No Sunsum Ɔnye Wo Aatsena.
Medze m’akoma nyina bɔ mpaa dɛ hom betsie Sunsum no a, Wɔasoma no ayamuyie mu ara wɔ hom nkyɛn no, ne ndze.
Mo nuambanyin na nkyerɛbaa, ɔyɛ me enyisɔ dɛ menya kwan nye hom rekasa Ewuradze N’Ahomgyeda, wɔ wiadze mfɛndzanan ehyiadzi mu, wɔ Easter ber yi mu yi. Meda hɛn Ɔsor Egya ase wɔ No Dɔba a, Ɔnoara baa asaase yi do dɛ Ɔrebɛyɛ hɛn Pomfo no, ho akyɛdze no. Ɔyɛ me enyisɔ dɛ minyim dɛ Ɔbɔɔ werdam dze tuaa hɛn bɔn kaw na Ɔsoɛree wɔ Wusoɛr no mu. Ɔyɛ nhyira ma me daa dɛ minyim, osian No Werdambɔ no ntsi, dabi modua wusoɛr mu nye ebusua adɔfo atsena ase afebɔɔ.
Ɔnam kwan kor pɛr noara a hɛn mu biara botum dze ehu no do na minyim dɛm ndzɛmba yinom no. Sunsum Krɔnkrɔn no akasa akyerɛ m’adwen na m’akoma dɛ ɔyɛ nokwar—nnyɛ mpɛn kor mbom mpɛn pii. Mehia dɛm awerɛkyekye mber nyina. Hɛn nyina yehyia abɛbrɛsɛ a ber no mu no yehia Sunsum no n’awerɛkyekye. Menyaa ho atsenkã dakor bi a megyinaa m’egya nkyɛn wɔ asopitsi bi. Yɛhwɛɛ me maame a ɔregye ahom a onnsi papa—na nkyii fõo. Ber a yɛrohwe n’enyim no, nna ɔayerɛw n’ano a yaw no kɔ. Yɛtaa dzinn mber kakra no, m’egya na odzii kan kasae. Ɔkãa dɛ, “Akataasiaba bi kɔ fie.”
Ɔkãa no komm. Nna ɔyɛ dɛ ma oenya asomdwee. Nna ɔrobɔ biribi a onyim ho amandzɛɛ. Ɔhyɛɛ ase kommyɛ mu boaboa Maame ne ndzɛmba ano. Ɔkɔr asopitsi abrandaa no do kɛdaa aneesfo na datserfo a wɔhwɛɛ no do nda pii no mu no.
Nna m’egya wɔ Sunsum Krɔnkrɔn n’anyɛnkoyɛ dɛm ber no mu a ɔdze tsee, ɔdze hun, na ɔyɛɛ dza ɔsɛ dɛ ɔyɛ dɛm da no. Nna oenya anohoba no a dodowara enya no: “Ama woenya no Sunsum ma ɔnye hɔn atsena” (N&A 20:79).
M’enyidado ndɛ nye dɛ mebɛma hom benya pɛ na tum mbordo a hom dze botum agye Sunsum Krɔnkrɔn no. Hom nkaa dɛ Sunsum Krɔnkrɔn no yɛ Nyametsir a otsĩa ebaasa no. Egya na Ɔba no Wɔasoɛr. Sunsum Krɔnkrɔn no yɛ sunsum nyimpa-su. (Hwɛ N&A 130:22.) Ɔwoara na ibɛsan eyi sɛ ebɛgye No na ayɛ No etuu wɔ w’akoma na w’adwen mu a.
Ngyinado no a yebotum dze enya dɛm ɔsor nhyira no wɔkã ho nsɛm pefee dapɛn biara, mbom bɛyɛ dɛ ɔnntaa nnhɛn hɛn akoma nye adwen mu. Ama Ɔasoma Sunsum no aba hɛn nkyɛn no “otwar dɛ daa yɛkaa” Agyenkwa no na “yesie ne mbrasɛm” (N&A 20:77).
