Anahnepen Mwomwohdiso
Pwuhk sarawi kan, ni sansal, kin padahngki tepidahn oh anahnepen mwomwohdiso me alialehda kaweid oh mweimwei sang rehn atail Sounkomour, Sises Krais.
Sounpar kei samwalahro, Elder Mark E. Petersen, me wia emen tohn Pwihn en Wahnpoaron Ehk-riemenko, padahngki karasaras wet:
“Kenneth oh ah pwoud, Lucille, wia aramas mwahu, mehlel oh likilik kei. Ira sohte kin kohla sarawi, ahpw, ira kehn me e itarete irahn wia aramas mwahu. Ira kin padahkiheng neira seri kan duwen mehlel oh mwakelekel oh ira kin medewehieng pein ira me ihte soahngko me Mwomwohdiso pahn wiahieng irail.
“Oh, pilehu, re nda me irail anahne arail ansou rehn peneinei ni wihkend kan … [oh] kohla sarawi kin kedirapwahla.”1
Rahnwet, ahi padahk doke aramas me inenen mwahu oh lamalam mwahu me sohlahr kin sarawi de iang patehng kemwekid en nan arail mwomwohdiso kan.2 Ni ai kosoia “mwomwohdiso kan,” e oarepene sinakoke kan, de soangen pelien lamalam teikan. Se pwunodki pwehki tohtohn towehkan nan kapokon pwukat wie malmalaulaula ansou koaros, nan sampah pwon.3 Ma kitail kin udihsang atail kin kesempwaliki atail mwomwohdiso, kitail kin kawehla pali ngenitail kan, oh aramas tohto me kin kadohwan sang pein irail rehn Koht kin katikala Sapwellime kapai kan ong sampah.
Wen tohtohn me kin iang sarawi oh iang kemwekid en mwomwohdiso kin sewesei kitail en wiahla aramas mwahu oh kin sewese mouren meh teikan. Nan mwomwohdiso kitail kin kasukuhlki mwomwen doadoahngki padahk kan. Kitail kin ale kasukuhl sang emen emen. Karasaras en widing kin kehlailsang padahk en souleng men. Kitail kin kehlailda sang ni atail kin ehuong me kin ahniki madamadau me duwehte atail. Kin iang oh patpene nan sarawi, atail mohngiong kan, nin duwen me pwuhk sarawi masani, kin “katengtengpene ki limpoak.”4
I.
Iren pwuhk sarawi me Koht ketkiheng Souleng kan nan Pwuhk Sarawi oh kaudiahl en mwehi wet kasalehda mwahu anahnepen ehu mwomwohdiso. Pwuhk Sarawi oh Pwuhk en Mormon kasalehda me Sises Krais kawadahr ehu mwomwohdiso oh ketin koasonehdier me mwomwohdiso wet pahn pousehla Sapwellime doadoahk kohkohlahte. E ketin malipehier Wahnpoaron Ehk-riemen oh ketkieng irail mweimwei oh kih kan en kaweid sapwellime mwomwohdisou. Pwuhk Sarawi padahkieng kitail me Sises Krais “me tapwih mwomwohdiso wet”5 oh sapwellime tohnpadahk mie, “pwehn kaunsekiala souleng kan, pwehn wia doadoahk en sahpis, pwehn kasalehda kahlepen Krais.”6 Mehlel me Pwuhk Sarawi kadehdehieng kitail tepidahn mwomwohdiso wet oh anahnepe ansou wet.
Ekei kin nda me kohla iang sarawi sohte kin sewese irail. Ekei pil kin nda, “I sohte koledi mehkot rahnet” de “sohte emen me pohneseie” de “I sarohdi.” Dehr mweidehng pein atail kahpwal en kadohwan sang kitail padahk en Krais, me padahkiheng kitail en papah, ahpw kaidehn en papahte.7 Ni atail tamtaman met, pil emen towe koasoiada duwen ah towehdahr Mwomwohdisou:
“Pahr kei samwalahro, I wekidala ahi madamadau me pid kohla sarawi. I sohte kin kohla sarawi pwehki pein ngehi, ahpw I kin medewe mehteikan. I kin nantiheng rahnmwahuih aramas me kin mwomwohd kelehpw, kin kasamwoh lukodo kan, … kin piserieng ale pwukoah. …
“Ni mwotomwot, I kin kohla sarawi ehu ehu wihk sang ni ei kin inengieng kehlail, kaidehn ien kin kohlahte, oh ien sair mouren aramas kan.”8
Presiden Spencer W. Kimball padahngki me “kitail sohte kin kohkihla sarawi pwe kitail en kin poudiahl de pil kin alehte kaweid. Kitail kohla pwe kitail en pwongih Kauno. Met e wia en emen emen ah pwukoah. … Ma kaudoko sohte pweida ong komwi, komwi me sohte alehda Sohte emen me kak pwongih Kauno ki komwi: komwi anahne wia pein omwi ansou ong Kauno.”9
Kohla iang sarawi kak kamarainehda atail mohngiong oh kamwakelehda pali ngenitail kan.
