Erekyerɛkyerɛ Adze wɔ Fie—Enyigyedze na Asodzi Krɔnkrɔn
Meserɛ ɔsor mboa ber a yɛbɔ mbɔdzen dɛ yɛbɛyɛ akyerɛkyerɛfo tse dɛ Christ wɔ hɛn efiefi mu.
Menye me yer dɔfo, Julie, yɛatsetse mba afɛɛfɛw beesia, na ndaansa yi wɔaka hɛn nko wɔ fie. Maafe hɛn mbofra a nna hɔn nyina wɔ fie na yɛrohwɛ hɔn no dodow. Maafe dza nna musũa fi hɔn hɔ na adze a nna mekyerɛkyerɛ hɔn no.
Ndɛ mebɛkã me nsɛm no akyerɛ awofo nye hɔn a wɔpɛ dɛ wɔyɛ awofo. Hom mu dodowara na sesei hom retsetse mbofra. Nkaafo no, ɔrennkyɛr na dɛm mber no aba. Na binom so no, baatanyɛ bɛyɛ hɔn nhyira ndaamba. Mobɔ mpaa dɛ hɛn nyina yebohu dɛ ɔyɛ enyigyedze na asodzi krɔnkrɔn dɛ yɛbɛkyerɛkyerɛ abofra adze.
Dɛ yɛyɛ awofo no, hɛn na yedzi kan kyerɛ hɛn mba ma wohu Ɔsor Egya na Ne Ba, Jesus Christ. Yɛboa hɛn mbofra ma wɔbɔ hɔn mpaabɔ a odzi kan. Yɛma kwankyerɛ na abamba ber a wodua enuma mu bɛhɛn ahyɛmudzi anamɔn kwan no do. Yɛkyerɛ hɔn ma wɔyɛ setsie ma Nyankopɔn ne mbrasɛm. Yɛkyerɛ hɔn Ne nhyehyɛɛ ma Ne mba, na yɛboa hɔn ma wɔyɛ aso ma Sunsum Krɔnkrɔn n’awɔse. Yɛkã tsetse nkɔnhyɛfo ho nsɛm kyerɛ hɔn na yɛhyɛ hɔn nkuran dɛ wondzi nkɔnhyɛfo atseasefo no ekyir. Yɛbɔ mpaa dɛ wobedzi konyim na yɛnye hɔn dzi yaw wɔ hɔn haw ber mu. Yɛgye temple nhyira ho dasegye kyerɛ hɔn, na yɛbɔ mbɔdzen dɛ yɛbɛyɛ hɔn ahoboa yie ma wɔasom etuhoakyɛ asɛmpakã dwumadzi. Hɛn mba hɔnara ba bɛyɛ awofo a, yɛma hɔn afotu ɔdɔ mu ara. Naaso—nkyii—yenngyaa mpo dɛ yɛbɛyɛ hɔn awofo. Yenngyaa da dɛ yɛbɛyɛ hɔn akyerɛkyerɛfo. Wonnsian hɛn mmfi onnyiewiei ɔfrɛ yinom ho da.
Ndɛ hom mma yɛndwendwen akwan nwanwa kakra a yenya dɛ yɛbɛkyerɛkyerɛ hɛn mba adze wɔ hɛn efiefi.
Ebusua Ewimbir Fie Nhyiamu
Yɛmfa ebusua ewimbir fie nhyiamu nhyɛ ase, nna ɔyɛ ehiadze tsitsir wɔ fie a gyedzi ahyɛ mu mã a, wɔtsetse me mu no. Mennkaa adzesuadze pɔkyee bi a wɔkyerɛɛ no wɔ ebusua ewimbir fie nhyiamu, mbom mekaa dɛ dapɛn biara nnyi hɔ a yɛannyɛ. Minyim dɛ nna ohia m’awofo ara yie.
Mekaa ebusua ewimbir fie nhyiamu dwumadzi kor a nna mepɛ. Dada to nsa frɛ ne mba no mu kor dɛ ɔmbɛyɛ “Test no.” Ɔma abofra no ndzɛmba ntoatoado a ɔsɛ dɛ ɔyɛ, tse dɛ, “Kɔ gyaadze na bue fridge no na tow mu. Nkyii tu mbirika kɔ me dan mu na keyi socks fi m’ahwehwɛ n’enyim. Na san bra me nkyɛn, huruhuru kɔ sor na ase mpɛn ebiasa na se dɛ, ‘Dada, maayɛ!’”
Nna ɔyɛ me dɛw dɛ woedu mo do. Nna mepɛ mutu anamɔn biara yie, na dza ɔyɛ me dɛw kɛse nye ber a mutum kã dɛ, “Dada, maayɛ!” Dwumadzi yi boae ma megyee moho dzii na ɔyɛɛ mberɛw maa banyimba a moho yɛ ahomtsew no yɛɛ dzinn tsiei Mama anaa Dada ber a wɔrekyerɛ asɛmpa fapem no.
