Limpoak Mehlel en Sounkomouro
Kasalehda limpoak ohng mehteikan wia poahsoanpen rongamwahu en Sises Krais.
Ehu ire kesempwal nan sapwellimen Sounkomouro padahngko ahnsou me E ketin kalkalohki rongamwahu pohn sampa iei kesempwalpen sewese mehteikanki limpoak. Kitail medewe mahs ire wet oh kilang mwomwen atail pahn mwekidki ni atail pahn medewe mwomwen Sises ah pwarek imwen Saimon, me wia parisi men.
Rongamwahu en Luk koasoaia duwen lih emen, me re inda me mihla nan dihp, pidelong nan ihmwen Saimon ni ahnsou me Sises ketiket wasao. Sang ni mwekid en karakarahk, lih menet kohdo rehn Sises, widenki Aluweluwe kan ki pilen meseh kan, oh limwiada paten neh kan ki piten moangehu, oh kin metik oh keiehki paten nehko ki leh pwohmwahu ehu.1 Ohl me ihmwaniki ihmwo, medmedewehieng pein ih me e lapalapasang liho, ahneki madamadau en kailok oh sohte utung dene, “Ohl menet, ma e wia soukohp men, e pahn ese ihs oh soangen lih dahmen me wie sasair ih: pwe ih lih dipan emen.”
En Parisi mwekid en sarawi-sang-kowe kahrehiong ohlo en tenek sapahrek ih Sises oh liho. Ahpw sang ni Sapwellime erepit, Sounkomouro mwahngih nan moangen Saimon o, oh ni erepit laud, uhwongda ahn Saimon madamadau en kailok, oh pil padahkiong ah souitar en kasamwoh aramas duwehte Sounkomouro ong nan imweho. Ni mehlel, sapwellimen Sises mahseno sair mehlel Parisio en wia soun kadehde men me Sises kolokol kisakis en kohpada oh me lih menet, sang ni karakarahk oh toutoukihla ni mehlel, kolulahr ih aledahr mahkepen dipe kan.3
Pil duwehte soangen mwekid tohto ahnsou me Sises ketiket nan sampah, mwekid wet kasalehda me Sounkomouro mwekidki limpoak ong koaros me pahn kin kohdo Reh—ni soh peikasal—ahpw mehlel ong koaros me udahn kin anahne Sapwellime sawas. Mwekid en pahtoula oh limpoak me sansal ong Sises sang rehn lih menet wia mehn kasansal en ah koluhla oh ineng en ahlehdi mahkpen dipeh kan. Ahpw, an Saimon mwekid en pohnmwahso, kohsang ni keptakai en ah mohngiong,4 perehsang ih en kasalehda duwen limpoak ong ngehn me kolulahro, oh e pil sohte katapaniki oh mwamwahliki Sounkomour en sampah. Ah mwekid kasalehda duwen ah mour me koakos oh sohte itar momourki kosonned en liksansalamwahu en ah wiewia kan sang ni medewehte-pein ih oh likamwiki ah kin poadidi.5
Limpoak oh doadoahk en papah me Sises wia nan mwekid wet kasalehda karasaras en mwomwen atail pahn sewese riatail ohl oh lih akan. Nan pwuhk sarawi kasalehda soangen karasaras tohto ong ni mwomwen Sounkomour o, ah kin mwekid ni loal oh kasalehda limpoak, sewese aramas en nan Sapwellime ahnsou ko me E wie lokolongki oh irail me “lipwongmasala, oh pakasarpeseng wasa tohto, duwehte sihpw me sohte sileparail.”6 E ketikihda Sapwellime limpoak ong koaros me anahne maiaudahsang katoutouparail kan, sang ni paliwar oh pil palingehn.7
Sapwellimen Sises mwekid en limpoak pahsoandahsang ni limpoak unsek,8 me wehwehki, Sapwellime limpoak mwakelekel oh unsek, me kohsang ni Sapwellime tohnmetei en tomwo. Wiepen poakehla wia pahsoan kesempwal ong irail me kin nantiheng wia me pwung oh pil ehuieng Souleng teikan me duwehte iang irail pahtou, oh poakehla, mahk oh kadek.9 Sapwellime mwekid en limpoak ong mehteikan, ni mehlel, kohsang ni rongamwahu en Sises Krais oh e wia kilel en mehn kamehlel en palingenitail oh mwomwen atail kin kerenlahng Sounkomour o. Pil doulahte, e kasalehda mwomwen irair en Sapwellime ahl en mour oh kasalehda mwekid laud en palingenitail.
