On ma Onkihnyuck ac Tiac Onkihnyuck
Nga ngihsre kais sie sesr in muhta ma pahtpaht ke luhlahlfongi ke un mwet on.
“Oasr kahlwem luhn faht in nguhnihk mihsenge,” Eliza Hewitt el suhmuhslah, “wolacna ac kahlwem liki acn lucng nuhkwewa sahyac, ke srihpacn Jisus El kahlwem luhk.”1 Ke engan ke note nuhkwewa, on in alu mahtuh Kristian se ingacn upac in onkihnyuck tiac isrwacsr. Tuh mihsenge nga kena sramsram ke kuhtuh kahs kac ma ac fah sahp kahsruh ke lwen kuht konwacack muh upac in onkihn kuh isrwacsr ac “pacl engan mihs” tiacna “sikyak.” Fin fahsr ne oasr pacl kowos tiac kuh in onkihn on engan oacna ke kowos lohng sin mwet sahyac, nga siyuck suwos in sruokyac ke kuhiyowos nohfohn kahs ke on se inge ma ahkkweye, “Jisus El kuh in lohng on ma [kowos] tiac kuh in onkihn.”2
Kuhtuh ma pwacye ma kuht sun ke kuht tuhlihk nuhtin God ke kuht muhta fin facl koluk se inge pa kuhtuh lwen uh arulacna upac, lwen ma luhlahlfongi ac puhlaik lasr srihkeyuck. Ma upac inge ac fah tuhkuh ke srihpacn mwe muhnahs lasr, mwe muhnahs luhn mwet sahyac, kuh mwe muhnahs luhn moul, tuhsruhk finne fuhkah srihpac, kuht konwacack lah ac kuh in tulokihnkuhti liki on kuht kena onkihn ac ahklohsryelah olwelah luhn “pacl engan in nguhna”3 ke Eliza Hewitt el ahkfuhlwactye ke kahs in on lal ah.
Na meac se kuht enenuh ke kain pacl ingacn? Sie ma uh, kuht eis kahs in kahsruh lal Mwet Sap Paul ac “finsrak nu ke ma su kut tia liye, kut ac mongfisrasr in tupan.”4 Ke pacl ingacn ke on in engan puhtatlac ten liki kuh lasr in ahkkahlwemye, kuht ac enenuh in sahp tu na mihslac ac lohng sin mwet sahyac, eis kuh sin ma wolacna ke on uh raunikuhtlac. Puhs sesr suc “muhnahs ke on uh” ahkkweyeyuck ke puhlaik ac ke on ke kuht tu fototo nuh sin mwet se suc oasr puhsra fokoko suwohs se lal. Pwacyena ke kuht onkihn on luhn ma muhtahl, kuht enenuh in tu fototo na pwacye nuh sin Mwet Lahngo ac Mwet Molwelah luhn facluh—suc puhsrwacl suwohswohs. Na kuht eis puhlaik sin Kuhiyacl in lohng mihs lasr ac kuht eis finsrak sin on Lal in mwet iwe lasr. Pwacyena ke “Leum El fototo nuh sesr” lah “mwet luhn mihslac onkihn insiyuck [ac] ros in luhng kuhlwacng uh sikyak.”5
Ke lwen ma kuht puhla muh kuht muhnahs ke on, suhpah kuhtuh liki ma kuht nuhnkuh kuht liye kuh lohng sin mwet sahyac, ngac siyuck sesr, yohk nuh sin mwet fuhsr ke Alu uh, in esam lah lahlmwetmwet lucng me oruh tuh puhsra nuhkwewa ke un mwet on luhn God tiacna oacna sie. Enenuh in oasr kain in puhsra—sipracno ac alto, pes ac tana—in oruh in fal on uh. In eis kahs pwacr ke lwacta sin muhtwacn wolacna luo ke Mwet Luhlahlfongi ke Lwen-sahflah, “Ma orahkrahk nuhkwewa nuhtin God oasr srihpac lalos in un mwet on nuhtin God.”6 Ke kuht nuhnkuh muh siena lasr oacna mwe muhnahs se kuh ke kuht srihke in eklac oacna mwet suhtuhuh—ma tuhkuh sin atacn inse fuhlwact luhn facsin uh ac ahkkolukyeyuck ka kain in social media nuhkwewa—tulac fohnlah luhn puhsrwen on wolacna ma God El oraclah in sikyak uh ke El oraclah facluh ac mwet puhkantwen kac.
