Pwarata fan iten ewe Mwichefen, Pwarata fan Iten Manauach
Non kan ran repwe feitto, esap tufich ach sipwe manau non pekin ngun nge esap wor emwen, aurour, me ekinamwe, me pesepes ese much seni ewe Ngun mi Fel.
Mwa met ren ei ew tufich mi amwarar ai upwe fitikemi ne apwapwai Paska non ei Raninfelin mwichenapen mwichefen! Ese wor och mettoch epwe kon murino nap seni ach sipwe chemeni ewe mettoch mi kon auchea a fis won fonufan ren ach fen ngeni ewe emon mi kon auchea mi manau won ei fonufan. Non ei, Sounengin non ewe Mwichefen, sia fen ngeni I ewe a poputani An Achasefan esemuch non ewe Ataken Gethsemane. A mochen epwe riaffou ren tipis me apwangapwangen emon me emon kich, minne riaffou a efisi cha an epwe sűk seni inisin. A irapengesino won ewe irapenges Calvary me manausefan non ewe aunungatin ran pwe epwe ewe aemonun aramas noun Semach won Nang mi manausefan. Ngang mi tongei I me pwarata pwe I mi manau! I ewe a emweni me auroura An Mwichefen.
Me nukun an ewe Chon Angasano Achasefan esemuch, esap wor emon neich epwe wor an apinukunuk ne niwin sefan ngeni Semach won Nang. Me nukun An Manausefan, mano epwe ina soponon. An ach Chon Amanau Achasefan a fori manau esemuch epwe tufich me manau fochocoh epwe tongeni fis ngeni kich.
Iwe pokiten An misin mi amwarar me ewe kinamwe A mut ngeni chon tapweno mwirin iwe punuwei, Wendy, me ngang aua mefi kinamwe non ewe pwinin January 2 2018 nupwen aua neno ren ew kokkon fon a urenikich pwe Preseten Thomas S. Monson a mano.
Sia ennetin pwositi Preseten Monson! Sia asamonu manauan me uruon. Emon mi tupwon, a nikitatiw ew napanap esemuch won ir meinisin ekkewe mi sinei i me won ewe Mwichefen mi tongei.
Non Raninfel, January 14, 2018, non ewe rum asan non ewe Salt Lake Tempel, ewe Aewin Presetensi a etetten sefan non ewe etetten mi mecheres me pin a fis me ren ewe Samon. Iwe non ewe mwich nanew, chon ewe Mwichefen non unusen fonufan ra eitata pour ne apungano ewe foffor a fis akkom me ren ekkewe Aposel. Ua kinisou ren ami aninis.
Ua pwan kinisou ren ekkewe ra akkom mwei. A fen ew ai kinisou ai angang non ewe Mwichen Ekkewe Engon me Ruemon Aposel non 34 ier me ai sineochu 10 me nein ekkewe 16 akkom Presetenin ewe Mwichefen. Ua kaeo chommong seni emon me emon ir.
A pwan watte ai kinisou ngeni ai kewe neuo. Ai kewe wanimon great-grandparents ra choni ei Mwichefen me non Europe. Ir meinisin ekkei aramas mi pwaracho ra fangeno mettoch meinisin ar repwe feito Zion. Nge, fansoun tappin aramas mwirin, esap meinisin ai kewe neuo ra nikitu. Pokiten ena, use mwarita non ew imw mi wor ewe kapas allim non.
Ua asamonu semei me inei. Ra fokkun auchea ngeniei me ra aitiei nesen mi auchea. Esap naf ai kinisou ngenir ren ewe pwapwa ra awora non imwem fan itei me pwi me fefinei kewe. Pwan, nupwen ngang mi chok emon at, ngang mi sinei pwe mi wor och mettoch ese nom non manauei. Non ei ran ua fiti efoch taraku me feino ngeni ew nenien amomo puk an LDS ai upwe kutta ew puk usun ewe Mwichefen. Ua sani upwe kaeo usun ewe kapas allim.
Nupwen ua weweiti ewe Kapasen Emirit, ua mochen semei me inei repwe manaueni ena annuk. Iwe, ew ran nupwen ngang mi chok kukkun, ua feitiw fan imwem we me amoku meinisin ekkewe rumen sakaw won ewe simen! Ua ekieki pwe semei we epwe awataei, nge ese apasa och kapas.
