Eden Mwomwohdiso wet Sohte Kak Wekidekla

Sang Elder Neil L. Andersen

Sang Pwihn en Wahnpoaron Ehk-riemenko

Ni atail kin men idawehn kaweid en Kauno me kin pwildohsang rehn Sapwellime soukohp momouro, mehlel ma e kin weksang dahme kitail tepin medemedewe, anahne karakarahkdi oh tohnmetei, Kauno kin ketin kapaia kin kitail manaman en ngehno laud sang mahs.

Nan ehu tuhpenehn pali en rohng ni Oahkus 16, 2018, Presiden Russell M. Nelson koasoia: “Kauno ketin kamarainihkinie kesempwal pen ahd me E ketin kahdanekiher Sapwellime Mwomwohdiso wet, iei Mwomwohdiso en Sises Krais en Souleng en Imwin-rahn akan.¹ Iei atail pwukoah kitail en kin peikiong Kupwure.”²

Rahn riau mwuri, ni Oahkus 18, I patehng Presiden Nelson nan Montreal, Canada. Mwurin at mihting nan wasa kaselelo nan Palais de Congré, Presiden Nelson sapeng iren peidek kei sang irail sounkair kei. Ohlo kasalehda me “e pahn wia doahk laud ehu pwehn [wekidala eden Mwomwohdisoht, oh] wekidala tiahk ehu me daulilahr sounpar epwiki kei.” Ahpw e pil kapatahiong me, “Eden Mwowmohdiso wet sohte kak wekidekla.”³

Wihk isuh mwuri, ohlo padahngki nan kapokon lap me: “Kauno ketin kamarainihkinie kesempwal pen ahd me E ketin kahdanekiher Sapwellime Mwomwohdiso wet, iei Mwomwohdiso en Sises Krais en Souleng en Imwin-rahn akan. … Pwe Pein Sounkomouro me mahsani, ‘Pwe iei met me pahn wia eden ahi mwomwohdisou,’” Ih eri kapwurehiong, “Eden Mwomwohdiso wet sohte kak wekidekla.”⁴

Ehu Peidek Mwahu

Ehu peidek mwahuo pil pwarada: “Dahme met ki?” pwe sounpar tohto kei kitail pil ahnlahr ehu ahdkamwan “Mormon”? “Pwihn en Koul en Mormon Tabernacle,” kasalehda nan kilel “Ngehi emen Mormon,” koul en Praimeri “Ngehi emen Pwutak en Mormon”?

Padahk en Krais kin poatoapoat oh sohte kin wekila. Ahpw, ire sansal oh kesempwal kan nan doadoahk en Sounkomouro kin pwarada ansou kan me konehng. Ni menseng wet Presiden Nelson koasoia, “Kopwurupwurdou wia mehkoat me wie mwekmwekid, kaidehn mwekid ehute.”⁵ Kauno ketin mahsaniher, Mehkoaros pahn pweida ni ansou me konehng.⁶ Met iei atail ansoun kalipwelipwa eden Mwomwohdiso wet me sansalehr.

Pweidahn Mwomwohdiso en Sises Krais en Souleng en Imwin-rahn akan anahne kitail en sansaliki Sapwellime ahdo. Me keren I mih nan Kirtland, Ohio, wasa me Soukohp Joseph Smith, iangahki tohn Mwomwohdisoht malaulau kei, kohpada me “Mwomwohdisoht pahn audehla pali Mese oh pali Kapi en Amerika--e pil pahn audehla sampa.”⁷ Kauno ketin kawehweier duwen doadoahk en dih wet me wia “ehu doadoahk kapwuraimwei oh lingan.”⁸ E pil ketin mahsaniher me ehu inou pahn pweida ni imwin-rahn akan eri elehda mehkoaros … sampa [pahn] ale kapai.⁹

Padahk kan nan kapokon wet kawewehdier ong lokaia 55 oh pahn pekeder nan wehwe ong sampa pwon. Ni imwio, aramas pahn rong oh wadek mahsen pwukat ni lokaia 97 nan wehi oh sahpw me tohto sang meh 220.

