Na Veisau Me ra Vaqaqacotaki na iTabagone

Mai vei Elder Quentin L. Cook

Ena Kuoramu ni iApositolo Le Tinikarua

E vuqa vei ira na cauravou kei na goneyalewa era na bole yani ka tiko ga ena salatu ni veiyalayalati ena raimatua dodonu vei ira noda itabagone.

Vinaka vakalevu, Peresitedi Nelson, na veidusimaki vakatakilai mai rekitaki baleta na ivakadinadina ena papitaiso kei na veituberi ko ni kerea me keimami wasea me vukei mera qaqaco na itabagone me tubu nodra gumatua vakalou.

Ni bera meu wasea na veisau oqo, keimami sa vakavinavinaka ena sala cecere era qarava na lewenilotu ena veivakatorocaketaki ena kena sa yaco tiko ena vakalesuimai ni kosipeli. Me vaka a vakatura o Peresitedi Nelson ena yabaki sa oti, o sa taura na memu wainibula!

O ni reki ena vulica na Lako Mai, Mo Muri Aue vale. O ni sa qarava talega mai na veisau ena lotu. Era sa duavata na lewe ni kuoramu ni italatala qase kei na iSoqosoqo ni Veivukei ena cakacaka ni veivakabulai.

Sa vuabale na neitou vakavinavinaka. Keimami sa vakavinavinaka vakatabakidua ni ra sa kaukauwa ka yalodina tiko na noda itabagone.

O ira noda itabagone era bula tiko ena dua na gauna e veivakayavalati ka veibolei talega. Na digidigi sa tu sa levu sara na kena veimataqali. Me vakataka oqo: na talevoni vuku nikua e tu kina na veitukutuku bibi sara ka veilaveti, oka kina na tuva kawa kei na veivolanikalou tabu. Ena yasana kadua, era tu kina na veika lialia, vakasisila, kei na ka butobuto a sega ni tu kina e liu.

Mera vukei na itabagone mera dutaitaka na digidigi medre oqo, sa vakarautaka kina na Lotu e tolu na parokaramu bibi ka matata. iMatai, sa vaqaqacotaki na lewenivuli ka sa vakatetei yani ki na itikotiko. iKarua, sa soli mai e dua na parokaramu ni gonelalai kei na itabagone e tiko kina na itaviqaravi talei kei na torocake yadudua ena Sigatabu sa oti maivei Peresitedi Nelson, Peresitedi Ballard, kei ira na Vakailesilesi Raraba. Na ikatolu ni parokaramu oya na veisau vakaisoqosoqo ni itabagone mera raimatua kina na bisopi kei na iliuliu. Na raimatua oqo e dodonu me na kaukauwa vakayalo ka na vukei ira na itabagone mera mataivalu ni itabagone sa kerea o Peresitedi Nelson mera yacova.

Cokoti Vata na iTuvatuva

Na sasaga oqo, vata kei na veika sa vakaraitaki ena rua na yabaki sa oti, era sega ni veisau vakatikitiki. Na veisau yadua sa tiki yaga sara ni ituvatuva cokoti vata mera vakalougatataki kina na Yalododonu ka vakarautaki mera sotava na Kalou.

Dua vei ira na ituvatuva sa baleta tiko na itabatamata e tarava. Era sa kerei na noda itabagone mera dui cakava nodra ilesilesi ni ra se gone—mera kua ni cakava na itubutubu kei na iliuliu na ka era rawa ni cakava ga na itabagone.

Vakaraitaki Raraba

Nikua sa vakaraitaki raraba yani na veisau ni isoqosoqo ni itabagone ena tabanalevu kei na iteki. Me vaka sa vakamacalataka o Peresitedi Nelson, ena vakamacalataka o Sister Bonnie H. Cordon na veisau ena Goneyalewa ena yakavi nikua. Dua na inaki ni veisau au na tukuna yani o ya me qaqacotaki na lewe ni Matabete i Eroni, kuoramu, kei na mataveiliutaki ni kuoramu. Na veisau oqo eda cakava vata kina na Vunau kei na Veiyalayalati 107:15, e tukuna, “Na matabisopi e mataveiliutaki ni matabete oqo [i Eroni], ka tu kina na kena idola se na kena dodonu.”