Nupwen ua marita me poputa ne weweiti ewe kokkot mi amwarar an Semach won Nang, ua kan apasa ngeniei, “Use chiwen mochen niffangen Kirisimas! Ua mochen riri ngeni semei me inei.” Ena fansoun ngang mi awitiwiti ese fis tori an semei me inei ra nu seni 80 ier, nge a fis. Use tongeni awewei ewe pwapwa ua mefi non na ran, me iteiten ran ua meifi ewe pwapwa ren ar ririfengen me ai riri ngeniir.
Non 1945, nupwen ngang mi nom non sukunen safei, ua punuweni Dantzel White non Salt Lake Tempel. Aua feioch ren tiwemon nengin murino me emon at auchea. Ikenai am we famini mi watteno ina ew me nein ekkewe watten pwapwa non manauei.
Non 2005, arap ngeni 60 ierin am pupunu, punuwei achengicheng Dantzel a weiweita an mano. Ren ekis fansoun, ai netipeta a arap epwe ngaweno. Nge ewe porousen Paska me ewe pwonen manau sefan a anisiei.
Iwe ewe Samon a wato Wendy Watson rei. Aua ririfengen non ewe Salt Lake Tempel non April 6, 2006. Ua tongei! I emon fefin mi amwarar—ew feioch ngeniei, ngeni ami famini, me ngeni unusen ewe Mwichefen.
Ekkei feioch ra feito pokiten ach kutta me ausening ngeni aurouren ewe Ngun mi Fel. Preseten Lorenzo Snow a apasa, “Iei ewe tufich mi nap an meinisin Aramas mi Pin Non Fansoun Soponon… pwe ina ach pung ne angei ewe pwanon ewe Ngun iteiten ran non manauach.”
Ew ekkewe mettoch ewe Ngun a kan soun wanong non ai ekiei non ei fansoun ua angei wisei minafo ren Presetenin ewe Mwichefen ina usun an ewe Samon mochen pwarano An ekiek me mochen. Ewe tufichin angei pwarata ina ew ekkewe niffang mi nap me ren Kot ngeni Noun semirit.
Seni ewe amemefin ewe Ngun mi Fel, ewe Samon epwe anisi kich non ekkewe mettoch sia mochen fori mi tupwon. Non ew rumwen reirei, ua uta unukun emon mi semwen—use sinei ifa usun upwe fori ew angangen reirei minafo—me ua mefi ewe Ngun mi Fel a awewei ewe angang non mokurei.
Ai upwe apochokuna tingoren pupunu ngeni Wendy, ua apasa ngeni, “Ngang mi sinei ussun pwarata me ifa usun upwe angei.” Ren an tufich—me, usun ua fen kaeo, ususun neminewe—a fen kutta me angei pwisin an pwarata usum, minne a ngeni ewe pwaracho an epwe apasa ewer.
Ussun emon chon ewe Mwichen Engon me Ruemon Aposel, ua iotek iteiten ran fan iten pwarata me kinisou ngeni ewe Samon iteiten fansoun A kapas ngeni netipei me ai ekiek.
Ekieki manamanan pwarata! Met chok wisach non Mwichefen, sa tongeni iotek ngeni Semach won Nang me angei emwen me aurour, sa tongeni sinei usun feiengaw me fitikoko, me sa tongeni apwonueta mettoch sise tongeni pwisin fori. Ika sipwe ennetin etiwa ewe Ngun mi Fel me kaeo ne esinna me weweiti An amemef, sipwe emwen non napanap mi watte me kukkun.
Nupwen ua keran mesengeni ewe weiresin angangen fini ruemon chon aninis, ua ekieki ifa usun upwe tongeni tufichin fini ruemon chok seni engon me ruemon mwan ngang mi tonger me asamonur.
Pokiten ngang mi sinei pwe aurour mi och a anongonong won mirit mi och, ua iotek fiti churi emon me emon ekkewe Aposel. Mwirin ua imuno non ew rum non ewe tempel me kutta mochenin ewe Samon. Ua pwarata pwe ewe Samon a emweniei ne fini Preseten Dallin H. Oaks me Preseten Henry B. Eyring pwe repwe nei chon aninis non ewe Aewin Presetensi.
