Tiepene Lap
Poahson en Tehnpas Sarawi oh Palingenimwail
Kapokon Lap en Oakotohpe 2021

Tehnpas Sarawi oh Poahson en Palingenimwail

Sang Presiden Russell M. Nelson

Presiden en Mwomwohdiso en Sises Krais en Souleng en Imwin-rahn akan

Ahnsou me mwekid lapala ieu wiawi nan ahmw mour, wasa me keieu mwahu me ken mihmi ie ni palingehn iei nan amwail kolokol inou sarawi en tehnpas sarawi!

Riei kempoakepahi ohl oh lih akan, I kapingki ahi patehng kumwail ni menseng wet pwe ien ehukieng kumwail pepehm kan en ahi mohngiong.

Ni amwail mwahngih, met kitail wiwia onohnsapahl en Tehnpas Sarawi en Salt Lake me kokouda nan mwehin kawao. Doadoahk apwal wet pahn iangkakehlailpen tepin poahson me wiawihda mahso, me mihmikiehr pahr epwiki samwa. Ahpw tehnpas sarawi wet pahn anahne keskesihnenki werei sang met. Kerenlahng imwin Meio, I dawih iren doadoahk me wihwiawi ong onohn laud wet. I medewe me ke pahn pereniki dahme ngehi oh ahi werek Wendy kilang. I medewe me kumwail pahn kak kilang dahme kahrehda koul me inda “Poahson Tengeteng”1 me kiheng kitail ehu wehwe kapw.

Kasdo sang wasahn onohnda en Tehnpas Sarawi en Salt Lake: ”Met kitail kilikilang tepin poahson en Tehnpas Sarawi en Salt Lake. I wie keskesihnen ni wasah ehu me mih pahn wasa me irail kin inda Garden Room. Ni ahi kaskasawih doadoahk en peh kan me mih ni ihmw wet, I pwuriamweikihla dahme pwihn me tepin kousoandier wasa kiset wiadahr. I inenen ahniki wahu lap ni ahnsou me I kehn me irail wiahkihda tehnpas sarawi kaselel wet ki dipwisou en doadoahkte oh wiepen doadoahk kante me irail kak wia nan erein sounpar epwiki kei samwalahro.

“Mwurin sounpar ngeder pwukat, ihte ma kitail pahn kasawih mwahu poahsono, kitail pahn kak kilang ohla kan sang lapakehn pihl, wehweh kan me mie nan siment kan, oh soangen ohla teikan me sansal nan takai kan me wiahda ihmwo.

“Met ni ahi kilangehr dahme semen en ahnsou wet kan kak wia pwehn kakehlailih tepin poahsono me iangahki soun dawih kan, sounpilahn kan, oh semen en soun wia ihmw kan, I inenen kapingki mehlel. Arail doadoahk me inenen kapwuriamwei!

“Poahson en ihmw ehu, ahpw mehlel me lapala duwehte met, pahn anahne en udahn kehlail oh teng pwehn kak kehlailieng rerrer en sahpw akan, loipenehn mete kehlail kan, kisinieng laud kan, oh soahng teikan me kin kak kawehla ihmw laud kan. Pwukoah doadoahk en kakehlailiala me wihwiawi ahnsou wet pahn kakehlailih poahson en tehnpas sarawi wet me pahn kak oh pahn dadaurki kasongosong en ahnsou.“

Kitail wia soahng koaros kitail kak en kiheng tehnpas sarawi lapalap wet, me epwelpe, laudpesengehr, poahson ehu me pahn kak powehdi kehlail kan koaros en nan Mileniem. Ni soangen mwohmwohte, iei ahnsouo met me emen emen kitail en koasonehdi wia uwen me kitail kak koaros—mwein lel uwen me kitail saik song wia—pwehn kakehlaka poahson kan en pein palingenitail. Mwehi kapw wet pahn anahne doadoahk kapw ieu.

Riei kempoakepahi ohl oh lih akan, iei rahnpwukat me wia imwin rahn akan. Ma kumwail oh ngehi pahn kak en kakehng kahpwal oh kapwunod kan me pahn pwarada, e udahn konehng kitail en ahniki poahson teng ni palingehn en kokouda pohn takai en atail Soundoar, Sises Krais.2

Eri, I kalelapak rehn emen emen kumwail, ”Ia uwen teng en amwail poahson? Oh dahme anahnepe ong kakehlepen amwail kadehde oh wewehki rongamwahuo?

