O Le Oa Silisili
E taitasi i tatou ma o mai ia Keriso ma le tautinoga e lē fetuuna’ia i Lana talalelei.
O loo tautala ia tusitusiga paia e uiga i se faitulafono mauoa talavou, na momo’e ane ia Iesu, ma tootuli i Ona aao, ma faatasi ai ma le lotofaamaoni, ma fesili atu i le Alii, “Se a se mea ou te faia ina ia ou maua ai le ola e faavavau?” I le mae’a ai o le iloiloga o se lisi umi o poloaiga sa tausia faamaoni e lenei alii, sa ta’u atu e Iesu i le alii e faatau ana mea uma, ma avatu tupe i ē matitiva, ave lona satauro, ma mulimuli atu ia te Ia. O le tuusa’o o lenei faatonuga na mafua ai ona maluluina vae o le taule’ale’a faitulafono—e ui ina taugata ona seevae,—ma aluese o ia ma le faanoanoa, ona o loo faapea mai tusitusiga paia, “e tele ana oloa.”1
Ua manino, o se tala taua lapata’i lenei e uiga i le faaaogaina o ‘oa ma manaoga o ē matitiva. Ae i le iuga, o se tala e uiga i le tuuto atu ma le loto atoa, ma le le faatuai i le tiutetauave paia. Pe mauoa pe leai, e taitasi i tatou ma o mai ia Keriso ma le tautinoga lava e tasi e lē fetuuna’ia i Lana talalelei lea sa faamoemoe e fai e lenei taule’ale’a. I le gagana masani a le autalavou i aso nei, e tatau ona tatou tautino atu i tatou lava ua tatou i ai “uma i totonu.”2
I lana fatuga masani e lē galo, o loo vaai faalemafaufau ai C. S. Lewis peisea’i o loo fetalai mai le Alii ia i tatou i se mea faapenei: “Ou te le manao … i lou taimi … [po o] au tupe … [po o] lau galuega [e tusa ma] lo’u manao mo [na o] Oe lava. [O le laau lena o loo e teteleina.] Ou te lē manao e tipi ese se lālā i i ma se lālā i o, ou te manao … ia tuu uma i lalo le [laau]. [Ma le nifo leaga lena.] Ou te lē manao e vili, pe ufiufi, pe [faatumu]. [Ou te manao] e se’i. [O le mea moni, ou te manao ia te oe e] aumai ia [te a’u lou] tagata natura atoa. … [Ma] o le a ou tuu atu ia te oe sou lava tagata fou. O le mea moni, o le a ou avatu A’u Lava mo oe: o lo’u loto o le a fai ma [ou loto].’”3
O tagata uma o lauga i lenei konafesi aoao, o le a fai mai uma lava, i ala eseese, le mea na fetalai atu ai Keriso i le alii mauoa: “Sau i lou Faaola. O mai atoatoa ma le loto atoa. Ave lou satauro, po o le a lava le mamafa, ma mulimuli ia te Ia.4 O le a latou saunoa mai i nei mea ma le silafia o totonu o le malo o le Atua, e le mafai ona i ai ni taumafaiga faa’afa’afa, leai se mea e amata fai ma toe tuu, leai foi se toe foi i tua. Ia i latou o e sa talosagaina le faatagaga e tanumia ai se matua ua maliu pe faatofa atu i isi tagata o le aiga, o le tali a Iesu sa faigata ma lē manino. “Tuu lena mea i isi,” na Ia fetalai atu ai. “O lē tago lona lima i le suotosina ma tepa i tua, e le tatau ia i le malo o le Atua.”5 Pe a fesiligia i tatou i mea faigata, e oo lava i mea e feteenai ma faananauga o o tatou loto, ia manatua o le faamaoni tatou te folafola atu i le faamoemoe o Keriso o le tuuto silisili lea o o tatou olaga. E ui ina faamautinoa mai e Isaia ia i tatou o loo maua “e aunoa ma se tupe ma e aunoa foi ma se tau,”6—ae ua—tatau ona tatou saunia, e faaaogaina ai le fuaitau a T. S. Eliot, “ia tatou tuuina atu mea uma ua ia i tatou.”7
O le mea moni, e tofu i tatou uma ma ni nai mausa po o ni faaletonu po o le talafaasolopito patino e mafai ona taofia i tatou mai le faatofuina atoatoa faaleagaga i lenei galuega. Ae o le Atua o lo tatou Tama ma e maoae le lelei i le faamagaloina ma le faagaloina o agasala ua tatou lafoa’ia, atonu ona o lo tatou agasala soo Na Te maua ai lava le mau avanoa e faamagalo ma faagalo ai. I soo se tulaga lava, o loo i ai se fesoasoani faalelagi mo tagata uma i soo se taimi tatou te lagona ai e faia se suiga i a tatou amioga. Na avatu e le Atua ia Saulo se “isi loto.”8 Na poloaiina e Esekielu Isaraelu uma anamua e lafoai mea ua tuanai ae “fai … se loto fou ma se agaga fou.”9 Sa valaau atu Alema mo se “liuga tele”10 lea e mafua ai ona faalautele le agaga, ma sa a’oa’o mai Iesu lava Ia e faapea “a le toe fanau le tagata e le mafai ona iloa e ia le malo o le Atua.”11 Ua manino o le gafatia o se suiga ma le ola ai i se tulaga ua sili atu ona mamalu ma faapaiaina, o se tasi lava lea o meaalofa e le aunoa a le Atua mo i latou o ē sailia.