Ketido Keriauo

Ni sapahldo kouwahlap oh lingan en Sounkomouro, tohn Mwomwohdiso en Sises Krais en Souleng en Imwin-rahn akan pahn iang tohn wehi koaros, aramas koaros, keinek koaros, lokaia koaros, oh pali en tiahk en sampa koaros.

Kekeirdahn Kamwahu pen Mwomwohdiso wet

Kamwahu pen Mwomwohdiso en Sises Krais me kopwurupwurdohu pahn kipehdi kaidehnte tohn Mwomwohdisoht ahpw, aramas koaros. Pwehki kamarain kan sang nanleng, kopwurupwurdohn rongamwahu sarawio pohn sampa, oh manaman en kisakis en Ngehn Sarawi, kitail pahn wiahla ehu mehn kamarain pohn dohlo ansou me rotorot en me sohte pwoson Sises Krais kin karotongala sampa. Tetehn tohto me pahn mweidehng peren en sampa en katikala arail pwoson Soundoro, kitail sohte pahn mwekid sang nan dewatail kan.¹⁰ Souleng kan me sohte iang kitail pahn kasamwo atail pwukoah oh kadehde mehlel kan en Krais. Pil duwehte Souleng kan me sohte kin liki kitail pahn ehu rahn wiahla kempoakepatail kei. Nan rahn kohkohdo kan, kitail pahn kahdanekihla mwaren Sises Krais.

Se kaping kalahngan ong kumwail pwehki amwail kin pwerisek pwehn uhki ahd mehlelo en Mwomwohdiso wet. Nan kapokon lap sounpar silu samwalahro, Presiden Nelson kalohkihda kokohp pwukat: “I inou kihong kumwail me atail poden ngoang pwehn doadoahngki ahd pwungo en Mwomwohdisohn Sounkomouro … pahn kalaudehla atail pwoson oh kak en alahle manaman lap en ngehno.”¹¹

Inou wet pweidahr rehn ekei tohnpadahk poadidi kan nan sampa.¹²

Brother Lauri Ahola sang Paliepeng en United States nda me ekei ansou e kin apwalehng en ndahla eden Mwomwohdiso wet pwon, ahpw pwehki kaweid sang soukohpo, e kin nannanti. Ahpw pwehki en soukohpo kokohp, ohlo nannantihte. Ehu ansouo, e mwemweitla rehn emen kempoakepah me towe ehu Mwomwohdiso tohrohr. Iet ah koasoi kan:

Emen iengeo idek, “Kowe emen Mormon?”

“‘Ngehi emen tohn Mwomwohdiso en Sises Krais en Souleng en Imwin-rahn akan, ehi,’ I nda. Ohlo eri tepda idek rehi peidek kei, me kin tepkihda: ‘Mwomwohdiso en Mormon kin kamehlele … ?’ Oh ansou koaros, I kin sapengki ah peidengko ki , ‘Nan Mwomwohdiso kopwurupwurdo en Sises Krais, se kin kamehlele …’

“Ni ansou me e diarada me I sohte kin pohnese ahd ‘Mormon,’ ohlo uhd peidek rehi, ‘Pwe kaidehn kowe Mormon?’

“Ngehi eri peidek reh ma e ese ihs me Mormon—ohlo sehse. I ndahiong ohlo me Mormon wia emen soukohp … [oh I] kapingki ahi kak wehwehki [ohlo].

