Me Mehlel Mwakelekel, Padahk Mwakelekel, oh Kaudiahl Mwakelekel
Menlau wiahki kapokon wet ehu ansou mwahu en douloalih padahk kan sang Kauno rehn Sapwellime sounpapah kan.
Riei ohl oh lih akan, kumwail ket nan kapokon lap! Mehd kaperen ei kak patehng kumwail! I kin medemedewe kumwail kerenieng ansou koaros nan erein sounpwong weneu samwalahr o. I kapakap kiher oh pwehki kumwail. Nan erein wihk kei samwalahro I kapakap kiher me kapokon wet en wia ehu ansoun katkataman oh kaudiahl ong koaros me rapahki kapai pwuko.
Se perenkihda mehlel aht pil kak pwurehng koaskoasoai ong kumwail sang nan Wasahn Kapokon wet. Pali laud en sehr kan sohte towe, ahpw pwarodohn ekei tohn Pwihn en Koul en Tabernacle wia mehkoat kaperen ehu. Se lukei kumwail koaros ong nan kapokon en nan wehwe wet, sohte lipilipil wasa kumwail mihmi ie.
Kitail mihmihte nan kahpwal en soumwahu lusilus kan en COVID-19. Kalangan en amwail kin ideidawehn aht kaweid oh kaweid kan en semen kan en pali en roson mwahu oh lapalap en kopwerment kan nan amwail wasa kan.
Kitail kin wia ehu kapokon lap sang ni kaweid en Kauno.1 Mwoamwen kapokon kan kin wekpeseng nan sounpar kan. Ni ansou me I pwulopwulo, kapokon kin wiawihki erein rahn silu de pahiou. Mwuri, kapokon kan kin wiawihki erein rahn riau. Padahk koaros—ahnsouo oh met—iei wahn kapakap oh kaunopada mwuledek en palingehn.
Kaun Lapalap akan oh Lapalap teikan en Mwomwohdisoht me kapahrek pahn dokehki arail padahk kan duwen atail Sounkomouro, Sises Krais, Sapwellime mahk, oh Sapwellime manaman en komour poatopoat. Sohte ehu ansou nan poadopoad en sampah me atail wehwehki atail Sounkomouro kin kesempwal sang oh pahrekiong mour en aramas koaros. Song medewe uwen mwadang en kahpwal kan en sampah—oh kahpwal kan nan atail mour kan—ah pahn kin kasohrala ma aramas koaros kin idawehn Sises Krais oh peikiong Sapwellime padahk kan.
Nin duwe met, I lukei kumwail en rong ire siluh pwukat nan kapokon wet, me mehlel mwakelekelo, padahk mwakelekel en Krais o, oh kaudiahl mwakelekelo. Me weksang dahme ekei sohte liki, uhdahn mie mehkot me pwung oh sapwung. Uhdahn mie me inenen mehlel—mehlel poatopoat Pil ehu paisuwed en nan mwehiet iei me aramas inenen malaulau me ese wasa re kak diar me mehlelo.2 I kak kamehlelehiong kumwail me dahme kumwail pahn rong rahnwet oh lakapw audaudki me mehlelo.
Padahk mwakelekel en Krais me manaman. E kin wekidala mour en koaros me kin wehwehki oh rapahki en kapwaiada nan arail mour. Padahk en Krais kin sewesei kitail en diar oh kekeid pohn ahl en inouo. Kekeid pohn ahl tehtiko ahpw ahl me pwungo iei me pahn kahrehiong atail kak ale mehkoaros sang rehn Koht.3 Sohte mehkot me kesempwal sang mehkoaros me Samatailo sapwellimaneki!
Eri, kaudiahl mwakelekel ong peidek kan nan amwail mohngiong kan pahn kahrehda amwail kapingki oh tamataman kapokon wet. Ma kumwail saikinte rapahki kaweid sang Ngehn Sarawi pwehn sewesei kumwail en rong mwahu dahme Kauno ketin kupwurki kumwail en rong nan rahn riau pwukat, I lukei kumwail en wia met. Menlau wiahki kapokon wet ehu ansou mwahu en douloalih padahk kan sang Kauno rehn Sapwellime sounpapah kan. Esehla mwomwen amwail pahn doadoahngki nan amwail mour.
Met iei Mwomwohdiso en Sises Krais en Souleng en Imwin-rahn akan. Kitail wia Sapwellime aramas en inou kan. Kauno ketin mahsaniher me E pahn ketin kamwadangahla Sapwellime doadoahk nan mwehi et,4 oh E ketin wiewia met ni uwe me mwadang sang mahs. Kitail ahneki ansou mwahu en iang wiewia Sapwellime doadoahk sarawi.
I patohwanda kapai ong koaros me kin raparapahki marain, wehwe, oh me mehlel laud. I pwilikihdi ahi limpoak ong emen emen kumwail, ni lengileng sarawi en Sises Krais, amen.