2010–2019
Kahs luhn Wosasuc
Eprel 2017
12:27

Kahs luhn Wosasuc

Sel Elder Valeri V. Cordón

Ke U luhn Mwet Itngucul

Luti fokoko uh yohk srihpac na pwacye in liyacacng wosasuc in sucu lasr uh, ac e enenuh oaru ac kuhiyac.

Tukun nga pahngonyuck in ekihn Mwet Kohl Fuhlwact luhn Alu uh, nga ac sucu luhk som liki acn Costa Rica nuh ke acn Salt Lake City ke kunohkohn se met luhk ah. Fin acn Macrike, nga ahkinsewowoyeyuck in muhtwacta yurin mwet ma tuhkuh ke kain in acn ac facsin puhkantwen. Sin mwet inge pa puhkantwen suc, oacna nga, isuslac fin muhtuhn facl ma oasr acn Latin America.

Nga akihlen puhkantwen mwet inge ma isuslac fin acn Latin America sramsram ke kahs Spanish in pa kahs lalos ac kahs English fal in sramsram na nuh sin mwet sahyac. Elos suc wi fihl se tohk, suc isuslac fin acn Macrike kuh tuhkuh ke matwac fuhsr ac wi lutlut inge, sramsram ke kahs English arlac wo ac sahp kahs Spanish lalos tiacna arlac wo. Ac kwacna ke fihl ahktolu, kahs Spanish, kahs luhn mwet mahtuh lalos, tuhlac.1

Mwet ma lutlutkihn kain in kahs pahngon ma se inge “wacngihnlac luhn sie kahs.” Wacngihnlac luhn sie kahs kuh in sikyak ke sucu se som nuh ke acn sahyac ma kahs lalos suhkwac orekmakihnyuck we. Tiac sikyak nuh sin mwet Latin America muhkwena, tuh sikyak oacpacna nuh sin kain in mwet fin facluh ke kahs lalos aholyucklac ke kahs sasuc se.2 Finne Nephi, mwet pahluh se luhn Puk luhn Mormon, tuh fosrngahlah in tuhlac kahs luhn mwet mahtuh lal ke el ahkolah in som nuh ke acn wihlwihl. Nephi el suhmuhslah, “Ac liye, ma na ke lahlmwetmwet luhn God tuh kuht in eis ma sihmlac inge, tuh kuht in kuh in sefiyac nuh sin tuhlihk nahtuhsr kahs luhn pahpah tuhmwacsr.”3

Tuh Nephi el oacyacpac fosrngah in wacngihnlac siena kain in kahs se. Ke fuhs se tohk, el kalweni fahk, “Ac oacyacpac tuh kuht in sefiyac nuh selos kahs ma sramsramkihnyuck ke oalin mwet pahluh muhtahl nuhkwewa, ma ituckyang nuh selos ke Nguhn ac kuh luhn God, e ke na muhtwacwacackiyacn facluh, finne nuh ke pacl se inge.”4

Nga akihlen kuhpahsr se inmahsrlon sefiyac kahs luhn mwet mahtuh lasr ac in sefiyac wosasuc luhn Jisus Kraist ke moul lasr uh.

Mihsenge, ke mwe kuhpahsr luhk, nga ke ahkuhtweyac in wo lah tiac kahs luhn facluh tuhsruhk kahs luhn inkuhsrao pa ma se ma enenuh in sefiyucki ke sucu lasr and tiac tuhlac. Nga sramsram ke kahs5 luhn wosasuc luhn Jisus Kraist. Ke “kahs luhn wosasuc,” kalmac sihk pa mwe luti nuhkwewa luhn mwet pahluh lasr, ahkostwen lasr nuh ke mwe luti ingacn, ac ukwe lasr nuh ke facsin suwohs.

Nga ac ahkuhtweyac ohiyac tolu ma ac sefiyac kahs se inge.

Ma se Met: Oaru liki Met ah ac Karihngihn ke Lohm ah

Ke Doctrine ac Covenants, Leum el suli mwet kol puhkantwen ke Alu uh, weluhlwacng Newel K. Whitney, in ahkwoyelah sucu lalos. Leum el kai mwet kuhlwacnsap Lal Newel K. Whitney muh el enenuh in ahkwoyelah ma luhn sucu lal, ac liye lah sucu lal ac oaru likina met ah ac karihngihn e lohm ah, ac pruhe pacl nuhkwewa, fin tiac elos ac fah itucklac liki acn selos.6

Sie ma ma oruh in wacngihnlac sie kahs uh sikyak ke pahpah kuh ninac tiacna sang pacl fal in luti tuhlihk nahtuhlos ke kahs luhn mwet lalos. Tiacna fal in sramsram muhkwena ke lohm ah. Fin pahpah kuh ninac ke in sefiyac kahs lalos, enenuh inlutiyuck. Mwet suhmaht ke lutlut tuh konwacack lah pahpah kuh ninac suc sang kuhiyaclos in sefiyac kahs luhn mwet mahtuh lalos oraclah in sikyak.7 Na mwet se ac sang kuhiyacl fuhkah in sefiyac kahs luhn wosasuc uh?