Tehnpas sarawi me wia kakehlepen atail pwoson oh kehlepen pali ngenitail pwehki Sounkomouro oh Sapwellime padahk me wia mohngiong en tehnpas sarawi. Soahng koaros me padahk nan tehnpas sarawi, me sang ni kaweid oh sang ni Ngehno, e kalaudehla atail wewehki Sises Krais. Sapwellime tiahk sarawi kesempwal akan katengeikitaildieng Ih sang ni inou sarawi kan en prihsduhd. Oh ni atail pahn kolokol atail inou sarawi kan, E pahn ketin kiheng kitail kisakis en Sapwellime manaman en kakehlail oh kamwahu.3 Oh, ia uwen atail pahn anahne Sapwellime manaman nan rahn akan me pahn kohdo.

Kitail alehier inouo me “ma [kitail] kaunopadahr [kitail] sohte pahn masak.”4 Inou wet me inenen kesempwal rahnwet. Kauno ketin sakarkidahr me mehndahte soangen kahpwal akan me kin pwarada rahnwet, irail kan me kokouda pohn Sises Krais, oh esehlahr mwomwen arail pahn karanih Sapwellime manaman, sohte anahne en pweiek ieng kapwunod kan en ahnsou wet.

Tiahk sarawi kan oh inou sarawi kan en tehnpas sarawi wia kadaudek en mahs. Kauno ketin mahsenieng Adam oh Ihp en kapakap, wiahda inou sarawih kan, oh wia meirong kan.5 Oh ni mehlel, ”ahnsou me mie aramas pohn Sampah me kin peikiong Sapwellimen Kauno mahsen, irail kin alehdi kosonned an kawada tehnpas sarawi kan.”6 Pwuhk sarawi mweimweidahr kan audaudkiher kapatapat kan me pid padahk, likou, lokaia, oh soahng teikan me duwen tehnpas sarawi.7 Soahng koaros me kitail kamehlele oh ehu ehu inou me Koht ketin wiadahr ong Sapwellime seri en inou kan mih nan tehnpas sarawi. Nan mwehi koaros, tehnpas sarawi kin kasalehda kesempwal en me mehlelo me irail me kin wiahda inou sarawi kan rehn Koht oh wie kolokol, iei irail me wia seri en inou.

Ahpw, nan tehnpas en Kauno, kitail kak wia soangen inou sarawih kan rehn Koht duwehte me Eipraam, Aisek, oh Seikop wiahda. Oh kitail kak alehdi soangen kapai kau te!

Kilel
Tehnpas Sarawi en Kirtland oh Nauvoo

Tehnpas sarawih kan wialahr kisehn mwehi wet sangete ni rahn ekei samwalahro.8 Elaisa ketkiong Sosep Smid kih kan en mweimwei en katengehdi peneinei nan Tehnpas Sarawi en Kirtland, Unseklahn kopwurupwurdohn prihsduhd wiawi nan Tehnpas Sarawi en Nauvoo.9

Lao lel ahnsou e mihmi nan lokolok en mehla, Sosep Smid sohte uhdihsang ale kaudiahl kan me kapwurehdo tiahk sarawi kan en endaumen oh katengtengpenehn peneinei.10 Ahpw, e kak kilang me mie anahnepen kamwakelepe. Mwurin ah ketkiong kasarawi en endaumen rehn Brigham Young nan Mei 1842, Sosep mahsaniong Brigham, “Met e sohte irekidi pwung, ahpw kitail wiahier uwen atail kak koaros nan irair apwal pwukat me kitail milahr loale, oh I koapwoaroapwoarki me komw pahn alehda pwukoah wet oh koasonehdi oh katangahwei wiepen doadoahk pwukat koaros.”11

