihsensiyuck yohk kalmeyac weacng ma el suhmuhslah ah: “Kuh Nguhn Muhtahl ac kahsrwe kom fuhkah?” Kihsensiyuck inge sramtweack sramsram na yohk inmahsrlon sucu sac suc ma elos nuh kwewa oasr fahk lalos kac. Nga fwefwelac ke ahkolah luhn mwet luti se inge ac kihsensiyuck wo se lal ah, suc ma nga tahfwelah in muhta nuhnkuh.
Tukun muhtwacta sac, nga kalweni in siyuck sihk sifacna, “Kuh Nguhn Muhtahl ac kahsrwe kom fuhkah?”—sie kihsensiyuck ma fal nuh sin tuhlihk ke Primary ma ac yac alkosrlac ac ahkolah nuh ke pacptais ac nuh sin tuhlihk ma tuhfahna pacptaislac ac eis mwe sang luhn Nguhn Muhtahl. Fal pac nuh sin tausin selos ma tuhfahna eklac.
Nga suli kais sie sesr, yohkna tuhlihk ke Primary uh, in nuhnkuh, “Kuh Nguhn Muhtahl ac kahsrwe kom fuhkah?” Ke nga motko kihsensiyuck se inge, nga sa na esamwack sie ma tuh sikyak nuh sihk ke nga tuhlihk ah. Nga tuh sruhmuhn sramsram se inge nuh sel Elder Robert D. Hales tukun na nga pahng nuh ke U luhn Mwet Sap Singucul Luo ah ac el sang sramsram inge nuh ke mackuhsin luhn Alu uh suc ma el sihmihs ke moul luhk uh.1 Kuhtuh suwos sahp lohng tari sramsram se inge, tuhsruhk sahp puhs suwos soenna lohng.
Ke nga tuh yac singucul sie ah, nga ac pahpah tuhmuhk ah som fanfan finohl suc ma oacna apkuhran nuh lohm sesr ah. Ke pahpah el fan nuh lucng ke inkacnek srihsrihk oactu ah, nga sro ke yot luhlahp nuh ke sie, ke sisken inkacnek srihsrihk ah. Ke nga srihke in fanuhkyac sie yot luhlahp ah, nga muhtwacwacack in ulyuc nuh lucng fin yot uh. Ke nga oruh ah, nga lut ke pahpah el sruokyac na pacl luhk ah ac amackihnyucwi nuh ten, fahk, “Nimet fanuhk yot sacn. Tari kuht fahsr na ke inkacnek srihsrihk uh.”
Mihnit ekahsr tohkoh, ke kuht tu lucng ke inkacnek srihsrihk ah ac ngweti nuh ten, kuht lut na pwacye ke kuht liye soko rahtuhl snek oan ye faht ah e lucng fin yot se na ma nga oruh ngwacn fanuhkyac ah.
Tohkohyang, ke kuht stosah som nuh lohm ah, nga etuh lah pahpah el soano ngwacn siyuck, “Kuh kom etuh fuhkah lah snek soko ah oasr insac?” Na nga siyuck, ac siyuck se luhk ah oruh sramsramkihnyuck Nguhn Muhtahl ac lah Nguhn Muhtahl kahsrwe kuht fuhkah. Nga tiacna muhlkuhnlah ma nga lotwelah ke lwen sac.
Kuh kom kuh in liye lah Nguhn Muhtahl el kahsrweyuc fuhkah? Nga ac srui ne tok ke pahpah tuhmuhk ah el porongo puhsra srihsrihk, ac fihsrwacsr luhn Nguhn Muhtahl, ke srihpac sac nga pain moullac.
Ma Kuht Etuh ke Nguhn Muhtahl
Met liki kuht nuhnak yohk ke kihsensiyuck se inge “Kuh Nguhn Muhtahl ac kahsrwe kom fuhkah?” lwelah kuht in sifil liye ke kuhtuh ma Leum El fahkwack ke Nguhn Muhtahl. Oasr ma pwacye ma pahtpaht puhkantwen kuht kuh in liye, tuhsruhk mihsenge, nga ac ahkyohkye ma tolu na.