Elder David A. Bednar luhn U luhn Mwet Sap Singucul Luo el kai lah “muhnahslah se luhn lutiyacn ac srihkasrak wowo luhn wosasuc ke lohm ah” pa ma kuh se ma kuh in oruh sucu ma mempucr ke alu ke fihl pucspucs uh in tilac wi alu uh.8

Pwacnwacng, kuht kuh in etuh muh luti ke ohiyac wo yohk srihpac na pwacye in sefiyac wosasuc ke sucu lasr uh, ac oaru ac mukwikwi yohk enenweyuck.

Kuht tuh suliyuck pacl puhkantwen in moulkihn ohiyac se in lutlut ke ma suhmuhslah lwen nuhkwewa ke sucu lasr ac in sifacna.9 Sucu puhkantwen ma oruh ma inge ahkinsewowoyeyuck lwen nuhkwewa ke puhla luhn tuhkweni ac kuhpahsr fototo nuh sin Leum.

Pahpah ac tuhlihk muhtwacn nahtuhl lutlut ke ma suhmuhslah

Lutlut ke ma suhmuhslah lwen nuhkwewa ac fah sikyak ngac? Ac fah sikyak ke pahpah ninac sruhkwack ma suhmuhslah uh ac, ke luhngse, suli sucu sac in fahsreni in tuhkweni lutlut. Arlac upac in akihlen lutlut se inge sikyak ke kuhtwena ohiyac sahyac.

Sucu lutlut ke ma suhmuhslah

Pahpah ac ninac an, tiacna oruh ma in wacngihnlac mwe insewowo na yohk inge. Met sano nuh ke pahtlaclac!

Ahkluo: Srihkasrak Wo ac Fokoko ke Lohm ah

Sie mwet lahlmwetmwet suc lutlut ke kain in kahs sihmlac muh in sefiyac kahs luhn mwet mahtuh se, “kom enenuh in oruh in ma pwacr ac ma moul se nuh sin tuhlihk nuhtum.”10 Kuht in “ahkmoulye kahs uh” ke mwe luti lasr ac srihkasrak wo lasr tuhkweni orekma.

Ke nga fuhsr ah, nga orekma ke factory luhn pahpah tuhmuhk ke pacl ma wacngihn lutlut uh. Ma se met ma pahpah tuhmuhk siyuck tukun nga eis mani luhk pa: “Na meac kom ac oruh ke mani lom ingacn?”

Nga etuh top nuh kac ac tohpohkohl: “Sang nuh ke sie tahfuh singucul luhk ac sefiyac nuh ke misin luhk.”

Tukun nga weluhl orekma ke yac alkosr ac kwacna topuk kihsen siyuck sac pacna, pahpah tuhmwacl ah pahngon muh el lutiyuc ke sie tahfuh singucul luhk. El tiacna etuh lah ma nga etwaclah uh mwe luti na yohk srihpac se ke wik se na. Lwelah nga in fahk nuh sum ohiyac ma nga lotwelah ip yohk ingacn.

Tukun ma sikyak ke srihpen mweun sifacna fin acn Central America, factory luhn pahpah tuhmuhk kauli. Tuh oasr mwet orekma 200 lal na som nuh ke suhpuhs liki mwet tuhta limekohsr suc orekma fin enenweyuck ke lohm sesr. Sie lwen ah ke pacl upac ingacn, nga lohng pahpah ac ninac kiyuck pwacpa lah elos ac sang mani nuh ke sie tahfuh singucul kuh moli mongo nwacn tuhlihk nahtuhlos.

Ke Sacnri nga tuh ukwe pahpah tuhmuhk in liye lah meac elac oruh. Tukun toeni in Alu lasr, nga liyacl ahkolah sie tahfuh singucul lal. Na pa ingacn lutlut luhk. Kihsen siyuck muhkwena luhk lah meac kuht ac kang.

