O Le Alofa o le Atua
Ua faamanuiaina i tatou e lo tatou Tama ma lo tatou Togiola i poloaiga, ma o le usitai i a La’ua poloaiga, tatou te lagona atili ai lo La’ua alolofa atoatoa ma le loloto.
E loloto ma atoatoa le alofa o lo tatou Tama Faalelagi ia i tatou.1 I Lona alofa, sa Ia foafoaina ai se fuafuaga, o se fuafuaga o le togiola ma le fiafia e tatala mai ai ia i tatou avanoa uma ma olioliga tatou te loto ia maua, e oo lava ma aofia ai mea uma ua ia te Ia.2 Ina ia ausia lena mea, sa finagalo ai foi o Ia e ofoina mai Lona Alo Pele, o Iesu Keriso, e fai ma o tatou Togiola. “Aua ua faapea lava ona alofa mai o le Atua i le lalolagi, ua ia aumai mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”3 O Lona alofa o le alofa le pona o se Tamā—e laugatasia mo tagata uma, ae e patino i tagata taitoatasi.
Ua ia Iesu Keriso foi lea lava alofa atoatoa e tasi ma le Tama. Ina ua faatoa folasia mai e le Tama Lana fuafuaga sili o le fiafia, sa Ia fesili mo se tasi e fai ma Faaola e togiolaina i tatou—o se vaega e tatau ai o lena fuafuaga. Sa ofo mai Iesu, “O a‘u lenei, auina atu a‘u.”4 “E lē faia e [le Faaola] ia se mea vagana ai ua mo le manuia o le lalolagi; ona ua alofa o ia i le lalolagi, na ia tuuina mai lona lava ola ina ia mafai ona ia aumai o tagata uma ia te ia. O le mea lea, ua lē poloaia ai e ia se tasi ia latou lē taumamafa i lana olataga.”5
O lea alofa paia e ao ona tatou maua ai se mafanafana tele ma le talitonuga maumaututu pe a tatou tatalo atu i le Tamā i le suafa o Keriso. E leai se tasi o i tatou o se tagata ese ia i La’ua. E le tatau ona tatou faatuatuai e valaau atu i le Atua, tusa lava pe tatou te lagona le lē agavaa. E mafai ona tatou faalagolago i le alofa mutimutivale ma le mana o Iesu Keriso e faafofogaina ai i tatou.6 Ma afai tatou te tumau i le alofa o le Atua, e atili tuuitiitia ai lo tatou faalagolago i le faamaoniga a isi e taiala i tatou.
O Le Alofa o le Atua e Lē Faatagaina se Agasala; Ae e Aumaia ai le Togiola
Ona o le alofa o le Atua e aofia ai tagata uma, ua fai mai nisi e “le faatuaoia,” ma i o latou mafaufau, atonu latou te manatu ai o lona uiga o faamanuiaga a le Atua e “le faatuaoia,” ma o le faaolataga foi e “le faatuaoia.” E le faatuaoia le alofa ma le faaolataga. E fai mai soo a nisi, “E alofa le Faaola ia te a’u i le tulaga lea ou te i ai,” ma e moni lelei lava lena mea. Ae e le mafai e Ia ona aveina se tasi o i tatou i Lona malo i le tulaga o tatou i ai nei, “aua e leai se mea eleelea e mafai ona nofo ai iina, pe nofo ai i lona afioaga.”7 E tatau ona foia muamua a tatou agasala.