Uo, tatou te maua i lo tatou taimi nei ia ituaiga uma o fevaevaeaiga ma vaevaega, seti ma soavaega, vaega faatekinolosi ma faasinomaga faaupufai, ma le sili atu nai lo le na o le inoino e oo ai. E mafai ona tatou fesili ifo ia i tatou lava pe o se olaga “maualuga atu ma paia atu”12 e faaaoga ai le fasifuaitau a Peresitene Nelson, o se mea e mafai ona tatou sailia? Pe a tatou faia, e lelei ina o tatou manatua lena vaitau matagofie i le Tusi a Mamona lea na fesili ai ma sa tali atu ai na tagata i lena fesili ma le mautinoa lava:
“Ma sa oo ina leai se finauga i totonu o le nuu atoa; i le laueleele atoa; … ona o le alofa o le Atua sa mau i loto o tagata.
“Ma sa leai se matau’a, po o ni feeseeaiga, … po o soo se mea faamataaitu; ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua.
“Sa leai ni faomea, po o ni fasioti tagata, sa leai ni sa Lamanā, po o soo se ituaiga o tagata; ae sa tasi i latou, o le fanau a Keriso, ma o suli i le malo o le Atua.
Ma sa faamanuiaina tele lava i latou!13
O le a le ki i lenei faateteleina faafuasei o le ola fiafia ma le faamalieina? O loo maua’a i le anotusi i se fuaiupu e tasi: “O le alofa o le Atua … sa mau i loto o tagata.”14 A oo ina seti e le alofa o le Atua le maualuga auaumama mo o tatou olaga, mo a tatou fegalegalea’iga o le tasi ma le isi ma taualuga i o tatou lagona mo tagata uma, ona mou atu ai lea o le faanofo ituaiga tuai, tuuitiitia ai le faipona, ma fevaevaea’iga faaletagata, ae faateleina le toafilemu. O le mea tonu lena na tupu i la tatou faataitaiga i le Tusi a Mamona. Sa le’i toe i ai ni sa Lamanā, po o ni sa Iakopō, po o ni sa Iosefā, po o ni sa Soramā. Sa le toe i ai lava ni “sa ituaigā”. Sa faaaoga e tagata na o le faasinomaga maualuga fou e tasi. Fai mai, na lauiloa i latou uma o “le fanau a Keriso.”15
Ioe, o loo tatou talanoa i i e uiga i le poloaiga sili muamua na tuuina mai i le aiga o tagata—ia alofa i le Atua ma le loto atoa, e aunoa ma se faatuaoia pe fetuuna’ia, o lona uiga, ma o tatou loto atoa, manatu, mafaufau, ma le malosi atoa.16 O lenei alofa i le Atua o le uluai poloaiga sili lea i le atulaulau. Ae o le upumoni sili muamua i le atulaualu e faapea e alofa le Atua ia i tatou i lena lava ala—ma le loto atoa, e aunoa ma se faatuai po o se fetuunaiga, ma Lona loto atoa, manatu, mafaufau, ma le malosi atoa. Ma a oo ina fetaui na malosi’aga o Lona finagalo ma o tatou loto e aunoa ma le taofiofia, o le a pasae faafuasei moni mai ai le mana paia faaleagaga. Ma e pei la ona tusia e Teihard de Chardin, “mo [le] taimi lona lua i le talafaasolopito o le lalolagi, o le a toe vaaia ai e le tagata le afi.”17
O iina la, ma na o le pau lena o le taimi, e mafai ai ona tatou tausia lelei le poloaiga lona lua i ni ala e le faata’eta’ealuga pe faatemutemu. Afai e lava lo tatou alolofa i le Atua e taumafai ai ia faamaoni atoatoa ia te Ia, o le a Ia aumai ia i tatou le tomai, le gafatia, le loto, ma le ala e alofa ai i o tatou tuaoi ma i tatou lava. Atonu o le taimi lea o le a mafai ai ona tatou toe fai atu, “E le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua.”18
Uso e ma tuafafine, ou te tatalo o le a tatou manuia i le mea na toilalo ai lena alii talavou mauoa, o le a tatou tauaveina le satauro o Keriso, po o le a lava le faigata, e tusa lava po o le a le faafitauli ma e tusa lava po o le a le tau. Ou te molimau atu a tatou tautino atu e mulimuli ia te Ia, o le a uia e le ala, se tasi auala po o se isi, i se pale tuitui ma se satauro Roma matuitui. Po o le a le mau’oa sa i ai le tatou faitulafono talavou, ae sa le’i lava lona mau’oa e faatau ai lona ala e aloese ai mai le taua o le fetaia’iga ma na faailoga [satauro ma le tuugamau], ma e tatou te le mafaia foi. Mo le faamanuiaga o le mauaina o le mea aupito silisili o meatotino uma—o le meaalofa o le ola e faavavau—e itiiti lava se mea e talosagaina i tatou e tumau ai i le ala e mulimuli ai i le Faitaulaga Sili o la tatou Galuega, lo tatou Fetu o le Aso, Fautua, ma le Tupu. Ou te molimau atu faatasi ma Amaleki e faalēiloa o anamua e faapea ia taitasi i tatou ma ia “ofoina atu [o tatou] agaga atoa e fai ma taulaga ia te ia.”19 O lena tuuto atu ma le naunautai, ma le mausali tatou te pepese ai:
Viia le mauga; Ua ou mautu i ai:
Mauga o lou alofa togiola. …
Lo’u loto lea, Se ave ma faamauina;
Faamau ai i lou maota i lugā.20
I le suafa paia o Iesu Keriso, amene.