Sa na ke lotu in Mante oasr mwet tongtong ke sruhngucl lasr ah. Ke nga ikacslah ah, elos siyuck pahpah tuhmuhk ah. Nga tuh pahnglol, ac ke el tuhkuh, mwet muhtwacta inge fahk muh eltahl enenuh ma puhkantwen in tuhtauh ke pacl na sa. Eltahl fahk nuh sel muh arlac enenweyuck ma inge in tuhtauh sa oruh elos kuh in sang mani kac ingena. Ke lwen sacn nga etwaclah ke mwe luti luhn moliyacn sie tahfuh singucul ac mwe insewowo ma tuhkuh kac.

Ke Wuhlweacng Sasuc, Leum el sramsramkihn srihkasrak wo, El fahk: “Nga fahk na pwaye nu suwos: Wen el tia ku in oru kutena ma ke ku lal sifacna. El oru na ma el liye Papa tumal El oru. Ma Papa El oru, Wen el oru pac.”11

Som nuh tempuhl

Tiacna fal in pa na sramsram nuh sin tuhlihk nahtuhsr ke yohk srihpaciyacn pahyuck lun tempuhl, lalo, ac liyacacng lwen Sahpuht. Elos enenuh in liye kuht in ahkmwesahsye moul lasr in som nuh tempuhl ke oasr kuhiyacsr in som. Elos enenuh in liye oaru lasr in lalo ke pacl fal12 ac karihngihn lwen in Sahpuht ke lwen fohn se. Fin mwet fuhsr lasr tiac kuh in lalo ke pacl in mongo luo, tiac kuh in lutlut ke ma suhmuhslah lwen nuh kwewa, ac tiac kuh in offiyac TV ac ke pacl liye sritacl luhlahp ke Sacnri, kuh ac oasr yohrohlos kuh in nguhn sifacna in kuhtanglah mwe sruhf fokoko luhn moul upac lasr mihsenge uh, oacna mwe sruhf in liye petsac koluk?

Ahktolu: Facsin luhn Sucu

Siepac ohiyac ma kahs se kuh in eklac kuh wacngihnlac uh sikyak pacl se kahs ac facsin sahyac uh muhtwacwacack in wi kahs se ma oasr met uh.13

Ke yac emet luhn Alu fohlohkihnyuckyak se, Leum el suli mwet kol puhs ke Alu uh in ahkwoyelah sucu lalos. El ikacslah solsol Lal in ahkuhtweyac ma luo kuht kuh in oruh in wacngihnlac kahlwem ac ma pwacye ke lohm sesr. El fahk muh mwet koluk sac tuhkuh in eislah kahlwem ac ma pwacye, nuh ke seahkostwen, liki tuhlihk nuhtin mwet, ac ke srihpen facsin luhn pahpah tuhmwacsr.14

Oacna sucu, kuht enenuh in sensenkihn kain in facsin nuh kwewa ma ac kosrwekuhtlac in karihngihn lwen Sahpuht kuh riti ma suhmuhslah ac pruhe lwen nuh kwewa lohm ah. Kuht enenuh kaliyac sruhngucl ke lohm sesr liki petsac koluk ac mwe sruhf suhlallacl sahyac. In lain facsin luhn facluh uh ke lwen lasr, kuh enenuh in orekmakihn ma suhmuhslah ac puhsren mwet pahluh moul in luti tuhlihk nahtuhsr ke ohiyac muhtahl lalos, srihpen moul lalos, ac misin muhtahl luhn Jisus Kraist.

Kaliyac

Ke ma suhmuhslah uh, kuht konwacack srihkasrak puhkantwen ke “wacngihnlac luhn sie Kahs.”15 Ke srihkasrak:

“Na tukun ma inge puhs na sin fihl kapwack se inge tiac kahlwem ke kahs lal tohkohsrah Benjamin, elos srwackna tuhlihk srihsrihk ke pacl se el sramsram nuh sin mwet lal; ac elos tiac luhlahlfongi ke ma mahtuh luhn pahpah tuhmwaclos. …

“Ac inge ke srihpen suhlahlahlfongi lalos elos tiac kahlwem ke kahs luhn God; ac insiaclos kwekwe.”16

Nuh ke fihl kapwack ingacn, wosasuc oacna kahs ma elos koflah kahlwem kac. Ac ke woiyacn sefiyac kahs luhn mwet mahtuh sahp kuhtuh pacl uh siyuckyuck, in kapsreyuck nuh ke plwacn in molwelah, wacngihn kihsen siyuck ke ma pahtpaht ma sikyak ke wacngihnlac kahs luhn wosasuc ke lohm sesr uh.

