Ahneki Popohl nan Ahnsou Apwal akan
Sohte ahnsou kesempwal duwehte rahnwet me konehng kitail en rapahki pein atail popohl.
Me keren, I alehdi pwukoa en kasarawihla wasa ehu me wia kisehn poadoapoad en Nauvoo. Kisehn palien ahi pwukoa, I ahneki ahnsou mwahu en pwarala Liberty Jail nan Missouri. Ni ahnsou me I kilang imwetengo, I medemedewe soahng kan me wiawiher wasahu me kahrehda e wia wasa kesempwal nan poadoapoad en Mwomwohdiso. Momour en souleng kan lelohng nan keper mwurin Kepina en Missouri kamanahla irail en kamakamala. Kapatahieng, Soukohp Joseph oh ekei kempoakepah kesempwal selidi nan Liberty Jail ni sohte diparail. Ehu kahrepe me kailok laud wet wiawihkihong toweh kan pwehki pali laud irail uhwong kalidu en aramas.1 Kailok laud wet me wiawihong Joseph Smith oh nah aramas akan, e wia ehu karasaras laud en doadoahngki saledek en pilipil ni sapwung me kin kahpwalih aramas pwung kan. Ahnsou me Joseph mihmi nan Liberty Jail kasalehda me kahpwal e sohte wia kasalepen me Kauno ketin likidmeliehla de ketin kauhdi Sapwellime kapai kan.
E sair ie mehlel ni ahi wadek dahme Soukohp Joseph Smith kalohngki ni eh tengedi nan Liberty Jail: “Maing Koht, ia wasa komw ketket ie? Oh ia impwal lapalao me repehla sapwellimomwi wasahn rukuruk?“2 Joseph kalelapak ia uwen werei en sapwellimen Kauno aramas akan pahn wie lokolongki kalokolok sapwung kan.3
Ni ahi wie keskesihnen nan Liberty Jail, E sair ie mehlel ni ahi wadek sapwellimen Kauno pasapeng: “Nei pwutak, popohl en mih rehmw; ahmw kasongosong oh ahmw kahpwal akan pahn wiawi ahpw ni ahnsou mwotomwot; oh eri, ma ke pahn dadaurete mwahu, Koht pahn ketin kalapalapihukala wasa ile.“4 E sansal me kahpwal akan kak kamwahuikitailla ong wasa kitail seiseiloaklahng wasa me soutuk oh lingan rasohng ketipin.5
Sapwellimen Sounkomouro mahsen kesempwalo me mahsanih, “Nei pwutak, popohl en mih rehmw“6 sair loaleiet mehlel oh e kesempwal mehlel ong nan atail mwehi. E katamando Sapwellime padahk ong Sapwellime tohnpadahko ni ahnsou me E ketin ieias nan sapwellime doadoahk pohn sampah.
Mwohn Sapwellimen Krais lokolok nan Mwetuwel en Kedsemani oh pohn lohpwuo, E ketin ruwese sapwellime Wahnpoaron ko “kumwail en poakpene nanpwungamwail; duwen ei poakohng kumwail”7 oh mwurinte mwo e ahpw ketin koaloalamwahuihki irail mahsen pwukat: “I kihong kumwail popohl, pein ei popohl me I kihong kumwail, I sohte kihong kumwail nin duwen me sampah wet kin wia. Kumwail dehr insensuwed, oh pahtou, oh masak.”8
Ehu mwahr keneinei kesempwal en atail Kauno oh Sounkomour, Sises Krais, iei “Nahnmwariki en Popohl.”9 Ahpw Sapwellime wehi pahn kakauda iangahki popohl oh limpoak.10 Kitail kaskasik mwehi en Melenia me Mesaia pahn kaunda.