Mwurin mehlahn Soukohpo, Preseden Young kaunda kaimwseklahn wiawidahn Tehnpas Sarawi en Nauvoo12 oh mwuhr ahpw kawada tehnpas sarawih kan nan Territory en Utah. Ni kasarawi en pereh pah kan en nan Tehnpas Sarawi en St. George, Brigham Young sakarkihda ni kehlail uwen kesempwalpen doadoahk en tehnpas sarawi ong me melahr akan ni ah inda, ”Ni ahnsou me I medewe oaralap wet, I mwahuki ngihl me keieu laud en panginda aramas akan.”13

Sang ni ahnsouwo kohla, tiahk sarawi kan tepida wihwiawi nan tehnpas sarawi. Preseden Harold B. Lee kawewehda dahme kahrehda wiepeh kan, kosonned akan, oh pil iangahki tiahk sarawih kan en tehnpas sarawi kin miehte wekdeklah kan nan Sapwellimen Sounkomouro Mwomwohdiso kopwurupwurdohu. Presiden Lee patohwan: “Tepin padahk mehlel kan en rongamwahu en Sises Krais me sarawi oh unsek. Sohte emen me kak wekidala tepin padahk mehlel kan oh [padahk] en Mwomwohdiso ihte Kauno kelehpw sang ni kaudiahl. Ahpw wiepeh kan kin wekila sang ni kaweid sarawi me kin kohieng irail kan me kin apwahpwalih ni ahnsou kan.”14

Kilang mwomwen ketkihdahn kamadipw sarawi ah wekisang pahr kei samwalahro. Ni rahn kei samwalahro, pihl en kamadipw sarawi kin kohda ong tohn sarawih kan nan ehu lapalahn kep. Koaros kin nimisang loale. Met kitail kin doadoahngki kisin kep pilasdik kan. Wiepehu me wekila, ahpw inou sarawih kan duhduwehte.

Medemedewe mwahu mehlel siluh pwukat:

  1. Kopwurupwurdohu wia wiepe ehu, kaidehn kemwekid ehu, oh pahn doudoulahte lao Kauno pwurehng ketdo.

  2. Me keieu poahsondahn kopwurupwurpenehn mehn Isrehl kan15 iei en wahdo kapai kan en tehnpas sarawi ong Sapwellimen Koht seri pwoson kan.

  3. Ni atail kin rapahki mwomwen atail pahn kak pweida mwahu nan pwukoaho, Kauno kin ketin kamarainih kitail. Kopwurupwurodo me doudoulahte mwowe anahne kaudiahl kan en pil doudoulahte mwowe.

Presidensi Keieu oh Pwihn en Wahnpoaron Ehk-Riemeno kin kalapw kalelapak rehn Kauno ma miehte wiepeh kan me pahn kak mwahu en ale oh kieng kapai en tehnpas sarawi kan rehn Sapwellime seri pwoson kan. Se kin rapahki kaweid kan rahn koaros ong mwomwen aht pahn ese mwahu me sampah idawehn ni pwung oh duwepene nan koasoandih kan en nan tehnpas sarawi, inou sarawi kan, oh tiahk sarawih kan itarete arail lokaia oh tiahk ah wekpeseng.

Sang ni kaweid en Kauno oh pasapengpen aht kapakap, wiepen wekdeklah kei wiawidahr. Iei Ih me ketin kupwurki kumwail en wehwehki mwahu ni sansal dahme kumwail wiakihda inou sarawih kan en wia. Iei Ih me ketin kupwurki kumwail en kehn ni unsek Sapwellime tiahk sarawih kan. E ketin kupwurki kumwail en medewe mwahu amwail pai akan, inou kan, oh pwukoah kan. E ketin kupwurki kumwail en ahniki soahng kan koaros en palingehn oh kekehn soahng koaros me kumwail saikinte ahniki. Met me E ketin kupwurki ong koaros tohn doadoahk en nan tehnpas sarawi, sohte lipilipil wasa irail kin kousoan ie.