President Gordon B. Hinckley tuu fo dɛ: “Sɛ ewɔ ekyingye biara wɔ ebusua ewimbir fie nhyiamu ho mfaso a, yɛ bi hwɛ? Boaboa wo mba ano twa woho hyia, kyerɛkyerɛ hɔn adze, gye dase kyerɛ hɔn, nye hɔn mbɔ mu nkenkan kyerɛwsɛm no na ma wɔmbɔ mu ngye hɔn enyi.”
Ber biara no, biribi betsia wo ma nnkɛyɛ ebusua ewimbir fie nhyiamu. Naaso, moto nsa frɛ wo dɛ hwehwɛ kwan a edze bodua akwansiwdze ne nkyɛn na ma ebusua ewimbir fie nhyiamu no nyɛ adze tsitsir—na ma ɔnyɛ enyigyedze ara yie.
Erekyerɛ Ebusua Mpaabɔ
Ebusua mpaabɔ yɛ kwan pa kor so yɛdze kyerɛkyerɛ adze.
Modɔ mbrɛ President N Eldon Tanner n’egya kyerɛkyerɛɛ no adze wɔ ebusua mpaabɔ ber. President Tanner see dɛ:
“Mekaa ewimbir kor bi, ber a yeebu ntwɛr wɔ ebusua mpaabɔ mu no, m’egya see Ewuradze dɛ, ‘Eldon yɛɛ biribi ndɛ a onnyi dɛ nkyɛ ɔyɛ, oedzi ho yaw, na sɛ edzi bɛkyɛ no a, nkyɛ ɔrennyɛ bio.’
“Dɛm no maa misii nkitse dɛ mirinnyɛ dɛm no bio kyɛn dza abaahwe bɛma maayɛ.”
Meyɛ banyimba no, nna ebusua mpaabɔ a yɛbɔ no pii no ɔtsetsee me, modwen ho dɛ, “Yɛbɔɔ mpaa no nkyɛ ɔnnkyɛr koraa?” Sesei a, meyɛ ɔwofo yi, minyim dɛ yennkotum abɔ mpaa dɛ ebusua ma wɔabor do da.
Mbrɛ Ɔsor Egya sii dzii kan daa Jesus Christ edzi dɛ Ɔyɛ No Dɔba no ayɛ me soronko daa M’enyi gye dɛ mobɔ mo mbofra no edzin dze bɔ mpaa ma hɔn ber a woritsie dɛ merekã kyerɛ Ɔsor Egya mbrɛ misi dɔ hɔn. Ɔyɛ dɛ mber pa biara a yɛdze bɛkyerɛ hɛn dɔ ama hɛn mbofra nnkyɛn ber a yɛnye hɔn robɔ mpaa anaa yerihyira hɔn no. Ber a ebusua ebusua abo ano wɔ ahobrɛadze mpaabɔ mu no, wɔdze kyerɛkyerɛ adzesuadze tsitsir na otsim daapem.
Adze Kyerɛ Ɔfrɛ Kradoyɛ
Ɔwofo adzekyerɛ tse dɛ eyɛ datser a wɔbɛfrɛ wo ber biara mu. Ohia dɛ daa yɛyɛ krado dɛ yɛbɛkyerɛkyerɛ hɛn mba adze osiandɛ yennyim mber pa no akwanya no bɛba.
Yɛtse dɛ Agyenkwa no a, N’adzekyerɛ “anntaa amba do wɔ asɔrfi mu mbom wɔ daa daa abrabɔ dwumadzi mu—ber a Ɔnye N’esuafo no ridzidzi, wɔresaw nsu efi bura mu, anaa wɔresen adɔmbadua nkyɛn.”
Mber pii a abasen kɔ no, me maame nye mo nuabanyin panyin, Matt, kyɛɛ n’asɛmpa ho nkɔmbɔdzi a ɔpɛ no papa, ber a nna ɔrobobɔw ndzɛmba a wɔahor na ber bi so ɔrekã kaar nye no rokɔ sẽ datser hɔ. Ndzɛmba pii a mepɛ wɔ me maame ho no, kor nye ne kradoyɛ dɛ ɔbɛkyerɛkyerɛ ne mba adze.
N’ɔwofo akyerɛkyerɛ no enngyaa da. Ber a nna morosom dɛ bishop no, me maame a, nna oedzi mfe 78 no, kãa kyerɛɛ me dɛ mihia dɛ mosusɔɔw me tsir. Onyim dɛ ɔwɔ dɛ meyɛ fasusu, na ɔanntweɔn ho dɛ ɔbɛkã dɛm akyerɛ me. Mama, modɔ wo yie!