Dɛm aber yi wɔ afe no mu boa hɛn ma yɛkaa Agyenkwa N’afɔrbɔ na No nsoɛree fi nda no mu, dɛ nyimpa-su ɔasoɛr. Nkaa mfonyin a ɔfa dɛm mber no ho no hyehyɛ dodowara adwen mu. Mber bi menye me yer kegyinaa nda bi enyim wɔ Jerusalem. Dodowara gye dzi dɛ ɔyɛ nda no a Agyenkwa no a wɔbɔɔ no mbeamudua no soɛree puei dɛ Nyame tseasefo a Ɔasoɛr no.
Ɔkwankyerɛfo a obu adze no too ne nsa dze frɛɛ hɛn na ɔsee dɛ, “Hom mbra, hom nhwɛ nda a ɔatɔ pan.”
Yɛbɔɔ hɛn mu adze dze hɛɛn mu. Yehun ɔbo pon a ɔtwer ban no ho. Naaso mfonyin kor bi so baa m’adwen mu a, ɔyɛ nokwar dɛ mbrɛ yehun no dɛm da no. Nna ɔfa Mary a, Asomafo no egya no wɔ nda ne nkyɛn no ho. Ɔno na Sunsum no maa muhunii na metsee wɔ m’adwen mu mpo, pefee dɛ mbrɛ nna ma mowɔ hɔ:
“Na Mary dze ogyina nda no do rusũ: na orusũ no, ɔbɔɔ no mu adze hwɛɛ nda no mu.
“Na ohun abɔfo beenu wɔ ntar fufuw mu dɛ wɔtsetse hɔ: ɔbaako tse etsifi, na ɔbaako tse anaafo wɔ mbrɛ Jesus no daa hɔ.
“Na wɔsee no dɛ, Ɔbaa, ebɛnadze ntsi na irusũ? Ɔsee hɔn dɛ, Osiandɛ woeyi m’Ewuradze kɔ, na minnyim mbrɛ wɔdze no akɔto.
“Na ɔsee dɛm no, ɔdaan noho hwɛɛ n’ekyir, na ohun Jesus dɛ ogyina hɔ, na onnyim dɛ Jesus a.
“Jesus see no dɛ, Ɔbaa, ebɛnadze ntsi na irusũ? Erohwehwɛ woana? Na, ɔnodze osusu dɛ ɔno nye turehwɛfo no, ɔsee no dɛ, Mo wura, sɛ ɔwo na afa no efi ha a, kyerɛ me mbrɛ edze no akɔto, na menkɛfa no.
“Jesus see no dɛ, Mary. Na ɔno daan noho see no Hebrew kasa mu dɛ, Rabboni; ɔnye dɛ, Kyerɛkyerɛfo.”
Jesus see no dɛ, Mma nnkã me, na minnyae monnkɔr sor wɔ m’Egya nkyɛn: na kɔ mo nuanom no nkyɛn kɛse hɔn dɛ, Morobɔkɔ sor wɔ m’Egya nye hom Egya, me Nyankopɔn nye hom Nyankopɔn nkyɛn” (John 20:11–17).
Maabɔ mpaa dɛ wɔma menya dza Mary tsee wɔ nda no ho na ma esuafo beenu no tsee wɔ Emmaus kwan no do ber a wɔnye Agyenkwa no nantsewee a, wɔdween dɛ Ɔyɛ ɔhɔho wɔ Jerusalem no, no ho atsenkã.
“Na wɔhyɛɛ no dɛ, Nye hɛn ntsena: na orudu ewimbir, na adze reyɛ asa. Na ɔmanee dɛ ɔnye hɔn bɛtsena.
Na ɔbaa dɛ ɔnye hɔn tse edzidzi no, ɔfaa paanoo, na ohyiraa do, na obubui maa hɔn.