Non chok ena napanap, ua pwarata pwe ewe Samon auroura kokkon Elter Gerrit W. Gong me Elter Ulisses Soares ar repwe kefinita pwe Noun Aposel. Ua etiwer ngeni ei wisen pwipwi fengen non angang mi sokono.
Nupwen aua chufengen non wisem ren Mwichen ewe Awein Presetensi me Mwichen Engon me Ruemon, am kewe rum ra winiti rumwen pwarata. Ewe Ngun mi wesen nom. Nupwen aua osukosuk ren itenap mi weires, ew mokutukut mi apwapwa a fis nupwen emon me emon Aposel a wau an ekiek me memef. Ina mwo aupwe sokono non ami ekiek nepoputan, ewe tong am mi mefi fan iten emon me emon ese siwin. Am tipeew a anisi kem ne esinna mochenin ewe Samon fan iten An Mwichefen.
Non am mwich, ewe napan esap ina pungunon! Aua ausening fengen ren iotek me kapas fengen tori aua tipeew fengen. Iwe nupwen aua ennetin tipeew, ewe etipeewin memefin ewe Ngun mi Fel a men apwapwa! Aua mefi met ewe Soufos Joseph Smith mi sinei nupwen a kaeo, “Nupwen a tipeew nefinach sia angei manaman ren Kot.” Ese wor emon chon ewe Aewin Presetensi ika Mwichen ekkewe Engon me Ruemon Aposel epwe fori mokutukun ewe Mwichefen me nukun an tingorei ewe Samon!
Pwi me fefinei, ifa usun sipwe winiti ekkewe mwan me fefin—chon angang usun Kraist—ewe Samon a mochen sipwe winiti? Ifa usun sipwe kuna ponuwen kapaseis mi aosukosuka kich? Ika met ewe mi fis ngeni Joseph Smith mi amwarar nein ekkewe Ira mi Pin a aitikich och mettoch, ina pwe nang a suk me Kot a kapas ngeni Noun kewe.
Ewe Soufos Joseph Smith a fori ew etetten ren ach sipwe fori ne apungano ach kapaseis. A chengen me ren pwonen James pwe ika ese wor ach mirit sipwe tingor ngeni Kot, nekukunun Joseph a uwei an kapaseis ngeni Semach won Nang. A kutta pwarata fan itan, me an kutta a suki ei amuchunon kinikinin fansoun.
Usun chok, met om kutta epwe suki ngonuk? Met mirit ese wor reom? Met en mi mefi ew atapwanapanen mochen ne sinei ika weweiti? Tapweno mwirin ewe nenien appiru an Joseph Smith. Kutta ew neni mi fanafaneno ikewe en mi tongeni fefeino ie. Etekisonok me mwen Kot. Wau unusen netipom ngeni Semom non Nang. Kun ngeni I ren ponuwen kapaseis me ren kinamwe.
Iotek non iten Jises Kraist usun ami osukosuk, ami nuokus, ami apwangapwang—ewer, mochenin netipemi. Iwe mwirin ausenging! Makkei ekkewe ekiek a tonong non mokuremi. Makkei ami memef me fori ren foffor ekkewe oua memef oupwe fori. Nupwen oupwe forsefani ei etetten iteiten ran, iteiten maram, iteiten ier, oupwe “marita non ewe nongonongen pwarata.”
Kot mi wesen mochen epwe kapas ngeni kemi? Ewer! Emon mwan epwe fen eitau poun mi apwangapwang an epwe sotuni ne akaunoi ewe chonupupu Missouri non fetanin, nap seni an epwe akounoi Kot seni an epwe ninatiw mirit seni nang won mokuren ekkewe Aramas mi Pin.
Ousap aureki usun met mi ennet. Ousap fen aureki ion ami mi tongeni nuku. Seni pwisin ami pwarata, ami mi tongeni angei ami pwisin kapasen pwarata pwe ewe Puken Mormon ina ewe Kapasen Kot, pwe Joseph Smith i emon soufos, me iei an ewe Samon we Mwichefen. Ese nifinifin met ekkoch repwe apasa ika fori, ese wor emon epwe tongeni sonani ewe pwarata mi kawor ngeni netipemi me ami ekiek usun met mi ennet.