“‘Ahpw,’ I doula nda me, ‘Mormon sohte mehkihla dipei kan. Mormon sohte … ale lokolok nan Kedsemani de mehla pohn lohpwuo [pwehki ngehi]. … Sises Krais iei ahi Koht oh ahi Sounkomour. … Oh ni Mware me I men aramas en esehkin ie.’ …

“ … Mwurin aht nennenkihla seken kei, ohlo nda, ‘Eri, kowe emen Souleng!’”¹³

Presiden Nelson nan kapokon lap

Tamataman dahme Presiden Nelson koasoia? “I inoukihong kumwail me ma kitail pahn wia uwen atail kak en kapwurehdo ahd pwungo ong Mwomwohdisohn Kauno, Ih me sapwellimaneki Mwomwohdisoht pahn kamweredi Sapwellime manaman oh kapai pohn mongen Souleng kan en Imwin-rahn akan, ni mwohmw ehu me kitail sohte kin kilang mahs.“¹⁴

Kauno kin Kalap Langahda Ahlo

Kauno kin kalap kapwaiada Sapwellime inou kan. Kauno kin ketin langahda ahl ong kitail ni atail kin wia Sapwellime doadoahk.

Erein sounpar kei se songosong en pwainda pali en internet kei ChurchofJesusChrist.org oh ChurchofJesusChrist.com. Pali pwuko sohte kin netila. Ele ni ansou me Presiden Nelson wia ah pakairo, pali riau ko wiahkintehiou ritida. Met wia manaman ehu.¹⁵

Manaman en Kauno pil kakehlaka kitail ni atail kin wekidala ahd kei me kin wie doadoahk nan Mwomwohdiso wet.

Kokohwei ni pwoson, eden Pwihn en Koul en Mormon Tabernacle uhd wekidekla ong Pwihn en Koul en Tabernacle nan Temple Square. Pali en internet LDS.org, me aramas tohto sang million 21 kin pwarek nan ehu sounpwong, uhd adanekihla ChurchofJesusChrist.org.¹⁶ LDS Business College uhd adanekihla Ensign College. Website Mormon.org uhd adanekihla ChurchofJesusChrist.org Uwen dipwisou daulih kid kei me ahd pwukat “Mormon” oh “LDS” kin patehng pil wekideklahr. Souleng en Imwin-rahn pwoson kan pil wekidalahr nempehn neirail website kan, podcast kan, oh Twitter.

Kilel kahpw en Mwomwohdiso

Kitail kauwadahr ehu kasansal me pahsonki Sises Krais.

“Nan werengen sansalo mie ehu en Thorvaldsen mahlen perperda ni sansal en Kristus. E kaskasale Kauno me iasadahr, ieias oh pengpengla pwehn ale koaros me pahn kohdo Reh.

“Nan sansalo, Sises Krais ketin keskesihnen pahn mwohng ehu [katkatamanehng] kitail me Sounkomouro ketin iasadahr sang nan sousouo.”¹⁷

Eden Mwomwohdiso nan lokaia kei

Eden Mwomwohdiso nan pil ekei lokaia

Mwomwohdiso en Sises Krais en Souleng en Imwin-rahn akan kalohkidahr sansal wet nan lokaia me tohto sang 50. Ahd kapw kan en pali kan pil alahladier nan sampa.

Kapingki Sawas en Mehteikan

Se kaping kalahngan ong aramas mwahu oh kadek tohto kan me wauneki atail mwauki arail pahn lukwerihkin kitail ahd pwungo. I wadekada ehu doropwe me pid dahme emen lapalap en Kahdilik koasoiaki “Souleng en Imwin-rahn akan.”¹⁸ Ni ahi pwarek emen sounkaweid en ehu mwomwohdiso en Souleng sounpwong ehu samwalahro nan paliepeng en United States, ohlo tepte ekeriki Mwomwohdiso wet ahdo pwon, oh kaimwsengkihla, “Mwomwohdiso en Sises Krais.”