Dɛ meyɛ egya no, menya nkenyan dɛ mankasa munsũa na mondwendwen kyerɛwsɛm no ho ama meetum eenya nyiano ber a me mba anaa mbanana hɔn adzekyerɛ ɔfrɛ kwan no bɛba. “Mber pa binom a wɔdze kyerɛ adze no, ɔhyɛ ase dɛ asɛmbisa anaa asɛnhia bi a ɔwɔ [ebusũa] mu ba bi n’akoma mu.” Ana dɛm mber no mu no yɛreyɛ aso a?
Mepɛ Ɔsomafo Peter ne nsato no: “Hom nsiesie homho daa dɛ hom beyi ano akyerɛ obiara a [na medze abofra kã ho] obisa hom enyidado a ɔwɔ hom mu no ase.”
Ber a meyɛ abasirba no, nna emi na me papa yɛpɛ empiresi a yɛhwɛ hɛn mu nyia ɔwɔ ahoɔdzen ara yie wɔ nsasuo mu. Yemia hɛn nsa dzendzen a yebotum na yɛahwɛ nyimpa ɔbɛkyerɛ yaw wɔ n’enyim. Sesei dze ɔnnyɛ enyigyedze, naaso dɛm mber nna ɔyɛ dɛw. Dɛm empiresi kor ekyir no, Dada hwɛɛ m’enyim na ɔkãa dɛ, “Ɔba, ewɔ ahoɔdzen wɔ wo nsamu. Mowɔ enyidado dɛ wo nsa benya ahoɔdzen daa a erennfa nnkã akataasiaba wɔ kwan a ɔmmfata mu.” Nkyii ɔtwee m’adwen gyinaa dɛ mebɛtsena ahosan mu na maaboa nkaafo no ma wɔayɛ dɛmara.
Elder Douglas L. Callister kyɛɛ iyi faa ne papa ho: “Dakor bi, ber a yerutu kwan fi edwuma mu rokɔ fie no Dada kãa no mpofirmu dɛ, ‘Metua m’ebupɛn du ndɛ. Mekyerɛw “meda ase” wɔ ebupɛn du krataasin no do. Ɔyɛ me enyisɔ ara yie dɛ Ewuradze rehyira hɛn ebusua.’”
Nkyii Elder Callister kamfoo n’egya-kyerɛkyerɛnyi no: “Ɔkyerɛɛ setsie ho ndzeyɛɛ na suban ebien no nyina.
Megye dzi dɛ ɔyɛ nyansadze dɛ dakor dakor yebisa hɛnho dɛ, “Ebɛnadze na mebɛkyerɛ, anaa ebɛnadze na medze me ndzeyɛɛ na setsie su rekyerɛkyerɛ me mba?”
Ebusua Kyerɛwsɛm Adzesũa Nkyerɛkyerɛ
Ebusua kyerɛwsɛm adzesũa nye nhyiamu bea pa a yɛdze kyerɛ nyamesɛm nkyerɛkyerɛ wɔ fie.
President Russell M. Nelson kãa dɛ, “Nnyɛ Ewuradze N’asɛm nko na ɔsɛ dɛ awofo suo mu yie, mbom wɔwɔ asodzi krɔnkrɔn dɛ wɔdze kyerɛkyerɛ hɔn mbofra.”
Ber a emi na Julie yɛretsetse hɛn mbofra no, yɛbɔɔ mbɔdzen dɛ yɛbɔwɔw do na yɛafa kwan nwanwa do ayɛ. Afe kor bi, yɛbɔɔ adwenpɔw dɛ yɛbɛkenkan Mormon Nwoma no wɔ Spanish kasa mu dɛ ebusua. Gyama dɛm ntsi na Ewuradze afrɛ hɛn mbofra a wɔsoom etuhoakyɛ asɛmpakã dwumadzi mu no, wɔ asɛmpakã dwuma a wɔkã Spanish kasa.? Es posible [Obotum ayɛ dɛm].
Ɔkãa m’akoma ara yie ber a Onuabanyin Brian K. Ashton nye me kyɛɛ dɛ ɔka afe kor ma oewie nsɔwdo skuul no, ɔnye ne Papa bɔɔ mu kenkaan Mormon Nwoma no ne krataafa biara. Onuabanyin Aston dɔ kyerɛwsɛm no. Wɔakyerɛw no wɔ n’adwen nye n’akoma mu. N’egya duaa dɛm eduaba no ber a Onuabanyin Ashton yɛ abasirba no, na dɛm eduaba no enyin abɛyɛ nokwar dua a no ndwow kɔ ase ara yie. Onuabanyin Ashton nye ne mba mpanyimfo no ayɛ dɛmara. Ndaansa yi ne mfe awɔtwe banyimba bisaa no dɛ, “Dada, dabɛn na menye wo bɛkenkan Mormon Nwoma no?”
