Limpoak en Koht
Samatailo oh atail Soundoaro kapaiakin kitail kosonned akan, oh ni atail pahn kapwaiada Sapwellimara kosonned akan, kitail kin kehn Sapwellimara limpoak unseko laud oh poatoapoat.
Samatail Nanleng ketin poakohng kitail laud oh unsek.1 Nan Sapwellime limpoak, E kapikada pilahn ehu, pilahn en poadoandoar oh peren en kak ritidahng kitail soahng koaros oh peren koaros me kitail men alehdi, ong ni soahng koaros me E sapwellimaniki oh me mie.2 Pwehn alehdi met, E pil men tohnmeteikihla Sapwellime Iehros Kesempwal, Sises Krais, en wia atail Sounkomour. “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”3 Ih pahpa me ahneki limpoak mwakelekel—unsek ong koaros a mehlel ong pein emen emen kitail.
Sises Krais iang Samatailo sapwellimaniki soangen limpoak unsek ohte. Ni ahnsou me Sahmo tepin kasalehda Sapwellime pilahn lap en popohlo, E ketin kapwukoahki emen en wia Sounkomour pwehn doareikitaila—e wia kisehn pilahn kesempwalo. Sises ketin mahsani, “Iet ngehi maing, Komw ketin poaroneiehla.”4 Sounkomouro “ketin wia soahng koaros pwehki kamwahu pen sampah; pwehki E poakohng sampah, iei me kahrehda e mweidala pein Ah mour pwe koaros en kak kohdo Reh. Eri, E ketin ruwesehki koaros en alehda Sapwellime komouro.”5
Limpoak laud wet pahn kiong kitail nsenamwahu oh ineng en kapakap ong Sahmo ni mwaren Krais. Sohte emen rehtail me wia aramas en liki Rehra. Kitail sohte anahne peikasalki lukwer iong Koht, itar ma kitail pehm me kitail sohte warohng. Kitail kak kehliki mahk oh wiewia mwahu en Sises Krais en kak sansalada.6 Ma kitail pahn mihmi nan limpoak en Koht, kitail pahn sohla nohn kehliki pwuhng en meteikan en kin kaweid kitail.
Limpoak en Koht Sohte Pwungki Dihp; Ahpw, e Wahdo Doarepatail
Pwehki sapwellimen Koht limpoak ah nohn-kapilkitailpene, ekei kin koasoiahki me e “sohte pweipwei,” oh nan arail madamadau kan irail kak kawekala madamadau wet en wehwehki me sapwellimen Koht kapai kan me sohte pweipwei” oh iei komourlahu me “sohte pweipwei.” Mepwukat sapwung. Ekei pahn kin inda, “Sounkomouro poakohng ie ni udahn mwoamwei,” oh met e udahn mehlel. Ahpw E sohte kak ketiki emen kitail ong nan Sapwellime wehi ni mwomwetail met, “pwehki sohte mehkot samin kak pidolong wasahu, de mih wasa me e ketiket ie.”7 Dipatail kan pahn keieu anahne kopwungpwungla mahs.
Ehu pako, Professor Hugh Nibley koasoia me wehin Koht sohte kak momour ma e pahn pwungkihla ehu dihp me keieu tikitik: ”Ekiste kasamin en suwed pahn kahrehda paliteio eh sohte mwakelekel oh sohte poatoapoat. Sapwung tikitik ehu nan ehu ihmw, de pwihn ehu, de kosonned , de wiewia ehu pahn udahn kalohmwatiala tangatang reirei en mour soutuk.”8 Kosonned akan en Koht inenen “koakos”9 pwehki Sapwellime wehi oh towe kan kak kehlail oh nantiongete soikala palien ngehn saut oh pilada me pwung kan, ni soh peikasal.10
Elder Jeffrey R. Holland kasawiadahr me, “Sises mwahngih mehlel dahme palilaud en atail tiahk kin manokonokihla: me mie wekpeseng kesempwal ehu nan pwungen kosonned en mahkepen dihp (me E sapwellimaniki manaman laud en kapwaiada) oh keinepwi ong me sohte kin kapwaiada (me E sohte pak ehu kin wia).”11
Mendahte atail sou itar akan, ahpw, kitail kak koapworopworki en alehdi “ahd oh kamehlelpen,”12 ehu wasa nan Sapwellime Mwomwodiso oh pil nan wehin selesdial. Mwurin Ah kasansalehda me E sohte kak ketin pwungkihla ehu kisin dihp, Kauno ahpw kameleilei kin kitail:
”Iei, Ih me koluhla oh kapwaiada kosonned en Kauno kan pahn alehdi mahk.”13
“Oh uwen tohto en nei aramas kan ah pahn kohlula I pahn mahkiohng irail diparail kan ni ahnsou me irail kin sapwungala mwohi.”14
Koluhla oh mahk laud kin kapwungala sapwung laud.
