’Ua ti’afa’ahou te Mesia ; e fa’anu’u te fa’aro’o iāna ra i te mau mou’a

Nā te peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

Te fa’aro’o ia Iesu Mesia ’o te mana rahi a’e ïa e roa’a ia tātou i roto i teie orara’a. E ti’a te mau mea ato’a i te feiā e ti’aturi.

E a’u mau taea’e ’e a’u mau tuahine here, tē māuruuru nei au nō te ha’amaita’ira’a ’ia paraparau atu ia ’outou i teie sābati Pāsa.¹ E taui te tusia tāra’ehara ’e te ti’afa’ahoura’a o Iesu Mesia i tō tātou orara’a tāta’itahi ē a muri noa atu. Tē here nei tātou iāna ’e tē ha’amori nei tātou iāna ’e i tō tātou Metua i te ao ra ma te māuruuru.

I roto i nā ’āva’e e ono i ma’iri a’e nei, ’ua tāmau noa tātou i te fa’aruru i te ma’i pe’e nā te ao ato’a nei. Tē fa’ahiahia nei au i tō ’outou itoito ’e te pūai pae vārua i mua i te ma’i, te ’erera’a, ’e te vai mo’emo’era’a. Tē pure tāmau nei au ’ia ’ite ’outou i te here ’āueue ’ore o te Fatu nō ’outou i roto i teie mau mea ato’a. Mai te mea ē, ’ua pāhono ’outou i tō ’outou mau tāmatara’a ma te hō’ē ti’ara’a pipi pūai a’e, ’aita ïa teie matahiti i ma’iri a’e nei i faufa’a ’ore.

I teie po’ipo’i ’ua fa’aro’o mai tātou mai roto mai i te feiā fa’atere o te ’Ēkālesia nō te mau fenua ato’a tei fa’aeahia e te ta’ata i te fenua nei. ’Oia mau, nō te mau taura ta’ata ato’a, te mau reo, ’e te mau nūna’a te mau ha’amaita’ira’a o te ’evanelia. Te ’Ēkālesia a Iesu Mesia e ’ēkālesia ïa nō te ao ato’a nei. ’O Iesu Mesia tō tātou ti’a fa’atere.

’Aua’a a’e rā, ’aita ato’a i ti’a i te ma’i pe’e ’ia fa’atāere i te haerera’a i mua o tāna parau mau. Te ’evanelia a Iesu Mesia o te mea mau ïa e tītauhia i roto i teie ao ’ārepurepu, te pāto’ito’i ’e te rohirohi.

E ti’a i te mau tamari’i tāta’itahi a te Atua ’ia fāri’i i te rāve’a nō te fa’aro’o ’e nō te fāri’i i te parau poro’i fa’aora a Iesu Mesia. ’Aita e parau poro’i ’ē atu tei hau atu i te faufa’a nō tō tātou ’oa’oa—i teienei ’e ’a muri noa atu.² ’Aita e parau poro’i ’ē atu tei hau atu i te ’ī i te tīa’ira’a. ’Aita e parau poro’i ’ē atu e nehenehe e fa’a’ore i te mārōra’a i roto i tō tātou tōtaiete.

’Ua riro te fa’aro’o i te Fatu ia Iesu Mesia ’ei niu nō te mau ti’aturira’a ato’a ’e ’ei fa’atahera’a nō te mana o te ra’i. ’Ia au i te ’āpōsetolo Paulo, « ’Aore e fa’aro’o ra e ’ore roa [te Atua] e mauruuru : ’O te ha’amori i te Atua ra, e fa’aro’o ’oia ē, e Atua, e ti’a ai, ’e ’o ’oia tē fa’autu’a i te feiā i ’imi pāpū iāna ra ».³