Ma se met, Nguhn Muhtahl pa mempucr ahktolu ke Sifac ke God. Kuht lotwelah ke ma pwacye se inge ke ip yohk ke luhlahlfongi se emet: “Kuht luhlahlfongi ke God, Pahpah Ma Pahtpaht, ac ke Wen Nahtuhl, Jisus Kraist, ac ke Nguhn Muhtahl.”2
Ahkluo, Nguhn Muhtahl el atacn nguhn se na, oacna ke ahkuhtweyucki ke ma suhmuhslah in pacl inge ke fahk nuh sesr muh Pahpah ac Wen oasr mahno in ikoac ac sri na pwacye oacna mwet uh, tuhsruhk Nguhn Muhtahl uh wacngihn mahno in ikoac ac sri la, ac tuh el atacn Nguhn se na. Fin tiac ohinge, Nguhn Muhtahl ac tiac kuh in muhta in kuht.3 Kalmacn ma inge pa oasr nguhnihn Nguhn Muhtahl, tiac oacna Pahpah God ac Jisus Kraist, suc ma oasr mahno in ikoac la. Ma pwacye se inge ahkuhtweyac kahlwem ine sahyac ma ituckyang nuh ke Nguhn Muhtahl ac ma etweyuck sesr, pa Nguhn Muhtahl, Nguhn luhn God, Nguhn luhn Leum, Nguhn Muhtahl suc El tuh Olwelah, ac Nguhn Muhtahl.4
Ahktolu, mwe sang luhn Nguhn Muhtahl tuhkuh ke fihliyac luhn paho. Akwuck se inge, sikyak tukun pacptais, suc ma oruh kuht fal in eis asruoki luhn Nguhn Muhtahl.5 In oruh akwuck se inge, mwet suwohs suc sruok Melchizedek Pristut fihliyac paholos fin sifen sie mwet,6 pahnglol ke inel, fahk kuh luhn pristut lalos, ac ke inen Jisus Kraist, ahkkweyacllah in sie mempucr ke Alu luhn Jisus Kraist luhn Mwet Luhlahlfongi ke Lwen-sahflah, ac fahk pohloh kahs yohk srihpac inge “Eis Nguhn Muhtahl.”
Kuh Nguhn Muhtahl ac Kahsrwe Kom Fuhkah?
Ke kuht puhsrallah ma yohk srihpac pwacye tolu ke Nguhn Muhtahl uh, kuht ac fohlohklac sramsramkihn kihsensiyuck se emet ah: “Kuh Nguhn Muhtahl ac kahsrwe kom fuhkah?”
Nguhn Muhtahl El Sensenkackihn
Oacna ke nga ahkuhtweyac ke ma sikyak ke nga tuhlihk ah, Nguhn Muhtahl El kuh in kahsrwe kom ke El sensenkackihn kom na met ke ma ac sensen nuh ke monum ac nguhnum uh. Nga sifilpac lotwelah ke yohk srihpaciyacn kunohkohn in sensenkackihn luhn Nguhn Muhtahl ke nga tuh kuhlwacnsap ke Prestuhnsi ke Eria fin acn Japan.
Ke pacl sac, nga orekma weluhl Prestuhn Reid Tateoka ke Japan Sendai Mission. Ipin kunohkohn lal ke misin se inge, Prestuhn Tateoka el plwacnwelah miting luhn misineri ma kol misineri nohfohn ke lacyacn kuhtuhlacp ke misin sacn. Lwen ekahsr met liki lwen in miting sacn, Prestuhn Tateoka el puhla ma se, sie puhla luhn insiyacl, in suli misineri nuh kwewa ke lwacyacn sacn in tuhkuh wi miting luhn mwet kol luhn misineri, likina in mwet kol na luhn elder ac tahmtahel ngwacn.
Ke el ahkkahlwemye plwacn lal, el ahkacsmakihnyeyuck lah miting se inge tiac ma nuh sin misineri nuh kwewa tuhsruhk ma nuh sin misineri kohlohltahl an. Tuhsruhktuh, el tiac ukwe plwacn ma akwucki elan muh ukwe kohkoh ma el puhlakihn ah, el suli misineri nuh kwewa ma kuhlwacnsap ke we acn ke siti ingacn, wi pac elos suc ma oasr ke siti luhn acn Fukushima, nuh ke miting sac. Ke lwen sacn, Mahs 11, 2011, misineri nuh kwewa fahsrweni nuh ke miting luhlahp sac nuh ke siti ma oan lun acn Koriyama.