Mehndahte atail kaskasik rahn en meleniao, kitail ese me popohl oh meleilei sohte itar nan atail mwehi.11 Nan erein ahi mour, I sohte kin kilang saminimin laud duwehte rahnwet. Kitail kin rong koasoai en lingeringer oh pingiping kan oh kilang mwekid kelingeringer oh kamedek kan me kin kauwehla popohl oh meleilei.
Popohl pohn sampah sohte inoupe de kamehlelpe lao pahn lel ni Ketdo Keriau en Sises Krais. Sounkomour o padahkiong Sapwellime Wahnpoaron ko me Ah doadoahk en sampah sohte pahn alehdi popohl en sampah. E ketin mahsanih, “kumwail dehr medewe me I kohdohn wahdo popohl pohn sampah.“12 Popohl ong koaros sohte wia kisehn sapwellimen Sounkomouro tepin doadoahk pohn sampah. Sohte popohl ong koaros rahnwet.
Ahpw, pein amwail popohl kak mie mehndahte ma mie lingeringer, pingiping, oh uhpene me kin kahpwalih oh kauwehla sampah rahnwet. Sohte ahnsou kesempwal duwehte rahnwet me konehng kitail en rapahki pein atail popohl. Koul sarawi kaselel oh kesempwal ehu me intingda ong neitail me pwulopwul kan sang rehn Brother Nik Day, me kahdaniki iei Popohl rehn Krais me koasoaia, “Ma sohte popohl pohn sampah, mie popohl rehn Krais.”13 Kitail kapaiki atail alehdi koul wet mwohnte soumwahu lusulus COVID-19 doupeseng nan sampah.
Koul wet kasalehda ni wiepe lingan koapwoaroapwoar en alehdi popohl oh kaweidki ni sansal me popohl e poahsonsang ieias oh misin en Sises Krais. President Joseph F. Smith kalohngki, “E sohte kak kohdo nan sampah ngehn en popohl oh limpoak … lao aramas koaros alehdi Sapwellimen Koht mehlelo oh Sapwellimen Koht padahk … oh esehda sapwellime manaman ngehn en popohl oh limpoak sohte kak kohdo pohn sampah lao aramas pahn alehda sapwellimen Koht mehlelo oh sapwellime mahseno, oh pohnese me Sapwellime kupwurokong oh manaman me sarawi.“14
Ni atail sohte pahn uhdihsang nannantihong wiahda popohl ong koaros, kitail kak ese ni mehlel me kitail kak ahneki pein atail popohl nin duwen Krais ketin pahdangkier. Padahk wet e sansal nan Doctrine and Covenants, me mahsanih: “Eri esehla, mehmen me pahn wia doadoahk mwahu kan pahn alehdi ketingpe, iei popohl pohn sampah, oh mour soutuk nan sampah me pahn kohdo.“15
Ia ekei soahngen “doadoahk mwahu kan“ me pahn kak sewese kitail en powehdi akupwung kan oh katikala pingiping oh diar popohl nan sampah? Sapwellimen Krais padahk kan koaros kaweid kitailla nan ahl wet. I pahn koasoaia ekeite me I kamehlele me kesempwal.
Keieu: Poakohng Koht, Momouriki Sapwellime Kosonned akan, oh Mahkohng koaros
President George Albert Smith wiahla President en Mwomwohdiso nan pahr 1945. Nan erein pahr akan me e wia Wahnpoaron e kin ndandki kaun me kin perenki popohl. Nan erein sounpar 15 mwohn eh wiahla President, kasongosong kan oh kahpwal akan en pahtou laud nan sampah, mwurinte mehla kan oh ohlahn Mahwin Lap keriau en sampah, sohte popohl mie.
