இயேசு கிறிஸ்து: நமது ஆத்துமாவைப் பராமரிப்பவர்

மூப்பர் உலிசஸ் சோயர்ஸ்

பன்னிரு அப்போஸ்தலர் குழுமம்

நமது பாவங்களுக்காக நாம் உத்தமமாய் மனந்திரும்பும்போது, நமது வாழ்க்கையில் கிறிஸ்துவின் பாவநிவாரண பலி முற்றிலும் பயனுள்ளதாக மாற நாம் அனுமதிக்கிறோம்.

எனக்கன்பான சகோதர சகோதரிகளே, இந்த பிரகாசமான ஈஸ்டர் காலையில், மனித வரலாற்றில் நிகழ்ந்த மிக அற்புதமான, மிகவும் கம்பீரமான, மற்றும் அளவிட முடியாத நம்முடைய கர்த்தராகிய இயேசு கிறிஸ்துவின் பாவநிவாரண பலியை நினைவு கொள்வதில் என் இருதயம் மகிழ்ச்சியடைகிறது. ஏசாயா தீர்க்கதரிசியின் புகழ்பெற்ற வார்த்தைகள், தேவனின் எல்லா பிள்ளைகளின் சார்பாக இரட்சகரின் இணக்கம் மற்றும் தியாகத்தின் மகத்துவத்தையும் தன்னலமற்ற தன்மையையும் பெரிதுபடுத்துகின்றன:

“மெய்யாகவே அவர் நம்முடைய பாடுகளை ஏற்றுக்கொண்டு, நம்முடைய துக்கங்களைச் சுமந்தார், நாமோ அவர் தேவனால் அடிபட்டு, வாதிக்கப்பட்டு, சிறுமைப்பட்டவரென்று எண்ணினோம்.

“நம்முடைய மீறுதல்களினிமித்தம் அவர் காயப்பட்டு, நம்முடைய அக்கிரமங்களினிமித்தம் அவர் நொறுக்கப்பட்டார். நமக்குச் சமாதானத்தை உண்டுபண்ணும் ஆக்கினை அவர்மேல் வந்தது, அவருடைய தழும்புகளால் நாம் குணமாகிறோம்.”¹

அனைத்து மனுக்குலத்தின் பாவங்களையும் தானாக முன்வந்து எடுத்து, நியாயமற்ற முறையில் சிலுவையில் அறையப்பட்டு, மூன்றாம் நாளில் மரணத்தை வெற்றிகரமாக வென்றதன் மூலம்,² பண்டைய காலங்களில் இஸ்ரவேலுக்கு வழங்கப்பட்ட பஸ்கா நியமத்துக்கு இயேசு மிகவும் பரிசுத்தமான அர்த்தத்தை அளித்தார்.³ தீர்க்கதரிசனத்தை நிறைவேற்றுவதற்காக, அவர் தனது சொந்த சரீரத்தையும், விலைமதிப்பற்ற இரத்தத்தையும் மிகப் பெரிய மற்றும் கடைசி தியாகமாக வழங்கினார், ⁴, கர்த்தருடைய பஸ்கா பண்டிகையில் பயன்படுத்தப்படும் பாரம்பரிய அடையாளங்களை மதிப்புடையதாக்கினார்.⁵ அவ்வாறு செய்யும்போது, மனித மனதிற்கு புரியாத சரீர மற்றும் ஆவிக்குரிய துன்பங்களை கிறிஸ்து அனுபவித்தார். இரட்சகர்தாமே சொன்னார்:

“ஏனெனில் இதோ, தேவனாகிய நான் எல்லோருக்காகவும் இவற்றை அனுபவித்தேன், …

“இந்த வேதனை, சகலத்திற்கும் மேலான தேவனாகிய என்னையே வேதனையினிமித்தம் நடுங்கி, ஒவ்வொரு துவாரத்திலிருந்தும் இரத்தம் கசிந்து, சரீரம் ஆவி இரண்டிலும் பாடுபடவைத்தது. நான் கசப்பான பானம்பண்ணி குறுகிப்போகாமலிருக்க விரும்புகிறேன்.