Wekidekla kapw kan en wiepen doadoahk kan en nan tehnpas sarawi, oh mehteikan me pahn idawehndo, iei pepeuslahn mehn kadehdeh me Kauno me ketin wie kaukauweid Sapwellime Mwomwohdiso. E kin ketin ketkihong emen emen kitail ahnsou mwahu en kalaudehla atail kakehlakahla atail poahson en palingenitail kan sang ni atail pahn poasonkihda atail mour ong Ih oh pohn tiahk sarawih kan oh inou sarawih kan en Sapwellime tehnpas sarawi. Ni ahnsou me kumwail wahdo amwail kisin likou en mweimwei en tehnpas sarawi, iangahki mohngiong karakarahk oh mwahliel marain, ong Sapwellimen Kauno tehnpas en padahk, E pahn padahkiong kumwail.

Ma pwehki e nohn doh, kahpwal en soumwahu kan, de soahng teikan me pahn kerempwahla amwail pahn kohla nan tehnpas sarawi, I luke kumwail en ahniki ekis ahnsou en medemedewe inou sarawih kan me kumwail wiahda.

Ma kumwail saik pereniki kohla ni tehnpas sarawi, kumwail kohla ahnsou koaros—kaidehn ekei pakte. Mweidehng Kauno, sang ni Sapwellime Ngehno, en kalohkehng kumwail oh sair kumwail wasao. I inoukieng kumwail me ni uwen ahnsou ehu, tehnpas sarawio pahn wiahla wasa ehu me pahn silasil, wasahn kaloalamwahu, oh ale kaudiahl.

Ma e pahn kak mengei ong ie ien koasoaieng emen emen irail me pwulopwul saik pwopwoud kan, I pahn peki ni ngidingid kumwail en rapahki werek men me kumwail pahn kak katengteng ieng nan tehnpas sarawi. Kumwail pahn mwein medewe soangen wekidekla dah me pahn wiahng amwail mour. I inoukieng kumwail me e pahn wekidala soahng koaros! Ni amwail pahn kapwopwoud nan tehnpas sarawi oh kalapw pwurala, kumwail pahn kin ahniki kehlail oh kaweid mwahu ong amwail pilipil en koasoandih kan.

Ma I kak koasoaieng emen emen ohl oh lih pwopwud kan me lel met saikinte katengtengpene nan tehnpas sarawi, I pekipek ni ngidingid kumwail en alehda step kan me kumwail anahne wia pwehn iang alehdi kapai laud en wekilahn mour en tiahk sarawi wet.16 E pahn mie wekila ehu? Ihte ma kumwail pahn men kekeirda kohkohlahte oh mihmihpene kohkohlahte. Ouramaniki en mihmihpene kohkohlahte sohte pahn kak pweida. Sohte ehu kasarawih de contrak me pahn kak wiawi pwehn kak mihmihpene kohkohlate.17

Ma I kak koasoaieng emen emen ohl de lih me men pwopwoudahr ahpw saikinte diar arail werek poatoapoat, I kangoangehkin kumwail en dehr awih lao kumwail pwopwoud pwe kumwail en ale amwail endaumen nan tehnpas en Kauno. Tepida met en esehla oh kilang ia wewehpen kolokol manaman en prihsduhd.

Oh ong kumwail me wiadahr amwail inou sarawi kan en tehnpas sarawi, I peki ni ngidingid kumwail en rapahki—ni kapakap oh ahnsou koaros—en wewehki inou sarawi kan en tehnpas sarawi oh tiahk sarawi kan.18 Wenihmw palingehn kan pahn ritida. Kumwail pahn esehla duwen kotehla kahdengo nan pwungen nanleng oh sampah, mwomwen amwail pahn peki rehn Sapwellimen Koht tohnleng kan en iangih kumwail, mwomwen amwail pahn kak alehdi mwahu kaweid sang nanleng. Amwail insenoh en kapwaiada me pahn utungada oh kakehlakahla amwail poahson en palingenimwail.

Riei kempoakepahi ohl oh lih akan, ni ahnsou me onohnsapahl en Tehnpas Sarawi en Salt Lake pahn imwisekla, sohte ehu wasa me pahn silasil sang wasao ni ahnsou en rerrer en sahpw nan wahu en Salt Lake me duwehte nan tehnpas sarawio.

Met pil duwehte, ni ahnsou me sohte lipilipil mwekid suwed wiawi nan amwail mour, wasa me keieu silasil ong ni palingehn iei en mihmi nan amwail inou sarawi kan en tehnpas sarawi!