Mwurinte Mahwin Lap keriau en sampah, ni tepin kapokon lap en Oakotohpe 1945 me e kaunda nin duwen eh wia president, President Smith katamankihong Souleng kan duwen sapwellimen Sounkomouro luhk en poakohng mehn mparail kan oh mahkohng arail imwintihti kan oh ahpw padahngki, “Iei met mour me souleng en imwin rahn akan koaros pahn rapahki en alehda ma irail kasik ehu rahn irail pahn kak kesihnen mwohn sihlangi oh alehdi sang nin lime kasamwasamw lingan en pwurala reh.“16
Keriau: Rapahki Wahn Ngehno
Nan nein Wahnpoaron Paul kisin likou ong mehn Kalesia kan, e kasalehda wekpeseng en doadoahk mwahu kan me kin kahrehda warohng sohsohki wehin Koht oh doadoahk kan me kak, kahrehda sohte warohng, ma sohte koluhla. Soahng kan me kin kahrehda atail warohng iei wahn ngehno kan me iei limpoak, peren, popohl, kanangamah, kadek, pwoson, mpai, [oh] liksang me suwed kan.17 Paul pil kapatahiong, sawaspene ong nan en emen emen apwal oh dehr pwangahkihda wia me mwahu.18 Soahngen doadoahk kan me sohte pwung iei kailok, lingeringer, oh pingiping.19
Ehu kasukuhl kesempwal me sang nan Kadehdeh Mering pid duwen Samatail Eipraam. Eipraam oh Lohd, me e pahn nainikio, ira kepwehpwe ahpw ira sohla kak mihmipene. Pwe ira en kak kauhdi pingiping, Eipraam mweidehng Lohd en pilada sahpw me e mwahuki. Lohd pilada sahpw patapat en nan Sordan, me diren pihl oh kaselel. Eipraam pilada sahpw patapat en nan Mamre wasa me sohte nohn pwehl mwahu. Pwuhk sarawi mahsanih me Eipraam kawada imwe ihmpwalo oh wiahda “pei sarawi ong Kauno.“20 A Lohd, e “kawada imwe ihmpwalo kasohpeilahng Sodom.“21 Pwe en ahneki ehupene ni popohl, iren kaweid wet inenen sansal: kitail pahn anahne inangih en mweidala insenatail oh kauhdi pingiping nan irair akan me sohte pid mour pwung pwe kitail en kak ahnekipene popohl. Nin duwen Nahnmwarki Benjamin eh padahngkier, “Oh kumwail sohte pahn ahneki madamadau en kamedekehla emen, ahpw momour ni popohl.”22 Ahpw nan irair akan me pid duwen mour pwung oh padahk kesempwal akan, kitail anahne kehlail oh tengeteng.
Ma kitail mwahuki ahneki popohl me wia ketingpen doadoahk en mour pwung, kitail pahn sohte kawada imwatail ihmpwal akan kasohpeilahng sampah. Kitail pahn kasohpeilahng imwatail ihmpwal kan ong tehnpas sarawi.
Kesiluh: Doadoahngki atail Saledek en Pilipil ong Pilada Mour Pwung.
Popohl oh saledek en pilipil kin ehupene nin duwen e wia pali kesempwal nan pilahn en komouro. Nin duwen kawehweh me mih nan Oaralap kan en Rongamwahu duwen “Saledek en Pilipil,” “Saledek en pilipil iei koahiek oh pai me Koht ketikihong kitail pwe kitail en kak pein pilada oh mwekidki pein kitail.“23 Eri, saledek en pilipil e wia poahson en pein atail kekeirda oh e wia irair me pahn kapai kitail ni atail idawehn Sounkomouro.24
Saledek en pilipil iei koasoandi ehu me tepsang nan Kaunsel en Nanleng mwohn mour wet oh pingiping me wiahwihda nanpwungen irail akan me pilada idawehn Krais oh me idawehnla Sehdan.25 Mweidala atail pohnmwahso oh pilada Sounkomouro pahn elehda kitail en kak alehdi Sapwellime marain oh Sapwellime popohl. Ahpw pein amwail popohl kin lelohng nan kasongosong ahnsou me aramas doadoahngki arail saledek en pilipil ni wiepe me keper oh kamedek.