“ஆயினும் பிதாவுக்கே மகிமையுண்டாவதாக, மனுபுத்திரருக்காக நான் பங்கெடுத்து எனது ஆயத்தங்களை முடித்தேன்.”⁶

கிறிஸ்து தம்முடைய எல்லையற்ற மற்றும் இரக்கமுள்ள தியாகத்தின் மூலம் பிதாவின் சித்தத்தை ⁷தயவாக நிறைவேற்றினார். நித்திய இரட்சிப்புக்கான சாத்தியத்தை நமக்கு வழங்கி, ¹⁰ வீழ்ச்சி மூலம் உலகுக்கு அறிமுகப்படுத்தி, ⁹ சரீரம் மற்றும் ஆவிக்குரிய மரணத்தின் கொடுக்கை அவர் முறித்தார்.⁸

நம் அனைவருக்கும் இந்த நித்திய மற்றும் பரிபூரண பலியை நிறைவேற்றும் ஒருவர் இயேசு மட்டுமே.¹¹ உலகம் உருவாக்கப்படுவதற்கு முன்பே, பரலோகத்தின் மகா சபையில் அவர் தெரிந்து கொள்ளப்பட்டு முன் நியமனம் செய்யப்பட்டார்.¹². மேலும், ஒரு அநித்தியப் பெண்ணிலிருந்து பிறந்ததால், அவர் சரீர ரீதியான மரணத்தை சுவீகரித்தார், ஆனால் தேவனிடமிருந்து, பிதாவின் ஒரே பேறான குமாரனாக, அவர் தனது சொந்த வாழ்க்கையை அர்ப்பணிப்பதற்கும் பின்னர் அதை மீண்டும் எடுத்துக்கொள்வதற்கும் அதிகாரம் பெற்றார்¹³ கூடுதலாக, கறை இல்லாமல், கிறிஸ்து ஒரு பரிபூரண வாழ்க்கையை வாழ்ந்தார், எனவே, அவர் தெய்வீக நீதியின் கோரிக்கைகளிலிருந்து விடுபட்டார்.¹⁴ சில சந்தர்ப்பங்களில் தீர்க்கதரிசி ஜோசப் ஸ்மித் போதித்தார்:

“இயேசு கிறிஸ்துவின் மத்தியஸ்தமில்லாமல், உலகத்திற்கு இரட்சிப்பு வரமுடியாது.

“தேவன்… தனது சொந்த குமாரனின் வரத்தில் ஒரு பலியை ஆயத்தம் பண்ணினார், அவர் சரியான நேரத்தில் அனுப்பப்பட வேண்டும்… மனிதன் கர்த்தருடைய சமூகத்தில் நுழைய ஒரு கதவைத் திறக்க வேண்டும்.”¹⁵

இரட்சகர் தனது பலியின் மூலம் சரீர மரணத்தின் விளைவுகளை நிபந்தனையின்றி அகற்றினாலும்¹⁶, நாம் செய்யும் பாவங்களுக்காக மனந்திரும்புவதற்கான நமது தனிப்பட்ட பொறுப்பை அவர் அகற்றவில்லை 17. மாறாக, நம்முடைய நித்திய பிதாவுடன் சமரசம் செய்ய ஒரு அன்பான அழைப்பை அவர் நமக்கு அளித்துள்ளார். இயேசு கிறிஸ்து மற்றும் அவரது பாவநிவாரண பலியின் மூலம், மனம் மற்றும் இருதயத்தின் மகத்தான மாற்றத்தை நாம் அனுபவிக்க முடியும், இது தேவனிடமும் பொதுவாக வாழ்க்கையிலும் ஒரு புதிய அணுகுமுறையைக் கொண்டுவருகிறது¹⁸. நம்முடைய பாவங்களிலிருந்து நாம் சிரத்தையோடு மனந்திரும்பி, நம்முடைய இருதயத்தையும் விருப்பத்தையும் தேவனுக்கும் அவருடைய கட்டளைகளுக்கும் திருப்பும்போது, நாம் அவருடைய மன்னிப்பைப் பெறலாம், அவருடைய பரிசுத்த ஆவியின் செல்வாக்கை நம் வாழ்வில் அதிக அளவில் உணர முடியும். இரக்கத்துடன், இரட்சகர் தாங்கிய துன்பத்தின் ஆழத்தை அனுபவிப்பதைத் தவிர்க்கிறோம்¹⁹.

மனந்திரும்புதலின் வரம், அவருடைய பிள்ளைகளிடம் தேவன் காட்டிய தயவின் வெளிப்பாடாகும், மேலும் நாம் செய்யும் மீறுதல்களை மேற்கொள்ள உதவும் அவரது ஒப்பற்ற வல்லமையை நிரூபிப்பதாகும். நம்முடைய அநித்திய பலவீனம் மற்றும் ஊனங்களுக்காக பொறுமை மற்றும் நீடிய சாந்தத்துக்கு நம்முடைய அன்பான பிதாவிடமுள்ளதற்கு இது ஒரு சான்று. “சந்தோஷத்தின், மனசமாதானத்தின் திறவுகோல்” என இந்த வரத்தை நமது அன்பிற்குரிய தீர்க்கதரிசி, தலைவர் ரசல் எம். நெல்சன் குறிப்பிட்டார்.²⁰

