Fa Sunsum Krɔnkrɔn no yɛ Wo Kwankyerɛfo
Akyɛdze nwanwa a ɔba hɔn a wɔdze hɔn gyedzi hyɛ Jesus Christ mu. Dɛm akyɛdze no nye Sunsum Krɔnkrɔn.
Easter Kwesida yi, hɛn adwendwen dan kɔ hɛn Ewuradze Jesus Christ no Wusoɛr no do, nye nda a ɔtɔɔ pan a ɔma gyedzinyi biara enyidado wɔ Christ no konyimdzi mu wɔ nkyɛ owu nkõgu no do. Me nye Ɔsomafo Paul gye dzi dɛ, mbrɛ Nyankopɔn “ onyaan Christ fii ewufo mu no [dɛmara na Ɔ]bɛma [hɛn] nyimpadua a owu yi so enya nkwa, ɔnam no Sunsum a ɔtse [hɛn] mu no.”
Erekenyan kyerɛ dɛ rema no nkwa. Dɛ mbrɛ Christ nam No Wusoɛr tum no do dze hɛn honandua ba nkwa mu, honandua mu wu ekyir no, dɛmara Okenyan hɛn so, anaa Ɔma yenya nkwa, fi sunsum mu wu mu. Moses nwoma no mu no, yɛkenkan fa nkenyanee yi bi ho: “[Adam] wonumaa no, na Nyankopɔn no Sunsum sianee ba no do, na dɛm na sunsum no woo no, wɔ mu-nyimpa mu.”
Akyɛdze nwanwa a ɔba hɔn a wɔdze hɔn gyedzi hyɛ Jesus Christ mu. Dɛm akyɛdze no nye Sunsum Krɔnkrɔn no rema hɛn dza Ahyɛmu Fofor frɛ no “Christ mu nkwa.” Ɔtɔfabi a dɛm akyɛdze yi yebu no tootooba?
Nuambanyin na nkyerɛbaa, ɔyɛ ndzinoa soronko dɛ “yebenya … Sunsum Krɔnkrɔn no dɛ hɛn kwankyerɛfo” dɛ mbrɛ sũahu a odzi do yi kyerɛ no.
Ber a Korea Ɔsa rokɔ do no, 2nd Leiutenant Frank Blair soom wɔ nsuhɛn a ɔda Japan mu. Nsuhɛn yi nnyɛ kɛse a obotum enya noara no sɔfoe, ntsi captain no serɛɛ Onuabanyin Blair dɛ ɔnyɛ ngyinahɔma sɔfo wɔ hɛn no mu, ber a ohun no dɛ aberantsɛ yi yɛ nyimpa a ɔwɔ gyedzi na nkyerɛkyerɛ, na dɔm no nyina dze obu ma no.
Leiutenant Blair kyerɛɛw dɛ: “ Hɛn nsuhɛn yi kɔtɔɔ ehum kɛse bi mu. Asorɛkye no ne tsentsen bɛyɛ anamɔn 45. Nna mowɔ aweɔnee … dɛm ber no mu no hɛn mfir ebiasa no mu kor gyaa edwuma yɛ na wɔkãa dɛ akãm abɛda nsuhɛn no ne finimfim. Nna aka hɛn mfir ebien a no mu kor so nntum nnyɛ edwuma yie. Nna yɛwɔ ɔhaw kɛsenara mu.”
Lieutenant Blair wiee n’aweɔnee no na ɔyɛɛ dɛ ɔrekɛda noara na captain no bɔɔ n’abow mu. Obisaa no dɛ, “Meserɛ wo ebɔbɔ mpaa ma hɛn yi a?.” Nyew, Lieutenant Blair peen no dɛ ɔbɛyɛ dɛm.