Ke pacl se ma orek miting sac, kusrusr na upac se ac sunami se sun acn Japan acn ma Japan Sendai Mission el oasr we. Koluk ohiyac, puhslac siti we acn sac—wi acn ma misineri ah tuhkuh we me—arlac muhsahllah ac kweok ke wacngihnlac luhn moul puhs. Ac siti luhn acn Fukushima kweokkihn ma muhsahllah tukun ma sikyak ke nuclear ah.
Finne lohm in miting ma misineri ah miting kac ke lwen sacn muhsahllah ke kusrusr sac, ke srihpen ahkostwen nuh ke kohkoh luhn Nguhn Muhtahl, Prestuhn ac Sister Tateoka ac misineri nuh kwewa elos tuhkweni pain moullac. Elos muhta wona ac loesalah liki kuhnanuclac upac luhn sunami ac pwacsin ke nuclear ah.
Ke kom lohacng nuh ke moklweyuck luhn Nguhn Muhtahl—nuh ke puhla ma kwacna mihs ac efahl—ac kuh in moklweyuck kom, finne kom tiac etuh, liki sensen ke moul in nguhn ac mahno.
Tamuhlwel ac tahmtahel, Nguhn Muhtahl ac fah kahsrwe kom ke ac sensenkackihn kom, oacna ke el tuh oruh nuh sin pahpah tuhmuhk ac Prestuhn Tateoka.
Nguhn Muhtahl El Ahkwoye
In kalweni in topuk kihsensiyuck se inge “Kuh Nguhn Muhtahl ac kahsrwe kom fuhkah?” lwelah nuh sesr in suk kunohkohn Lal ke El ekihn Mwet in Ahkwo. Ma muh kuht tiac motko muh ac sikyak ke moul lasr kwewa uh oraclah ahsor, waek, ac suhpwacrlac. Ne ohinge, inmahsrlon ma upac inge, Nguhn Muhtahl El kuhlwacnsuhpwe kuht ke sie kunohkohn yohk srihpac Lal—oacna Mwet in Ahkwo, suc pa ingacn sie Inel. Kahs mihs, ac pwacye sel Jisus Kraist inge ahkuhtweyac kunohkohn muhtahl se inge, “Nga fah siyuk sel Papa, ac el ac fah sot Ngun Mutal nu suwos, su ac fah kasrekowos ac muta yuruwos ne tok.”7
In ahkuhtweyac in yohk ke mwe luti se inge, nga ac akacsruhi ke sie sramsram pwacye ke sie sucu suc ma oasr mukul limekohsr nahtuh suc mukwilac liki acn Los Angeles, California, USA, nuh ke sie mura srihsrihk kuhtuh yac somlah ah. Mukul luo ma mahtuh emet ah muhtwacwacack wi sritacl ke aeskul lalos ac asruoki nuh sin kawuck, mwet kol, ac orek sritacl an—suc ma inkaiyaclos mempucr ke Alu uh. Asruoki inge kahsrwelos kohlohloslac nuh ke pacptais lal Fernando, mukul mahtuh emet, ac tamuhlwel se wiyacl tohkohl ah.
Tok kuhtuh Fernando el mukwilac liki lohm ah, som nuh ke acn ma el tahfwelah lutlut lal ac sritacl futpohl ke college. El pahyuckyak sin switart se lal ke aeskul ah, Bayley, lun tempuhl. Ke Fernando ac Bayley ahksahfyelah lutlut lalos, elos arlac engan tuhpan isuslac luhn tuhlihk se emet nahtuhltahl—ahwowo muhtwacn se. Tuhsruhk ke sucu lal Fernando ac Bayley kahsrwelos in mukwi fohlohk nuh yen selos, stosah soko ma Bayley ac tahmtahel wiyacl ah kahsruhsr ke inkacnek luhlahp we ah ac sun acksitacn na luhlahp se ke stosah puhkantwen sahyac. Bayley ac ahwowo soenna isuslac se nahtuhl ah kwewana misac.