Dua na itavi vakaivolanikalou nei bisopi o ya me vakatulewa vei ira na bete ka bose vata kei ira, ka vakavulici ira ena nodra ilesilesi. Me ikuri, o imatai ni daunivakasala ena matabisopi me raici ira vakatabakidua na ivakavuvuli kei ikarua ni daunivakasala na dikoni.

Sa vakakina, me muavata ki na ivakatakila oqo ena Vunau kei na Veiyalayalati, na mataveiliutaki ni Cauravou sa na boko laivi. Sa levu sara nodra caka vinaka na veitacini yalodina oqo, eda sa vakavinavinaka kina vei ira.

Eda sa nuitaki ira na matabisopi ni ra na vakacerecerea ka raicamatua na nodra ilesilesi ni matabete na cauravou ka vukea nodra itavi ni kuoramu. Era na kacivi na daunivakasala qase gumatua ni Cauravou mera vukei ira na mataveiliutaki ni kuoramu ni Matabete i Eroni kei na matabisopi ena nodra itavi. Eda sa nuidei tiko ni vuqa na cauravou kei na goneyalewa era na bole yani ka tiko ga ena salatu ni veiyalayalati ena raimatua dodonu vei ira noda itabagone.

Ena ituvatuva veiuqeti ni Turaga, sa ilesilesi nei bisopi na tamata yadua ena tabanalevu. Ena vakalougatataki ira na itubutubu ni itabagone kei na itabagone. E dua na bisopi a raica ni a vakasalataka tiko e dua na cauravou e valuti tiko ena iyaloyalo vakasisila, me na vukei koya me veivutuni ke vukei rau na itubutubu ena loloma kei na veikilai yalo. Na vakabulai nei cauravou sa vakabulai kina na nona vuvale ka rawa ga oqo ena nona cakacaka o bisopi ena vukudratou taucoko na vuvale. Sa mai dua na lewe ni Matabete i Melikiseteki kilikili o cauravou oqo ka sa kaulotu tudei tiko.

Me vaka e vakatututaka na italanoa oqo, na veisau oqo ena:

• Vukei na bisopi kei nodra daunivakasala mera raicamatua na usutu ni nodra itavi vei ira na itabagone kei ira na Lalai.

• Vakatikori na kaukauwa kei na itavi ni Matabete i Eroni me usutu ni cauravou yadua ena nona bula kei na lalawa.

Na veisau oqo ena:

• Vakamatatataka talega na itavi ni mataveiliutaki ni kuoramu ni Matabete i Eroni kei na nodra ripote yani vakadodonu ki na matabisopi.

• Vakauqeti ira na iliuliu matua me vukea ka tubera na mataveiliutaki ni kuoramu ni Matabete i Eroni me laveti cake na kaukauwa kei na lewa ni nodra itavi.

Me vaka, ni veisau oqo e sega ni vakalailaitaka na ilesilesi ni matabisopi vei ira na goneyalewa. Sa vakavulica oti o Peresitedi Nelson, “Na imatai ka ilesilesi bibi duadua [nei bisopi] o ya me karoni ira na cauravou kei na goneyalewa ni nona tabanalevu.”

Era na cakava rawa vakacava na noda bisopi lomani daucakacaka na ilesilesi oqo? O ni nanuma tiko, ena 2018, a veisau na kuoramu ni Matabete i Melikiseteki mera cakacaka vakavoleka kei na iSoqosoqo ni Veivukei me rawa ki na kuoramu ni italatala qase kei na iSoqosoqo ni Veivukei, ena veidusimaki nei bisopi, mera colata na ilesilesi bibi a dau kania tu vakalevu e liu na nona gauna. Na ilesilesi oqo e oka kina na cakacaka ni kaulotu kei na cakacaka ni valetabu kei na tuvakawa ena tabanalevu—vakakina e vuqa na veiqaravi ki na lewe ni tabanalevu.

O bisopi e sega ni rawame lesia na ilesilesi eso, me vaka ena itabagone, daunilewa, karoni ira na tiko leqa, ka raica raraba na veika vakailavo kei na bula raraba vakayago. Na kena oqo, era vica wale mai na kena eda a kila vinaka tu beka ena gauna e liu. Me vaka a vakamacalataka o Elder Jeffrey R. Holland ena yabaki sa oti ni a vakaraitaki na veisau ena kuoramu ni Matabete i Melikiseteki: “O bisopi ena dei tikoga, me bete levu vakatulewa ena tabanalevu. Ia na ituvatuva vou oqo [ena kuoramu ni italatala qase kei na iSoqosoqo ni Veivukei] ena vakatulewa kina o koya ena cakacaka ni Matabete i Melikiseteki kei na iSoqosoqo ni Veivukei ka sega ni gadrevi vua me cakava na nodrau cakacaka na isoqosoqo oqo.”