Sa ta‘ua e Polofesa Hugh Nibley i se tasi taimi e le mafai e le malo o le Atua ona onosaia pe afai e faananau e oo lava i se agasala aupito itiiti: “O sina ofuvae itiiti lava o le piopio o lona uiga o le isi lalolagi o le a le pala pe faavavau. O sina faaletonu itiiti i se fale, faalapotopotoga, gagana, po o le amio o le a lēma’alofia ai le lamatia moni o le taunuuga o le faavavau.”8 O poloaiga a le Atua e “saolele”9 aua o Lona malo ma ona tagatanuu e na o le pau le mea e mafai ai ona tu, pe afai latou te teena e le aunoa mea leaga ma filifili le lelei, e aunoa ma se tuusaunoaga.12
Na matauina e Elder Jeffrey R. Holland, “Na malamalama manino lava Iesu i le mea e foliga mai o loo galo i le toatele o la tatou aganuu faanei onapo: e i ai se eseesega taua i le va o le poloaiga ia faamagalo le agasala (lea sa Ia maua le mana lē faatapulaaina e faia ai) ma lapataiga e tetee ai i le lē amanaiaina (lea Na te le’i faia lava i se taimi e tasi)”11
Peitai, e ui i ni o tatou lē atoatoa i le taimi nei, e mafai lava ona i ai lo tatou faamoemoe e maua “se igoa tauleleia,”12 ma se nofoaga, i Lana Ekalesia i le lalolagi selesitila. I le mavae ai o le faamanino mai faapea e lē mafai ona Ia faatagaina pe faasēloa le agasala, ua faamautinoa mai e le Alii ia i tatou:
E ui i lea, o ia o lē e salamo ma faia poloaiga a le Alii o le a faamagaloina.”13
“Ma o le tele o taimi e salamo ai loʼu nuu Ou te faamagalo ai i latou ia latou solitulafono faasaga mai ia te aʼu.”14
O le salamo ma le alofa tunoa paia e foia ai le faafitauli:
“Ia manatua foi upu na tautala atu ai Amoleka ia Seseroma, i le aai o Amonaea; ona sa fai atu o ia ia te ia e moni o le a afio mai le Alii e togiola lona nuu, ae o le a le afio mai o ia e togiola i latou ia latou agasala, ae ia togiolaina i latou mai ia latou agasala.
“Ma ua ia te ia le mana na tuuina mai ia te ia mai le Tamā e togiola ai i latou mai ia latou agasala ona o le salamo; o lea na ia auina mai ai ana agelu e talai mai tala o tuutuuga o le salamo, lea e aumai ai i latou i le mana o le Togiola, mo le olataga o o latou agaga.”15
Faatasi ai ma le tuutuuga o le salamo, e mafai e le Alii ona faasafua atu le alofa mutimutivale e aunoa ma le faoa o le faamasinotonu, ma le “E le tuua e le Atua le avea ma Atua.”16
O ala o le lalolagi, e pei ona outou silafia, e tetee ia Keriso, po o le “soo se mea lava se’i vagana ai Keriso.” O o tatou taimi, e talitutusa lava ma le talafaasolopito o le Tusi a Mamona, lea e tulimatai ai e tagata faatosinaloto le pulega amiolētonu i isi; tuusaoloto faiga feusua’i, ma faalauiloa le faateleina o le tamaoaiga e avea ma sini o lo tatou olaga. O o latou filosofia e ta’uamiotonuina ai le faia o sina agasala itiiti,17 po o ni agasala foi se tele, ae e leai se tasi e mafai ona ofo maia le togiola. Lea e na o le toto o le Tamai Mamoe e auala mai ai. O le mea sili e mafai ona ofoina mai e tagata ia e fai mai “soo se mea lava se’i vagana ai Keriso” po o “soo se mea lava se’i vagana ai le salamo” o le mau lē faavaea e faapea e le i ai se agasala, pe afai foi e i ai, o le i’uga lava e leai ni taunuuga. Ou te le o mafai ona vaai i se aoga o lena manatu i le Faamasinoga Mulimuli.18
