Nkwagye Ayɛdze horow dze Kan Nwanwa Bɛbrɛ Hɛn
Yɛreyɛ ayɛdze horow na yeridzi ahyɛmudzi horow a ɔkã ho no dze kan nwanwa bɛbrɛ hɛn wɔ wiadze a ɔrokɔ do hyɛ sum yi mu.
Enuanom na nkyerɛbaa, menye hom dzi dɛw wɔ asɛmpa no, anaa Christ ne nkyerɛkyerɛ no mu.
Ber bi nyɛnko bi bisaa Elder Neil L Andersen, a nkyɛ nkaano ɔkã Eduosuon no ho, dɛ erekãsa wɔ nyimpa dodow 21,000, enyim wɔ Conference Center hɔ a, ɔtse dɛn. Elder Andersen buaa dɛ, “Ɔnnyɛ nyimpa dodow 21,000 na wɔma motwentweɔn; ɔyɛ Enuanom 15 a wɔtsena w’ekyir no a.” Meserewee dɛm ber no,, mbom sesei metse. Mbrɛ misi dɔ na mema mbarimba 15 yinom tsipia dɛ nkɔnhyɛfo, adzehufo, nye nyikyerɛfo a.
Ewuradze kãa kyerɛɛ Abraham dɛ ɔnam n’asefo mu na asɔfodzi no do, na “wɔdze Asɛmpa no ne nhyira … onnyiewiei nkwa mpo no” behyira ebusua ebusua nyinara wɔ asaase do (Abraham 2:11; hwɛ nyiyimu 2–10so).
Wɔdze asɛmpa no ne nhyira yinom na asɔfodzi no asan ananmu aba asaase do, na 1842 mu no, Nkɔnhyɛnyi Joseph Smith dze endowment no maa mbanyin na mbaa kakraabi. Nna Mercy Fielding Thompson yɛ hɔn mu kor. Nkɔnhyɛnyi no see no dɛ, “[endowment] yi beyi wo efi sum mu aba kan nwanwa mu.”
Ndɛ mebɛpɛ dɛ migyina nkwagye ayɛdze horow a ɔdze kan nwanwa bɛbrɛ emi na ɔwo do.
Ayɛdze na Ahyɛmudzi
True to the Faith mu no yɛkenkan dɛ: Ayɛdze yɛ nyɛe krɔnkrɔn a, ɔagye ato mu a, wɔdze asɔfodzi tumdzi yɛ. Ayɛdze horow [no a] ohia tsitsir ma hɛn nkwagye ntowdo no … wɔfrɛ no nkwagye ayɛdze horow. Enuma, pisi, Melchizedek Asɔfodzi ne nhyɛe (wɔdze ma mbanyin), temple endowment no, na awar nsɔwano no kã ho,”
Elder David A Bednar kyerɛkyerɛɛ dɛ, “Nkwagye ayɛdze na nkwagye ntowdo ayɛdze horow a wɔyɛ no wɔ Ewuradze n’Asɔr a ɔdze asan ananmu mu no … yɛ akwan a wɔagye ato mu a nhyira horow na ɔsor tum botum edua do aba hɛn ankorankor abrabɔ mu.”
Tse dɛ cedi coin a ɔwɔ afã ebien no, yɛnye Nyankopɔn ntamu ahyɛmudzi kã nkwagye ayɛdze horow nyina ho. Nyankopɔn bɔɔ hɛn nhyira horow ho anohoba, sɛ nokwar mu ara, yedzi ahyɛmu no do a.
Nkɔhyɛnyi Amulek paa mu kãa dɛ, “Iyi … nye mber a … [yɛdze] siesie [hɛn]ho hyia Nyankopɔn kwan” (Alma 34:32). Yesi dɛn siesie hɛnho? Yɛregye ayɛdze horow emudzi mu ara no. President Russel M Nelson ne nsɛm mu no, otwar dɛ yɛsan so, “Kɔdo nnantsew ahyɛmudzi anamɔn kwan no do.” President Nelson kɔdo dɛ, “Hom pisi dɛ hom bɛkã Agyenkwa no do, ber a hom nye No dzi ahyɛmu na nkyii hom sie ahyɛmudzi no, bobuei sunsum mu nhyira na ndzinoa biara a ɔwɔ hɔ ma mbanyin, mbaa na mbofra a wɔwɔ beebiara no mbobow ama hɔn.”
Tse dɛ hom mu pii no, John na Bonnie Newman, nyaa sunsum mu nhyira horow a President Nelson bɔɔ ho anohoba no. Kwesida dakor bi, Bonnie nye hɔn mbofra baasa akɔ asɔr ekyir no, ɔsee John, a ɔnnyɛ Asɔrba no dɛ, “munnkotum monko menye hɔn akɔ asɔr. Ohia dɛ eyɛ w’adwen sɛ enye hɛn bɔkɔ m’asɔr anaa ibɔhwehwɛ asɔr a yebotum abɔmu akɔ, mbom mbofra no hia dɛ wobohu dɛ hɔn egya so dɔ Nyankopɔn.” Kwesida a odzi do nna ekyirii Kwesida biara no, John annkɔ asɔr nko; ɔsomee so, a mfe pii no ɔbɔɔ sanku maa ward, nkorbata horow beberee, na Primaryfo. Ɔyɛɛ me adom ma menye John hyiae wɔ Ebɔwbira 2015 mu, na dɛm nhyiamu mu no, yɛpɛnsapɛnsamu kwan pa a obotum ada no dɔ edzi ama Bonnie nye dɛ ɔnye no bɔkɔ temple, naaso dɛm no nnkotum abamu gyedɛ oenuma no.