Na hɔn enyiwa buei ma wohun no, na ɔyeew hɔn enyiwa do.
“Na wɔsee hɔnho dɛ, Ɔnye hɛn rekasa wɔ kwan mu, na obuee kyerɛwsɛm no mu kyerɛɛ hɛn no, hɛn akoma annhyehye hɛn mu anaa?” (Luke 24:29–32).
Wɔkãa nsɛm yinom bi bio wɔ sacrament nhyiamu bi a mokɔree bɔbor mfe eduosuon a abɛsen kɔ no. Dɛm nda no mu no nna wɔyɛ sacrament nhyiamu ewimbir. Nna abowano ayɛ sum. Mboanofo no toow nsɛmfua a yenyim yi. Maatse no mpɛn pii. Mbom me nkaadze a ɔaka m’adwen mu nye m’atsenkã dɛm anafua no. Ɔtwe me bɛn Agyenkwa no. Bia sɛ mobɔ me tsir mu kã nsɛmfua no a, hɛn nyina yɛbɛkaa no bio:
Enye me ntsena; adzesaa aba,
Anapa no abɛsen na ɔkɔ;
Ewimbir no nwinwin no rehyɛ;
Adzesaa reba.
Akwaaba ɔhɔho, tsena m’akoma
Na enye me ntsena me fie.
Enye me ntsena; adzesaa aba,
Menye wo nantseew ndɛ no
Ama m’akoma adzɛw wɔ mo mu
Ber a menye wo kasae no.
W’asɛm a ho hia no ahyɛ me kra mã.
Na wɔama m’atsena wo nkyɛn.
Dza ɔsombo kyɛn dza woesisi ho nkaa no nye yɛbɛkaa Sunsum Krɔnkrɔn no rekenyan hɛn akoma nye No nokwar a Ɔkɔdo si no pi no. Dza ɔsombo kyɛn yɛdze hɛn enyiwa bohu anaa yɛbɛkaa nsɛm a wɔakã anaa yɛakenkan no nye yɛbɛkaa dza Sunsum no ne ndze komm no ma yɛtse ho nkã no. Ɔnntɔ kã, na maatse mbrɛ Emmaus kwan no do akwantufo no tsee no—dɛ akoma mu a ɔredzew brɛww ampaara no. Ɔtaa dɛ ɔyɛ kan na awerɛhyɛmu kommyɛ mu nkã-tse
Yɛwɔ anohoba a wonntwa ho bo a ɔyɛ Sunsum Krɔnkrɔn no n’anyɛnkoyɛ; na yɛwɔ kwankyerɛ pa no so mbrɛ yebesi agye dɛm akyɛdze no. Ewuradze N’asomfo a ɔwɔ tumdzi no kã nsɛmfua yinom ber a ne nsa gu hɛn tsir do: “Gye Sunsum Krɔnkrɔn no.” Aber noara mu no emi na ɔwo yenya awerɛhyɛmu dɛ Ɔbɔsoma No. Mbom hɛn asɛdze nye dɛ yɛbɛsan mu ebue hɛn akoma mu agye Sunsum no no som no wɔ hɛn abrabɔ ber nyina mu.
Nkɔnhyɛnyi Joseph Smith no sũahu horow no ma hɛn kwankyerɛ. Ɔhyɛɛ no som ase na ɔsɔɔw do a ɔdze adwenpɔw dɛ nankasa ne nyansaa tɔ sin ma ɔdze bohu kwan a ɔsɛ dɛ ɔfa do. Ɔsaan mu yii dɛ ɔbɛyɛ ahobrɛadze wɔ Nyame enyim.
Odzi do no, Joseph saan mu yii dɛ obebisa Nyankopɔn. Ɔdze gyedzi bɔɔ mpaa dɛ Nyame betsie no. Mbuae no bae ber a ɔyɛ aberantsɛba no. Dɛm abɔfo no bae ber nna ohia ehu mbrɛ Nyankopɔn besi apɛ akyekyeer N’Asɔr. Sunsum Krɔnkrɔn no maa no awerɛkyekye na kwankyerɛ n’abrabɔ ber nyina mu.
