Te ’itera’a i te ’oa’oa i roto i te Mesia
Te rāve’a pāpū a’e nō te ’ite mai i te ’oa’oa i teie orara’a ’o te ’āpitira’a i te Mesia i roto i te tauturura’a ia vetahi ’ē.
’Aita te Fatu i ani i tō tātou feiā ’āpī autahu’ara’a a Aarona ’ia rave i te mau mea ato’a, te mea rā tāna i ani, e mea māere mau ïa.
Tau matahiti i ma’iri a’e nei, ’ua tupu i roto i tō mātou ’utuāfare iti te hō’ē mea e fārereihia nei e te mau ’utuāfare e rave rahi i roto i teie ao ’ati. ’Ua tupuhia tā mātou tamaiti na’ina’i, ’o Tanner Christian, i te ma’i māriri ’aita’ata. E tamaiti fa’ahiahia teie, mai te mau tamari’i e iva matahiti te huru. E tamaiti ’ārearea roa ’e te māramarama ’e te araara i te pae vārua. E mea ’ino ’e e mea maita’i. I tōna na’ina’ira’a, e māere noa mātou i tōna māramarama ’e tōna ’ino ato’a, ’e ’ua uiui noa tō mātou mana’o ē, ’ia pa’ari mai ’oia, e riro ānei ’oia ’ei peropheta ’aore rā, ’ei ta’ata ’eiā i te fare moni. Noa atu rā te huru, mai te mea ra ē e vaiiho ’oia i te hō’ē tāpa’o i ni’a i te ao nei.
’E inaha, ’ua ro’ohia ’oia i te hō’ē ma’i rahi. I te roara’a o nā matahiti e toru i muri iho, ’ua fa’a’ohipahia te mau rāve’a pūai ’e te mau rā’au nō teie tau nō te fa’aora iāna, ma te ravehia e piti tauira’a ivi tua, ’e nā roto i te reira, ’ua ro’ohia ’oia i te ma’i mahāhā, e ’ua vai noa ’oia i raro a’e i te mātini mata’i 10 hepetoma te maoro ma te hīro’a ’ore. E temeio, ’ua ora mai ’oia nō te hō’ē taime poto ; ’e ’ua ho’i fa’ahou mai tōna māriri ’aita’ata.
Nā mua a’e oia ’a pohe ai, ’ua tomo te māriri ’aita’ata ’o Tanner nā roto i tōna mau ivi, ’e noa atu te mau rā’au pūai, ’ua mamae noa ’oia. E mea fifi roa nāna ’ia haere i rāpae i tōna ro’i. I te hō’ē po’ipo’i sābati, ’ua tomo atu tōna metua vahine, ’o Kalleen, i roto i tōna piha, nō te hi’o iāna hou ’a haere ai te ’utuāfare i te fare pure. ’Ua māere ’oia i te ’itera’a atu iāna, ’ua fa’anehenehe ’e tē pārahi noa ra i te hiti o tōna ro’i, ma te ’aro ma te māuiui nō te tapitopito i tōna ahu. ’Ua pārahi atura ’o Kalleen i pīha’i iho iāna. Nā ’ō atura ’oia, « Tanner, ’ua pāpū ia ’oe ē, e nava’i tō ’oe itoito nō te haere i te purera’a ? E tano paha e fa’aea noa i te fare ’e e fa’afa’aea i teie mahana ».
’Ua hi’o tūtonu noa ’oia i ni’a i te tahua. E diakono ’oia. E pupu autahu’ara’a tāna. ’E e ’ohipa tāna i fa’ata’ahia.
« ’Ua tītauhia iā’u ’ia ’ōpere i te ’ōro’a mo’a i teie mahana ».
« ’Ua pāpū iā’u ē, e nehenehe te hō’ē ta’ata e rave i te reira nō ’oe ».
Nā ’ō mai ra ’oia : « ’Ē, terā rā, tē ’ite nei au e mea nāhea te ta’ata ’ia hi’o mai iā’u ’ia ’ōpere ana’e au i te ’ōro’a mo’a. Tē mana’o nei au ē, e tauturu te reira ia rātou ».
Nō reira, ’ua tauturu atura ’o Kalleen iāna ’ia tapitopito i tōna ’ahu, ’e ’ia tā’amu i tōna tā’amu ’arapo’a, ’e ’ua tere atura rāua i te fare purera’a. E mea pāpū, e ’ohipa faufa’a roa tei tupu.