Dɛm ber no, nkyɛ Lieutenant Blair botum abɔ mpaa sin ara dɛ, “Hɛn Ɔsor Egya, meserɛ wo hyira nsuhɛn yi na ma hɛn bambɔ” na nkyii ɔakɛda. Mbom, ɔbɔɔ mpaa dɛ obohu biribi a obotum ayɛ dze aboa nsuhɛn no ne yieyɛ. Onuabanyin Blair ne mpaabɔ ho mbuae no, Sunsum Krɔnkrɔn no kenyaan no dɛ ɔnkɔ hɛn no sor, nye captain no nkɛkasa, mfa nsũa biribi yie. Ohun dɛ captain no robɔ mbɔdzen ehu mbrɛ obesi dze mfir a wɔaka no boguan ntsɛntsɛm. Lieutenant Blair sanee kɔr ne pia mu dɛ ɔrokɔbɔ mpaa bio.
Ɔbɔɔ mpaa dɛ,”Ebɛnadze na mobotum ayɛ dze aboa esiesie ɔhaw a ɔwɔ mfir yi ho yi?”
Mbuae no, Sunsum Krɔnkrɔn no wasaa guu n’asowa mu dɛ ɔnantsew nsuhɛn no mu nhwehwɛ ndzɛmba mu yie. Ɔsanee kɔr captain no hɔ kɛserɛɛ kwan a ɔdze bɛnantsew nsuhɛn no do. Afei, wɔdze ahoma kyekyeer n’asen, na ɔkɛhɛɛn ehum no mu.
Ogyinaa nsuhɛn no sor ekyir no, ɔhwɛɛ propeller akɛse no ber a asorɛkye maa hɔn do ma wopue no. Nna no mu kor ara nna ɔreyɛ edwuma yie, na ɔno mpo otwa no ho mbordo. Ɔhyɛɛ iyinom nsew ekyir no, Lieutenant Blair sanee kɔbɔɔ mpaa bio. Mbuae a ɔdaa edzi pefee nye dɛ efir a ɔaka a oye no reyɛ edwuma mbordo na ohia dɛ ɔtɔ no bo. Ntsi ɔsanee kɔɔr captain no hɔ kɛmaa no dɛm adwen no. Ɔyɛɛ captain no ahobow, rekaã kyerɛɛ no dɛ hɛn n’engineer no ebosusu dza ɔnye wo nsusui no bɔ ebira akyerɛ no seseiara—dɛ womia hɔn mbirikatu wɔ efir papa no mu mfa ntra ehum no. Naaso, captain no saan mu yii dɛ obedzi Lieutenant Blair no nsusui no do na ɔgoow efir n’ano. Anapahema no nna nsuhɛn no da nsu a ɔataa dzinn ahotɔ mu ara.
Ndɔnhwer ebien ara ekyir no, efir papa no so gyaae edwuma yɛ koraa. Wɔdze ahom fã a ɔwɔ efir a ɔaka no, dze nsuhɛn no nkotonkoto kodwiir ahɛngyinabea.
Captain no kãa kyerɛɛ Lieutenat Blair dɛ, “ Sɛ yɛanngow efir n’ano dɛm aber no a, nkyɛ yɛbɛyew no wɔ ehum no ne finimfin.”
Ɔnnyɛ dɛm efir no a, nkyɛ kwan biara nnyi hɔ a yɛdze bɛdandan hɛn no. Nkyɛ nsuhɛn no bobutuw na ɔamem. Captain no daa LDS ɔfesa aberantsɛ yi ase na ɔkaã dɛ ɔgyee dzii dɛ odzii Lieutenant Blair no sunsum mu akwankyerɛ no do na ɔgyee nsuhɛn no na no mu dɔm no.
Hwɛ, dɛm asɛm yi yɛ ahobowsɛm. Ɔronntɔ kã dɛ yebehyia akomatusɛm a ɔtse dɛm yi dze, naaso asɛm yi kita akwan horow a no ho hia ma yeetum hɛn nsa ataa akã Sunsum no n’akwankyerɛ no.