என் அன்பான நண்பர்களே, நம்முடைய பாவங்களுக்காக நாம் உண்மையிலேயே மனந்திரும்பும்போது, ²¹ கிறிஸ்துவின் பாவநிவாரண பலியை நம் வாழ்க்கையில் முற்றிலும் பயனுள்ளதாக மாற்ற அனுமதிக்கிறோம் என்பதை நான் உங்களுக்கு சாட்சியளிக்கிறேன்.²² நாம் பாவத்தின் அடிமைத்தனத்திலிருந்து விடுபடுவோம், நம்முடைய பூலோக பயணத்தில் மகிழ்ச்சியைக் காண்போம், நித்திய இரட்சிப்பைப் பெற தகுதியுடையவர்களாகி விடுவோம், இது இயேசு கிறிஸ்துவை விசுவாசித்து அவரிடம் வரும் அனைவருக்கும் உலக அஸ்திபாரத்திலிருந்து ஆயத்தப்படுத்தப்பட்டது.²³

இந்த கம்பீரமான வரத்தைக் கூடுதலாக, தற்போதைய தொற்றுநோய்களில் நாம் சமீபத்தில் அனுபவித்த சூழ்நிலைகள் உட்பட, நம்முடைய துன்பங்கள், சோதனைகள் மற்றும் அநித்திய வாழ்க்கையின் பலவீனங்களை எதிர்கொள்வதால் இரட்சகர் நமக்கு நிவாரணத்தையும் ஆறுதலையும் அளிக்கிறார். அநித்தியத்தில் நாம் அனுபவிக்கும் துயரங்களை கிறிஸ்து எப்போதும் அறிந்திருப்பார் என்று நான் உங்களுக்கு உறுதியளிக்கிறேன். கசப்பு, வேதனை, சரீரவலி மற்றும் அத்துடன் நாம் எதிர்கொள்ளும் உணர்ச்சி மற்றும் ஆவிக்குரிய சவால்கள் அனைத்தையும் அவர் புரிந்துகொள்கிறார். இரட்சகரின் நெஞ்சம் இரக்கத்தால் நிரம்பியுள்ளது, அவர் எப்போதும் நமக்கு உதவ ஆயத்தமாக இருக்கிறார். இது சாத்தியமானது, ஏனென்றால் அவர் நம்முடைய பலவீனங்கள் மற்றும் ஊனங்களின் வேதனையை தனிப்பட்ட முறையில் அனுபவித்து மாம்சத்தில் எடுத்துக்கொண்டார்.²⁴

சாந்தத்துடனும், மனத்தாழ்மையுடனும், அவர் எல்லாவற்றிற்கும் கீழே இறங்கி, மனிதர்களால் வெறுக்கப்படுவதையும், நிராகரிக்கப்படுவதையும், அவமானப்படுத்தப்படுவதையும் ஏற்றுக்கொண்டார், நம்முடைய மீறுதல்களுக்காகவும் அக்கிரமங்களுக்காகவும் காயமடைந்தார். உலகத்தின் அனைத்து பாவங்களையும் தம்மீது எடுத்துக்கொண்டு, அப்படியாக, அவர் நம்முடைய முற்றிலுமான ஆவிக்குரிய பராமரிப்பாளராகி அவர் இந்த காரியங்களை அனைவருக்காவும் அனுபவித்தார்.²⁵

நாம் அவரண்டை நெருங்கி வரும்போது, ஆவிக்குரிய ரீதியில் அவருடைய கவனிப்பில் நாம் சரணடையும்போது, அவருடைய நுகத்தை நாம் எளிதாக்கிக் கொள்ள முடியும், இது எளிதானது, மற்றும் அவரது சுமை இலகுவானது, இதனால் வாக்குறுதியளிக்கப்பட்ட ஆறுதலும் ஓய்வும் பெறுகிறோம். அதற்கும் மேலாக, வாழ்க்கையின் கஷ்டங்கள், பலவீனங்கள் மற்றும் துயரங்களை சமாளிக்க நாம் அனைவரும் தேவைப்படும் வலிமையைப் பெறுவோம், அவருடைய உதவி மற்றும் குணப்படுத்தும் வல்லமை இல்லாமல் சகித்துக்கொள்வது மிகவும் கடினம்.²⁶ “கர்த்தர் மேல் உன் பாரத்தை வைத்துவிடு, அவர் உன்னை ஆதரிப்பார்” என வேதங்கள் நமக்குப் போதிக்கின்றன²⁷. “தேவன் [தம்முடைய] குமாரனால் உண்டான சந்தோஷத்தின் மூலம் உங்கள் சுமைகள் இலகுவாகும்படி அருளுவாராக”²⁸.

மரியோ மற்றும் ரெஜினா எமெரிக் என்ற அன்பான தம்பதியினர் மரித்ததை கடந்த ஆண்டு இறுதியில் நான் அறிந்தேன், அவர்கள் தேவனிடம் மிகவும் விசுவாசமாக இருந்தார்கள், கோவிட் -19ன் சிக்கல்களால் ஒருவருக்கொருவர் நான்கு நாட்கள் இடைவெளியில் காலமானார்கள்.