Menlau kumwail kamehleleie ni ahnsou me I inda me ni ahnsou me poahson en palingenimwail kokouda pohn Sises Krais, kumwail sohte anahne masak. Ni amwail pahn mehlelieng amwail inou sarawi kan me kumwail wiahda nan tehnpas sarawi, kumwial pahn ahniki kehlail sang ni Sapwellime manaman. Eri, ni ahnsou me rerrer en palingehn kan pahn wiawi, kumwail pahn kak kesihnenkihda amwail kehlail pwehki poahson en palingenimwail me teng oh sohte kak mwekida.

I poakoahng kumwail, riei ohl oh lih akan. Mehlel pwukat me I ese: Koht, Samatail Nanleng, kupwurki kumwail en pilada pwurala kousoanla Reh. Sapwellime pilahn en kekeirdahn mour soutuk sohte kapingiping, oh e wahuniki amwail kisakis en pilipil. Kumwail ahniki saledek en pilada ihs me kumwail men wiahla—oh ihs me kumwail men mih reh—nan mour me pahn kohdo.

Koht ieias! Sises iei ih me Krais! Iei Sapwellime Mwomwohdiso met, me kopwurupwurdo pwehn sewese kumwail en alehdi mour soutuk. I kadehde mepwukat ni mwahr sarawi en Sises Krais, ahmen.

Ire kan

  1. Kilang “Poahson Tengeteng,” Hymns, no. 85.

  2. Eri, “ni ahnsou me tepelo [kadarala] uwen kehlail en [kisinieng], … e sohte pahn mei manaman [pohtail] pwehki takai me [kitail] kouwada powe, iei me mehlel en poahson, poahson ehu me ma ohl akan kawada irail sohte pahn pwupwidi” (Helaman 5:12; iren kapatapat).

  3. Kilang Doctrine and Covenants 109:15, 22.

  4. Doctrine and Covenants 38:30; pil tehk Doctrine and Covenants 10:55.

  5. Kilang Moses 5:5–6.

  6. Diksineri en Pwuhk Sarawi, “Tehnpas Sarawi.”

  7. Ni karasepe, kilang Eksodus 28; 29; Leviticus 8. Ihmpwal sarawi en Moses me pil kin kahdaniki “ihmpwal en kadehde” (Nempe kan 9:15) oh “ihmpwal sarawi en kadehde” (Eksodus 38:21). Tehnpas en Solomon ohla nan 578 BC, pahr kei mwurin peneinei en Lihai arail mwesel sang Serusalem. Kopwurupwurdohn tehnpas sarawi wet sang Zerubbabel wiawi nan pahr 70 kei mwuri. Oh e pil ohkihla kisiniei nan 37 BC. Herod katehlapala tehnpas sarawio nan 16 BC. Eri tehnpas sarawi wet, me Sises pil ahnla, ohla nan AD 70. Nihpai ahniki pepehm en nan tehnpas sarawi ni ah kin kohla “pohn nahna kan” pwehn kapakap (1 Nephi 18:3) oh mwuhr, nan Amerika, ahpw kawada tehnpas sarawi ehu “ni mwomwen tehnpas sarawi en Solomon,” e sohte nohn lingan duwehte (kilang 2 Nephi 5:16).

  8. Kilang Doctrine and Covenants 88:119; 124:31.

  9. Kilang Doctrine and Covenants 110:13–16; 124:28. Keimw pahieu en Tehnpas Sarawi en Nauvoo wiawihda nan Eiprel 6, 1841, mwurinte sounpwung kei me Sosep Smid alehdi kaudiahl en kawada. Tehnpas en Nauvoo ahniki pwukoah kesempwal laud kan. Ni karasepe, Kauno kaweweh me wasahn pepdais pahn anahnepe mie ong Souleng kan en wia pepdais ong irail me melahr akan (kilang Doctrine and Covenants 124:29-30).

  10. Kilang Doctrine and Covenants 131; 132. Doctrine and Covenants 128 me audaudki kisin likou me Sosep Smid intingiada ong Souleng kan me pid duwen pepdais ong me mehlahr kan. Wasao e sakarkihda me komourla en me mehlahr akan “iei e konehng oh kesempwal ong atail mour, … [pwe] ma sohte kitail irail sohte pahn kak unsekla—oh pil duwehte kitail ma sohte me melahr akan kitail sohte pahn unsekla” (iretikitik 15).