Te mau mea maita’i ato’a i roto i te orara’a—te mau ha’amaita’ira’a ato’a e faufa’a mure ’ore—e ha’amata te reira nā roto i te fa’aro’o. Te vaiihora’a i te Atua ’ia upo’oti’a i roto i tō tātou orara’a, e ha’amata te reira nā roto i te fa’aro’o ē, e hina’aro tōna ’ia arata’i ia tātou. E ha’amata te tātarahapa mau nā roto i te fa’aro’o ē, e mana tō Iesu Mesia ’ia tāmā, ’ia fa’aora, ’e ’ia ha’apūai ia tātou.⁴

« ’Eiaha e huna i te mana o te Atua », ’ua parau te peropheta Moroni, « tē rave ra ho’i ’oia i te ’ohipa ma te mana, ’e mai te au i te fa’aro’o nō te tamari’i a te ta’ata nei ».⁵ Nā tō tātou fa’aro’o e tātara i te mana o te Atua i roto i tō tātou orara’a.

Noa atu rā i te reira, e nehenehe te fa’a’ohipara’a i te fa’aro’o e riro ’ei ’ohipa teimaha. I te tahi taime, e nehenehe tātou e uiui ē, e ti’a ānei ia tātou ’ia ha’aputu i te fa’aro’o nō te fāri’i i te mau ha’amaita’ira’a tā tātou e hina’aro rahi. Terā rā, ’ua tāmarū te Fatu i te reira mau mata’u nā roto i te mau parau a te peropheta Alama nō te Buka a Moromona.

Tē ani nei Alama ia tātou ’ia tāmata i te parau ’e « i te fa’atupu ho’i i te fa’aro’o iti ha’iha’i noa iho, ’aita atu i ti’a ia [tātou] maori rā, ’o te hina’aro i te fa’aro’o ».⁶ Teie parau ē, « e fa’aro’o iti ha’iha’i » tē fa’aha’amana’o mai nei te reira iā’u i te parau fafau a te Fatu i roto i te bibilia ē, ’āhiri « e fa’aro’o tō tātou, e mai te hō’ē huero tinapi noa iho te rahi » e ti’a ïa ia tātou ’ia « parau noa atu i teie nei mou’a, ’a haere i ’ō atu, ’e nāna ïa e haere noa ; ’e ’aita roa e mea e ’ore e ti’a ia ’outou ».⁷

Tē māramarama nei te Fatu i tō tātou paruparu tāhuti nei. E rave tātou i te hape i te tahi taime. ’Ua ’ite ato’a rā ’oia nō tō tātou pūai rahi. E mea na’ina’i roa te huero tinapi ’ia ha’amata ana’e, terā rā, e tupu mai ’oia ’ei rā’au rahi e ti’a ai i te mau manu ’ia hāmani i te ’ōfa’ara’a i roto i tōna mau ’āma’a. Tē fa’ahōho’a nei te huero tinapi i te hō’ē fa’aro’o na’ina’i e tupu i te rahi.⁸

’Aita te Fatu e tītau i te fa’aro’o pāpū e ti’a ai ia tātou ’ia fāri’i i te mana pāpū E ani mai rā ’oia ia tātou ’ia ti’aturi.

E a’u mau taea’e e a’u mau tuahine here, tā’u pi’ira’a ia ’outou i teie po’ipo’i Pāsa ’ia ha’amata i teie mahana i te fa’arahi i tō ’outou fa’aro’o. Nā roto i tō ’outou fa’aro’o, e fa’arahi Iesu Mesia i tō ’outou ’aravihi ’ia fa’anu’u i te mau mou’a i roto i tō ’outou orara’a,⁹ noa atu ē, e nehenehe tō ’outou iho mau tāmatara’a e ’aifāito i te rahi o te mou’a Everest.

E riro tō ’outou mau mou’a ’ei mo’emo’e, te fē’a’a, te ma’i, ’aore rā te tahi atu mau fifi nō ’outou iho. E rave rahi tō ’outou mau mou’a, noa atu rā i te reira, te pāhonora’a i tō ’outou mau tāmatara’a o te fa’arahira’a ïa i tō ’outou fa’aro’o. E tītau te reira i te ohipa. E fifi noa iho ā te mau pīahi hupehupe ’e te mau pipi fa’atāere haere noa i te ha’aputu i te tahi noa tuha’a iti ha’iha’i o te fa’aro’o.

