Sifac ke God ac Plwacn in Molwelah
Ke srihpen oasr ma pwacye lasr ke Sifac ke God ac kuhpahsr lasr nuh Selos uh, oasr map nuh inkacnek na pwacye nuh ke fuhfahsryucsr lasr ke moul facluh uh.
I.
Ip yohk ke luhlahlfongi se met lasr fahk: “Kuht luhlahlfongi ke God, Pahpah Ma Pahtpaht, ac ke Wen Nahtuhl, Jisus Kraist, ac ke Nguhn Muhtahl.” Kuht wi mwet Kristin sahyac nuh kwewa luhlahlfongi kacn Pahpah se ac Wen se ac Nguhn Muhtahl se, tuhsruhk tuh ma kuht luhlahlfongi Kwaclos uh tiac oacna ma mwet sahyac uh luhlahlfongi uh. Kuht tiacna luhlahlfongi ke ma mwet Kristin ke facluh se inge pahngon mwe luti ke U Muhtahl luhn Mwet Tolu. Ke Ararama se met lal, Joseph Smith el liye luhman mwet luo, mwet luo, suc ahkkahlwemye lah ke pacl sacn-kuhiyacn luhlahlfongi fahkwack lah God ac Sifac luhn God tiac pwacye.
In kapsruh ma sielacna nuh ke luhlahlfongi lah God el sie ma lukmac upac kuht in kahlwem ac etuh kac pa ma pwacye lah ma God el oraclah ac kuhpahsr lasr nuh Sel uh pa kuht etuh uh ac pa ki nuh ke mwe luti nuh kwewa sahyac nahtuhsr. Pwacpuhl suhmuhslah ke Jisus El Pruhe Kacsr yohk, suc El fahk lah “moul ma pahtpat pa inge: in etekom, God pwaye sefanna, ac in etuh Jesus Christ, su kom supwama” (John 17:3).
Sang kuhiyac in etuh God ac orekma Lal muhtwacwacack met liki moul sukawihl ac fah tiac sahflah inse. Mwet Pahluh Joseph Smith el luti, “Ac fah yohk pacl tukun kom som ahluhkwelah mwe lihsrlihsr met liki kom fah lutlut ke [mwe luti nuhkwewa ke moul ma pahtpaht].”1 Kuht kapkapwack ke etwacack kuht eis ke moul in nguhn se met ah. Ohinge, srihke in luti Mwet Israel ke ma God El oraclah ac kuhpahsr Lal nuh sin tuhlihk Nahtuhl, Mwet Pahluh Isaiah el fahkwack oacna sihmlac ke Pwacpuhl ah:
“Su ac ku in lumweyuk God nu kac? kuh kom ac ahketeya fuka lah El oana mea? …
“Ya kom tia etu? ya kom tiana lohng? kom tiana lohng lah faclu mutawauk fuka?” (Isaiah 40:18, 21).
Kuht etuh lah mempucr tolu ke Sifac ke God uh siena ataclos liki sie sin sie. Kuht etuh ma se inge eke mwe luti oreklac sel Mwet Pahluh Joseph Smith ah: Oasr mahno ac ikoac luhn Pahpah ac Wen Nahtuhl oacna monun mwet uh kuh in puhsralyuck. Wacngihn mahno ac ikoac luhn Nguhn Muhtahl tuhsruhk tuh el oacna nguhnihn mwet se. Fin tiac pa inge, na Nguhn Muhtahl tiac kuh in utyak nuh yohrohsr (liye D&C 130: 22).
Nuh ke acn fuhlwact lal Pahpah God nuh lun Sifac ke God, oacyacpac nuh ke ma kunwen kais sie atacn mwet in oruh, Mwet Pahluh el ahkuhtweyac:
“Kuhtena mwet suc liye ke inkuhsrao ikacklah etuh lah oasr mwet tolu ke inkuhsrao suc sruok ki luhn kuh, ac sie karihngihn nuhkewa. …
“… Mwet tolu inge … pa pahngpahng God pa emet, Mwet in Oraclah; God ahk luo, Mwet in Molwelah; ac God ahk tolu, Mwet Lohoh kuh Mwet in Fwahkwelihk.
