Fet blong Tekem Aksen mo blong Kam Huia Yu
Tru long prea, skripja stadi, mo aksen, yumi save karemaot lok long ol blesing blong heven mo kam ol moa ol gudfala man blong folem Sevya Jisas Kraes.
I no longtaem afta we mi bin kasem koling blong kam olsem wan Jeneral Atoriti Seventi, mi bin gat janis blong mitim Presiden Russell M. Nelson blong smol taem. Hem i no wan plan blong mit insaed long kafeteria, mo hem i kaen tumas blong invaetem Elda S. Mark Palmer mo mi blong sidaon mo glad blong kakae lanj tugeta wetem hem.
“?Yumi stap tokbaot wanem taem yumi stap wetem profet long lanj taem?” hemia tingting we i kam long maen blong mi. So, mi askem Presiden Nelson sapos hem i gat eni kaonsel mo daereksen blong mi, from we mi jes statem koling blong mi. Ansa blong hem i simpol nomo mo stret; hem i lukluk long mi mo talem, “Elda Schmeil, oli singaotem yu from huia yu save kam.” Afta long eksperiens ia, mi stap tingting hevi abaot wanem nao Lod i wantem mi blong kam. Taem mi stap tingting long hemia, mi luksave se Hem i wantem mi blong kam wan moa gud hasban, papa, pikinini boe mo wan moa gud wokman. Afta, mi kam blong luksave se, evri samting ia i save hapen taem mi wok blong kam wan moa gud disaepol blong Sevya, Jisas Kraes.
Long las jeneral konfrens, Presiden Nelson i bin talem: “Blong mekem eni samting, i nidim hadwok. Blong kam wan tru disaepol blong Jisas Kraes, i semmak nomo.”1 Presiden Nelson i stap invaetem yumi blong wok had blong kam ol moa gud disaepol blong Jisas Kraes. Hem i talem long yumi se blong kam moa olsem Sevya, yumi nidim blong mekem fet blong yumi i kam moa strong taem, yumi askem, tekem aksen mo stap stadi.
1. Askem
Hem i talem: “Askem Papa blong yu long Heven, long nem blong Jisas Kraes, blong kasem help.”2 Blong stap askem samting tru long prea i wan long olgeta ki blong save olsem wanem blong kam wan moa gud disaepol blong Jisas Kraes.
Kolosap long en blong seves blong Hem long medel blong Ol Man blong Nifae long Ol Amerika, Jisas Kraes i gobak long heven. Afta, ol disaepol blong Hem oli, “kam tugeta mo oli joen tugeta long strong prea mo fasin blong livim kakae. Mo Jisas i bin soem hemwan bakegen long olgeta, from oli stap prea long Papa long nem blong hem.”3 ?From wanem Jisas Kraes i bin soem Hemwan bakegen long ol disaepol blong Hem? From se oli stap prea; oli stap askem.
Afta, Hem i gohed blong talem:
“Mo naoia mi go long Papa. Mo i tru mi talem long yufala, eni samting we bae yufala i askem Papa long nem blong mi, bae hem i givim long yufala.
“From hemia, askem, mo bae yufala i kasem; noknok, mo bae i open long yufala; from hem we i askem, i kasem; mo long hem we i noknok, bae i open.”4
Yumi nidim blong askem wetem fet blong save tingting blong Lod, mo akseptem se Lod i save wanem i moa gud blong yumi.
2. Tekem Aksen
Blong stap tekem aksen i wan narafala impoten ki blong stap kam wan moa gud disaepol blong Jisas Kraes. Taem yumi tekem aksen, bae Hem i lidim mo daerektem yumi folem rod ia. Mi save se Nifae i stap lukaotem Lod blong i lidim hem blong save olsem wanem blong karem ol buk ia we oli bin mekem wetem bras, aot long Leban, be yet, hem mo ol brata blong hem oli traem tu taem be oli no save kasem. Be oli stap tekem aksen mo Lod i stap daerektem olgeta folem rod blong olgeta. Long en, Nifae i gat sakses blong traem namba tri taem. Hem i talem, “Mo Spirit i lidim mi; mi no save yet wanem samting bae mi mas mekem.”5
Hemia i wei we Lod i stap wok taem yumi mekem efot faswan, mo tekem aksen, iven taem yumi no gat wan klia save long wanem we yumi nidim blong mekem. Lod i bin talem long Nifae wanem blong mekem: go mo karem ol buk. Be Hem i no talem long Nifae olsem wanem blong mekem. Hem i lego long Nifae blong wokemaot, mo blong lukaotem help blong Lod—mo hemia i olsem wanem, Lod i stap wok oltaem long laef blong yumi. Taem yumi tekem aksen wetem fet, Lod bae i lidim mo daerektem yumi.
