Young Womenfo wɔ Edwuma no mu
Akataasia biara a ɔwɔ Asɔr mu wɔdɛ no noho som bo, onya kwan dze som, na ɔtse nkã dɛ ɔwɔ biribi a ɔsombo a ɔdze ma edwuma yi.
Afe a abasen kɔ, wɔ wiadze mfɛndzanan asɔfodzi nhyiamu mu no, Bishop Gérald Caussé kasae kyerɛɛ Asɔr no ne mbanyin a ɔkãa mbrɛ hɔn a wokita Aaron na Melchizedek Asɔfodzi no si yɛ etsipɛmfo a wɔnntsew hɔn mu wɔ nkwagye edwuma ne nyɛe mu ho asɛm. Dɛm asɛm no ayɛ nhyira kɛse a ɔroboa mberantsɛ a wokita Aaron Asɔfodzi no ma woeehu hɔn kyɛfa a wodzi no wɔ wɔrekyekyer Nyankopɔn n’Ahenman wɔ asaase yi do no mu. Hɔn nkabɔmu ɔsom no hyɛ Asɔr no dzen na ɔdze nsakyeree a no mu dɔ yie na pisi ba hɛn mberantsɛ hɔn akoma mu, ber a wohu hɔn ntoboa no no bo a ɔsom na mbrɛ edwuma yi si yɛ enyimnyam.
Ndɛ mebɛpɛ dɛ asɛm a mebɛkã no bata dɛm asɛm no ho ber a mekã mbrɛ Asɔr no ne young womenfo so wohia hɔn na wohia hɔn tsitsir ara pɛr wɔ Ewuradze n’edwuma ne nyɛe wɔ hɔn ebusua ebusua na N’Asɔr mu.
Tse dɛ Bishop Caussé no, wɔ me mbasirwa ber mu ara yie no, nna metse Asɔr no ne nkorbata kakraba bi mu, na nna wɔtaa ma me dwumadzi na ɔfrɛ horow a nkyɛ mpanyimfo na wɔbɛyɛ. Mfatoho, nna hɛn a yɛwɔ mbabun ekuwekuw mu no dzi bano yɛ mboa wɔ hɛn dwumadzi na ndzɛmba soronko a ɔkɔ do ho nhyehyɛɛ mu. Yɛkyerɛɛw agodzi, hyehyɛɛ adwontow kuw dze gyee nkorɔfo enyi wɔ nkorbata dwuma ase, na yɛdze hɛnho nyina hyɛɛ nkorbata dwuma nyina mu. Wɔfrɛɛ me nkorbata adwontow baanodzinyi na midzii sacrament nhyiamu adwontow enyim dapɛn biara. Nna ɔyɛ sũahu kɛse dɛ mfe 16 nyi dɛ ogyina obiara enyim wɔ nkorbata no mu Kwesida biara na ɔhwɛ ma wɔtow Asɔr ndwom. Metsee nkã dɛ wohia me na nna minyim dɛ mowɔ biribi dze ma. Nkorɔfo enyi daa mo do dɛ mobɔwɔ hɔ, na ɔyɛɛ me enyigye dɛ moho yɛɛ mfaso. Dɛm sũahu no boaa me ma menyaa me dasegye wɔ Jesus Christ ho, na dɛ mbrɛ ɔyɛɛ maa Bishop Caussé no, dɛmara na ɔtoo m’abrabɔ ne sekyɛ wɔ asɛmpa som mu.