’Ua haere au i te fare purera’a i muri a’e i te hō’ē putuputura’a nā mua atu, ’e ’ua hitimahuta vau i te ’itera’a ia Tanner e pārahi ra i ni’a i te pārahira’a o te mau diakono. ’Ua fa’ata’a marū noa mai ’o Kalleen iā’u nō te aha ’oia i tae mai ai, ’e tāna i parau : « E tauturu te reira i te ta’ata ».
’E nō reira, ’ua hi’o noa vau i te mau diakono i te ti’ara’a i mua i te aira’a mā’a o te ’ōro’a mo’a. ’Ua turu’i marū noa ’oia i ni’a i te hō’ē diakono ’a hōro’a mai ai te mau tahu’a ia rātou i te fa’ari’i faraoa ’Ua haere atura ’o Tanner i tōna vāhi i fa’ata’ahia, ’e ’ua tāpe’a ’oia i ni’a i te hope’ara’a o te pārahira’a nō te ha’apāpū i tōna ti’ara’a ’a hōro’a ai ’oia i te ’ōro’a mo’a.
Mai te huru ra ē, tei ni’a te mata o te mau ta’ata ato’a iāna, ma te ’ite i tōna māuiui ’a rave ai ’oia i tāna ’ohipa ’ōhie roa. Noa atu rā i te reira, ’ua fa’atupu te mau tauto’ora’a a Tanner i te māramarama, ’a haere ai ’oia ma te hanahana, mai te tahi ’āna’ira’a i te tahi ’āna’ira’a—ma te hou i ni’a i tōna upo’o—ma te mono i te Fa’aora, mai tā te mau diakono e rave nei. Teie diakono huehue i mūta’a ihora, i teie nei rā, e mea paruparu, tē tītau pūai nei ’oia i te hō’ē tuha’a rahi o tōna tino paruparu, ’ua pēpē roa, ’ua ’ino roa, ma te ha’amāuiui iāna iho nō te tāvini ma te hōpoi atu i te mau tāpa’o o te tāra’ehara ’o te Fa’aora i roto i tō tātou orara’a.
Nō te ’itera’a mātou i tāna hi’ora’a nō te riro ’ei diakono, ’ua fa’atupu te reira i roto ia mātou i te mana’o ta’a ’ē ato’a—nō ni’a i te ’ōro’a mo’a, nō ni’a i te Fa’aora, ’e nō ni’a i te mau diakono ’e te mau ha’api’i ’e te mau tahu’a.
Tē māere nei au i te temeio tei tura’i iāna i taua po’ipo’i ra ’ia pāhono ma te itoito i taua pi’ira’a iti ha’iha’i ra ’ia tāvini, ’e i te pūai ’e i te mau ti’ara’a o tō tātou mau feiā ’āpī ato’a e ti’a mai nei, ’o tē fa’aitoito nei i te pāhono i te pi’ira’a a te hō’ē peropheta ’ia fa’aō i roto i te mau nu’u a te Atua, ’e ’ia ’āmui i roto i te ’ohipa fa’aorara’a ’e te fa’ateiteira’a.
I te mau taime ato’a e rave te hō’ē diakono i te fa’ari’i ’ōro’a mo’a, e ha’amana’o tātou i te ’ā’amu mo’a nō te tāmā’ara’a hope’a, ’ia Getesemane, ia Kalavaria, ’e i te mēnema o te ’ō. ’A parau ai te Fa’aora i tāna mau pipi, « e nā reira ’outou ’ei mana’ora’a iā’u », 1 ’ua paraparau ato’a ’oia ia tātou tāta’itahi nā roto i te mau tau. ’Ua paraparau ’oia nō te temeio hope ’ore tāna e fa’atupu ’a hōro’a ai te mau diakono, te mau ha’api’i, ’e te mau tahu’a nō a muri a’e i tōna mau tāpa’o, ’e ’ia ani i tāna mau tamari’i ’ia fāri’i i tāna hōro’a tāra’ehara.
Tē fa’ahi’o nei te mau tāpa’o ato’a o te ’ōro’a mo’a ia tātou i taua hōro’a ra. Tē hi’o nei tātou i te faraoa ’o tāna i vāvāhi—’e te faraoa tā te mau tahu’a i mua ia tātou e vāvāhi nei i teienei. Tē feruri nei tātou i te aura’a o te pape ha’amo’ahia, i nanahi ra ’e i teie mahana, ’a haere ai te mau pure o te ’ōro’a mo’a ra, ma te hanahana, mai te vaha o te mau tahu’a ’āpī, i roto i tō tātou ’ā’au, ’e i roto i te mau ra’i, ma te fa’a’āpī i te mau fafaura’a o tē nati ia tātou i te mau mana o te fa’aorara’a ’o te Mesia. E nehenehe tā tātou e feruri i te aura’a ’ia ’āfa’i mai te hō’ē diakono i te mau tāpa’o mo’a, ma te ti’a mai tā Iesu e ti’a i reira, ma te pūpū ’ia ha’amāmā i tā tātou mau hōpoi’a ’e i tō tātou māuiui.