“Pa ingacn acn fuhlwactlacna luhn Pahpah in karihngihn ekihn Chief kuh Prestuhn, Jisus ekihn Mwet Iwe ac Nguhn Muhtahl ekihn Mwet in Tuhtahf kuh Mwet Lohoh.”2
II. Plwacn Sac
Kuht kahlwem ke kuhpahsr lasr nuh sin mempucr ke Sifac ke God oacna ke ma ahkkahlwemyeyuck ke plwacn in molwelah.
Kain in kihsensiyuck nuh ke “Kuht tuhkuh oyac mwe?” “Efuh kuht oasr inge?” ac “Kuht ac som nuh oyac?” ma suhmuhslah uh tohpohklah kwewa pa pahngpahng “plwacn in molwelah,” “plwacn wolacna luhn engan,” kuh “plwacn luhn molwelah” (Alma 42:5, 8, 11). Wosasuc luhn Jisus Kraist pa infulwacn plwacn se inge.
Ke tuhlihk nguhn nuhtin God, ke sie acn nuh ke moul sukawihl, kuht kena sie finsrakkihn moul ma pahtpaht tuh ac kuh in kapwack fahsr fal ke wacngihn ma sikyak kuht puhlakihn ke moul in mahno lasr uh. In sang sie atac na wo ah, Pahpah tuhmasr Inkuhsrao El karihngihn Oreklac luhn facluh, suc, eslah mwe esam lasr ke ma sikyak nuh ke isuslac lasr, kuht kuh in oruh in kahlwem luhngse lasr in liyacacng masap Lal ac moulkihn ac kapkapwack ke mwe srihkasrak sahyac ke moul in ikoac lasr uh. Tuhsruhk ke kais sie ma sikyak ke moul se ingacn, ac ke ma sikyak ke Puhtatlac luhn ninac ac pahpah tuhmwacsr, nguhnasr fah kweokkihn misac ke in lihsyucklac liki ye muhtuhn God, fohkfohklah ke ma koluk, ac fah oacna atacn misac luhn mahno ac ikoac. Plwacn lal Pahpah motkweyuck tari ac sang ohiyac in kuhtanglah kwewa ma kosrweyucklac uh.
III. Sifac ke God
Ke kuht etuh tari ke srihpac ke plwacn yohk luhn God, kuht inge fah lohacng yohk nuh ke ma kunwen kais sie mempucr tolu ke Sifac ke God ke plwacn sacn.
Kuht muhtwacwacack ke mwe luti se ke Pwacpuhl. In kaliyac lwacta ahkluo lal nuh sin mwet Corinth, Mwet Sap Paul el oruh apkuhran na in wacngihn ahkoeyac nuh ke Sifac ke God pa Pahpah, Wen, ac Nguhn Muhtahl: “Lungkulang lun Leum Jesus Christ, lungse lun God, [kuh tuhkweni3] sie sin sie lun Ngun Mutahl in wi kowos nukewa” (Luo Corinth 13:14).
Ma suhmuhslah se ke pwacpuhl inge luhmweyuck nuh ke Sifac ke God ac mwe ahkuhtweyac kwewa kalmacn luhngse ac srihpen luhngse luhn God Pahpah, ke pahkotwen ac misin in molwelah lal Jisus Kraist, ac ke wi luhn Nguhn Muhtahl.
God Pahpah
Nohfohnna muhtwacwacack yohrohl God Pahpah. Ke kuht etuh kuhtuh srihsrihk ke ma oacna sie ac ma siena Kacl, siena ma kuht etuh uh in kahlwem ke wal fuhlwact Lal, kuhpahsr lasr nuh Sel, ac ohiyacn karihngihnyuck Lal ke plwacn in molwelah, Oreklac luhn facluh, ac ma nuh kwewa tohkoh sahyac an.