Asɔrba biara wɔdɛ ohu mbrɛ hɔnho si hia dodow no. Nyimpa biara wɔ biribi a ohia dze ma na ɔwɔ talent soronko na ahom horow a ɔboa ma edwuma a ohia tsitsir yi kɔ do. Hɛn mberantsɛ wɔ Aaronic Asɔfodzi asodzi horow a wɔakã ho asɛm wɔ Nkyerɛkyerɛ na Ahyɛmudzi mu a ɔda edzi ara yie. Ebia ɔnnda edzi mma Asɔr no ne young womenfo, hɔn awofo na hɔn baanodzifo dɛ, ofi ber a wonumaa hɔn no, young womenfo wɔ ahyɛmudzi asodzi horow dɛ “hom nye hɔn a hɔn werɛ ahow dzi hɔn yaw, nyew, na wɔkyekye hɔn a wohia awerɛkyekyer no hɔn werɛ, na wogyina dɛ Nyankopɔn n’adasefo aber nyina wɔ adze nyina wɔ adze nyina mu, wɔ gynabew biara a [hom] wɔ mu no mu, kesi owu mu mpo.’’ Young womenfo wɔ akwan horow dɛ wɔbɛhyɛ asodzi yinom mã ber a wɔsom wɔ hɔn ward na nkorbata ahorow na wɔ adzesũa presidencyfo mu, wɔ mbabun abaguafo na wɔ ɔfrɛ horow binom mu. Akataasia biara a ɔwɔ Asɔr mu wɔdɛ no noho som bo, onya kwan dze som, na ɔtse nkã dɛ ɔwɔ biribi a ɔsombo a ɔdze ma edwuma yi.
Handbook 2 mu no, yesũa dɛ “asɔrba asɛmpasomafo edwuma, nyia ɔasakyer reka asɔr no mu, wɔrobɔ asɔrmba akɔtrɔbɔdwefo hyew, temple na ebusua abakɔsɛm, na erekyerɛkyerɛ asɛmpa no,” kã nkwagye edwuma ho wɔ hɛn ward horow mu. Hɛn bishopfo anokwafo a wokita asɔfodzi nsaafee na wɔhwɛ edwuma yi do wɔ ward hɔ. Mfe pii besi ndɛ no, hɛn presidency ebisa asɛmbisa no dɛ, “Dza wɔabobɔ edzin yinom no mu hen dze na onnyi dɛ hɛn young womenfo wɔdze hɔnho hyɛ mu?. Ne nyiano nye dɛ wɔwɔ biribi dze ma wɔ edwuma yi n’afã nyinara mu.
Mfatoho, ɔnnkyɛree na mihyiaa young womenfo pii wɔ Las Vegas apaamu a nna wɔafrɛ hɔn dɛ wɔmbɔsom dɛ ward temple na ebusua abakɔsɛm aboafo. Nna ahokekã ahyɛ hɔn mã dɛ wobotum akyerɛkyerɛ hɔn wardfo na wɔaboa hɔn ma wɔahwehwɛ hɔn ewuakɔr. Nna wɔwɔ nsaano dwuma a ɔsom bo wɔ kɔmputa do, nna woesũa mbrɛ wosi dze FamilySearch dzi dwuma, na hɔn enyi gyee dɛ wɔnye binom bɛkyɛ dɛm nyimdzee no. Na ɔdaa edzi pefee dɛ wɔwɔ dasegye ntseasee wɔ yɛrohwehwɛ hɛn ewuakɔr hɔn edzin no ho hia ho ama woeetum aayɛ nkwagye ayɛdze horow a ohia tsitsir dze ama hɔn wɔ temple.
Abosoom pii a abasen kɔ no, minyaa kwan dɛ mobɔsɔ young womenfo beenu a woedzi mfe 14 no hɔn adwenkyerɛ ahwɛ. Menyaa ward baguafo hɔn nhyehyɛɛ ankasa ebien na memaa Emma na Maggie nkorkor. Mekãa kyerɛ hɔn dɛ wɔnkenkan nhyehyɛɛ no na wɔnhwɛ dɛ sɛ dwumadzi ndzɛmba bi fi ward abaguafo no hɔ a wobotum edzi ho dwuma a. Emma hun dɛ ebusua fofor bi rutu aba ward no mu, na ɔkãa dɛ obotum aboa hɔn ma woetu aba na wɔahyehyɛ hɔn ndzɛmba. Ɔdween ho dɛ obotum afa mbofra a wɔwɔ ebusua no mu no anyɛnkofo na ɔnye hɔn akapasar hɔn skuul fofor no. Ohun dɛ ward edzidzi bi reba do na ohun dɛ akwanhorow pii wɔ hɔ a obotum dze asom.