Se diaradahr me lepin lokaia weneu me patehng nan ahdo pahn ele sohte sonamwahu ong pali en kair, ahpw Presiden Nelson koasoiahier me, “pali en rohng kan pahn pohnese atail pekipeko.”¹⁹ Kalahngan en kumwail amwail kihong kiht soangen madamadau ohte me kumwail kiongehr pali en tiahk, mwadong, kopwerment oh pali teikan ni amwail kin doadoangki ahd me se pwungki.

E pahn miehte ekei aramas me, songosong en kedirepwa de kasohwe kesempwal pen atail doadoahk, pahn kin ekehker kin kitail “Mwomwodiso en Mormon.” Ni wahu, se pil pwurehng peki pali en rohng kan en kin wauneki aht anahn oh ekerkin kitail ahd me wie doadoahkehr kereniong lel sounpar 200.

Eimah en Souleng kan en Imwin-rahn akan

Mie kiden Souleng en Imwin-rahn akan me ni eimah doadoahngkier eden Mwomwohdisoht. Ni atail wia atail pali, mehteikan pahn alasang. I pwungki soai pwoatet sang Tahiti.

Iriura Jean me sounpar eisek koasonedier me e pahn idawehn kaweid en Presiden Nelson.

“Nan en serepeino pwihn nan sukuhl irail koasoia arail imwin wihk … oh Iriura koasoia … mwomwohdiso.

“Ah sounpadahko, Vaite Pifao, nda, ‘Oh, eri kowe emen Mormon?’

“Iriura nda ni eimah, ‘Soh … ngehi emen tohn Mwomwohdiso en Sises Krais en Souleng en Imwin-rahn akan!’

“En serepeino sounpadahko sapeng ‘Ehi, … kowe emen Mormon.’

“Iriura ngidingidki, ‘Soh sounpadahk, ngehi emen tohn Mwomwohdiso en Sises Krais en Souleng en Imwin-rahn akan!’

Ms. Pifao pwuriamweikihla en Iriura ah lamalam kehlail oh medewe dahme serepeino nohn ngidingidiki en doadoahngki [ahd] reirei en ah mwomwohdisou, [Liho lemehda en esehla mwahu duwen Mwomwohdisou.]

“[Mwuri, ni en Sister] Vaite Pifao ah pepdais [liho kaping kalahnganki] en Iriura ah kehlailiki kaweido sang Presiden Nelson.”²⁰

Lih emen me esehla duwen Mwomwohdisou pwehki nah tohnsukuhlo

“Eden Mwomwohdiso wet sohte kak wekidekla.” Kitail wenla mwowe nan pwoson. Ni atail kin men idawehn kaweid en Kauno me kin pwildohsang rehn Sapwellime soukohp momouro, mehlel ma e kin weksang dahme kitail tepin medemedewe, anahne karakarahkdi oh tohnmetei, Kauno kin ketin kapaiahkin kitail manaman en ngehno laud sang mahs oh kin kadarodo Sapwellime tohnleng kan pwehn sewesei kitail oh keskesihnen limwahtail.²¹ Kitail kin ale sawas en Kauno oh Sapwellime kamanaman.

I kilangki mesei oh kadehde manaman en kaudial me mie pohn atail Presiden Russell M. Nelson. Ihte me e anahne en kin papah Kauno oh kapaiada seri en Sahm Nanleng kan. Sang ni pein ahi irair sarawi, I kadehde me Kauno kin poakohng ohlo. Ih iei Sapwellimen Koht soukohp.

I kadehde me Sises iei ih me Krais oh Sapwellimen Koht Ieroso. Ni mwaren Sises Krais, amen.

Ire kan

1. Kilang 3 Nihpai 27:7–9; Doctrine and Covenants 115:4.

2. Russell M. Nelson, nan “Eden Mwomwohdisoht” Newsroom, Oahkus 16, 2018, newsroom.ChurchofJesusChrist.org.

3. “Presiden Nelson Koasoia Eden Mwomwohdisoht,” Newsroom, Oahkus 21, 2018, newsroom.ChurchofJesusChrist.org.