Tatou te le tau taumafai e lu’i mea e lē mafai, i le taumafai ai lea e fai ni ‘alofaga o a tatou agasala. Ma i se isi foi itu, tatou te lē tau taumafai e lu’i mea e lē mafai, i le taumafai lea e soloiese ia aafiaga o agasala i lo tatou lava malosi. O la tatou tapuaiga e le o se lotu e taumafai ia ta’uamiotonuina pe o se lotu e mumusu e talia ni lē atoatoa, ae o se lotu o le togiolaina—togiolaina e ala ia Iesu Keriso. Afai o i tatou o nisi o e ua salamo, faatasi ai ma Lana Togiola ua tu‘itu’iina a tatou agasala i Lona satauro, ma “ua faamaloloina i tatou i ona faalavalava.”19
O Le Alofa Naunau o Perofeta e Faapei Foi o le Alofa o le Atua
Ua leva ona faagaeetia a’u, ma ou lagonaina foi, le alofa naunau o perofeta a le Atua i a latou lapataiga e faasaga i le agasala. E le o faaosofia i latou e se manao ia ta’usalaina. O lo latou naunautaiga moni e faapei o le alofa o le Atua; o le mea moni, o le alofa lava lea o le Atua. Latou te alolofa ia i latou e auina i ai i latou, po o ai lava i latou ma pe o a foi o latou uiga. E faapei lava foi o le Alii, e le mananao Ana auauna ia mafatia se tasi i tiga o le agasala ma filifiliga lē lelei.20
Na auina atu Alema e folafola atu le savali o le salamo ma le togiolaina i se nuu inosia o ē sa loto e sauaina, faatigaina, ma fasiotia le au Kerisiano talitonu, e aofia ai foi ma Alema lava ia. Ae sa ia alofa ia i latou ma naunau mo lo latou faaolataga. Ina ua uma ona folafola atu le Togiola a Keriso i le nuu o Amonaea, sa aioi atu Alema: “Ma o lenei, ou uso e, ou te moomoo mai le vaega totonugalemu o loʼu loto, ioe, ma le atuatuvale tele e oo lava i le tiga, ina ia outou faalogo mai i a’u upu, ma lafo ese a outou agasala, … ina ia mafai ona si’i a’e outou i le aso mulimuli ma ulu atu i le malologa o le [Atua].”21
I upu a Peresitene Russell M. Nelson, “O le mea moni ona e loloto lo tatou amanaia o fanau uma a le Atua o lea tatou te folafola atu ai Lana upumoni.”22
E Alofa le Atua Ia Te Oe; Pe E Te Alofa Ea Ia Te Ia?
O le alofa o le Tama ma le Alo e foai fua mai ae e aofia ai foi faamoemoe ma faamoemoega. Ou te toe ta’ua Peresitene Nelson, “O tulafono a le Atua e uunaia atoatoa lava e Lona alofa le mafuatia mo i tatou ma Lona finagalo ia tatou avea uma ma tagata e mafai ona tatou avea ai.”23
Ona e alolofa i La’ua ia te oe, La te le finagalo ai e tuua oe “i lou tulaga moni o loo e i ai.” Ona e alolofa i La’ua ia te oe, La te finagalo ia e maua le fiafia ma ia manuia. Ona e alolofa i La’ua ia te oe, La te finagalo ai ia e salamo aua o le ala lena i le fiafia. Ae o lau lava filifiliga—La te faamamaluina lau faitalia. E tatau ona e filifili e alofa ia i La’ua, ia auauna atu ia i La’ua, e tausi a La’ua poloaiga. Ona mafai lea ona La’ua matua faamanuia tele ia te oe faapea foi ona alolofa ia te oe.