Maggie hun dɛ mpanyimfo pii wɔ ward no mu a wohia fɛkuwbɔ na nsera. Ɔkãa dɛ ɔdɔ pɛ dɛ ɔsera asɔrmba mpanyimfo anwanwafo yinom na ɔyɛ mboa ma hɔn. Ɔsanee so hun dɛ obotum akyerɛkyerɛ wardfo no mbrɛ wosi buei social media account horow na mbrɛ wɔdze dzi dwuma. Nna adzebiara nnyi nhehyɛɛ no do a young womenfo beenu no nnkotum aboa!
Ana hɔn a wɔtsena ward abaguafo do no, anaa wokita ɔfrɛ wɔ ward mu no, hu young womenfo no dɛ aboafo a wɔsom bo dɛ wɔboa ma wɔhyɛ hɛn ward horow no mu ehiadze mã a? Ɔyɛ a nna gyinabew pii wɔ hɔ a wohia obi ma ɔayɛ, na yɛtaa dwen mpanyimfo nko a wɔwɔ ward no mu ho dɛ wobotum ayɛ. Dɛmara dɛ wɔato nsa afrɛ hɔn a wokita Aaronic Asɔfodzi no dɛ wɔnye hɔn egyanom na mbanyin a wokita Melchizedek Asɔfodzi no mbɔmu nyɛ edwuma no, wobotum afrɛ hɛn young womenfo no ma wɔnye hɔn enãnom anaa nkyerɛbaa fasusufo bi asom wardfo na wɔahwɛ hɔn ehiadze. Wobotum, hɔn enyi ber, na wɔpɛ so dɛ wɔbɛyɛ dodow akyɛn dɛ wɔbɔkɔ asɔr Kwesida ara!
Ber a yɛhwɛ asɛdze a enyi bɛda kwan dɛ yɛdze bɛma young womenfo no ndamba no, yebotum ebisa hɛnho sũahu horow a yebotum dze ama hɔn sesei a ɔbɔboa hɔn ahosiesie ma wɔayɛ asɛmpasomafo, asɛmpa abenfo, baanodzifo wɔ Asɔr ekuwekuw mu, temple edwumayɛfo, nyernom, enãnom, akyerɛkyerɛfo, esusufo, na anyɛnkofo. Wobotum ahyɛ ase sesei ayɛ dɛm asɛdze yinom pii. Wɔtaa serɛ mbabun no ma wɔboa kyerɛkyerɛ adzesuadze Kwesida wɔ hɔn adzesũaber. Akwan horow wɔ hɔ ndɛ ma hɛn young womenfo no wɔbɔyɛ ɔsom wɔ temple mu a nkyɛ ayɛdze edwumayɛfo anaa etuhoakyɛfo bɛyɛ sɛ wɔnye hɔn mbabun kuw horow kɔ dɛ wɔrekɛyɛ enuma ama ewufo a. Afei wɔto nsa frɛ hɛn Primary mbasiamba no dɛ wɔnkɔ Temple na Asɔfodzi Ahosiesie nhyiamu horow, a ɔbɔboa hɔn ma wɔatse ase dɛ wɔyɛ edwumayɛfo a hɔn ho hia dodow wɔ asɔfodzi-kwankyerɛ edwuma no mu. Worusua dɛ mbanyin, mbaa, mbabun, na mbofra nyina gye asɔfodzi nhyira na hɔn nyina botum abɔhyew wɔ asɛdze mu dɛ wɔrema Ewuradze N’edwuma no akɔ kan.