Ne upac kweok lal Fernando, oacpacna pahpah ninac ac tuhlihk wiyacl Bayley ah, mihs ac puhla wowo puhtati nuh faclos in pacl in ahsor lalos. Nguhn Muhtahl ke kunohkohn Lal ekihn Mwet in Ahkwo pwacyena lah El tahpkuhl Fernando in pacl na kweok suc ma tiac kuh in ahkuhtweyucki. Nguhn sang mihslac suc ma oan ac kohlohl Fernando nuh ke sie ohiyac in nuhnakmuhnahs ac luhngse nuh sin mwet nuh kwewa ma sun ongaiyac upac sac.
Pahpah ac ninac kiyacl Bayley ah pahngonwack tamuhlwel se wiyacl suc kuhlwacnsuhpuh misin lal ke pacl se ongaiyac sac sikyak. El ahkuhtweyac ke sie lwacta puhla lal ke el lohng nus na upac se ke tahmtahel sacohk se wiyacl ah: “Arlac usrnguck in lohng lah puhsrwemtacl arlac mihs in pacl na upac se inge. Nga tiac etuh lah meac ngwac fahk. … Ma sefanna nga nuhnkuh ah pa tahmtahel wiyuck el ac wacngihn ke ngwac fohlohk nuh lohm ah. … Nga ahkwoyeyuck ke testimoni kuh lowos ke Mwet Lahngo ac plwacn Lal. Puhla mihs se pacna inge oruh in luhluhyak muhtuhk ke nga lutlutkihn ac luti ac sesseslah insiyuck. Nga tuh ahkwoyeyuck ac ahkacsmakihnyeyuck ke ma ma nga etuh.”8
Nguhn Muhtahl ac fah kahsrwe kom ke ac ahkkweye kom, oacna ke El oruh nuh sin sucu lal Fernando ac Bayley ah.
Nguhn Muhtahl Fahkwack
Nguhn Muhtahl el oacyacpac fahkwack ac lohoh ke Pahpah ac Wen ac ma pwacye nuhkwewa.9 Leum, ke El sramsram nuh sin mwet tuhma lutlut Lal, fahk ohinge: “Ngun Mutal el ac tuku, su tuku sin Papa me, …el ac fah orek loh keik.”10
In ahkuhtweyac kunohkohn sacohk luhn Nguhn Muhtahl ke ekihn mwe lohoh se, nga ac tahfwelah sramsram se kacl Fernando ac Bayley ah. Fin kom esam, nga sruhmuhn lah Fernando ac tamuhlwel wiyacl pacptaislac, tuhsruhk pahpah ninac kiyacl ac tamuhlwel fuhsr tolu wiyacl tiacna pacptaislac. Ac, finne elos suliyuck pacl puhs in ohsun nuh sin misineri ke yac ekahsr ah, kais sie pacl sucu sac sruhnga.
Ke wacngihnlac lal Bayley ac tuhlihk muhtwacn ahwowo se nahtuhl ah, sucu lal Fernando ah koflah na in ahkwoyeyuck. Sahyacl Fernando ac sahyacn sucu lal Bayley, wacngihn ahkwo ac mihs sucu lal Fernando ah konwacack. Elos koflah kahlwem kac lah efuh tuhlihk mukul se na nahtuhltahl, wi sucu lal Bayley, in kuh in polong ma na toasr se inge.
Sahflahiyac ah, elos kahlwemwack kac lah ma ma oasr sin mukul se nahtuhltahl ah ac wacngihn seltahl pa wosasuc fohlohkyak luhn Jisus Kraist, ac lah oacna pa inge acn el eis mihslac ac ahkwo we. Ke elos etwacack ah, elos suli misineri in luti sucu lalos ke wosasuc. Tukun ma inge, elos eis mwe loh lalos sifacna ac testimoni lalos ke plwacn wolacna luhn engan, suc ma sang nuh selos mihslac wo ac puhla wo suc ma elos insacnweacng in suk ah.