E wehwe mwahu en kasawih me mwekid en limpoak en Sises sohte kin koasoandi oh alehdi mweimwei, ong ni doadoahk kei me e pahn anahne kanekehla, ahpw e wia doadoahk en nan rahn koaros pwehki Sapwellime limpoak mwakelekel ong Koht oh Sapwellime seri kan oh Ah ineng en sewese irail.
Sises kin kak kasawiada anahn en aramas mendahte ma e pil doh. Eri, e sohte wia mehkot kapwuriamwei ehu, ni karasepe, mwurinte ah kamwahuiala nein soun papah en sounpei liduo,10 Sises seiloakla sang Kapernaum ong nan sahpw me adaneki Nain. Ih wasahu me Sises wiahda ehu mwekid kapwuriamwei nan Sapwellime papah pohn sampah ansou me e likwerih mwahnakapw mehla men, ihte nein lih sohte pwopwoud men nah pwutak, en pwourda oh mourda. Sises kehn kaidehnte nsensuwed en nohnohu ahpw soangen irair kahpwal akan en ah mour, oh me elehda Ah inenen poakehla mehlel liho.11
Met duwehte lih me dipan oh lih me sohte ah pwoud nan Nain, aramas tohto me kitail kin karanih wie raparapahki kaloalamwahu, pohnese, patehng oh sewese kin irail dahme kitail kak kihda. Kitail koaros kak wia dipwisou en doadoahk ni limen Kauno oh mwekid kihwei ni limpoak ong irail akan me anahne, rasehngete dahme Sises ketin wiahier.
I ese kisin serepein men pwe ipwikihdi nan werengen kilin ewehu pwal oh ni tapin ewe pil pwal. E anahne ale keieu en koadoahk tohto en pwal ni rahn keriau en ah mour. E sair irail kan me iang mihmi nan kahpwal wet, serepein menet oh ah pahpa oh nohno rapahki mwomwen arail pahn utung, wehwehki, oh sewese mehteikan me iang mihmi nan mwekid apwal wet. Re pein ntingdohngie oh koasoia: “Sang ni mwekid en nait serepeinet, se ahnekiher ahnsou mwahu en tuhweng aramas mwahu tohto me anahne kaloalamwahu, utuht, oh kakehlail. Ekis ahnsou samwalahro, nait serepein, me sounpar 11 met, koasoiong nohno oh pahpa en seri men me pil mih nan soangen irairohte. Nan ahnsou en koasokoasoio, nait serepeino ansou ehu ahpw kihsang ah mask o pwehki sang ni soumwahu en pandemic, pwe pahpa oh nohnou en kak kilang oh ahneki me mie koapwoaroapwoar, mendahte ma serio ahneki ahnsou reirei en kohla nan pahr kei pwe en kak kamwahuila kahpwalo. Se inenen kapingki pwehki aht kasalehda aht limpak oh sawas ong irail akan me lokolok, nin duwen Sounkomouro ah wiahiong kitail. Se kehn me se katikitikiala aht medek ahnsou koaros me se kin katikala en emen aramas ah medek.”