Me vakataka, o peresitedi ni iSoqosoqo ni Veivukei kei peresitedi ni kuoramu ni italatala qase, ni lesi, e nona ilesilesi cecere me vakasalataki ira na qase—vakakina vei Peresitedi ni Goneyalewa me vakasalataki ira na goneyalewa. Ni o bisopi duadua ga ena veiqaravi vaka-daunilewa, o ira na iliuliu tale oqo era na ciqoma na ivakatakila mai lomalagi me veivuke ena ibolebole sega ni gadrevi kina na daunilewa se okati ena cakacaka ni veivakalolomataki eso.

E sega ni tukuni ni sega ni rawa vua e dua na goneyalewa me kakua ni vosa vei bisopi se nona itubutubu. Mera raici ira matua na itabagone! E tukuni tiko ni rawa vei iliuliu ni Goneyalewa me na sotava vinaka na nodra gagadre na goneyalewa yadua. O bisopi ena kauwai talega vei ira na goneyalewa kei na cauravou, ia eda sa kila na kaukauwa e lako mai vei ira na iliuliu ni Goneyalewa kaukauwa, gumatua, ka yalodei era dauloloma ka veituberi, sega ni ra siova nodra itavi na mataveiliutaki ni kalasi, ia era vukea na itabagone mera rawata nodra itavi.

Ena wasea yani o Sister Cordon na ikuri ni veisau talei ni goneyalewa ena bogi nikua. Ia, au sa vakaraitaka yani ni o ira na peresitedi ni Goneyalewa ni tabanalevu era sa na ripote ka veivakasalataki vei bisopi ni tabanalevu. E liu, na itavi oqo a rawa me lesi vei daunivakasala, ia ni da toso ki liu, ira na goneyalewa era na lesi vakatabakidua vua e dua e taura tu na idola ni vakatulewa ena tabanalevu. O Peresitedi ni iSoqosoqo ni Veivukei ena tomana tiko nona ripote vakadodonu vei bisopi.

Ena veiqaravi raraba vakakina ena iteki, ena tomani tiko na mataveiliutaki ni Cauravou. Ena veiqaravi ena iteki, e dua na lewe ni matabose e cake me sa peresitedi ni Cauravou ka cokovata kei rau na lewe ni matabose e cake lesi ki na Goneyalewa kei na Lalai, me ratou lewe ni Komiti ni Matabete i Eroni kei na Goneyalewa ni iteki. E ratou na cakacaka vata na veitacini oqo kei na mataveiliutaki ni Goneyalewa ni iteki ena komiti oqo. Ni veiliutaki e dua na daunivakasala vei peresitedi ni iteki, na komiti oqo ena bibi cake baleta ni levu na parokaramu kei na itaviqaravi ena parokaramu vou ni Gonelalai kei na iTabagone ena qaravi ena iteki.

O iratou na lewe ni matabose e cake oqo, ena veidusimaki ni mataveiliutaki ni iteki, e ratou sa ivurevure vei bisopi kei na kuoramu ni Matabete i Eroni ena sala e tautauvata nodratou veiqaravi na lewe ni matabose e cake ki na kuoramu ni italatala qase ni tabanalevu.

Me kena isema, e dua tale na lewe ni matabose e cake me sa peresitedi ni Matawilivola ni Sigatabu ni iteki, ke sa gadrevi, me na lewena na komiti ni Matabete i Eroni kei na Goneyalewa ni iteki.

Na ikuri ni veisau vakaisoqosoqo ena qai vakau tiko na kena itukutuku vei ira na iliuliu. Na veisau oqo e oka kina:

• Na bose ni komiti ni itabagone ni matabisopi sa na sosomitaki ena matabose ni itabagone ni tabanalevu.

• Na vosa “Muavata” sa na bokoci ka sa vakatokai me “iTaviqaravi ni Goneyalewa,” “iTaviqaravi ni kuoramu ni Matabete i Eroni,” se “itaviqaravi ni itabagone” ka me vakayacori e veimacawa ke rawa.