O lo la faamoemoega autu mo i tatou ia tatou alolofa atu foi. “O sē lē alofa ua lē iloa e ia le Atua; aua o le Atua o le alofa lava ia.”24 E pei ona tusia e Ioane, “Le au pele, afai ua alofa mai pea le Atua ia i tatou, e ao foi ona tatou alolofa o le tasi i le isi.”25
Na ta’ua e Joy D. Jones, o se sa avea ma Peresitene Aoao o le Peraimeri e faapea a o avea ma se ulugalii talavou, sa valaauina o ia ma lona toalua e lo latou epikopo e asiasi ma auauna atu i se aiga ua tele tausaga e le’i toe o mai i le lotu. Sa vave ona manino i la la’ua asiasiga muamua, sa le mananao ai le aiga. I le mavae ai o le lē fiafia i taumafaiga faaopoopo lē manuia, ma i le mavae ai o le tele o tatalo faamaoni ma le manatunatu loloto, sa maua e Uso ma Tuafafine Jones se tali i le aisea o la la’ua auaunaga i le fuaiupu lenei mai le Mataupu Faavae ma Feagaiga: “Ia e alofa atu i le Alii lou Atua ma lou loto atoa, ma lou manatu atoa, mafaufau, ma le malosi; ma ia e auauna atu ia te ia i le suafa o Iesu Keriso ia e auauna atu ia te ia.26 na saunoa mai ai Tuafafine Jones:
“Sa ma iloaina sa ma taumafai ma le faamaoni e auauna atu i lenei aiga ma ia auauna atu i la ma epikopo, ae sa tatau ona ma fesili ifo ia i maua lava pe na ma auauna moni atu ma le alofa i le Alii. …
Sa amata ona ma taulai atu ma le fiafia i a ma’ua asiasiga faatasi ma lenei aiga pele ona o lo ma alolofa mo le Alii [tagai i le 1 Nifae 11:22]. Sa ma faia mo Ia. Sa Ia faia le tauiviga e lē toe avea ma se tauiviga. I le tele o masina o lo ma tutu ai i le fasitepu o le faitotoa, sa amata ona avatu ma’ua i totonu e le aiga. Mulimuli ane, sa matou faia tatalo e lē aunoa ma talanoaga faatasi faaletalalelei. Sa atia’e se faauōga umi ma tumau. Sa matou tapuai atu ma alolofa ia te Ia e ala i le alofa i Lana fanau.”27
I le faamamaluina e alofa atoatoa le Atua ia te i tatou, e mafai ona tatou taufai fesili, “O le a le lelei o lo’u alofa i le Atua? Pe mafai ona Ia faalagolago mai i lo’u alofa e pei ona ou faalagolago i Lona alofa?” Mata e le o se faanaunauga aoga le ola ina ia mafai ona alofa mai le Atua ia i tatou e ui i o tatou toilalo ae faapena foi ona o tagata ua avea ai i tatou? Oi, ina ia mafai ai ona Ia fetalai e uiga ia te oe ma a’u e faapei ona sa Ia fetalai ai e uiga ia Ailama Samita, mo se faataitaiga, “O A’u, le Alii, ua alofa ia te ia, ona o le faamaoni o lona loto.”28 Se’i o tatou manatuaina le apoapoaiga agalelei a Ioane: “Aua o lenei lava le alofa i le Atua, ia tatou tausi i ana poloaiga: e le mamafa foi ana poloaiga.”29
Ioe, o Ana poloaiga e le o se avega mamafa—ae o le faafeagai. O loo faailoga ai le ala o le faamalologa, fiafia, filemu, ma le olioli. Ua faamanuiaina i tatou e lo tatou Tama ma lo tatou Togiola i poloaiga, ma o le usitai i a La’ua poloaiga, tatou te lagona atili ai lo La’ua alolofa atoatoa ma le maoae.30
O le vaifofo lenei mo o tatou taimi faifai pea—o le alofa o le Atua. I vaitau faamanuiaina o le talafaasolopito o le Tusi a Mamona i le mavae ai o le misiona a le Faaola, o loo ta’ua mai ai e faapea “sa oo ina leai se finauga i le laueleele, ona o le alofa o le Atua sa mau i loto o tagata.”31 A o tatou tinoū e agai atu i Siona, tatou te manatua le folafolaga o i le Faaaliga: “Amuia i latou o ē faia ana poloaiga, ina ia taga ia i latou le laau o le ola, ma ia latou ulu atu i le aai [paia] i ona faitotoa.”32
Ou te tuu atu la’u molimau i le moni o lo tatou Tama Faalelagi ma lo tatou Togiola, o Iesu Keriso, faapea ai ma lo La alolofa faifai pea, e le mavae mo i tatou. I le suafa o Iesu Keriso, amene.