Odzi kan, ɔfa nyikyerɛ ho no, ɔsɛ dɛ yɛbɔ ahotsew bra a ɔbɛma yeenya nkenyan efi sor. Nna Lieutenant Blair robɔ ahotsew na nokwardzi bra. Sɛ nna ɔnnyɛ setsie a, nkyɛ oenntum ennya sunsum mu awerɛhyɛmu a ohia dze abɔ mpaa dɛ mbrɛ ɔyɛe maa no nsuhɛn no n’ahotɔ na ɔdze benya kwankyerɛ pɔtsee yi. Otwar dɛ hɛn mu kor biara, bɔ mbɔdzen dze hɛn abrabɔ to Nyankopɔn Ne mbrasɛm ho ama Ɔaakyerɛ hɛn kwan.
Ɔtɔfabi a yɛnntse sunsum no ne nkenyan osiandɛ yɛmmfata. Nnuho nye setsie kwan a wɔfa do dze nya nkitahodzi pefee bio. Ahyɛmu Dadaw no mu, nnuho ne kasafua n’asekyerɛ yɛ “ebɛsan” anaa “dan wo ho.” Sɛ etse dɛ enye Nyankopɔn ntamu atwe a, ohia ara dɛ eyɛ w’adwen dɛ ibɛdan efi bɔn ho, na edze w’enyim etsim Agyenkwa no do, hɔ na ibohu dɛ Ɔrotweɔn wo a, Ɔatserɛw N’abasa mu. Ɔayɛ krado dɛ Ɔbɛkyerɛ wo kwan, na mpaabɔ kortsee na otwa dɛm kwankyerɛ no ntamu bio.
Otsĩa ebien, Lieutenant Blair emmbisa Ewuradze dɛ ɔnsɔw ne haw no ano mma no. Obisaa dza obotum ayɛ ma ɔayɛ ne kyɛfa dze asɔw ɔhaw n’ano. Dɛmara so yebotum ebisa, “Ewuradze, ma mubotum ayɛ dze aboa ma ayɛ me kyɛfa dze asɔw ɔhaw no ano?” Nkyɛ yɛbɛsesẽ hɛn haw nkorkor na yebisa Ewuradze wɔ mpaabɔ mu dɛ Ɔnsɔw ano mma hɛn ara no, yehia dɛ yɛhwehwɛ akwan pa horow dze nya Ewuradze no mboa na yɛdze enyimpi dzi Sunsum no no kwankyerɛ no do.
Adzesũadze a otsĩa ebiasa a ohia so wɔ Lieutenent Blair asɛm no mu. Ana nkyɛ obotum dze dɛm ɔdwe awerɛhyɛmu abɔ mpaa sɛ nna onnyaa Sunsum mu kwankyerɛ dadaw? Ehum rutu no nnyɛ mber a mbrɛana erobɔhwehwɛ Sunsum Krɔnkrɔn n’akyɛdze na adwen mbrɛ wosi dze dzi dwuma. Aberantsɛ yi nna oridzi nhwɛdo pɛpɛɛpɛr a mber a wɔabɛsen no ɔdze edzi dwuma mpɛn pii, a ber a ɔyɛ etuhoakyɛ asɛmpasomafo no kã ho. Yehia Sunsum Krɔnkrɔn no dɛ hɛn kwankyerɛfo ber a esu ataa dzinn, ama yɛaatse ne ndze yie wɔ ehum begyabegya mu.
Binom bɔdwen dɛ onnyi dɛ hɛn enyi da akwankyerɛ daa daa fi Sunsum Krɔnkrɔn no hɔ osiandɛ “ɔnnsɛ dɛ mehyɛ hom wɔ ndzɛmba nyinara mu” ma yɛannyɛ nkowaa enyihafo. Naaso kyerɛwsɛm yi, wɔdze maa asɔpɔkan asɛmpakãfo a wobisaa Joseph Smith nyikyerɛ a ɔsɛ dɛ hɔn ara wonya ma hɔnho. Nkyekyɛmu a odzi iyi kan no, Ewuradze kãa kyerɛ hɔn dɛ wɔmbra asɛmpakã mbewdo “ama wɔnye hɔnho nye emi aafa apam.”