Aua’e, ’aita e tītauhia i te feiā ’āpī tamāroa ’e te feiā ’āpī tamāhine ’ia ma’ihia nō te ’ite i te ’oa’oa ’e te fā nō te tāvini i te Fa’aora.
’Ua parau mai ’o Elder David A. Bednar ē, nō te riro mai te mau misiōnare, e rave tātou i tā te mau misiōnare e rave nei, ’e i muri iho, « te fa’aue nā ni’a iho i te fa’aue, te a’o nā ni’a iho i te a’o, e nehenehe [tātou] e riro mai ’ei misiōnare mai tā te Fatu e hina’aro ». 2
’Oia ato’a, mai te mea e « hina’aro tātou e riro mai ia Iesu », 3 e ti’a ia tātou ’ia rave i tā Iesu e rave, ’e i roto i te hō’ē parau māere, tē fa’ata’a mai nei te Fatu e aha tāna e rave : ’Ua parau ’oia, « inaha, teie ho’i tā’u ’ohipa ’e tō’u hanahana—te fa’atupura’a i te tāhuti ’ore ’e te ora mure ’ore o te ta’ata nei ». 4
Te misiōni a te Fa’aora i te mau taime ato’a ’e a muri noa atu, ’o te tāvini ïa i tōna Metua nā roto i te fa’aorara’a i tāna mau tamari’i.
’E te rāve’a pāpū a’e nō te ’ite mai i te ’oa’oa i roto i teie orara’a ’o te ’āpitira’a ïa i te Mesia i roto i te tauturura’a ia vetahi ’ē.
Terā ïa te parau mau ’ōhie roa tei fa’auru i te fa’anahora’a a te mau tamari’i ’e a te feiā ’āpī.
Te mau ’ohipara’a ato’a ’e te mau ha’api’ira’a ato’a a te mau tamari’i ’e a te feiā ’āpī, nō ni’a ïa i te tauturura’a i te feiā ’āpī ’ia riro hau atu mai ia Iesu, ma te ’āpiti atu iāna i roto i tāna ’ohipa nō te fa’aorara’a ’e te fa’ateiteira’a.
Te mau tamari’i ’e te feiā ’āpī, e mauha’a te reira nō te tauturu i te tamari’i Paraimere tāta’itahi ’e i te feiā ’āpī ’ia tupu i te rahi i roto i te ti’ara’a pipi, ’e ’ia fāri’i i te hō’ē hi’ora’a ātea tei ’ī i te ’ōrama o fa’aro’o nō te huru o te ’ē’a o te ’oa’oa E nehenehe rātou e haere mai nō te ’ite ātea ’e nō te tītau i te mau ’ē’a o te vāhi fa’aeara’a ’e te mau tāpa’o fa’a’itera’a i ni’a i te ’ē’a o te fafaura’a, i reira rātou e bāpetizohia ai ’e e ha’amauhia ai i te hōro‘ara’a o te Vārua Maita’i ’e e ’āpitihia ai i te mau pupu autahu’ara’a ’e te mau piha ha’api’ira’a a te feiā ’āpī tamāhine, i reira rātou e ’ite ai i te ’oa’oa nō te tauturura’a ia vetahi ’ē nā roto i te monora’a i te hō’ē tāvinira’a mai tā te Mesia te huru. E ha’amau ïa rātou i te mau ’ōpuara’a, te mea rarahi ’e te mea na’ina’i, ’o tē hōro’a mai i te au māite i tō rātou orara’a, ’a riro hau mai ai rātou mai te Fa’aora. Nā te mau ’āmuira’a a te feiā ’āpī nō te Pūai o te Feiā ’Āpī ’e te mau ve’a, te Hoa, ’e te fa’anahora’a ’āfa’ifa’i nō te Orara’a i te ’evanelia, e tauturu ia rātou ’ia ’imi i te ’oa’oa i roto i te Mesia. E ’ite ātea rātou i te mau ha’amaita’ira’a nō te maura’a i te mau parau fa’ati’a nō te hiero, ’e ’ia fāri’i i te Vārua ’o Elia maoti te fa’aurura’a a te Vārua Maita’i ’a titau ai rātou i te mau ha’amaita’ira’a o te hiero ’e te ’ā’amu ’utuāfare. E arata’ihia rātou nā te mau haʼamaitaʼiraʼa pātereāreha. I te roara’a o te tau, e tomo rātou i roto i te hiero nō te fāri’i i te mana, nō te fāri’i i te ’oa’oa i reira, a natihia ai rātou e a muri noa atu, i tō rātou ’utuāfare, noa atu te ’ohipa e tupu mai.