3. Stadi
Long 3 Nifae, ol disaepol oli talemaot long Sevya se i gat ol raorao abaot nem blong Jos long medel blong ol pipol. Sevya i ansa mo tijim wan impoten prinsipol taem Hem i talem, “?Oli no bin ridim ol skripja?”6 Stadi i bakegen wan narafala impoten ki blong stap kam wan moa gud disaepol blong Jisas Kraes. Prea mo skripja stadi i wok tugeta. Tufala i wok tugeta blong gud blong yumi. Hemia i wei we Lod i bin stanemap. “Kakae gud long ol toktok blong Kraes; from luk, ol toktok blong Kraes bae i talem long yufala evri samting we yufala i mas mekem.”7
Sevya i tijim tu se yumi no mas stadi nomo ol skripja be tu, blong tijim ol samting insaed long olgeta, olsem we Hem i bin soem long ol Man blong Nifae: “Mo nao i bin hapen se taem we Jisas i eksplenem evri skripja we oli bin raetem tugeta wan taem, nao hem i givim oda long olgeta se oli mas tijim ol samting we hem i bin eksplenem long olgeta.”8
Hemia i wan long olgeta risen from wanem hem i impoten blong Nifae i gobak mo karem ol buk we oli mekem long bras: ol famli blong hem oli nidim ol skripja, i no blong helpem olgeta nomo blong wokbaot i go long promes graon, be tu, blong helpem olgeta blong tijim ol pikinini blong olgeta. Yumi tu, yumi mas lukaotem help insaed long ol skripja from rod blong yumi, mo yumi mas tijim ol samting insaed long hem, insaed long ol hom blong yumi mo long ol koling blong yumi.
4. Tekem Aksen blong Kam Huia Yu
Plante taem, ol ansa blong ol prea bae oli no kam kwik. Be yumi mas gat fet blong gohed, mekem ol stret mo gud aksen, gohed strong olsem Nifae taem hem i bin stap traehad blong karem ol buk we oli wokem wetem bras. Lod bae i soem long yumi smosmol long wan taem, taem yumi stadi long ol skripja, Lod bae i givim ol ansa long yumi, o paoa we yumi nidim blong go tru long wan moa dei, wan moa wik, mo blong traem wan moa taem. Elda Richard G. Scott i bin talem: “Stap glad se samtaem God i stap letem yu blong stap traehad blong wan longfala taem bifo ansa ia i kam. Hemia i mekem fet blong yu i kam antap mo bildimap ol gudfala fasin.”9
Tru long prea mo skripja stadi, Lod i oltaem givim long mi paoa blong tekem aksen mo stap strong long wan moa dei, wan moa wik, mo traem wan moa taem. Plante taem, ol ansa oli no kam kwik. Mi gat ol kwestin we ansa blong olgeta i no kam yet, be mi gohed blong askem mo stadi from, mo mi glad se Lod i gohed blong givim paoa long mi blong tekem aksen taem mi stap wet from ol ansa.
Elda Richard G. Scott i bin talem tu se: “Taem yu wokbaot i go long en blong save blong yu i go long laet blong ol samting we yu no sua long ol, we yu stap yusum fet, bae i lidim yu i go blong faenem ol ansa we bae oli kam, sapos nomo, yu bin go tru ol samting.”10
Blong kam wan moa gud man blong folem Sevya Jisas Kraes, i wan laef taem wokbaot mo yumi evriwan i stap long ol defdefren level, stap muv i go long wan defren step. Yumi mas tingbaot se hemia i no wan kompetisen, mo yumi stap long ples ia blong lavem mo helpem wanwan long yumi. Yumi Nid blong stap tekem ol aksen we bae i save letem Sevya i wok wetem yumi long laef blong yumi.
Lod i toktok long Sidni Rigdon mo talem hemia: “Mi bin luk long yu mo ol wok blong yu. Mi bin harem ol prea blong yu, mo mi bin mekem yu rere from wan wok we i moa bigwan.”11 Mi testifae se Lod i harem mo ansarem ol prea blong yumi; Hem i save yumi; Hem i gat wan wok we i moa bigwan blong wanwan long yumi. Tru long prea mo skripja stadi, yumi save karemaot lok long ol blesing blong heven mo kam moa ol gudfala man blong folem Sevya Jisas Kraes.
Presiden Dallin H. Oaks i tijim se “Las Jajmen i no blong skelem ful wok we i gud mo nogud—wanem yumi bin mekem. Hem i blong luksave wanem ol aksen mo tingting blong yumi—huia yumi kam.”12
Mi talem tangkyu from ol profet, sia, mo reveleta; oli ol gadman long taoa. Oli luk ol samting we yumi no luk. Mi testifae se tru long ol toktok blong olgeta, yumi save kam ol moa gud man blong folem Sevya Jisas Kraes mo kam huia Hem i wantem yumi blong kam. Mi testifae se Kraes i stap laef mo i save wanwan long yumi. Hemia i Jos blong Hem. Long tabu nem blong Jisas Kraes, amen.