E tītauhia te fa’aro’o nō te rave i te mau mea ato’a ma te maita’i. Te rirora’a ’ei pipi mau nā Iesu Mesia ’aita e ta’a-’ē-ra’a. E tītauhia te tūtavara’a nō te fa’arahi i tō ’outou fa’aro’o ’e te ti’aturira’a iāna. Tē hina’aro nei au e hōro’a atu e pae mana’o nō te tauturu ia ’outou ’ia fa’ahotu i te reira fa’aro’o ’e te ti’aturira’a.

’A tahi, ’a tuatāpapa i te mau parau. ’Ia riro ’ei ta’ata ’apo itoito mau. E hopu ia ’outou iho i roto i te mau pāpa’ira’a mo’a nō te māramarama maita’i a’e i te misiōni ’e te tāvinira’a a te Mesia. ’Ia ’ite ’outou i te parau ha’api’ira’a a te Mesia ’ei reira ’outou e māramarama ai i te mana o te reira nō tō ’outou orara’a. ’A tu’u i roto roa ia ’outou i te parau mau ē, nō ’outou te tāra’ehara a Iesu Mesia. ’Ua rave ’oia i ni’a iāna iho i tō ’outou ’ati, tō ’outou mau hape, tō ’outou mau paruparu ’e tā ’outou mau hara. ’Ua ’aufau ’oia i te ho’o monora’a ’e ’ua hōro’a mai i te mana ia ’outou nō te fa’anu’u i te mau mou’a ato’a tā ’outou e fārerei. Tē fāri’i nei ’outou i te reira mana nā roto i tō ’outou fa’aro’o, te ti’aturi, ’e te hina’aro e pe’e iāna.

E nehenehe te fa’anu’ura’a i tō ’outou mau mou’a e tītau i te hō’ē temeio. Ha’api’i mai nō ni’a i te mau temeio. E tae mai te temeio ’ia au i tō ’outou fa’aro’o i te Fatu. I rōpū i te reira fa’aro’o tē vai ra te ti’aturira’a i tōna hina’aro ’e tāna tārena—nāhea ’e a hea ’oia e ha’amaita’i ai ia ’outou i te tauturu temeio tā ’outou e hina’aro. Nā tō ’outou noa ti’aturi ’ore e tāpe’a i te Atua ’ia ha’amaita’i mai ia ’outou i te mau temeio nō te fa’anu’u i te mau mou’a i roto i tō ’outou orara’a.¹⁰

Rahi noa atu tō ’outou ha’api’ira’a mai nō ni’a i te Fa’aora, ’ōhie noa ato’a atu te ti’aturira’a i ni’a i tōna aroha, tōna here hope ’ore, ’e tōna mana ha’apūai, ’e te fa’aora. E fātata roa a’e te Fa’aora ia ’outou i te taime e fa’aruru ’outou ’aore rā e ta’uma ’outou i te hō’ē mou’a ma te fa’aro’o.

Te piti, ’a mā’iti ’ia ti’aturi ia Iesu Mesia. Mai te mea tē fē’a’a ra tō ’outou mana’o nō ni’a i te Atua te Metua ’e tāna tamaiti here, ’aore rā te ti’ara’a mau o te fa’aho’i-fa’ahou-ra’a mai ’aore rā, te ti’ara’a mau o te pi’ira’a hanahana o Iosepha Semita ’ei peropheta, ’a mā’iti ’ia ti’aturi¹¹ ’e ’ia vai ha’apa’o noa. ’A tu’u atu i tā ’outou mau uira’a i mua i te Fatu ’e i mua i te tahi atu mau rāve’a maita’i. ’A tuatāpapa ma te hina’aro e ti’aturi ’eiaha rā ma te tīa’ira’a ’ia ’itehia te hō’ē hape i roto i te orara’a o te hō’ē peropheta ’aore rā te hō’ē ta’a-’ē-ra’a i roto i te mau pāpa’ira’a mo’a. ’A fa’aea i te fa’arahi noa i tō ’outou mau mana’o fē’a’a nā roto i te fa’a’ite’itera’a i te tahi atu feiā mana’o fē’a’a. ’A vaiiho i te Fatu ’ia arata’i ia ’outou i roto i tō ’outou tere ’itera’a pae vārua.