Ke ma inge, tiacna kalmac lah mwet nuhkwewa ke un mwet on wolacna inge kuht in sifacna sasa! Puhsrwen on sin mwet puhkantwen tiacna on wohwohn okahrkahr, ac un mwet on enenuh kaiyuck—ke srihpac lasr mihsenge, Elder Hales, ngwac orekmakihn kahs luhn mwet tuhma lutlut—tuh ke pacl se kuht eis kahs in on muhtahl ac oreyuck met liki facluh uh, na Pahpah tuhmasr Inkuhsrao El engan ke kuht on ke puhsra lasr sifacna, ac tiac ke puhsrwen mwet sahyac. Luhlahlfongi in kowos sifacna, ac luhlahlfongi in El. Nimet ahkmuhnahsye srihpac lowos kuh kahsruh lowos. Yohk liki nuhkwewa, nimet fahsr liki srihpac lowos ke on an. Efuh? Ke srihpacn puhsra lowos siena liki nuhkwewa; kom tiac kuh in ahollah. Fin tuhlac puhsren mwet sefanna ac ahkmuhnahsye mwet on nuhkwewa sahyac ke un mwet on facluh se inge, wi elos suc puhla muh elos tu muhkwena kuh tiac puhla fal inmahsrlon mwet uh kuh Alu uh.
Tuh oacna ke nga ahkkweye kowos nuhkwewa in luhlahlfongi ke on ma ac sahp upac in onkihn uh, nga sa in akihlen lah ke srihpac siena nga muhnahs kuhtuh ke kain in on sahyac ma enenuh—tuh soenna—onkihnyuck.
Ke nga liye puhsiyacn ma sesuwohs lain mwet fin facluh uh, nga puhlakihn mwacta in weluhl Mrs. Hewitt onkihn ke “mwe insewowo ma [God] El use nuh sihk ingena [ac] ma engan ‘ahkoeyucklac’ lucng.”7 Kahs in on ingacn tiac kuh in onkihnyuck ke luhlahlfongi ne ke na kuht karuhnguhnwacng suwohs mwet suhkahsruhp. Suhkahsruhp uh selngawi se ma kalweniyuck, yac nuh ke yac ac fihl nuh ke fihl. Ahkmuhnahsye mahno uh, ahkngalye nguhna, ahkkolukye sucu, ac kuhnahoslah mwe finsrak. Kuht fin kuh in oruh kuhtuh pac ma in ahkfihsrwacsrye suhkahsruhp uh, oacna Jisus El kalweni sap kuht in oruh, sahp kuhtuh sin mwet suhkahsruhp uh fin facluh elos ac kuh in onkihn kuhtuh sin kahs ke “Oasr Kahlwem luhn Faht in Nguhnihk Mihsenge,” sahp ke pacl se emet in moul lalos.
Nga oacyacpac konwacack lah upac in onkihn ke kahs engan ac srui ke puhs mwet raunikuhtlac suc kweok ke mas luhn nuhnak kuh kain in mas sahyac. Koluk ohiyac, kuhtuh sin ma upac inge kalweni finne oasr orekma oaru sin mwet karihngihn, weacng mwet ke sucu. Nga pruhe tuh kuht ac fah tiac lwelah tuhlihk nuhtin God inge in sifacna kweok ac tuh kuht ac ahkmuhtahlyeyuck kuht ke kuh Lal in lohng on ma elos tiac kuh in onkihn ingena.
Ac sie lwen nga finsrak ac fah oasr un mwet on wolacna fin facluh nohfohn ma sefanna finne fuhkah mwet wi, ahkkahlwemye lah lihkacsihk, kahs in ahkkoluk, ac kahs muhlat tiacna inkacnek in ahkwoye fohs luhn mwet uh. Kahs fahkwack inkuhsrao me lah ohiyac se muhkwena lah ma fohs luhn mwet uh kuh in wolac fal ke luhngse God ac liyacacng masap Lal, oruh in ikacslah sruhngucl nuh sin ohiyac sahflah se in luhngse sie sin sie oacna mwet tuhlan. Mwet pahluh Ether el luti lah kuht enenuh “finsrak nuh ke sie facl wo liki inge.” Ke el riti kahs ingacn yac sie tausin tohkoh, Moroni suc ullac ke mweun puhkantwen el fahk lah “sie inkacnek wolacna” nuh ke facl se ingacn pa wosasuc luhn Jisus Kraist.8
Kuht tarilacna lah inmahsrlon kain in ma upac inge oasr, kuhtuh pacl uh, siepacna kain in on nuhkwewa sahyac ma kuht konwacack lah kuht tiac kuh in onkihn, tuh ke srihpac sahyac. Ma inge ikyak ke puhla inge arulacna loal ac sacohk, finne muhtahl, lah tiac kuh in kuh tiac enenuh in ahkkahlwemyeyuck—oacna luhngse lal Cordelia ke pahpah tuhmwacl, ke el fahk: “Nga tiac kuh in ahkkahlwemye … luhngse luhk. … Nga tiac kuh in ahkkahlwemye puhla luhk ke kahs.”9 Tuhkuh nuh sesr oacna sie ma muhtahl, puhla inge tiacna kuh in ahkuhtweyucki—wolacnalac ke nguhn—oacna ke pruhe Lal Jisus ma el oraclah ke tuhlihk nuhtin mwet Nephi. Elos suc lohoh ke pacl ingacn suhmuhslah:
“Sie muhta soenna liye, kuh insrac soenna lohng, met, ma na yohk srihpac ac wolacna oacna ke kuht tuh liye ac lohng ke Jisus El sramsram nuh sin Pahpah;
“… Wacngihn lohoh kuh in sramsram, tiac pac kuh in sihmihsyucklac sin kuhtwena mwet, insiacn mwet uh tiac pac kuh in nuhnkuh ma na yohk srihpac ac wolacna oacna ke kuht kwewa tuh liye ac lohng ke Jisus El sramsram.”10
Kain in pacl ahkmuhtahlyeyucklac inge tiac ahkuhtweyucki ke srihpacn, finne kuh, ac sahp oacna tiac ahkfuhlwactyeyuck.