  11. Sosep Smid, nan Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 454.

  12. “Church Historian George A. Smith kaimwsengkihla me meh 5,634 ohl oh lih akan me alehdi arail endaumen nan Tehnpas Sarawi en Nauvoo me saik nekila nan Tihsempe 1845 oh Senueri 1846. Katengtengpenehn pwopwoud wie doudoulahte lel nan Feb. 7, [1846,] ni ahnsouwo pohnangin pwopwoud 2,000 me katengteng pene sang prihstud ong mour soutuk” (Bruce A. Van Orden, “Temple Finished before Exodus,” Deseret News, Dec. 9, 1995, deseret.com; pil kilang Richard O. Cowan, “Endowments Bless the Living and Dead,” Church News, Aug. 27, 1988, thechurchnews.com).

  13. “Dahme kumwail medewe ma pahpah kau pahn koasoaia ma irail kak koasoai sang ni arail melahr? Re sou pahn inda, ‘Se wie wonohnkier met ki pahr kid kei, nan imweteng wet, awiawihkier ahnsou wet e pahn leledo’? … Mehlel, ma mie arail kehl posopos en nanleng kan pahn lel nan salengetail kan, ma kitail kak ahpw medewehla songen kesempwal en doadoahk me kitail ahnikiher. Tohnleng kan koaros nanleng kilikilang uwen tohtohn aramas, oh wie kangoangeh irail ong komourlahn peneinei en aramas koaruhsie. … Ni ahnsou me I medewe oaralap wet, I mwahuki ngihl me keieu laud en panginda aramas akan” (Discourses of Brigham Young, sel. John A. Widtsoe [1954], 403–4).

  14. Harold B. Lee, “God’s Kingdom—a Kingdom of Order,” Ensign, Jan. 1971, 10. Pil kilang sakarada ieu sang Presiden Wilford Woodruff nan 1896; e sakarkihda me: “I men koasoaia me, ni ahi wia preseden en Mwomwohdiso en Sises Krais en Souleng en Imwin-rahn Akan, kitail anahne met en wenla mwowe oh kekeirda. Kitail saikinte [alehda] lahs en kaudiahl kan. … Preseden [Brigham] Young, me idawehnla Preseden Joseph Smith, me kaweid kitaildo me. E ketin koasonehdi pilahn kan en tehnpas sarawi pwukat oh kapwaiada kahrepeh kan pwukoah oh doadoahk. … E sohte alehdi kaudiahl kan koaros me anahne ong doadoahk wet; pil duwehte Preseden Taylor, oh pil Wilford Woodruff. E sohte pahn mie ididihn doadoahk wet lao e unsekla” (The Discourses of Wilford Woodruff, sel. G. Homer Durham [1946], 153–54).

  15. Kilang 3 Nihpai 29:8–9.

  16. Kilang Doctrine and Covenants 131:2, 4.

  17. Kilang Doctrine and Covenants 132:7.

  18. Elder John A. Widtsoe intingihdi me: “Ong ohl oh lih akan me kin kohla nan tehnpas sarawi, ni meserail kan ritpeseng, me kin tehk mwahu simpwol kan oh inou sarawi kan, oh wia ni keneinei, nantieng en wewehkihla mwahu kawehwepeh kan koaros, Koht ketin mahsanieng sapwellime mahsen, oh kaudiahl kan ahpw pahn kohdo. Pwehki endaumen e direkihla simpwol kan aramas pweipweite me pahn song en nantieng kawehwe; e inenen direkihla kaudiahl ong irail kan me kin nantieng en kehlailki en rapahki oh kilang, me sohte aramas emen me kak en kawehwe de kasalehda ni sansal dahngeh kan me kin wiawi nan tehnpas sarawi. Endaumen me sansalki kaudiahl kak wehwe keieu mwahu sang kaudiahl” (nan Archibald F. Bennett, Saviors on Mount Zion [Sunday School manual, 1950], 168).

Nting