I kamehlele me popohl mehlel me kitail kin kehn nan mohngiongitail kan kin kakehlaila sang ni atail marainiki dahme Sounkomour en sampah pahn ketin wia ong kitail. Nan Preach My Gospele kasalehda ni lingan nin duwe met: “Ni atail pahn koapworopworki Tomw en Sises Krais, E pahn ketin sewese kitail powehdi atail kapwal akan, soumwahu kan, oh medek kan. Kitail kak direkihla peren, popohl, oh kameleilei. Mehkoaros me sapahrek nan mour kak kapwungpwungla sang ni Tomwpen Sises Krais.”26
Kapahieu: Kawada Saion nan Atail Mohngiong kan oh Imwatail kan
Kitail wia sapwellimen Koht seri oh wia Sapwellime peneinei. Kitail pil iang peneinei me kitail ipwidi ie. Koasoandi en peneinei iei poahson en peren oh popohl. President Russell M. Nelson padahkihonger kitail—oh kitail pil esehlahr sang nan erein soumwahu doar wet kitail koledihsanger—me nan werengen-ihmwatail kan, Soun utuht-en Mwomwodiso kan kin kak kasawih “oh kak kapitala manaman en peneinei kan … ong ni wekideklahn [atail] wasahn kousoan[kan] ong wasa sarawi en pwoson.”27 Ma kitail pahn ahneki soangen doadoahk sarawi wet nan imwatail kan, kitail pahn pil ahneki sapwellimen Sounkomouro popohl.28 Se wehwehki me tohto kumwail sohte ahneki kapai en mihmi nan ihmw me mour pwung mie oh kumwail kin pelpelian ahnsou koaros irail akan me kin pilada mour sapwung kan. Sounkomouro kak ketikihong kumwail silasil oh popohl pwe en kaweid kumwail alehdi perehre oh wasahn ruksang kisinieng en mour wet.
I kamehlelehiong kumwail me peren, limpoak, oh pepehm en pweida me kin wiawihong peneinei me ahneki limpoak, oh mour pwung kin wiahda popohl oh peren. Limpoak oh kadek wia poahson en kak ahneki Saion nan atail mohngiong kan oh imwatail kan.29
Kelimau: Idawehn Kaweid en Ahnsou wet me Sang Atail Soukohp
Atail popohl kin kakehlaila mehlel ahnsou me kitail kin idawehn sapwellimen Kauno soukohp, President Russell M. Nelson. Ekis keieng kitail pahn ahneki ahnsou mwahu en rong sang ih. E kaunopadahr ong pwukoah wet sang ni tepin kawa. Pein ah kaunopada udahn kaselel mehlel.30
E padahkihong kitail me kitail kak “kehn popohl poatoapoat oh peren nan ahnsou apwal akan,” ni atail pahn nantihong duduwehla atail Sounkomour, Sises Krais.31 E ketin kaweidkihong kitail en “kohluhla rahn koaros” pwe kitail en kak alehdi sapwellimen Kauno “kamwakel, kamaiau, oh kakehlail manaman.“33 I wia sounkadehde ni mehlel me kempoakepahtail soukohp alehdier kaudiahl oh pil wie alialehte kaudiahl sang nanleng.
Kitail kin kesempwalki oh utungada ih nin duwen eh wia atail soukohp, ahpw kitail kin pwongih Samatail Nanleng oh atail Sounkomour, Sises Krais. Ngehn Sarawi kin kakehlailih kitail.
I kadehdehki oh kasalehda ahi kadehde nin duwen ahi wia Wahnpoaron men me Sises Krais, Sounkomour oh Soundoar en sampah, me ketin kaukaweid oh kakahluwa Sapwellime Momwohdiso kopwurupwurdo. Sapwellime mour oh doadoahk en tomwo iei udahn poahson en popohl. Ih iei Nanmwariki en Popohl. I kadehdehki ni mehlel oh wahu me E ketin ieias. Ni mwaren Sises Krais, ahmen.