Bishopfo, yenyim dɛ hɔn ndwuma no mu taa yɛ dur, naaso dɛ mbrɛ dza ohia tsitsir ma hom no mu kor nye dɛ hom bɔhwɛ Aaronic Asɔfodzi quorum horow do no, Handbook 2 kyerɛ mu dɛ “bishop na n’apamfo ma asɔfodzi baanodzi ma Young Women kuw no. Wɔhwɛ ankorankor young womenfo do na wɔhyɛ hɔn dzen, a wɔnye hɔn awofo na Young Women baanodzifo bɔmu wɔ mbɔdzembɔ yi mu.’’ Ɔsan so kã dɛ, “bishop na n’apamfo no taa dze hɔn ho hyɛ Young Women nhyiamu, ɔsom, na dwumadzi horow mu.’’ Yɛda bishopfo ase dɛ wonya mber dze kɛsera Young Womenfo adzesũa horow na wɔma young womenfo no akwan horow ma wɔnnyɛ edwuma no adzehwɛfo ara kɛkɛ. Yɛda hom ase dɛ wɔhwɛ no pefee dɛ hom young womenfo no yɛ hɔn kyɛfa a ɔsombo dze hwɛ dɛ ward mu asɔrmba no hɔn nsa aka hɔn ehiadze! Akwanya horow yinom dɛ wɔbɔsom wɔ akwanhorow a mfaso wɔ mu no hyira hɔn dodow kyɛn dwumadzi horow mu a hɔn enyi gye ara.
Ɔkɔ Asɔr ne young womenfo no hɔ, hom botum dɛ wonnkenya adagyer wɔ hom mbasirba mfe no mu na wɔataa ayɛ tafɛrbanyinmbɔmu. Yeehu dɛ hom mu pii na woridzi aper a wɔnngye hɔnho ntomu, enyiber, atseetsee kɛse ho adwendwen, na mpo awerɛhow ahyɛ hɔn do. Hom dze hom adwen roto biribi do, akyɛn dɛ wɔrodwendwen hɔnara hɔn nsɛnhia ho no, bia orunntum nsiesie nsɛmnsɛm yinom nyina dze, mbom ɔsom botum ataa ama hom adzesoadze ayɛ har na hom haw ayɛ mberɛw kakra. Akwanhorow apapa mu kor a yebepegya hɛnho nye yebodua hɛn ahohia na som ma binom do akyerɛ dɛ yɛwɔ dza ɔsombo dodow a yebotum dze ama. Nkataasia, mehyɛ hom nkuran dɛ hom mma hom nsa do wɔ etuhoakyɛ mu na hom mfa hom nsa no nyɛ edwuma ber a hom hu ehiadze a ɔbɔ hom ho aprɔw no. Ber a wɔyɛ hɔn ahyɛmudzi asodzii na wɔboa ma wɔkyekyer Nyankopɔn n’ahenman no, nhyira bɛhɛn hom abrabɔ mu na wobohu osuanyiyɛ dɛwdzi no bun a onnyiewiei.
Enuanom na nkyerɛbaa, hɛn young womenfo no yɛ nwanwa. Wɔwɔ talent horow, ahokekã a ɔmmbɔ adze, na ahom na wɔwɔ ayamuhyehye na tsema. Wɔpɛ dɛ wɔsom. Wohia dɛ wohu dɛ wɔsom bo na wohia tsitsir wɔ nkwagye edwuma no mu. Dɛ mbrɛ mberantsɛ no yɛ ahoboaboa wɔ Aaron Asɔfodzi mu ma ɔsom kɛsenara ber a wɔkɔ kan kɔ Melchizedek Asɔfodzi mu no, dɛmara hɛn young womenfo no reyɛ ahoboaboa dɛ wɔbɛyɛ mbaa kuw kɛsenara a ɔwɔ asaase do no mu kuwmba—Relief Society. Wɔbɔmu a, young womenfo anokwafo ,yinom a hɔnho yɛ fɛw, hɔnho yɛ dzen na young menfo no reyɛ ahoboaboa abɛyɛ nyernom na kunnom, na enãnom na egyanom a wɔbɛtsetse ebusua ebusua a wɔfata Nyankopɔn ne celestial ahenman no mu.
Megye dase dɛ hɛn Ɔsor Egya N’edwuma nye dɛ Ɔbɛma Ne mba bɛkyebo na onnyiewiei nkwa. Hɛn nkataasia a wɔsom bo no wɔ asɛdze a ohia dɛ wodzi dze boa ma edwuma kɛse yi ba mu. Jesus Christ ne dzin mu, amen.