Mahlwem luo tukun misac lal Bayley ac ahwowo se insiyacl ah, pahpah ninac kiyacl Fernando oacyacpac tamuhlwel fuhsr luo wiyacl ah pacptaislac ac ahkkweyeyucklac ac eis mwe sang luhn Nguhn Muhtahl. Tamuhlwel fuhsr emet wiyacl Fernando ah tuhpan pacl in pacptais lal ke el ac yac oalkosr uh. Kais sie selos fahkwack lah Nguhn, pa Nguhn Muhtahl, fahkwack mwe lohoh ke pwacyeiyacn wosasuc uh, kohlohlos nuh ke kena in pacptaislac ac in eis mwe sang luhn Nguhn Muhtahl.
Tamuhlwel ac tahmtahel, Nguhn Muhtahl ac kahsrwe kom ke ac fahkwack nuh sum oacna ke El oruh nuh sin sucu lal Fernando.
Ahkfototo
Nga ac ahkfototoyelah ma nga sruhmuhn ah. Nga tahkuhnlah ma pwacye tolu ma ac uskuhtme nuh ke etwacack ke Nguhn Muhtahl. Ma inge pa Nguhn Muhtahl pa mempucr ahktolu ke sifac ke God, Nguhn Muhtahl atacn nguhn se na, ac mwe sang luhn Nguhn Muhtahl tuhkuh ke fihliyac luhn paho. Nga oacyacpac sokwack top tolu nuh ke kihsensiyuck “Kuh Nguhn Muhtahl ac kahsrwe kom fuhkah?” Nguhn Muhtahl sensenkackihn, Nguhn Muhtahl ahkkweye, ac Nguhn Muhtahl fahkwack.
Suwohs in Karuhnganwacng Mwe Sang
Nuh suwos suc plwacn in pacptaislac ac ahkkweyeyucklac, kowos suc tuhfahna kuh in welah, kuh finne elos ke pacl loeloes somlah, yohk srihpac nuh ke mwactwacngwacsr ke moul in nguhn ac mahno in karuhnganwacng mwe sang luhn Nguhn Muhtahl. Kuht muhtwacwacack in oruh ke kuht insacnweacng in karuhnganwacng masap, kais sie pruhe ac pruhe in sucu, riti ma suhmuhslah, ac suk luhngse ac kuhpahsr in nuhnakmuhnahs yurin sucu ac mwet kuht luhngse. Kuht enenuh in liyacacng nuhnak lasr, mukwikwi lasr, ac kahs lasr in nwacsnwacs. Kuht enenuh in ahkfuhlwactye Pahpah tuhmasr Inkuhsrao ke lohm sesr, ke alu, ac, pacl ma kuh, lun tempuhl muhtahl. Fototo nuh yurin Nguhn, ac Nguhn fah fototo nuh yurum.
Fahkwack luhlahlfongi
Inge nga kaliyac ke sie puhsren suli ac fahkwack luhlahlfongi pwacye luhk. Nga suli kowos in moul fal nuh ke kahs ke on soko ma kwacna onkihnyuck sin tuhlihk srihsrihk nahtuhsr, kahs ma nga etuh lah elos ac akihlen: “Porongo, porongo. Nguhn Muhtahl fah mahmah. Porongo, porongo sie puhsra srihsrihk fihsrwacsr.”11
Tamuhlwel ac tahmtahel sacohk wiyuck, mahtuh ac fuhsr, nga fahkwack mwe loh luhk ke wolacna luhn mwet inkuhsrao suc nohfohnna oraclah Sifac ke God: God suc Pahpah, Jisus Kraist, ac Nguhn Muhtahl. Nga fahkwack testimoni luhk ke suwohs lasr ma kuht insewowokihn ke kuht ekihn Mwet Luhlahlfongi ke Lwen-sahflah suc moulkihn fohnlah luhn pacl uh pa mwe sang luhn Nguhn Muhtahl. Nga etuh lah Nguhn Muhtahl oruh ac fah kahsrwe kom. Nga oacyacpac fahkwack mwe lohoh sacohk luhk ke Jisus Kraist ac kunohkohn Lal oacna Mwet Lahngo ac Mwet in Molwelah lasr ac ke God oacna Pahpah tuhmasr Inkuhsrao. Ke inen Jisus Kraist, amen.