“Tamataman koasoi kan me Amulek koasoiaiong Zeezrom, nan kanihmw en Ammonihah, pwe e koasoiiong ih me Kauno pahn ketdo pwe en ketiki sapwellime aramas akan, ahpw e sohte pahn ketdo ketiki irail nan diparail kan, ahpw e pahn kapit irail sang nan diparail kan.
“Oh E ahneki manaman sang rehn Sahmo en doarehla Sapwellime aramas sang diparail kan pwehki sang ni koluhla; ihme kahrehda e kadaredo sapwellime tohnleng kan en kalohkihda rongamwahuo me iei koluhla, me kin wahdo manaman en Soundoro, ong komourpen palingenirail kan.”15
Sang ni mwekid en koluhla, Kauno kak ketkihdo mahk ni sohte kalokepe, oh “Koht sohte pahn udihsang wia Koht.”16
Mour en sampah, kumwail ese, iei me sohte kin kamehlele Krais, de “koaros mwahu, ahpw sohte Krais.” Atail mwehi wet pil rasehng kemwekid kan me kin wiawi nan Pwuhk en Mormon me duwehte aramas akan arail kin song koadoahke mehteikan en wia me sapwung, kieng irail saledek en perepereniki wia insenen nenek, oh kakairada kepwehpwe en wia poahson en atail mour. Arail madamadau kan kasalehda “ong ni kawehla kisin dihp tikitik”17 de pil tohto dihp, ahpw sohte ehute pahn kak lapwada. Met e kohdo sangete ni intahn Simpwulo. Me keieu mwahu me aramas akan me kin pwungki ”koaros mwahu, ahpw sohte Krais” de “sohte mehkot sang koluhla” kak sawaski iei me dene dihp sohte kin mie de ma e mie, ah sohte kalokepe kin wiawi. I sohte kak kilang me akipwung wet pahn kak pwarada ni rahn en kadeiko.18
Kitail sohte anahne wia mehkot me apwal ong wekidseli dipatail kan pwe en kak mwoamw mwahu. Oh ni pali teio, kitail sohte anahne wia mehkot apwal pwe en kasohrela dipatail kan ni pein atail wiewia. Atail palien lamalam kaidehn palien lamalam en kapwungala de palien lamalam en aramas unsek kei, ahpw palien lamalam en doarehla sang nan dihp—doarepen dihp wet sang Sises Krais. Ma kitail kin karakarahk, pwehki Sapwellime Tomwo, dipatail kan pahn sohrala ni Sapwellime lohpwuho, oh ”ni lipwehkan kitail eri kehlaildahr.”19
Limpoak Mwuledek en Soukohp kan kin Duwehte Limpoak en Koht.
I inenen kapingki ahnsou reirei oh I pil ahneki pepehm en, men alehdi limpoak en soukohp en Koht akan nan arail kehkehlik ki duwen dihp. Irail sohte kehlail ki ineng en uhwong de kawehla. Arail ineng mehlel kan duwehte limpoak en Koht; ni mehlel, e wia limpoak en Koht. Irail kin poakohng irail ako me re kin kadarala, sohte lipilipil ihs oh sohte lipilipil ni soangen mwohmw. Duwehte Kauno, Sapwellime ladu kan sohte mwahuki emen en lokolongki medek en dihp oh pilipil sou itar akan.20
Alma pekederla pwe en kalohkihwei padahk en koluhla oh doarepehu ong aramas ekei me men kemehla, kaloke, oh pil kemehla Souleng kan, pil iangahki Alma. Ahpw e poakohng irail oh men irail en komourala. Mwurin ah padahngki Tomwpen Krais ong tohn Ammonihah kan, Alma pil koasoia ni ngidingid, “Oh met, riei ohl ako, I inengieng sang nan kapehdeiet unsek, ei, sang ni ei pwunod laud me kaweikek, pwe kumwail en rong ei koasoi kan, kesehsang kumwail dipwamwail akan, … pwe kumwail en kak kehlailda ni imwin rahno oh pedelong nan [Sapwellimen Koht] wehio.”21
Nan en President Russell M. Nelson koasoi kan, “Met pwehki kitail inenen kesempwal ki sapwellimen Koht seri kan me kahrehda atail kin padahngki Sapwellime me mehlel o,”22
Koht poakohng kumwail; Kumwail poakohng Ih?