Te toru, e ’ohipa i roto i te fa’aro’o. E aha tā ’outou e rave ’āhiri ē, e fa’aro’o hau atu tō ’outou ? ’A feruri na i te reira. ’A pāpa’i i te reira. I muri iho, ’a fāri’i i te fa’aro’o hau atu nā roto i te ravera’a i te hō’ē mea ’o te tītau hau atu i te fa’aro’o.

Te maha, ’a rave i te ’ōro’a mo’a ma te ti’amā. E tātara te mau ’ōro’a i te mana o te Atua nō tō ’outou orara’a.¹²

’E te pae, e ani i te tauturu i tō ’outou Metua i te ao ra, nā roto i te i’oa o Iesu Mesia.

E tītau te fa’aro’o i te ’ohipa. E tītau te fāri’ira’a i te heheura’a i te ’ohipa. Terā rā, « ’o tei ani ra ho’i, ’ua noa’a ïa ; ’e ’о tei ’imi ra, ’ua ’itea ïa ; ’e te feiā ato’a i pātōtō ra, ’ua ’īritihia ïa te ’ōpani ».¹³ ’Ua ’ite te Atua e aha te mea e tauturu i tō ’outou fa’aro’o ’ia tupu i te rahi. E ani, ’e e ani fa’ahou.

E parau paha te ta’ata ti’aturi ’ore ē, nō te feiā paruparu te fa’aro’o. ’Aita rā teie huru parau e ti’aturi i te pūai o te fa’aro’o. E tāmau noa ānei te mau ’āpōsetolo a te Fa’aora i te ha’api’i i tāna parau ha’api’ira’a i muri a’e i tōna pohera’a, noa atu ē, e ro’ohia rātou i te pohe, ’āhiri ē, ’ua fē’a’a rātou iāna ?¹⁴ E fāri’i ānei ’o Iosepha ’e ’o Hyrum Smith i te pohe maratiri nō te pārurura’a i te fa’ati’ara’a o te ’Ēkālesia a te Fatu maoti te hō’ē ’itera’a pāpū ē, e parau mau ? E pohe ānei e 2 000 feiā mo’a i ni’a i te ’ē’a o te mau pionie¹⁵ āhiri ē, ’aita tō rātou fa’aro’o i roto i te fa’aho’i-fa’ahou-ra’a mai o te ’evanelia a Iesu Mesia ? ’Oia mau, te fa’aro’o, ’o te mana ïa e ti’a ai i te pāpū ’ore ’ia rave i te mea e’ita e ti’a ’ia rave.

’Eiaha e fa’aiti i te fa’aro’o i noa’a a’ena ia ’outou. E tītauhia te fa’aro’o nō te tomo mai i roto i te ’Ēkālesia ’e nō te ha’apa’o tāmau noa. E tītauhia te fa’aro’o nō te pe’e i te mau peropheta maoti i te pe’e i te feiā ’aravihi ’e te mana’o tu’iro’o. E tītauhia te fa’aro’o nō te tāvini i te hō’ē misiōni i roto i te hō’ē tau ma’i pe’e. E tītauhia te fa’aro’o nō te ora i te hō’ē orara’a vi’ivi’i ’ore ’a tuō noa ai tō te ao ē, te ture a te Atua nō te vi’ivi’i ’ore, ’ua hope tōna tau. E tītauhia te fa’aro’o nō te ha’api’i i te ’evanelia i te mau tamari’i i roto i te ao nei. E tītauhia te fa’aro’o nō te tāparu i te ora o te hō’ē tei herehia, ’e hau roa atu te fa’aro’o nō te fāri’i i te hō’ē pāhonora’a au ’ore.