Tamuhlwel ac tahmtahel, kuht moul fin facluh muh oasr on puhs ma tiac kuh in kuh soenna kuh in onkihnyuck sesr. Tuh nga ngihsre kais sie sesr in muhta ma pahtpaht ke luhlahlfongi ke un mwet on, ma kuht kuh in engankihn ma pahtpaht on ma sacohk liki nuhkwewa—“on luhn luhngse moliyucklac.”11 Wo lah, mwet nuhkwewa kuh in eis Iwaclah inge. Oasr acn nuh selos suc sramsram ke kahs sienalac, ahkfuhlwactye facsin luhn mwet puhs, ac muhta fin acn puhkantwen. Oasr acn nuh sin mwet lolacp, nuh sin mwet pahyuck, nuh sin sucu luhlahp, ac nuh sin sucu wacngihn tuhlihk. Oasr acn nuh selos suc luhngse oacna sie kain in mwet. In kahs fototo, oasr acn nuh selos nuhkwewa suc luhngse God ac ahkos masap Lal oacna in osra suwohs soko ke ohiyacn mwet uh, tuh fin luhngse in God pa on tuhkweni lasr, pwacyena fuhfahsryucsr lasr in ahkostwen nuh Sel pa ma wolacna kac. Ke masap muhtahl luhn luhngse ac luhlahlfongi, auliyak ac mongfihsrwacsr, ma pwacye ac nuhnak muhnahs, oasr acn in un mwet on se inge nuh selos nuhkwewa suc kena wi.12 “Tuhkuh oacna kom oasr ke,” Pahpah luhngse El fahk nuh sin kais sie sesr, tuh El fahk pac, “Nimet plwacn in muhta na ke atac sacn.” Kuht isracsr ac esam lah God El oaru in ikihlkuhtlac yohk liki kuht kuh in nuhnkuh.
Ke on wolacna se inge lah pa plwacn Lal nuh ke molwelah lasr, lwelah kuht in insepuhsisacl ukwe kolyuck Lal ac kampare ke on ma tiac kuh in onkihnyuck sesr, ne ke kuht kuh in sang “on an nuh sin Tohkohsrah [lasr].”13 Na sie lwen, oacna on luhngseyuck soko lasr fahk:
Kuht ac onkihn ac kuht ac lihksrweni fahkwack wi mwet mweun inkuhsrao,
Hosanna, hosanna nuh sin God ac sin Lamb! …
… Oacna Jisus el oactui ke chariot e Lal!14
Nga fahkwack ai se ngacn fah tuhkuh, lah God Pahpah tuhmasr Inkuhsrao El fah sifil suhpwacma nuh facluh Wen Kuloh Sefanna Nahtuhl, pacl se inge in leum ac kol oacna Tohkohsrah luhn tohkohsrah uh ma pahtpaht. Nga fahkwack lah pa inge Alu fohlohkyak Lal ac inkacnek in use mwe luti ac akwuck molwelah luhn wosasuc Lal nuh sin mwet nuhkwewa. Ke pweng Lal “tuh som nuh ke muhtuhn facl nuhkwewa [ac] nuh ke acn nuhkwewa,”15 Jisus fah ke pwacye “[ahkkahlwemye] muhta in isrwacsr lal.”16 Ac fah oasr kahlwem luhn faht ma pahtpaht na pucspucs ke nguhna ke lwen se ingacn. Tuh ao uliyuckme se inge in tuhkuh, nga pruhe ke luhngse ke inen Jisus Kraist, amen.