Ua pesei kemi pwe oupwe awatteno ami tufichin angei ami pwisin pwarata, pun ewe Samon a fen pwonei pwe ika oupwe tingor, oupwe angei pwarata mwirin pwarata, mirit mwirin mirit, pwe oupwe sinei ekkewe mettoch mi monomon me kinamwe—ewe a wato pwapwa, ewe a wato manau esemuch.
Mi chommong met Sememi won Nang a mochen oupwe sinei. Usun met Elter Neal A. Maxwell a aitikich, “Ngeni ekkewe mi wor meser ne kuna me sening ne ausening, mi fat pwe ewe Sam me ewe Nau ra fangeno monomonen ekkewe fonufan!”
Ese wor mettoch epwe sukano nang usun chufengenin watten nimenimoch, wesen aneasochis, ennetin kutta, kametip iteiten ran won ekkewe kapasen Kraist non ewe Puken Mormon, me awora fansoun no ngeni ewe tempel me angangen uruon famini.
Ennetin, epwe wor fansoun nupwen oupwe mefi pwe ouse angei pwarata. Nge ua pwon pwe nupwen oupwe soposopono ne aneasochis, apasa ami kinisou ren ekkewe feioch ewe Samon a ngeni kemi, me nupwen oupwe tipepos ne asufonu an ewe Samon fansoun, oupwe angei mirit me wewe oua kutta. Ekkewe feioch ewe Samon a awora ngeni kemi—pwan manaman—repwe fis. Om angei om pwisin pwarata epwe wato feioch me manaman.
Ngang mi apinukunuk usun ekkewe ran mwach. Repwe masoweni tufich ngeni kich ach sipwe fefeita, aninis, me uwei ewe kapas allim ngeni nesopun fonufan meinisin. Nge ngang mi pwan apareni usun ekkewe ran mwach. Sia nom non ew fonufan mi fitikoko me mi napeno osukosukan. Ewe tufichin mak fetan won internet me ach chosani porous iteiten awa a apekusu kich ren porous ese kauk. Ika epwe wor ach apinukunuk ne kutta mettoch mi auchea ekkewe chommong ekiek me miriten aramas ra angawa ennet, mi auchea sipwe kaeo ne angei pwarata.
Ach Chon Amanau me Chon Angasano, Jises Kraist, epwe fori ekkoch An manaman nefinen iei me nupwen epwe wareto sefan. Sipwe kuna esisin mi amwarar pwe Kot ewe Sam me Noun we Achengicheng repwe nemeni ei fonufan non tekia me ning. Nge, non ekkan ran mwach, esap tufich ach sipwe manau non pekin ngun me nuku ewe emwen, aurour, me amemefin ewe Ngun mi Fel.
Pwi me fefinei achengicheng, ua sio ngeni kemi oupwe anapano ami tufich ren pekin ngun ne angei pwarata. Mut ngeni ei Raninfelin Paska epwe fansoun siwin non manuemi. Fini ne fori ewe angangen ngun mi namot ne pwapwaiti ewe niffangen ewe Ngun mi Fel me ausening mongungun ewe Ngun fan chommong me non fatafatoch.
Usun Moronai, ua pesei kemi non ei Raninfelin Paska pwe “oupwe feito ren Kraist, me kamwochuno niffang mi och meinisin,” poputa ren ewe niffangen ewe Ngun mi Fel, ena niffang mi tongeni me epwe siwini manauemi.
Kich chon tapweno mwirin Jises Kraist. Ewe ennet mi kon auchea ewe Ngun mi Fel epwe pwarata ngeni kemi pwe Jises I ewe Kraist, ewe Noun ewe Kot mi manau. I mi manau! I Chon Peni kich ngeni ewe Sam, ach Chon Appiru, me ach Chon Angasano. Non ei Raninfelin Paska, sia achema An asoren achasefan, An ennetin Manausefan, me An pin.
Iei An Mwichefen, a niwin sefan me ren ewe Soufos Joseph Smith. Ua ennetin pwarata, fiti ai tong ngeni emon me emon ami, non ewe it mi pin Jises Kraist, amen.