Asɛmpasomafo yinom nna wɔrohwehwɛ hɔn akwantu nhyehyɛɛ ho nyikyerɛ pɔkyee. Nna wonsũaa dɛ ɔwɔ dɛ wɔhwehwɛ hɔnankasa hɔn kwankyerɛ wɔ ankorankor nsɛm mu. Ewuradze frɛɛ suban yi dɛ mbrɛ ɔtse: enyihaw. Bi a asɔpɔkan asɔrmba nyaa enyigye dɛ woenya nkɔnhyɛnyi nokwafo ara ma nna wɔwɔ esian mu dɛ wonnkosũa ehu mbrɛ hɔnara wobesi benya nyikyerɛ. Yɛreyɛ sunsum mu ahodan nye idua No Sunsum mu dze tse Ewuradze ne ndze ma ɔwoara w’abrabɔ.
Alma tuu ne ba fo dɛ “enye Ewuradze mfa apam wɔ biribiara a ebɛyɛ ho.” Ebɔbɔ bra wɔ kwan yi do no—dza yɛtaa frɛ no “Sunsum mu abrabɔ no”—yɛ ndzinoa a ɔkrɔn. Ɔdze ɔdwe atsenkã na enyidado nye Sunsum no mu aba, tse dɛ ɔdɔ, dɛw na asomdwee.
Lieutenant Blair no tum a ɔdze nya nyikyerɛ no gyee ɔno nye ne hɛn mu edwumafo wɔ ehum kɛse ber no mu no. Ehum asorɔtow gu do rutu ndɛ. Mormon Nwoma no mu abɛbusɛm a ɔfa nkwadua ho no twa mfonyin a ɔyɛ ndam a ɔkyerɛ mbrɛ wosi nya sunsum mu ahotɔ wɔ dɛm wiadze yi mu. Adaaso yi kã sum ehubɔhubɔw a ɔrosoɛr mpofirmu dze sunsum mu ɔsɛɛ abrɛ Asɔrmba a wɔnam anamɔn kwan do resan akɔ Nyankopɔn nkyɛn.
Modwendwen mfonyin yi ho a, muhu dɔmtutuw wɔ m’adwen mu a wɔnam dɛm anamɔn kwan no do, binom nsa dze dadze poma no mu dzendzeendzen, naaso dodowara dzi nkorɔfo a wɔwɔ hɔn enyim no anamɔn ara no ekyir. Kwan a odzi ekyir yi nngye adwen anaa mbɔdzembɔ biara. Ibotum ayɛ na adwen dza binom reyɛ na wɔrodwen ara. Iyi yɛ edwuma ara yie ber a ewia da do fɛɛfɛw. Naaso ndaadaa ehum na atorsɛm ehubɔhubɔw soɛr a ɔmmbɔ nkae. Gyinabew yinom mu no, inyim Sunsum Krɔnkrɔn ne ndze no yɛ sunsum mu nkwa na owu ntamu asɛm.
Nephi n’anohoba a ɔyɛ ndam no nye “na obiara a obetsie Nyame n’asɛm, na … oesuo mu dzen no … ɔnnkɛhera da; na nsɔhwɛ nye abɔnsam n’egyen menaba no runntum nnhyɛ hɔn do mmfura hɔn enyiwa a ɔdze hɔn bɔkɔ ɔsɛɛ mu.”
Iridze nkorɔfo a wodzi w’enyim hɔn anamɔn ekyir no nndzi mu. Yennkotum ayɛ na yɛadwen dza binom reyɛ na wɔrodwen ara; otwar dɛ hɛn abrabɔ nya akwankyerɛ. Otwar dɛ hɛn mu kor biara dze noara ne nsa suo dadze poma no mu Afei yɛdze ahobrɛadze awerɛhyɛmu bɔkɔ Ewuradze nkyɛn, a yenyim dɛ “ Obosuo hɛn nsamu aagye [hɛn] taataa, na ɔama [hɛn] mpaabɔ ho mbuae.” Wɔ Jesus Christ ne dzin mu, amen.