• Na ilavovakarau ni tabanalevu ni itaviqaravi ni itabagone sa na vidai vakatautauvata vei ira na cauravou kei na goneyalewa ena kedra iwiliwili ena isoqosoqo yadua. E dua na ilavo veiraurau ena vakarautaki ki na itaviqaravi ni Lalai.

• Ena veiqaravi kece—ena tabanalevu, iteki, kei na kena raraba—eda na taurivaka na vosa “isoqosoqo” ka sega ni “mataisoqosoqo.” O ira era liutaka na iSoqosoqo Raraba ni Veivukei, Goneyalewa, Cauravou, Lalai, kei na Matawilivola ni Sigatabu era sa na vakatokai mera “Vakailesilesi Raraba.” O ira era liutaka na isoqosoqo ni veiqaravi ena tabanalevu kei na iteki era na vakatokai mera “vakailesilesi ni tabanalevu” kei na “vakailesilesi ni iteki.”

Na veisau sa mai vakaraitaki nikua ena vakayacori ena gauna ga era sa vakarau kina na tabanalevu, tikina, kei na iteki, ia sa na tekivu tiko ena 1 ni Janueri, 2020. Na veisau oqo, ni umani ka cokoti vata ena veisau e liu, ena matanataka tiko na sasaga vakayalo vakaisoqosoqo e salavata kei na ivunau mera kalougata ka qaqaco na tagane yadua, yalewa, itabagone, kei na gone, mera vukei mera muria na ivakaraitaki ni iVakabula, o Jisu Karisito, ni da toso tiko ena salatu ni veiyalayalati.

Kemuni na taciqu kei na ganequ lomani, au yalataka ka vakadinadinataka ni veisau matata oqo, ena veidusimaki veivakauqeti nei peresitedi ka parofita, Russell M. Nelson, ena vakaukauwataka ka qaqacotaki ira yadua na lewe ni lotu. Era na vakaceretaka na itabagone na nodra vakabauta na iVakabula, taqomaki mai na veitemaki nei vunimeca, ka tu vakarau mera sotava na veibolei ni bula. Ena yaca tabu i Jisu Karisito, emeni.

iDusidusi

1. Russell M. Nelson, ena “Latter-day Saint Prophet, Wife and Apostle Share Insights of Global MinistryNewsroom, Oct. 30, 2018, newsroom.ChurchofJesusChrist.org.

2. Me ikuri, o ni sa sasaga vagumatua mo ni taurivaka na yaca dodonu ni Lotu a veivakavulici kina o Peresitedi Russell M. Nelson ka nanuma tiko noda iVakabula ena loloma kei na vakarokoroko ena nomuni cakava vakakina.

3. “Eda sa kacivi na lewe ni Lotu i Jisu Karisito ni Yalododonu Edaidai ‘meda cakacaka ena nona were ni vaini me baleta na nodra vakabulai na yalo ni tamata’ (Vunau kei na Veiyalayalati 138:56). Na cakacaka ni veivakabulai oqo e wili kina na cakacaka vakadaukaulotu ni lewenilotu, nodra maroroi na saumaki mai, vakabulabulataki ni lewenilotu luluqa, cakacaka ni vola kawa kei na valetabu, kei na vakavulici ni kosipeli. Ena veiliutaki ena cakacaka oqo ena tabanalevu na matabisopi, ka ra na veivuke kina na lewe ni matabose ni tabanalevu” (iVoladusidusi 2: Veiliutaki ena Lotu, 5.0, ChurchofJesusChrist.org).

4. Oi keda na iliuliu, eda sa lomani ira na lewe ni Lotu i Jisu Karisito ni Yalododonu Edaidai mo ni caka vinaka ka bula vakatisaipeli kina. Eda sa rokovi ira na tamata yadua, ira na tina, na tama, na itabagone, kei ira na gonelalai era sa lakova tiko na salatu ni veiyalayalati—ena nodra yalodina kei na reki.

5. Ena 2019, o ira na dikoni yabaki 11 era sa tekivu vota yani na sakaramede, kei ira na goneyalewa kei na cauravou yabaki 11 era sa na taura na ivolatara vakaiyalayala ni valetabu. Ena yabaki sa oti, a bolebole o Peresitedi Nelson vei ira noda cauravou kei na goneyalewa mera lewena na mataivalu itabagone me sokumuni o Isireli veisebayaki ena yasa ruarua ni ilati (raica na “Hope of Israel” [worldwide devotional for youth, June 3, 2018], HopeofIsrael.ChurchofJesusChrist.org). Sa veiuqeti na kena dolei mai.