I mua i te mau mata’i o te ma’i pe’e ’e te mau ’ati ; tē vai mana noa nei te fa’atupura’a i te faufaura’a ato’a o te fa’anahora’a ’āpī a te mau tamari’i ’e te feiā ’āpī—e mea rū rā. E’ita e nehenehe i tā tātou feiā ’āpī e tīa’i ’ia ti’a mai te fenua hou ’a ’ite ai rātou i te Fa’aora. Tē rave nei te tahi pae i te mau fa’aotira’a i teienei, ’o tā rātou e ’ore e rave ’āhiri rātou i ’ite i tō rātou ihota’ata mau—’e tōna.
’E nō reira, teie te pi’ira’a rū a te mau nu’u a te Atua nō te fa’aineinera’a « te mau ihitai ato’a i ni’a i te tahua pahī ! »
E te mau māmā ’e te mau pāpā, tē hina’aro nei tā ’outou mau tamaiti ’ia pāturu ’outou ia rātou ma te pūai i teienei mai tā ’outou i rave i mūta’a iho ’a ha’apa’o ai rātou i te mau mea faufa’a iti roa a’e mai te mau tāreta ’e te mau pine. E te mau metua vahine ’e te mau metua tāne, te feiā fa’atere nō te autahu’ara’a ’e nō te feiā ’āpī tamāhine, mai te mea tē aro nei tā ’outou feiā ’āpī, nā te mau tamari’i ’e te feiā ’āpī e tauturu ’ia ’āfa’i mai ia rātou i te Fa’aora, ’e e hōpoi mai te Fa’aora i te hau ia rātou. 5
E te mau peresidenira’a nō te autahu’ara’a ’e nō te piha ha’api’ira’a, ’a ti’a i ni’a ’e ’a rave i tō ’outou pārahira’a i roto i te ’ohipa a te Fatu.
E te mau ’episekōpo, ’a nati i tā ’outou mau tāviri i tā te mau peresideni autahu’ara’a, ’e i reira tā ’outou mau pupu autahu’ara’a—’e tā ’outou mau pāroita—e taui ai e a muri noa atu.
’E ia ’outou na ’e te u’i e ti’a mai nei, tē fa’a’ite pāpū atu nei au, ’ei ta’ata tei ’ite ē, e mau tamaiti ’e e mau tamāhine here ’outou nā te Atua, ’e e ’ohipa tāna nā ’outou nō te rave.
’Ia ti’a ana’e ’outou i te fāito hanahana o tō ’outou mau pi’ira’a, ma tō ’outou ’ā’au ato’a, tō ’outou pūai, tō ’outou mana’o, ’e tō ’outou itoito, e tupu tō ’outou here i te Atua, ’e e ha’apa’o i tā ’outou mau fafaura’a, ’e e ti’aturi i tōna autahu’ara’a ’a rave ai ’outou i te ’ohipa nō te ha’amaita’i ia vetahi ’ē, ma te ha’amata nā roto i tō ’outou iho fare.
Tē pure nei au ’ia fa’aitoito ’outou, ma te pūai hau atu, e au nō teie taime, ’ia tāvini, ’ia fa’a’ohipa i te fa’aro’o, te tātarahapa, ’e ’ia ha’amaita’i i te mahana tāta’itahi, ’ia ti’a ia ’outou ’ia fāri’i i te mau ha’amaita’ira’a hiero ’e i te ’oa’oa vai maoro ’o tē tae mai nā roto ana’e i te ’evanelia a Iesu Mesia. Tē pure nei au ’ia fa’aineine ’outou nō te riro mai taua misiōnare itoito ra, te tāne ’aore rā, te vahine fa’aipoipo ha’apa’o, te metua tāne ’aore rā, te metua vahine here, tā ’outou i fafau e riro mai ’outou i te pae hope’a, nā roto i te rirora’a ’ei pipi mau nā Iesu Mesia.
E mata nā ’outou i te tauturu i te fa’aineine i te ao nei nō te ho’ira’a mai o te Fa’aora, nā roto i te anira’a i te mau ta’ata ato’a ’ia haere mai i te Mesia ra ’e ’ia fāri’i i te mau ha’amaita’ira’a o tōna tāra’ehara. I te i’oa o Iesu Mesia, ’āmene.