Oacna ke Elder Bruce R. McConkie el suhmuhslah met liki misac lal: “Yohkiyacn ac sahflahiyacn ohiyac ke kahs, oasr God pwacye ac moul sefanna. El pa Pahpah, Elohim Wolacna, Luhmahl Fuhlwactlacna, Mwet se Oraclah ac Mwet Kol se fin facluh nohfohn.”4 El pa God Pahpah tuhmwacl Jisus Kraist, ac oacyacpac kuht nohfohn. Prestuhn David O. McKay el luti lah “ma pwacye yohk se emet kahsrweyucklac sel Jisus Kraist pa ma pwacye se, lah tohkoh, lucng liki, ac raunweack nuh kwewa oasr God Pahpah se, Leum luhn kuhsrao ac facluh.”5
Ma kuht etuh ke ohiyac luhn God Pahpah uh pa yohkna ma kuht lotwelah ke mwe luti luhn Wen Sefanna Nahtuhl, Jisus Kraist. Oacna ke Elder Jeffrey R. Holland el luti, sie srihpac yohk srihpac emet ke luti lal Jisus uh pa in ahkkahlwemye nuh sin mwet uh “meac God Pahpah Ma Pahtpaht el oacna. … in ahkkahlwemye ac oraclah nuh sesr sifacna ohiyac pwacye luhn Pahpah Tuhmwacl, Pahpah tuhmasr in Kuhsrao.”6 Pwacpuhl uh nwacnwack mwet pahluh lohoh lah Jisus el “luhmahl oacna luhman” Pahpah Tuhmwacl (Hebrew 1:3), suc ahkuhtweyucki yohkna ke luti lal Jisus sifacna lah “Kutena mwet su liyeyu tari el liyal pac Pahpah” (John 14:9).
God Pahpah pa Pahpah tuhmasr in nguhn. Kuht tuhlihk Nahtuhl. El luhngse kuht, ac ma nuh kwewa El oruh ma nuh ke mwe insewowo ma pahtpaht. El pa mwet se oraclah plwacn in molwelah, ac ke kuh Lal plwacn Lal sang srihpac nuh ke wolacna yohk luhn tuhlihk Nahtuhl.
Wen sac
Nuh sin mwet moul in ikoac, mwet se ma liyeyuck emet ke Sifac ke God pa Jisus Kraist. Ma suhmuhslah yohk se sihmlac sin Prestuhnsi Se Met ke 1909 sulweyucklac El elan pa “wen se isuslac emet nuhtin God—wen se isuslac emet ke nguhn, ac isuslac emet ke ikoac.”7 Wen, wolacna liki nuh kwewa, pa sulweyucklac sin Pahpah in tahfwelah plwacn luhn Pahpah—in ahkorekmaye kuh luhn Pahpah in oraclah facluh wacngihn tilokihnyac (liye Moses 1:33) ac in molwelah tuhlihk nuhtin God liki misac pa nuh ke Sifilpac Moulyak Lal ac liki ma koluk pa nuh ke Iwaclah Lal. Kihsac na fuhlwact ac muhtahl se inge fal in pahngonyuck muh pa “ohiyac yohk srihpac se ke ohiyac mahtuh nuh kwewa.”8
Ke kain in toeni yohk srihpac ac muhtahl ke God Pahpah el sifacna ahkkahlwemye Wen nahtuhl, El fahk, “Pa inge wen kuloh nuhtihk: Porongwacl” (Mark 9:7; Luke 9:35; liye pac 3 Nephi 11:7; Joseph Smith—History 1:17). Ohinge, El pa Jisus Kraist, Jehovah, Leum God luhn Israel, suc sramsram nuh sin ac ke mwet pahluh.9 Na ke Jisus El tuh sikyang nuh sin mwet Nephi tukun Sifil Moulyak Lal, El ahkuhtweyac Kacl sifacna lah el pa “God luhn facluh nohfohn” (3 Nephi 11:14). Na pa inge Jisus el kwacna sramsram nuh sin mwet pahluh ke Puk luhn Mormon ac nuh sin Mwet Luhlahlfongi ke Lwen sahflah ekihn “Pahpah ac Wen,” sifac an ahkuhtweyac ke mwe luti sihmlac luhn Prestuhnsi ac U luhn Mwet Singucul Luo ke yac 100 somlah ah.10
Nguhn Muhtahl
Mempucr se ahktolu ke Sifac ke God uh pa Nguhn Muhtahl, oacyacpac pa Nguhna Muhtahl, Nguhn luhn Leum God, ac Mwet in Ahkwoye. El pa mempucr se ke Sifac ke God suc ekihn mwet in tuhtahf se nuh ke fwackyuck luhn kais sie. Ekihn sie Nguhnihn mwet (liye D&C 130:22), El kuh in muhta yohrohsr ac oruh orekma yohk srihpac in tahfwelah kahs inmahsrlon Pahpah ac Wen ac tuhlihk nuhtin God fin facluh. Puhs ma suhmuhslah luti lah misin Lal pa in fahkwelihk kacl Pahpah ac Wen (liye John 15:26; 3 Nephi 28:11; D&C 42:17). Mwet Lahngo El olwelah lah Mwet in Ahkwoye se fah luti ma nuh kwewa, usacni ma nuh kwewa nuh ke mwe esam lasr, ac kol kuht nuh ke ma pwacye nuh kwewa (liye John 14:26; 16:13). Ohinge, Nguhn Muhtahl kahsrwe kuht in srwelah ma pwacye ac ma kikiacp, kol kuht ke sulwaclah yohk lasr, ac kahsrwe kuht ke ma upac ke moul sukawihl se inge.11 El oacyacpac pa srihpac se oruh kuht nwacsnwacslah, pa sis, iyucklac ac nwacsnwacslah liki ma koluk (liye 2 Nephi 31:17; 3 Nephi 27:20; Moroni 6:4).