E piti matahiti i ma’iri a’e nei, ’ua tere māua te tuahine Nelson i Samoa, Tonga , Fiti, ’e Tahiti. ’Ua fa’aruru te reira mau nūna’a nō te motu i te ua rahi e rave rahi mahana. ’Ua ha’apae te mau melo ’e ’ua pure ’ia pāruruhia tā rātou mau putuputura’a i rāpae i te ua.

I Samoa, Fiti ’e Tahiti, ’ua mau te ua i te taime ’a ha’amata ai te putuputura’a. I Tonga rā, ’aita ïa te ua i fa’aea. Noa atu rā i te reira, 13 000 feiā mo’a tei haere mai e rave rahi hora nā mua roa, ’ia roa’a te hō’ē pārahira’a, ’ua tīa’i ma te fa’a’oroma’i i raro a’e i te ua tāmau, ’e ’ua pārahi i te roara’a e piti hora putuputura’a.

’Ua ’ite mātou i te fa’aro’o pūai i te ’ohipara’a i rotopū i te reira mau ta’ata tāta’itahi nō te motu—e fa’aro’o e nava’i nō te tāpe’a i te ua, ’e e fa’aro’o nō te tāmau māite ’a ’ore ai te ua e fa’aea.

E’ita te mau mou’a i roto i tō tātou orara’a e nu’u noa mai tā tātou e hina’aro ’aore rā i te taime tā tātou e hina’aro. Terā rā, i te mau taime ato’a e tūra’i tō tātou fa’aro’o ia tātou i mua. I te mau taime ato’a e fa’arahi te fa’aro’o i tō tātou ti’ara’a ’ia fāri’i i te mana atua.

’Ia ’ite mai ’outou ē : mai te mea e hi’a te mau mea ato’a ’e te mau ta’ata ato’a i te ao nei tā ’outou i ti’aturi, e ’ore roa Iesu Mesia ’e tāna ’Ēkālesia e fa’aru’e ia ’outou. Eʼita roa atu te Fatu e ti’aruhe e’ita ato’a e tāʼoto.¹⁶ « E hō’ē ā noa huru [tōna] i nanahi, i teie nei mahana ’e [ananahi] ».¹⁷ E’ita ’oia e fa’aru’e i tāna mau fafaura’a,¹⁸ tāna mau parau fafau, ’aore rā tōna here nō tōna nūna’a. Tē fa’atupu nei ’oia i te mau temeio i teie mahana ’e e fa’atupu ’oia i te mau temeio ananahi.¹⁹

Te fa’aro’o ia Iesu Mesia ’o te mana rahi a’e ïa e roa’a ia tātou i roto i teie orara’a. E ti’a te mau mea ato’a i te feiā e ti’aturi.²⁰

E tura’i tō ’outou fa’aro’o e tupu ra i te rahi i te mau mou’a—’eiaha te mau mou’a ’ōfa’i o tē fa’a’una’una nei i te fenua—te mau mou’a rā nō te veve rahi i roto i tō ’outou orara’a. E tauturu tō ’outou fa’aro’o ruperupe ia ’outou ’ia huri i te mau tāmatara’a i roto i te mau tupura’a i te rahi ’e i te mau rāve’a ’ite-’ore-hia a’e nei.

I teie sābati Pāsa, ma te mana’o here ’e te māuruuru hōhonu, tē fa’a’ite nei au i tō’u ’itera’a pāpū ē, ’ua ti’afa’ahou mau Iesu Mesia. ’Ua ti’afa’ahou ’oia nō te arata’i i tāna ’Ēkālesia. ’Ua ti’afa’ahou ’oia nō te ha’amaita’i i te orara’a o te mau tamari’i ato’a a te Atua, i te mau vāhi ato’a e orahia ra e rātou. Ma te fa’aro’o i roto iāna, e nehenehe tātou e fa’anu’u i te mau mou’a i roto i tō tātou orara’a. Tē fa’a’ite pāpū nei au i te reira i te i’oa mo’a o Iesu Mesia, ’āmene.