![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fd1%2F62%2Fd16219aaad9aee7c709e59e2bac3d6542c1d9eec%2Fd16219aaad9aee7c709e59e2bac3d6542c1d9eec.jpeg/full/!250,/0/default)
Saq ruhil yaal, saq ruhil tzol’leb’ ut saq ruhil k’utb’esinb’il na’leb’
Yalomaq eeq’e re naq li ch’utub’aj-ib’ a’in a’anaq jun hoonal re xyalb’al xsahil li raatin li Qaawa’ li te’xwotz lix moos.
Ex was wiitz’in, nink’e sahil k’ulunik eere sa’ li jolomil ch’utub’aj-ib’ a’in! K’a’jo’ xsahil inch’ool chi wank eerik’in! Yookin chek’oxlankil chiruheb’ li waqib’ po xe’nume’. Xintijok cherix ut choq’ eere. Chiruheb’ li xamaan xe’nume’ xintijok chi anchal inch’ool re naq li ch’utub’aj-ib’ a’in a’anaq jun hoonal re xk’ulb’al k’utb’esinb’il na’leb’ ut re k’oxlak choq’ reheb’ li te’sik’oq re.
Nasaho’ qach’ool chi ch’utlaak wi’chik sa’ li Ch’utamil Kab’l. Lix k’ihal li chunleb’aal yamyookeb’, a’b’an rilb’aleb’ laj b’ichanel re li Coro Tabernaculo a’an jun xnimal ru eetalil re xik chi uub’ej. Naqak’e lee chaab’il k’ulunik sa’ li ch’utub’aj-ib’ a’in, yalaq ta b’ar wankex.
Toj yooko chixk’ulb’al li tiq’e’k xb’aan li COVID-19. Naqab’antioxi naq nekepaab’ li qaatin ut li raatineb’ laj b’anonel ut eb’ laj jolominel sa’ li junjunq chi tenamit.
Naqach’utub’ qib’ rajlal jolomil ch’utub’aj-ib’ jo’ naxtaqla li Qaawa’.1 Na’uxman li jalok chiru xnumikeb’ li chihab’. Naq saajin chaq, li jolomil ch’utub’aj-ib’ kiwan chiru oxib’ malaj kaahib’ kutan. Chirix chik a’an, li jolomil ch’utub’aj-ib’ kiwan chiru wiib’ kutan. Li junjunq chi aatin—junxil ut anajwan—a’an ruuchinihom li kawil tijok ut nimla kawresink-ib’ sa’ musiq’ej.
Eb’ li jolomil aj b’eresinel ut jolomil aj k’anjel re li Iglees li te’aatinaq te’xjayali li raatin chirix li qaKolonel Jesukristo, li ruxtaan, ut lix wankil aj tojol-ix li maak’a’ roso’jik. Maajun wa kik’ulman sa’ ruchich’och’ naq li nawom chirix li qaKolonel tz’aqal aajel ru ut nim xwankil choq’ re li junjunq chi aamej. K’oxlahomaq chan ru naq sa’ junpaat raj taatuqlaaq chixjunil li ch’a’ajkilal sa’ li ruchich’och’—ut li wankeb’ sa’ qayu’am—wi ta chixjunil te’xsik’ raj xtaaqenkil li Jesukristo ut rab’inkil lix k’utum.
Rik’in li musiq’ej a’an, nekexinb’oq chirab’inkil oxib’ li na’leb’ chiru li jolomil ch’utub’aj-ib’ a’in: li saq ruhil yaal, li saq ruhil tzol’leb’, ut li saq ruhil k’utb’esinb’il na’leb’. Us ta wan xkab’ rix xch’ooleb’ jalaneb’ chik, chi yaal naq wan li k’a’ru us ut li ink’a’ us. Chi yaal naq wan xtz’aqalil li yaal—li junelikil yaal. Jun li majelal re li qakutankil, a’an naq moko k’iheb’ ta li kristiaan neke’xnaw b’ar te’xtaw li yaal.2 Ninye chi yaal eere naq li teerab’i anajwan ut wulaj a’anaq li saq ruhil yaal.
Lix saq ruhil tzol’leb’ li Kristo wan xwankil. Naxjal xyu’ameb’ chixjunileb’ li neke’tawok ru ut neke’xsik’ xyu’aminkil. Lix tzol’leb’ li Kristo nokoxtenq’a chixtawb’al ut chi kanaak sa’ xb’ehil li sumwank. Li wank sa’ li b’e ka’ch’in ru, a’ut tiik tz’aqal, tixk’e qak’ulub’ chireechaninkil chixjunil li k’a’ru wan re li Dios.3 Maak’a’ junaq chik k’a’aq re ru jwal terto xtz’aq chiru chixjunil li wan re li Yuwa’b’ej!
Li saq ruhil k’utb’esinb’il na’leb’ choq’ reheb’ lix patz’om lee raam tixb’aanu naq li ch’utub’aj-ib’ a’in jwal sahaq ut ink’a’ taasachq sa’ eech’ool. Wi maji’ nekesik’ xtenq’ li Santil Musiq’ej re teerab’i li taaraj li Qaawa’ naq teerab’i chiruheb’ li wiib’ kutan a’in, nekexinb’oq naq teeb’aanu anajwan. Yalomaq eeq’e re naq li ch’utub’aj-ib’ a’in a’anaq jun hoonal re xyalb’al xsahil li raatin li Qaawa’ li te’xwotz lix moos. Tzolomaq ajwi’ roksinkileb’ sa’ lee yu’am wulaj wulaj.
A’an a’in Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Laa’o lix tenamit re li sumwank. Li Qaawa’ kixye naq tixseeb’a lix k’anjel sa’ xq’ehil,4 ut yoo chixb’aanunkil sa’ junpaat. Osob’tesinb’ilo chi tz’aqonk sa’ lix loq’laj k’anjel.
Ninkanab’ jun li osob’tesink sa’ xb’eeneb’ li te’xsik xkomon chik lix saqen, lix nawom, ut li yaal. Ninye inrahom choq’ eere, sa’ lix loq’laj k’ab’a’ li Jesukristo, amen.