4. Russell M. Nelson, “The Correct Name of the Church,” Liahona,Nohpempe 2018, 87.

5. Russell M. Nelson, “The Temple and Your Spiritual FoundationLiahonaNohpempe 2021, 94.

6. Doctrine and Covenants 64:32

7. Teachings of Presidents of the Church: Joseph Smith (2007), 137.

8. 2 Nephi 27:26

9. 1 Nephi 15:18

10. Doctrine and Covenants 101:17

11. Russell M. Nelson, “Becoming Exemplary Latter-day Saints,” Liahona,Nohpempe 2018, 114.

12. Kilang Henry B. Eyring, “Thus Shall My Church Be Called,” Liahona, Oakotohpe 2021, 6-9.

13. Lauri Ahola, “Using the Full Name of the Church Was Awkward but Worth It,” Liahona, Epreil 2020, ChurchofJesusChrist.org.

14. Russell M. Nelson, “The Correct Name of the Church,” 89.

15. En Mwomwohdisoht Ohpis en Intellectual Property wie mwasamwasahn kodahn palien internet me adaneki ChurchofJesusChrist.org sang 2006, oh e saikinte kohda. Meid kalahngan pali en interneto kohda pwehn netila ni ansou me Presiden Nelson wia ah pakair o, oh Mwomwohdiso wet eri pwainda ahdo sang ehu pali ni isais ehu me inenen tikitik.

    Ni soangen mwohmwohte, Mwomwohdiso wet pil kin mwasmwasahn kodahn pali en internet teio ChurchofJesusChrist.com sangete 2011. Kapwuriamwei, pwe e pil kohda nan Oahkus 2018 oh pil alahlda ni isais ehu me tikitik.

16. Nan kapokon lap en Oakotohpe 2018, Presiden Nelson nda:

    Riei ohl oh lih akan, mie akpwung tohto kei nan sampa me uhwong kopwurupwurdohn ahd pwung en Mwomwohdisoht. Pwehki dipwisoun doadoahk en internet me kitail wie doadoahngki oh kamangailahn doadoahk en rapahki palien sawas pwe kitail en kin mengei en diar dahme kitail anahne ansou mwadang--iangahki ire kan me pid Mwomwohdisohn Kauno--aramas ngeder nda me kaidehn ansoun kopwungala ahdo met. …

    “… I inoukihong kumwail me ma kitail pahn wia uwen atail kak en kapwurehdo ahd pwungo ong Mwomwohdisohn Kauno, Ih me sapwellimaneki Mwomwohdiso wet oh pahn kamweredi Sapwellime manaman oh kapai pohn Souleng kan en Imwin-rahn akan. (”The Correct Name of the Church,” 88, 89).

    Sangete wekdeklahn LDS.org ong ChurchofJesusChrist.org, kehlail en pali en internet wet (kehlail oh pitipit en pali en internet wet ah kin kihda ire kan me anahnpe mie) wie kekehlaila sang mahso. Ni karasepe, pali ChurchofJesusChrist.org met, oh erein sounparehr ehu dou powe, pali wet me keieu kehlail en kihda sawas nan United States pohn Google ansou me aramas kin rapahki pali en “mwomwohdiso,” pwe mahso ire wet sohte kin kak sansal.

17. Russell M. Nelson, “Langahda Nanleng kan Pwehn Sawas,” Liahona, Mei 2020, 73.

18. Kilang Tad Walch,“‘If we can’t get along, it’s downright sinful’: The partnership between Catholics and Latter-day Saints,” Deseret NewsSulai 1, 2021, deseret.com.

19. Russell M. Nelson, “The Correct Name of the Church” 89.

20. The Correct Name of the Church: A Tahitian StoryPacific Newsroom, Septempe 15, 2019, news-nz.ChurchofJesusChrist.org.

21. Kilang Doctrine and Covenants 84:88