Ɔkɔɔr Jesus Christ n’Asɔr a ɔwɔ hɔ ma Nda a Odzi Ekyir Ahotseweefo mfe 39 ekyir no, wonumaa John wɔ afe 2015 mu. Afe kor ekyir no, a nna ɔyɛ mfe 20 ekyir a Bonnie nyaa ɔnoara ne endowment no, wɔsɔɔw John na Bonnie ano wɔ Memphis Tennessee temple no mu. Hɔn mfe 47 babanyin, Robert, kãa no wɔ n’egya ho dɛ, “nokwar m’egya ahyirɛn ampaara ofitsi ber a onyaa asɔfodzi no.” Bonnie dze kãa ho dɛ, John yɛ nyimpa a daa n’enyi gye na ɔwɔ ahomka, naaso ɔgyee ayɛdze horow na oridzi n’ahyɛmu do no ebuei n’ayamuyie mu.”
Christ no Werdambɔ no na Ne Fasusu
Mfe pii a abasen kɔ no, President Boyd K. Packer bɔɔ kɔkɔ dɛ, “Suban pa a ayɛdze horow nnkã ho no nnkotum agye dasanyi anaa wɔama no ntowdo.” Nokwar, nnyɛ ayɛdze na ahyɛmudzi horow no nko na yehia dze asan akɔ hɛn egya hɔ, mbom yɛsan so hia Ne Ba, Jesus Christ, na No Werdambɔ no.
Ɔhen Benjamin kyerɛkyerɛɛ dɛ ɔnam Christ nkotoo ne dzin mu na nkwagye botum edua aba adasamba do (hwɛ Mosiah 3:17; hwɛ Gyedzi ho Nsɛmpɔw 1:3so).
Ɔnam No Werdambɔ do, Jesus Christ gyee hɛn fii Adam n’Asehwe no nsunsuando na ɔyɛe ma hɛn nnuhu na n’ewie no nkwagye ntowdo no etum aba. N’abrabɔ nyina mu no, Ɔyɛɛ fasusu maa hɛn dɛ yɛbɛgye nkwagye ayɛdze horow a no mu na “nyamesu mu tum da edzi” (N&A 84:20).
Agyenkwa no gyee enuma ayɛdze ama “ɔaahyɛ tseneneeyɛ no mã” (hwɛ 2 Nephi 31:5–6) ekyir no, Satan sɔɔ No hwɛe. Dɛmara no, hɛn nsɔhwɛ nnwie wɔ enuma anaa nsɔwano ekyir, mbom yɛregye ayɛdze krɔnkrɔn horow na yeridzi ahyɛmudzi horow a ɔkã ho do no, dze kan nwanwa hyɛ hɛn mã, na ɔma hɛn ahoɔdzen ma yɛkõ tsia na yedzi nsɔhwɛ do nkonyim.
Kɔkɔbɔ
Isaiah hyɛɛ nkɔm dɛ nda a odzi ekyir mu no, “asaase so aprɔw … osiandɛ … wɔasakyer ahyɛdze no” (Isaiah 24:5; hwɛ N&A 1:15so).
Kɔkɔbɔ a ɔnye no sɛ a, woyii kyerɛɛ Nkɔnhyɛnyi Joseph Smith, nye dɛ binom “wɔdze hɔn ano famfa twe bɛn [Ewuradze], … na wɔkyerɛkyerɛ nyimpa ne mbrasɛm dɛ mbrɛ ɔyɛ kyerɛwsɛm nkyerɛkyerɛ, na wɔyɛ dɛ wɔwɔ nyamesompa, na mbom wɔpow no tum no” (Joseph Smith—Abakɔsɛm 1:19).
Paul so bɔɔ kɔkɔ dɛ beberee benya “nyamesompa, na mbom wɔpow no mu tum no: woyinom na dan woho fi hɔn nkyɛn” (2 Timothy 3:5). Misi do, woyinom na dan woho fi hɔn nkyɛn.