Ɔyɛɛ setsie maa nkenyan ber a nna ɔyɛ dzen no. Mfatoho, onyaa kwankyerɛ dɛ ɔnsoma Duebien no ma wɔnkɔ Ngyiresi Aborɔkyir ber a nna ohia hɔn kɛse no. Ɔsomaa hɔn.
Ɔgyee ntsentsenee na awerɛkyekye fii Sunsum no hɔ ber wɔdze no too efiadze na wɔtseetsee Ahotseweefo no ara yie no. Ɔpenee na osianee kɔr Carthage kwan no do ber a nna onyim dɛ obehyia mbusu.
Nkɔnhyɛnyi Joseph Smith yɛɛ fasusu maa hɛn wɔ mbrɛ yɛbɔkɔ do edua Sunsum Krɔnkrɔn no mu enya sunsum mu kwankyerɛ na awerɛkyekye.
Dza odzii kan saan mu yii nye dɛ ɔbɛyɛ ahobrɛadze wɔ Nyankopɔn enyim.
Otsĩa ebien nye ɔdze gyedzi wɔ Jesus Christ mu bɔɔ mpaa.
Otsĩa ebiasa nye ɔyɛɛ setsie pɛpɛɛpɛr. Setsie botum akyerɛ dɛ yɛbɛyɛ adze ntsɛmara. Obotum akyerɛ dɛ yɛbɛyɛ ahoboa. Anaa yɛbɔtweɔn abotar mu enya nkenyan ntowdo.
Na otsĩa anan nye yɛbɔbɔ mpaa dze ehu binom hɔn ehiadze na hɔn akoma mu na mbrɛ Ewuradze pɛ dɛ yɛboa hɔn fa. Joseph bɔɔ mpaa maa Ahotseweefo no a wɔrehaw no ber nna ɔda efiadze no. Menya kwan dze ahwɛ Nyame no nkɔnhyɛfo ber a wɔrobɔ mpaa, dze rebisa nkenyan, dze renya mbuae na woridzi do.
Meehu dɛ hɔn mpaabɔ no fa nkorɔfo a wɔdɔ hɔn na wɔsom hɔn ho. Nkaafo ho tsema yɛ dɛ ma obue hɔn akoma mu ma wonya nkenyan. Dɛm no botum ayɛ hɔ ama hom.
Nkenyan bɔboa hɛn ma yɛasom binom ama Ewuradze. Hom enya ho sũahu, dɛ mbrɛ menya no. Ber a nna me yer noho akyer no wɔ nankasa n’abrabɔ mu no—Dakor bi me bishop see me dɛ—“Ber biara a mebɛtse dɛ obi a ɔwɔ ward no mu no hia mboa no, mubodur hɔ dɛ morokɔboa no, muhu dɛ nna wo yer edzi me kan dada. Osi dɛn yɛ dɛm?”
Ɔtse dɛ asomfo ekunyin a wɔwɔ Ewuradze n’ahenman mu no nyina. Ɔyɛ dɛ ndzɛmba ebien na wɔyɛ. Asomfo ekunyin no afata Sunsum Krɔnkrɔn n’anyɛnkoyɛ no aber nyina. Na wɔafata dɛ wobenya ayamuyie, a ɔyɛ Christ no dɔ mapã no, akyɛdze. Dɛm akyɛdze horow no enyin wɔ hɔn mu ber a wɔdze edzi dwuma dze ɔdɔ asom ama Ewuradze no.
Kwan a mpaabɔ, nkenyan, na Ewuradze n’edwuma ho dɔ bɔ mu yɛ edwuma wɔ hɛn som mu no, wɔakã no pɛpɛɛpɛr wɔ nsɛmfua yi mu.
“Sɛ hom serɛ biribi wɔ me dzin mu a, mebɛyɛ.