IV.
Na, kahlwem ke ma fuhlwact se inge fahkwack ke ma suhmuhslah ke Sifac ke God ac plwacn in molwelah kahsrwe kuht fuhkah ke ma ahktihkuclkuclye kuht mihsenge uh?
Ke srihpen kuht eis ma pwacye ke Sifac ke God ac ke kuhpahsr lasr nuh Selos, srihpac luhn moul, ac finsrak ma pahtpaht lasr facluh, oasr macp in kolyuck na wowo se nahtuhsr ac mwe ahkkweye kuht ke fuhfahsryucsr ke moul in sukawihl lasr uh. Kuht etuh lah suc kuht ac alu nuh se ac efuh kuht alu nuh sel. Kuht etuh lah suc kuht uh ac mac kuht ac fah muh ekihn sie pacl (liye D&C 93:19). Kuht etuh lah suc oruh fihsrwacsr ma nuh kwewa, ac kuht etuh lah mac kuht enenuh in oruh in engankihn mwe insewowo yohk tuhkuh ke plwacn in molwelah luhn God. Kuht etuh fuhkah ma inge? Kuht etuh ke fwackyuck luhn God sin mwet pahluh Lal ac nuh sin kais sie sesr mwet uh.
Sruokyacn ma Mwet Sap Paul el ahkuhtweyac ke “fulatan woiyen moul su oan in Christ” (Ephesus 4:13) enenweyuck yohk liki in eis etwacack. Tiacna fal nuh sesr in kwacfeyuck nuh ke wosasuc uh; kuht enenuh in mukwikwi ac nuhnak kac kuht in muh eklac kac. Sahyacn lutlut luhlahp luhn facluh, suc luti kuht in etuh ma se, plwacn in molwelah ac wosasuc luhn Jisus Kraist srihke kuht in eklac nuh ke sie ma pwacye.
Oacna ke Prestuhn Thomas S. Monson el luti kuht ke toeni luhlahp sahflah se lasr ah:
“Yohk srihpac nuh ke plwacn [in molwelah] sac pa Mwet Lahngo lasr, Jisus Kraist. Fuhnuh ke tiac Iwaclah Lal, ma nuh kwewa fah tuhlac. Tiacna fal, tuhsruhk, falkihn in luhlahlfongi Kacl ac misin Lal. Kuht enenuh in orekma, ac eis etwacack, suk ac pruhe, auliyak ac kapkapwack. Kuht enenuh in etuh masap luhn God ac moulkihn. Kuht enenuh in eis akwuck sacohklacna Lal. Kuht fin oruh oacna kuht ac eis ma pwacye, moul ma pahtpaht. …
“Ke loaliyacn nguhnihkac ke mongfihsrwacsr nuh kwewa,” Prestuhn Monson el fahkwack, “Nga fahkwack ke mwe sang yohk se suc pa plwacn lal Pahpah nuh sesr. Pa inge inkacnek suwohs nuh ke mihs ac engan nuh sesr ingena ac ke moul se tohkohyang uh.”12
Nga sang pacna luhlahlfongi kuh luhk ke mwet pahluh-prestuhn sacohk lasr. Nga fahkwack lah oasr Pahpah tuhmasr Inkuhsrao se, suc luhngse kuht. Nga fahkwack lah oasr Nguhn Muhtahl se lasr, suc kol kuht. Ac nga fahkwack ke Jisus Kraist, Mwet Lahngo lasr, suc oruh ma nuh kwewa kuh, ke inen Jisus Kraist, amen.