தற்போது பிரேசிலில் ஆயராக பணியாற்றி வரும் அவர்களின் மகன்களில் ஒருவர் என்னிடம் பின்வருமாறு கூறினார்: “என் பெற்றோர் இந்த நிலையில் இந்த உலகத்திலிருந்து வெளியேறுவதைப் பார்ப்பது மிகவும் கடினமாக இருந்தது, ஆனால் என் புரிதலை மீறிய வலிமையும் சமாதானமும் எனக்கு கிடைத்ததால், அந்த சோகத்தின் மத்தியில் என்னுடைய வாழ்க்கையில் கர்த்தருடைய கரத்தை என்னால் தெளிவாக உணர முடிந்தது. இயேசு கிறிஸ்து மீதும் அவருடைய பாவநிவிர்த்தி மீதும் எனது விசுவாசத்தின் மூலம், என் குடும்ப உறுப்பினர்களையும் இந்த கடினமான அனுபவத்தின் போது எங்களுக்கு உதவிய அனைவரையும் பலப்படுத்தவும் ஆறுதலளிக்கவும் தெய்வீக உதவி எனக்குக் கிடைத்தது. எல்லோரும் எதிர்பார்த்த அற்புதம் நிகழவில்லை என்றாலும், எனது சொந்த வாழ்க்கையிலும் எனது குடும்ப உறுப்பினர்களின் வாழ்க்கையிலும் ஏற்பட்ட அநேக அற்புதங்களுக்கு தனிப்பட்ட முறையில் நான் ஒரு சாட்சி. என்மீதுள்ள இரட்சகரின் அன்பிலும், அவருடைய பிள்ளைகளுக்கு தேவனின் மகிழ்ச்சியின் திட்டத்திலும் எனக்கு நம்பிக்கையும் தன்னம்பிக்கையும் அளித்து, என் இருதயத்தின் ஆழத்தில் ஊடுருவிய ஒரு விவரிக்க முடியாத சமாதானத்தை நான் உணர்ந்தேன். மிகவும் வேதனை நிறைந்த நாட்களில், நமது முழு இருதயத்தோடும், வல்லமையுடனும், மனதுடனும், பெலத்துடனும் அவரை நாடும்போது, இரட்சகரின் அன்பான கரங்கள் எப்போதும் நீட்டப்படுகின்றன என்பதை நான் அறிந்தேன்.

என் அன்பான சகோதர சகோதரிகளே, இயேசு மரித்தோரிலிருந்து உயிர்த்தெழுந்தார், அவர் ஜீவிக்கிறார் என்பதற்கு இந்த ஈஸ்டர் ஞாயிற்றுக்கிழமையில், எனது பரிசுத்தமான சாட்சியை கூறுகிறேன். அவர் மூலமாகவும், அவர் செய்த பாவநிவாரண பலியின் மூலமாகவும், சரீர ரீதியாகவும் ஆவிக்குரிய ரீதியாகவும் மரணத்தை வெல்வதற்கான வழியை இரட்சகர் நமக்கு வழங்கினார் என்பதை நான் உங்களுக்கு சாட்சியளிக்கிறேன். இந்த மிகப்பெரிய ஆசீர்வாதங்களுக்கும் மேலாக, கடினமான நேரங்களில் நமக்கு ஆறுதலையும் உறுதியையும் அவர் அளிக்கிறார் நமது விசுவாசத்தில் முடிவுபரியந்தம் நீடித்து, இயேசு கிறிஸ்து மீதும் அவருடைய வானுலக பாவநிவாரண பலியின் மீதும் நாம் நம்பிக்கை வைக்கும்போது, ஒருநாள் அவருடைய பிரசன்னத்திற்கு திரும்ப நமக்குதவ எல்லாவற்றையும் செய்ய சித்தமாயிருக்கிற நமது அன்புக்குரிய பரலோக பிதாவின் வாக்குறுதிகளை நாம் அனுபவிப்போம் என்று நான் உறுதியளிக்கிறேன். இது அவருடைய கிரியையும் அவருடைய மகிமையுமாயிருக்கிறது!²⁹ இயேசுவே கிறிஸ்து, உலக மீட்பர், வாக்குறுதியளிக்கப்பட்ட மேசியா, உயிர்த்தெழுந்தவர் மற்றும் ஜீவனானவர் என்று நான் உங்களுக்கு சாட்சியமளிக்கிறேன்.³⁰ பிதாவின் ஒரே பேறானவரும், நமது கர்த்தருமான இயேசு கிறிஸ்துவான அவருடைய பரிசுத்த நாமத்தில் இந்த சத்தியங்களை நான் உங்களுடன் பகிர்ந்துகொள்கிறேன், ஆமென்.