Nan mwomwohdiso kitail sohte kin kelehpwki papah de wia pein atail pilipil de kamwahupetail. Kitail kin ehupene oh papah. Ni atail kin sawas kitail kin diar ansou mwahu soh kasikpe kan pwehn kalaudehla atail koahiek. Soahng kan me kin wiawi sang mwomwohdiso kin sewese kitail en powehdi kahpwal kan me kin kaluetehla pali ngenitail.
Mie soangen kamwahu tohto me kitail kak kosoia, de me pil mwahusang. Nan mwomwohdiso kitail kin ehu ong aramas mwahu kei me kin nanantiheng papah Koht. Met kin kataman ong kitail me kitail sohte kin kelehpw nan atail kapokon en mwomwohdiso kan. Kitail koaros anahne kin ehupene, mehlel ehupenehn nan mwomwohdiso kak wia ehu wiepe keieu mwahu me kitail kak wia, ohng pein kitail oh iengatail kan oh seri kan. Ma sohte ehupene pwukat, apw mehlel nan pwungen seri kan oh pahpa nohno loaloapwoat kan, semen kan diarada me e apwal en kakairada seri kan nan arail mwomwohdiso.10
II.
Lel ansouet, I koskosoia duwen mwomwohdiso kan ni oaretik. Met I pahn kosoia kahrepehkan duwen wia towe emen en mwomwohdiso wet, towehda, oh patehng kopwurpwurdohn Sapwellimen Sises Krais ah Mwomwohdiso en Sises Krais en Souleng en Imwin-rahn akan.
Kitail, ni mehlel, pwungkihda me iren pwuhk sarawi kan, mahso oh met, ni sansal padahngki tepidahn oh anahnepen mwomwohdiso me alialehda kaweid oh mweimwei sang rehn atail Sounkomour, Sises Krais. Kitail pil kin kadehde me kapwurpwurdohn Mwomwohdiso en Sises Krais e wiawihda pwe en padahngki mehlel en rongamwahu unseko oh ketkiheng manaman en prihsduhd pwe en kak wia tiahk sarawi kan me kitail anahne pwe kitail en kak iang ketla nan Sapwellime wehi. 11 Tohn mwomwohdiso kan me sohte inangih iang sarawi oh kehliki pein ih kin katorehla irail sang wiepehkan en rongamwahuo: manaman oh kapai en prihsduhd, unsek pen padahk kopwurpwurdohu, oh inengen oh ansou mwahu en doadoangki padahk wet. Irail soikala arail ansou mwahu en katengtengpene arail peneinei kohkohlahte.
Ehu kamwahupen kapwurupwurdohn Mwomwohdiso iei e sewese kitail en keirda ni pali ngehn. Keirda wewehki wekila. Nan palien ngehn met wewehki koluhla oh raparapahki en karanihla Kauno. Nan kapwurupwurdohn Mwomwodiso kitail kolokol padahk, wiepe kan, oh soun sawas semen kan me kin sewese kitail en koluhla. Kahreparail, kaidehn mehn kaloke, oh re sohte duwehte me kin sansal nan mwoalen kapwung kan. Pwihn en soun sawas en Mwomwohdiso kan kin rapahki pwe en sewese kitail en warohng sapwellime kalahngan en mahk me kohsang ni Tomwpen Sises Krais.
Pein en emen ah pepehm en ngehno kelepw sohte kak sewese kakehlaka oh kamwahuiala mwekid en sahpis sang ni Mwomwohdiso kapwurupwurdo. Karasaras laud en met iei me pwulopwul kan oh irail me mah kan me pwilikihdi arail sukuhl de mwekid en me mah kan oh alehda doadoahk en misineri kan. Irail wia doadoahk en misineri ong aramas ekei me re sehse nan wasa kan me re pil sohte wewehki sang ni kaidehn irail me pilada. Met pil duwehte irail kan me loaloapwoat oh kin wia sahpis kaselel me kitail kin kahdaneki “doadoahk en tehnpas sarawi.” Papah pwukat sohte kak wiawi nan Mwomwohdiso ma sohte pwihn me kin kihda sawas, koasoanehdi, oh kaweid.
Atail pelien lamalam oh papahn nan Mwomwohdiso kasukuhlihong irail ia mwomwen arail pahn doadoahk ni minimin pwe en wia kamwahupen wehi laud. Soangen mwekid oh pweida wet sohte kin pweida sang rehn aramas emen en katehlapahla wiewia kan nan atail wasahn kousoan. Nan koasoandi en nan ward kan, kitail kin ehu ong oh doadoahk ong aramas emen me kitail sohte kin pein pilada, aramas me pahn kin padahki kitail oh skeng ih kitail.