Ninac el pruhe wi tuhlihk mukul fuhsr natuhl

Oacna tuhlihk nuhtin God, kuht mwet sesuwohs suc srihke in etwaclah kahs suwohs se.17 Oacna ninac luhngse tuhlihk srihsrihk nahtuhl, Pahpah tuhmasr Inkuhsrao el arlac mongfihsrwacsr nuh ke muhnahs ac tahfonglac lasr. El sacohkkihn ac kahlwem ke srihke suhfal lasr in pruhe, ma sramsramkihnyuck ke inse pwacye, oacna kahs na kahto; El engankihn puhsrwen kahs luhn wosasuc se met lasr; El luti kuht ke luhngse pwacye.

Sucu tuhkweni pruhe

Wacngihn ma kuht in oruh ke moul se inge, finne luhman yohk srihpac, ac fah wacngihn ma yohk srihpac na pwacye fin wacngihnlac kahs luhn wosasuc in sucu lasr.18 Pa pruhe luhk lah Pahpah Inkuhsrao Elac fah ahkinsewowoye srihke lasr ke kuht kwacfeacng in etwaclah kahs Lal, nwe ke na kuht etuh na pwacye in sramsram ke kahs fuhlwact se inge, ma nuh kahs pwacye na lasr e ke muhtwacwacackiyac ah. Ke inen Jisus Kraist, amen.

Mwe Kahsruh

  1. Sin mwet Latin America, ke fihl ahktolu “mwet ma etuh na kahs English pa … 72 percent” (Richard Alba, “Bilingualism Persists, but English Still Dominates,” Migration Policy Institute, Fepweri 1, 2005, migrationpolicy.org/article/bilingualism-persists-english-still-dominates).

  2. “In sramsram kahs English muhkwena pa ohiyac yohk emet ke fihl ahktolu.” (Alba, “Bilingualism Persists, but English Still Dominates”).

  3. 1 Nephi 3:19; ahkuhtweyac wo ituckyang.

  4. 1 Nephi 3:20; ahkuhtweyac wo ituckyang.

  5. Kahs se kalmeyac “ohiyacn sramsram nuh sie sin sie sin sie muhtuhn facl kuh mwet” (Oxford Living Dictionaries, “language,” oxforddictionaries.com

  6. Liye Doctrine and Covenants 93:50; ahkuhtweyac wo ituckyang.

  7. “[In karihngihn kahs pwacye ke acn se] kuh in sikyak, tuh enenweyuck oaru ac plwacn se” (Eowyn Crisfield, “Heritage Languages: Fighting a Losing Battle?” onraisingbilingualchildren.com/2013/03/25/heritage-languages-fighting-a-losing-battle). “Ke srihkasrak, mwet ma sramsram kahs German ma muhta infulwen acn Macrike srwackna sramsram kahs lalos ke fihl nuh fihl.” (Alba, “Bilingualism Persists, but English Still Dominates”).

  8. David A. Bednar, “Multigenerational Families,” ke General Conference Leadership Meetings, Eprel 2015, broadcasts.lds.org.

  9. Sie srihkasrak ke lwen lasr pa mwe lut sin Prestuhnsi se Met: “Kuht kai pahpah ninac ac tuhlihk in oaru nuh ke pruhe in sucu, ekuh in toeni luhn sucu, lutlutkihn wosasuc ac kaiyuck, ac ahkpwacr tuhkweni luhn sucu” (First Presidency letter, Fepweri 11, 1999).

  10. “Kowos enenuh in ahkpwacyelah kahs nuh ke tuhlihk nahtuhlos, elos in muh kuh in kahlwem ac sramsram ac puhla oacna elos wi un mwet ma aholyucklac ke kahs sacn” (Crisfield, “Heritage Languages: Fighting a Losing Battle?” ahkuhtweyac wo ituckyang.

  11. John 5:19.

  12. “Lwen in lalo suwohs se weacng in tiac mongo ac nihm kof nuh ke pacl in mongo luo ke lwen fohn se, in wi toeni in kuhfa lwen Leum, ac in sang mwe sang ke lalo in kahsruh mwet ma enenuh” (Handbook 2: Administering the Church [2010], 21.1.17).

  13. Liye Omni 1:17.

  14. Liye Doctrine and Covenants 93:39; ahkuhtweyac wo ituckyang.

  15. Kahsrweyuck nuh ke sramsram se inge, “wacngihnlac luhn sie kahs” kalmac ohiyacn wosasuc kuh in wacngihnlac (liye Mwet Nununku 2:10;Omni 1:17;3 Nephi 1:30).

  16. Mosiah 26:1, 3; ahkuhtweyac wo ituckyang.

  17. Liye Matthew 5:48; 3 Nephi 12:48.

  18. Liye Matthew 16:24–26.