Kempoakepahi ko, ni atail nantihong en kasalehda mwekid en limpoak nan atail mour, me sansalehr sang rehn Sounkomouro, kitail pahn kak kehn oh wehwehki anahn en aramas akan. Sang ni atail kin pein kehn ong pein kitail, pepehm en inengiong oh limpoak pahn pwarada nan atail mwekid koaros. Kauno pahn mwahngih atail wiewia kan, oh kitail pahn kapaikihda ni atail wia dipwisou en doadoahk kei nan Lime kan nan mohngiong mwuterek oh wahdo kamwahu ong loalen irail akan me “solahr … arail koapwoaroapwoar.”12
Sapwellimen Sises kehkehlik ong Saimon me wia Parisi o kasalehda me kitail en dehr mwomwsuwed oh tenek sapahrekih mehn mpatail kan, pwehki kitail koaros anahne kin wehweki oh ale mahkpen atail soh itar kan sang rehn Samatail Nanleng me limpoako. Pwe iei ire wet te me Sounkomour o pil padahngki ni ahnsou me E mahsanih, “Oh dahme ke kilekilang ki diperen dihpw me mih nan mesen riomw o, ah kahpw sohte kak kilang lepin tuhke me mih nan mesemwen?”13
Kitail anahne medewe me e sohte mengei en wehwehkihla soangen mwekid koaros me pahn kihpene wiewia en mwekid oh karasaras en aramas emen. Ni mwohmw kan kin pitih kitaildi oh ekei pak sohte kin kasalehda uhdahn mwekid en aramas emen. Sohte duwe kowe oh ngehi, Krais kak mahsani ni sansal soahng koaros me kin wiawi.14 Itarete Ah ketin mwahngih atail luwet akan, Sounkomouro sohte kin mwadangete teneki kitail ahpw kin doulahte oh sewese kitail ni limpoak nan ahnsou kan, sewese kitail en kihsang lepin tuhke me mih nan mesetail kan. Sises ahnsou koaros, kin mahsani nan atail mohngiong kan, ah kaidehn mas likitail kan.15 Pein Ih mahsanih, “Ke dehr tenek sang ni mwohmw de mas liki.”16
Met, medewe sapwellimen Sounkomouro kaweid ong werek en mehn Nihpai meh ehk riemen o ong ni peidek wet:
“Oh ke ese me ke pahn kadeingki aramas menet, sang ni mehn tenek me I pahn ketkihenguhk, me pahn udahn konehng. Eri, soangen aramas dahnge me kumwail en wia? Mehlel I indahiong kumwail, kumwail en duweiehte.”17
“Eri I pahn kasik me ke pahn unsekla duwehte ngehi, de Sememw me ketiket nanleng me unsek.”18
Nan ire wet, Kauno ketin koasoanedier tenekpen irailoko me kin tenekih irailkan me kin pwupwidi de luwetala. Pwe kitail en kak wia tenek me pwung, kitail anahne idawehn Sounkomouro oh kilang duwen sapwung kan me emen emen wiahda ni atail kin poakehla, pil duwehte ni Ah kin ketin mahsani. Pwe en dehde me kitail sousou keren en unsekla, mwein e pahn mwahu ma kitail pahn mwohndi ni alualuwen Sises ko oh pekimahngki atail luwet kan, me pahn duwehte lih me koluhla nan nimwen paresiho, oh sohte kawehkihla ansou oh kedkedirepwki en mehteikan arail soh itar akan.
Koampoakepaiko, I kadehde me kitail en nantiheng idawehn sapwellimen Soundoaro karasaras nan atail mour, atail ngoang en kapinga pweidahn men mpatail kan pahn laudla oh atail ineng en kadeik arail sapwung pahn tikitikla. Atail ehuong Koht pahn tehlapala, oh ni mehlel atail mour pahn linganla, atail pepehm pahn kansenamwahu, oh kitail pahn mihla nan peren me sohte imwi. Kitail pahn dehdehki soun kameleilei,19 me sapwellimarail mahsen duwehte nimenseng lingan ehu.
I kapakapki me kitail pahn kin medemedewe laud oh wehwehki duwen riatail mehteikan oh pwe sapwellimen Kauno mahk, karakarahkala, en kak kamwahuiala atail sou kanengamah ong en mehteikan arail soh itar akan. Met iei sapwellimen Sounkomouro luhk ong kitail. I kadehde me E ketin ieias. Iei Ih me wia karasaras unsek en mahk oh iangahng kanengamah. I wia ahi kadehde ohng me mehlel pwukat ni mwar sarawi en Soundoar Sises Krais, amen.