“Sɛ hom dɔ me a, hom ndzi me mbrasɛm do.
“Na mibebisa Egya no, na ɔama hom Okyigyinafo fofor, ma ɔnye hom aabɛtsena daa;
“Nokwar Sunsum no a: ɔno na wiadze nntum nngye no; osiandɛ onnhu no, na eso onnyim no: na homdze, hom nyim no; osiandɛ ɔtse hom nkyɛn, na ɔbɛtsena hom mu.
“Mirinngya hom ngyanka, mebɛba hom nkyɛn.
“Aka karabaabi na wiadze nnhu me bio, na homdze, hom me; osiandɛ metse ase yi, hom so bɛtsena ase.
“Da no hom bohu dɛ mowɔ m’Egya no mu no hom wɔ no mu, na mo so mowɔ hom mu.
“Nyia ɔwɔ me mbrasɛm na odzi do no, ɔno nye nyia ɔdɔ me, na nyia ɔdɔ me no, m’Egya bɔdɔ no, na mo so mobɔdɔ no, ma mibeyi moho makyerɛ no” (John 14:14–21).
Megye mankasa me dasegye dɛ Egya no nyim wo, Onyim wo nkã-tse, nye hɔn a woetwa woho ehyia nyina no hɔn sunsum mu na honandua mu ehiadze. Megye dase dɛ Egya no na Ɔba no rosoma Sunsum Krɔnkrɔn no akɔ hɔn a wɔwɔ dɛm akyɛdze no, wobisa dɛm nhyira no, na wɔhwehwɛ dɛ wɔbɛfata no. Egya no, anaa Ɔba no, anaa Sunsum Krɔnkrɔn no mmfa Hɔnho nnhyɛ hɛn do. Yɛwɔ pɛ dɛ yɛsan mu yi. Ewuradze ase obiara dɛ:
“Hwɛ, migyina abowano na morobɔ mu: sɛ obi tsie me ndze na obue abow no a, mebɛhɛn mu aba ne nkyɛn, na menye no bedzidzi na ɔno so nye me edzidzi.
“Na nyia obedzi nyim no, mebɛma ɔnye me atsena m’ahengua do, dɛ mbrɛ mo midzii nyim, na menye m’Egya tsenaa n’ahengua do.
Nyia ɔwɔ aso, ma ontsie dza Sunsum no kã” (Nyikyerɛ 3:20–22).
Medze m’akoma nyina bɔ mpaa dɛ hom betsie Sunsum no a, Wɔasoma no ayamuyie mu ara wɔ hom nkyɛn no, ne ndze. Na mobɔ mpaa dɛ hom bobue hom akoma mu daa agye No. Sɛ hom pra hom akoma mu bisa, dze gyedzi wɔ Jesus Christ mu hwehwɛ nkenyan a, hom benya wɔ Ewuradze no kwan do na Ne mber pa mu. Nyame yɛɛ dɛm maa aberantsɛba Joseph Smith. Ɔyɛ dɛm ndɛ ma hɛn nkɔnhyɛnyi tseasefo, President Russell M. Nelson. Nelson Ɔdze wo ato Nyame Ne mba binom kwan do ama aasom hɔn ama No. Nnyɛ dza medze m’enyi ehu nko ntsi na minyim mbom ɔnam Sunsum a Ɔwɔse gu m’asowa mu wɔ tum mu no.
Maatse Egya na No Dɔba hɔn dɔ ma Nyame ne mba nyina a wɔwɔ wiadze yi mu, nye Ne mba a wɔwɔ sunsum wiadze mu no ne nkã. Maatse awerɛkyekye na kwankyerɛ nkã efi Sunsum Krɔnkrɔn no hɔ. Mobɔ mpaa dɛ nkyɛ hom enya Sunsum n’anyɛnkoyɛ mu enyigye aber nyina. Wɔ Jesus Christ ne dzin mu, amen.