   Era sa veiqaravi tiko na daukaulotu ena sala cecere ni ra se yabaki gone. Tekivu mai na 6 ni Okotova, 2012, sa rawa mera kaulotu na cauravou yabaki 18 kei na goneyalewa yabaki 19.

6. “Sa itavi talega ni peresitedi ena Matabete i Eroni, me vakatulewa vei [iratou] na bete, me bose vata kei ira, ka vakavulica vei ira na itavi ni nodra itutu. … Ia sa dodonu me bisopi ko koya na peresitedi oqo; ni oqo e dua na itavi ni matabete ko ya” (Vunau kei na Veiyalayalati 107:87–88).

7. Era na kacivi talega na iliuliu qase mera kenadau ena kuoramu ni Matabete i Eroni me vukea na parokaramu kei na itaviqaravi ka tiko ena bose ni kuoramu me rawa vei iratou na matabisopi me sikova wasoma na kalasi kei na itaviqaravi ni Goneyalewa ka sikova talega na Lalai. Eso na kenadau e rawa mera kacivi mera veivuke ena soqo eso me vakataka na keba; eso mera kacivi mera veiqaravi vakabalavu mera vukei ira na daunivakasala ni kuoramu. Ena dau rua tiko na turaga qase ena bose, parokaramu, se itaviqaravi yadua ni kuoramu. Ni dau veisau na itavi kei na itutu, e sega ni namaki me lailai sobu na iwiliwili ni turaga qase era veiqaravi ka veitokoni tiko kina kuoramu ni Matabete i Eroni.

8. Russell M. Nelson, “iVakadinadina, Kuoramu ni Matabete i Eroni, kei na Kalasi ni Goneyalewa,” Liaona,Nove. 2019; raica talega na Ezra Taft Benson, “To the Young Women of the Church,” Ensign, Nov. 1986, 85.

9. Eda sa vakasalataki ira tiko na bisopi mera vakayagataki gauna vakalevu vei ira na lewenilotu itabagone qase cake kei na nodra dui vuvale.

10. Jeffrey R. Holland, general conference leadership meeting, Apr. 2018; raica talega na “Effective Ministering,” ministering.ChurchofJesusChrist.org. E vakavulica o Elder Holland ni ilesilesi e sega ni rawa vei bisopi me lesia o ya na dabe vakatulewa ena kuoramu ni Matabete i Eroni kei na goneyalewa, ni o koya e daunilewa, e lewa na veika vakailavo kei na veika raraba ena Lotu, ka me karoni ira na dravudravua kei na tiko leqa. Na mataveiliutaki ni kuoramu ni italatala qase kei na iSoqosoqo ni Veivukei kei na so tale e rawa mera liutaka na cakacaka ni kaulotu, cakacaka ni valetabu kei na tuvakawa, me matua na veivakavulici ena tabanalevu, ka veiwanonovi matua ka veiqaravi vei ira na lewe ni Lotu.

11. Me ikuri ki na veituvaki eso e gadrevi kina na idola nei koya na daunilewa, na cala ni veivakalolomataki cava ga mera na qarava na veibisopi me vaka sa virikotori tu ena lawa ni Lotu.

12. O peresitedi ni iSoqosoqo ni Veivukei ni iteki ena tomana tiko nona ripote vakadodonu vei peresitedi ni iteki.

13. Sa rawa me rau kacivi na daunivakasala ni peresitedi ni Cauravou ena iteki maivei ira na lewe ni iteki se, ke gadrevi, o koya na lewe ni matabose e cake sa lesi ki na Goneyalewa kei lewe ni matabose e cake sa lesi ki na Lalai.

14. Na baraca e peresitedi tiko ni Matawilivola ni Sigatabu e bibi sara na nona ilesilesi ena lewenivuli ni itabagone ena rua na Sigatabu ni veivula yadua.

15. O ira na mataveiliutaki ena iSoqosoqo ni Veivukei, Goneyalewa, Cauravou, Matawilivola ni Sigatabu, kei na Lalai ena veiqaravi raraba kei na iteki era sa Vakailesilesi Raraba se vakailesilesi ni iteki. Ena veiqaravi ena tabanalevu, ena liutaki ira na cauravou na matabisopi, era sa sega kina ni vakailesilesi ni tabanalevu o ira na daunivakasala ni cauravou.