Mfatoho Nkyerɛkyerɛ
Ewiei, hɛn ɔwofo akyerɛkyerɛ a onya nhyɛdo kɛse nye hɛn fasusu. Wotu hɛn fo dɛ, “Yɛ[nyɛ] esusudo ma agyedzifo, wɔ kasa mu, abrabɔ mu, wɔ ɔdɔ mu, gyedzi mu, ahotsew mu.”
Ndaansa yi hɛn akwantu mu no, emi na Julie kɔr asɔr na yehun nkyekyɛmu yi a wɔdze ridzi dwuma. Aberantsɛba a ɔnnkɛkyɛr na ɔakɔ n’asɛmpakã dwuma na ɔkasaa wɔ sacrament nhyiamu no ase.
Ɔkãa dɛ, “Hom nyina nyim dɛ m’egya yɛ nyimpa pa wɔ asɔr mu, naaso …” Ogyinae, na medze ɔhaw dwendwen dza ɔbɔtoa do akã. Ɔsɔɔw do na ɔsee dɛ, “Ɔyɛ nyimpa papa kyɛn dɛm wɔ fie.”
Ekyir no medaa aberantsɛba no ase dɛ ɔkamfoo n’egya ma ɔyɛɛ nkenyan. Nkyii na muhun dɛ n’egya yɛ ward no ne bishop. Nna ɔrosom no ward no nokwar mu dɛ bishop dze, naaso ne babanyin hun dɛ n’edwuma a ɔkrɔn no, ɔyɛ no wɔ fie.
Elder D. Todd Christofferson tu fo dɛ: “Yɛwɔ akwan horow a yɛdze bɛkyerɛkyerɛ … ebusuasantsen a wɔaba do no, na ɔwɔ dɛ yɛdze hɛn adwenpa na mbɔdzembɔ ara yie dze yɛ hɔnho edwuma emudzi mu. Ne nyina mu no, otwar dɛ yɛkɔ do hyɛ awofo nkuran na yɛboa hɔn ma wɔwɔw do bɛyɛ akyerɛkyerɛfo apapa … nkanka wɔ fasusuyɛ mu.”
Dɛm na Agyenkwa no kyerɛkyerɛ adze.
Mfeda, ber a yɛnye hɛn mba akaekyirfo beenu yɛwɔ ahomgye no, Julie susuu dɛ yɛnkɛyɛ ngyina-ananmu enuma wɔ St. George nye San Diego Temple ebien no mu. Mohwinhwinii—kyerɛɛ moho—rodwen dɛ, “Yɛwɔ fie a yɛkɔ temple, na sesei yɛwɔ ahomgye mu. Dɛn ntsi na yɛnyɛ ahomgyedze? Enuma ekyir no, nna Julie pɛ dɛ yetwitwa mfonyin wɔ temple n’abowano. Mohwinhwinii dzinn—bio. Hom nsusu dza osii: yetwitwaa mfonyin pii.
Julie pɛ dɛ hɛn mba benya nkaadze wɔ mbrɛ yesii boaa hɛn ewuakɔr, na mo so dɛmara. Nna yennhia temple ho adzesuadze a wɔyɛ no wɔ adzesuabea. Nna yɛdze robɔ bra—meda enã a ɔdɔ temple na ɔpɛ dɛ ɔnye ne mba kyɛ no dɔ no.
Ber a awofo dɔ hɔnho na wɔkyerɛ tsenenee fasusu no, mbofra no nya nhyira daapem.
Ewiei
Hom a hom robɔ hom mbɔdzen ara yie dze akyerɛkyerɛ adze wɔ hom efiefi nyina no, nkyɛ hom enya asomdwee na dɛwdzi wɔ hom mbɔdzembɔ mu. Na sɛ hom nya atsenkã dɛ hom hia mpontu anaa ahoboaboa yie a, meserɛ hom nyɛ aso ber a Sunsum no kenyan hom no, na hom nhyɛ bɔw ndzi do.
Elder L. Tom Perry kãa dɛ, “Ɔman biara n’apɔwmudzen, no nkorɔfo hɔn enyigye, hɔn prɔmprɔmyɛ, na hɔn asomdwee ne nyina ne farbaa nye mbofra a wɔkyerɛkyerɛ hɔn adze wɔ fie.”
Nyew, me fie no buw no atɔ pan, naaso meda ho da ɔfrɛ do, m’ayɛ krado na enyidahɔ dze rohwehwɛ kwan a ɔsombo a medze bɛkyerɛkyerɛ me mba mpanyimfo, hɔn mba, na dabi, enyidado mu dɛ hɔn mbanana so.
Meserɛ ɔsor mboa ber a yɛbɔ mbɔdzen dɛ yɛbɛyɛ akyerɛkyerɛfo tse dɛ Christ wɔ hɛn efiefi mu. Wɔ Jesus Christ ne dzin mu, amen.