Ni kapatapat en sewese kitail en kasukuhlki koahiek ni palingehn me duwehte limpoak, pokehla, mahk, oh kanengamah, met kihong kitail ansou mwahu en kasukuhlki ia mwomwen atail pahn doadoahk ong aramas emen me sohte duwete kitail oh me kaidehn me kitail pein pilada. Kamwahu wet seweseier tohton towe kan, oh pwihn tohto alehdi kapai pwehki sang ni arail kin patehng. Souleng en Imwin-Rahn akan wadawadki arail ahneki koahiek en kaweid oh ehupene nan kemwekid kan. Tiahk wet tepsang irail pioneer kehlail ko me pwungkipene Intermountain West oh kawada atail tiahk en sahpis en minimin mwahu.
Pali lauden sawas oh meiroang kan anahne en pweida sang ni kihpene oh katanga soahng koaros ni tenek laud ehu. Mwomwohdiso kopwurupwurdo wet kin wia sawas laud wet nan wasa koaros nan sampah. Mepwukat me iangahki palien sukuhl oh imwen wini, kamwenge irail me duhpeklahr kan, sewese pwihn en refugee, sewese kamwahuiala me kin kamam mehn kalitopw kan, oh kasamwohdo mehteikan. Tohn atail Mwomwohdiso wet dehdekilar arail project en Helping Hands nan ansou en melimel kan. Tohn Mwomwohdiso mweidohng kitail en wia kisehn mwekid en mehn tenek-laud ehu. Towe kan pil kin pwain arail mehn sawas akan pwehn sewese me semwehmwe.
Ni kapatapat ong pepehm en meleilei oh popohl ong ni ehuong Ngehno, me kin iang sarawi kan pereniki wahn momourki rongamwahu o, me duwehte kapai kan en momourki Mahsen en Eripit oh dipwisou oh inou en palingehno ong ni momouriki kosoned en meirong en eisek kis ehu. Kitail pil kapaidahrki soun sawas kan sang rehn atail kaun kan.
Mwarehda soahng pwukat koaros iei tiahk sarawi koaros me kesempwal ong mour soutuk, me iangahki kamadipw sarawi me kitail kin ale nan ehu ehu rahn en Sapad. Tiahk sarawi me keieu kesempwal nan Mwomwohdiso kapwurupwurdo iei inou en pwopwoud soutuk, me kin elehda popohl en ehupenehn peneinei kan. Presiden Russell M. Nelson padahngki met ni wiepe kesempwal. Eh ndahda: “Kitail sohte kak inengiengte kitail en pwurala rehn Koht. Kitail pahn kapwaiada kosonned akan [me kapai kan] dokdoke.”12
Ehu kosonned ko iei en sarawi rahn Sarawi koaros.13 Atail kin sarawi oh wiepen mour soutuk kin kahrehiehng atail kin karanihla Koht oh kalaudehla oh katehlapiala atail limpoak. Parley P. Pratt, emen Wahnpoaron en mwehiet, kawehweda mwomwen ah pepehm ansou me Soukohp Joseph Smith kawehwehda padahk pwukat: “I kehn me Koht iei Semei nanleng: me Sises iei riei pwutak, oh ai pwoud wia kempoakepahi soutuk: me kadek, sounsawas mwahu, me kaloalamwahu ohngie, oh e wia mehn kapohl rehi erein oh kohkohlahte. Ni mwotomwot, ih kak ahneki limpoak sang rehn ngehn sarawi oh pil wehwehki sang rehn ngehn sarawi.”14
Pwehn kairala, I men katamankihong koaros me kitail sohte pahn kamehlele me mwahu kak kohsangete nan mwomwodiso ieu. Ehu ohngete mwomwohdiso, kitail kilang rar en aramas utuhtung oh wiewia doadoahk mwahu tohto. Emen emen, Souleng en Imwin-Rahn akan kin patehng me tohtohie. Kitail kilang doadoahk pwukat ni kasalepen mwekid mehlel soutuk me “Ngehno kin ketkihwei marain ong aramas koaros me kohdo pohn sampah.”15
Mendahte doadoahk mwahu me kin kak pweida likin mwomwohdiso, unsekpen padahko oh perepehkan oh tiahk sarawi kan mie nan Mwomwohdiso kopwurupwurdo wet kelehpw. Oh pilehu, wen tohtohn me kin iang Sarawi kin kiheng kitail kehlail oh kalaudehla pwoson me kin kohdo sang ehuieng pelien lamalam teikan oh sarawiheng irail me kin nannantiheng keid nan ahlen inouo oh nantiheng wihwia tohnpadahk en Krais kei. I kapakapki kitail en tengeteng nan Mwomwohdiso wet ni atail pahn nannantiheng rapahki mour soutik, kisakis sang Koht me keieu laud, ni mwaren Sises Krais, amen.