Limpoak en Sahm oh Nah kin kohieng koaros ahpw kin iangahki koapworopwor kan oh kasikpe kan. Pil pwurehng, Presiden Nelson padahngki me, “Kosonned en Koht kan mie pwehki Ah ketin poakong kitail ni mehlel oh Kupwurki kitail en wiahla dahme kitail kak en wiahla.”23
Pwehki Ira poakohng kumwail, Ira sohte kupwurki ketiketlahsang kumwail “ni soangen mwohmwente.” Pwehki Ira ketin poakohng kumwail, Ira kupwurki kumwail en ahneki popohl oh pweida. Pwehki Ira poakohng kumwail, Ira kupwurki kumwail en koluhla pwehki iei ih met ahl en kolahng peren. Ahpw iei amwail pilipil—Ira kesempwaliki amwail mehn pilipil. Kumwail anahne pilada en poakohng Ira, papah Ira, oh kolokol Sapwellimara kosonned akan. Ira ahpw kak inenen kapaiada kumwail pil duwehte poakohng kumwail.
Ira ketin kasik sang rehtail kitail en pil ahneki limpoak. “Ih me sohte ahneki limpoak sohte wewehki ihs Koht; pwe Koht me limpoak.“24 Ni Sohn ah ntingih, “Kempoake, ma Koht inenen poakohng kitail, kitail anahne en poakohng mehteikan.”25
Praimeri Presiden Lap Joy D. Jones en mahso katamando me ahnsou me e pwopwoud kapw, ih oh ah pwoud alehdi pwukoah en kohla pwarek oh sewese peneinei ehu me solah kohla sarawi sounpar tohto kei. E mwadangete sansal ni ehd en ara pwarala me re sohte anahne ira. Mwurin ara kin nannantiong ahpw sohte kin pweida pwarpwarek, oh mwurin kapakap oh pil madamadau kan, Brother oh Sister Jones alehdi pasapeng duwen kahrepen ara papah ni ire tikitik ehu me kohsang nan Doctrine and Covenants: “Ke en poakohng Kauno ahmw Koht sang nan mohngiong unsek, ahmw kehl unsek, lamalam, oh kehl; oh ni mwaren Sises Krais ke en papah ih.”26 Sister Jones koasoia:
“Se diarada me se nannantiong en papah peneinei wet oh pil papah aht bishop o, ahpw se anahne idek reht ma mehlel ieu se men papah sang ni limpoak ong Kauno. …
“… Se tapiadahr kin kasik aht pahn kin pwarek peneinei mwahu wet pwehki sang ni aht poakoahng Kauno [kilang 1 Nihpahi 11:22]. Se wiewia met pwehki Ih. E wiahda aht kahpwalo en solahr apwal ong kiht, Mwurin sounpwung kei me se kin kohla keskesihnen ni arail wenihmwo, peneinei o tapiada kin kasomwoi kiht. Mwurin ahnsou reirei, se pil wia aht kapakap oh kin koasoia pene duwen rongamwahuo. Irail wiahla kempoakepaht. Se kin pwongih oh poakohng Ih sang ni poakohng Sapwellime seri kan.”27
Nan atail wewehki me Koht poakohng kitail ni unsek, kitail anahne kin idek, “Ia uwen ahi poakohng Koht? E kak kehliki ahi limpoak duwehte ahi kin kehleki Sapwellimeo?” E sohte mwahu kitail en warohng momour pwe Koht en kak poakohng kitail a kaidehn te atail kin pwupwidi kan ahpw pil pwehki sang ni dahme kitail wiewiahla? Oh, E pil kak mahsanihki kumwail oh ngehi duwehte Ah mahsanihki Hyrum Smith, ni karasepe,“Ngehi, Kauno, poakohng ih pwehki mwakelekel en ah mohngiong.”28 Kitail pil tamataman an Sohn kapahrek mwahuo: “Oh met limpoak en Koht, kitail en kolokol sapwellime kosonned akan: oh sapwellime kosonned akan sohte kansensuwed.”29
Oh pil, Sapwellime kosonned akan sohte kansensuwed—ahpw e kansenamwahu. Re kin kasalehda ahl en kamwahu, peren, meleilei, oh nsenamwahu. Samatailo oh atail Soundoaro kapaiakin kitail kosonned akan, oh ni atail pahn kapwaiada Sapwellimara kosonned akan, kitail kehn Sapwellimara limpoak unseko laud oh poatoapoat.30
Iet pasapengpen dahme kitail kin peipeieng kan—limpoak en Koht. Nan poadoapoad en Pwuhk en Mormon mwurinte Soundoaro, e repwot ehr “me mie ahnsou me sohte kahpwal nan sahpw, pwehki sang ni limpoak en Koht me kin koukousoan nan mohngiong en aramas akan.”31 Ni atail nannantiong kohkohwei Saion, kitail tamataman inou me mih nan Kaudiahl: “Kapai ong irail akan me kin kapwaiada sapwellime kosonned akan, pwe irail pahn ahneki pwung en tuhke en komour o, oh pidelong nen kehl en kolahng kanihmw [sarawi] o.”32
I kadehdeki mehlel en Samatail Nanleng oh Sounkomour, Sises Krais, oh Sapwellimara limpoak me sohte kak mehla, oh pil sohte imwi. Ni mwaren Sises Krais, amen.