Abrabɔ mu nsɔhwɛ pii na dza wɔdan hɛn adwen no tse dɛ “mpataku edzifodzipɛfo” (Matthew 7:15). Ɔyɛ guanhwɛfo nokwafo na obesiesie, ɔbɔbɔ hɔnho ban, na ɔabɔ nguan na kuw no kɔkɔ sɛ mpataku yinom reba a (hwɛ John 10:11–12). Dɛ yɛyɛ guanhwɛfo aboafo a yɛhwehwɛ sũasũa Oguanhwɛfo pa n’abrabɔ a odzi mu no, ana yɛnnyɛ hɛnara hɛn akra ho nguanhwɛfo na binom so dze dɛmara a? Nkɔnhyɛfo, adzehufo, na nyikyerɛfo, hɔn afotu, Sunsum Krɔnkrɔn n’akyɛdze na no tum no, sɛ yɛweɔn na yɛyɛ ahoboa a yebotum ehu mpataku no dɛ wɔreba. Na mbom, sɛ yɛyɛ oguanhwɛfo a yɛnnhwɛ hɛnara hɛn akra na binom akra do yie a, emimdzi na obesi. Biribiara mmfa moho dze emimdzi ba. Moto nsa frɛ hɛn mu kor biara dɛ ɔbɛyɛ oguanhwɛfo nokwafo.
Sũahu na Dasegye
Sacrament no yɛ ayɛdze a ɔboa hɛn ma yɛtsim wɔ anamɔn kwan no do, na yeridzi no emudzi mu yɛ dasegye dɛ yerisie ahyɛmudzi horow a ɔkã ayɛdze horow nkaa nyina ho no do. Mfe kakra a abasen no, ber a nna menye me yer, Anita rosom wɔ Arkansas Little Rock Asɛmpakã Dwuma no, menye asɛmpasomafo beenu bi kɛkyerɛkyerɛ adze. Adzesua ber no, nuabanyin pa bi a nna yɛrekyerɛ no adze kãa dɛ, “Maaba hom asɔr pɛn; ebɛnadze ntsi na ɔwɔ dɛ Kwesida biara hom dzi paanoo na wɔnom nsu yi? Hɛn asɔr dze, yɛyɛ no mpɛn ebien afe no mu, Easter na Borɔnya no, na ntseasee wɔ mu papaapa.”
Yɛnye no kyɛɛ dɛ ɔyɛ mbrasɛm ma hɛn dɛ “wohyia mu mpɛn pii na wodzi paanoo na wɔnom wenyin” (Moroni 6:6; hwɛ N&A 20:75 so). Yebuei hɛn ano kenkaan Matthew 26 na 3 Nephi 18. Oyii ano dɛ ɔda ho nnhu no ho hia.
Afei yɛnye no kyɛɛ ntõtõho a odzi do no: “Susu dɛ enya kaar akwanhyia dzendzenndzen bi. Epira na w’enyiwa do esiw wo. Obi tu mbirika ba, a ohun dɛ w’enyiwa do esiw wo, na ɔfrɛ Mprɛprɛn Esian Bambɔ nkanee, 911. Wɔma wo ayarhwɛ na w’enyiwa do tsetsew wo.”
Yebisaa nuabanyin yi dɛ, “Sɛ itum hu dza etwa woho ehyia a, ebɛn nsɛm na ibebisa?”
Ɔkãa dɛ, “Mebɛpɛ dɛ muhu mbrɛ misii befir hɔ na onyia a ohun me. Mebɛpɛ meda no ase dabiara osiandɛ ɔgyee me nkwa.”
Yɛnye nuabanyin pa yi kyɛɛ mbrɛ Agyenkwa no si gyee hɛn nkwa asɛm, mbrɛ osi hia dɛ yɛda No ase dabiara, dabiara, dabiara!
Afei yebisaa dɛ, “Ehu dɛ Ɔdze No nkwa maa ɔwo na hɛn yi, mpɛn ahen na ibɛpɛ dɛ idzi paanoo na anom nsu no dɛ No honandua na bɔgya asɛnkyerɛdze?”
Ɔkãa dɛ, “maatse ase, maatse ase. Mbom aka adze kor. W’asɔr no mu nnyɛ dɛw dɛ medze no.”
Ɔno na yebuaa dɛ, “Sɛ Agyenkwa Jesus Christ dua w’abow mu a nkyɛ ebɛnadze na ibɛyɛ?
Ɔkãa dɛ, “ mobu ntwɛr, ntsɛmara.”
Yebisaa dɛ, “Sɛ nnantsew kɔ Latter-day Saint asɔr dan mu a nnyɛ dɛm nkã-tse yi—obu ma Agyenkwa no, na inya a?”
Ɔkãa dɛ, “matse ase, matse ase, matse ase!”
Ɔbaa asɔr dɛm Easter Kwesida no na ɔkɔɔr do sanee bae.
Meserɛ hɛn mu kor biara dɛ yɛmbisa hɛnho dɛ, “Ebɛn ayɛdze horow, a sacrament no kã ho, na ohia dɛ menya, na ebɛn ahyɛmudzi horow na ohia dɛ meyɛ, me sie, na midzi do?” Mobɔ anohoba dɛ yɛreyɛ ayɛdze horow na yeridzi ahyɛmudzi horow a ɔkã ho no dze kan nwanwa bɛbrɛ hɛn na yenya bambɔ wɔ wiadze yi ɔrokɔ do hyɛ sum no. Jesus Christ ne dzin mu, amen.