Wan Haos blong Oda we I Folem Step
“Oda ia we i folem step” i wan simpol, nomol, mo gud wei we i wok blong Lod i stap tijim yumi, olsem ol pikinini blong Hem, abaot ol impoten prinsipol.
Long wok laef blong mi, mo long seves blong mi insaed long Jos, mi bin mekem hemia plante taosen taem—be neva long fored blong olgeta 15 man we oli stap sidaon stret biaen long mi. Mi stap filim prea blong yufala mo prea blong olgeta.
Ol brata mo sista. Mi mi blong Kingdom blong Tonga long Saot Pasifik, be mi groap long Not Amerika. Wol sik ia i mekem se plante handred pipol, maet ol taosen yang misinari blong Tonga we oli givim seves raon long wol oli no gobak long homples blong olgeta from boda i klos. Sam elda blong Tonga oli bin stap long misin blong olgeta blong tri yia mo ol sista, !ova tu yia finis! Oli gat longfala tingting mo wet wetem fet ia we ol pipol blong yumi oli gat. Be taem yumi stap wet i go, yufala i no sek se sam we oli stap long ol wod mo stek blong yufala oli stap luk moa olsem mi—we mi olfala mo gat grei hea. Yumi talem tangkyu long ol misinari long evri ples from gudfala seves blong olgeta, iven we i longwan o i sotwan bitim wanem we oli ting, from wol sik ia.
Wan Sandei, taem mi wan dikon, mi stap aotsaed long japel rum wetem wan trei blong wota, mo pasem sakramen taem wan woman i wokbaot insaed long bilding. Mi mekem diuti blong mi, mi go kolosap mo presentem trei. Hem i talem yes long hed, i smael, mo i tekem wan kap wota. Hem i bin kam let tumas blong tekem bred. Sot taem afta long eksperiens blong mi, hom tija blong mi, Ned Brimley i tijim mi se, plante ples mo blesing blong gospel blong Jisas Kraes, oli givim i kam long yumi long oda we i folem step.
Samtaem afta long wik ia, Ned Brimley mo kompanion blong hem i kam long haos wetem wan lesen mi neva fogetem. Ned i rimaenem mifala se i gat oda long wei we God i bin krietem wol ia. Lod i lukaotgud blong eksplenem long Moses, oda ia we Hem i bin folem blong Krietem planet wol ia. Faswan, Hem i stat blong serem laet long tudak, afta wota mo drae graon. Hem i ademap laef long plant mo animol bifo Hem i ademap long planet ia, hae kriesen blong Hem: man, mo i stat wetem Adam mo Iv.
“Nao hem i mekem man mo man ya i tekem fasin blong hem, i olsem hem stret. Fastaem hem i mekem tu man nomo, wan we i man, mo wan we i woman.
“Mo God i luk se evri samting we hem i bin mekem, mo i luk se i gud tumas.” (Jenesis 1:27, 31).
Lod i bin glad. Mo Hem i spel long nambaseven dei.
Oda we i folem step we Hem i krietem wol ia folem, i no givim yumi nomo wan smol lukluk long wanem i impoten long God, be tu, from wanem, mo huia nao Hem i krietem wol ia blong hem.
Ned Brimley i bin poenemaot gud insperesen lesen blong hem wetem wan simpol toktok: “Vai, haos blong God i wan haos we i gat oda. Hem i wantem luk yu laef long wan laef we i gat oda. We i folem ol stret step. Hem i wantem yu blong go long wan misin bifo yu mared.” Long saed ia, ol lida blong Jos oli stap tij naoia se “Lod i wantem luk wanwan yang man we i save mekem, blong hem i rere blong go long misin. … Ol yang woman, we oli wantem go long misin, oli mas rere tu.” (Jeneral Hanbuk: Stap Givim Seves Insaed long Jos Ia blong Jisas Kraes blong Lata-dei Sent, 24.0, ChurchofJesusChrist.org/study?lang=bis). Brata Brimley i gohed: “God i wantem yu blong mared bifo yu gat ol pikinini. Mo Hem i wantem yu blong gogohed blong developem ol talen blong yu long semtaem we yu stap kasem wan edukesen.” Sapos yu jusum blong laef long wan wei we i no gat step blong folem, bae yu faenem se laef i had moa mo i trabol moa.
Brata Brimley, i tij tu se, tru long sakrifaes blong Jisas we i pem praes, Sevya i bin helpem yumi blong putumbak oda insaed long laef blong yumi we i gat trabol, o i olbaot tumas from ol nogud joes blong yumi.
Stat long tetaem ia, mi tingting fulap long “oda ia we i folem step.” Mi developem wan evri dei fasin blong lukaotem ol paten we i gat step long laef, mo long gospel.
Elda David A. Bednar i tijim prinsipol ia: “Taem yumi stadi, lanem, mo laef folem gospel blong Jisas Kraes, oda we i folem step, i givim tijing. Tekem, eksampol, ol lesen we yumi lanem abaot ol fasfala impoten samting long saed blong spirit folem oda blong ol bigfala samting we oli bin hapen taem gospel blong Sevya i bin kambak fulwan long ol las dei ia.”
Elda Bednar i mekem lis mo putum Fas Visen, wetem taem we Moronae i kamkamaot long Josef Smit i kam faswan, we tufala i tijim boe profet faswan, afta huia i God mo fasin blong Hem, afta i gat rol blong Buk blong Momon, mo Elaeja blong karem Isrel i kam tugeta long tugeta saed blong vel long las dispensesen ia.
Elda Bednar i finis i se: “Naesfala oda ia i givim infomesen abaot ol samting long saed blong spirit we oli impoten long Hae God” (“Hat blong Ol Pikinini Bae I Tanem I Go long Ol Papa blong Olgeta,” LiahonaNovemba 2011).
Wan samting mi luk, i we, “oda ia we i folem step” i wan simpol, nomol, mo gud wei we i wok blong Lod i stap tijim yumi, olsem ol pikinini blong Hem, abaot ol impoten prinsipol.
Yumi kam long wol blong lanem samting mo kasem eksperiens ia we bae yumi no save gat long nara wei. Hao wanwan long yumi i groap, i no semmak, mo i impoten olsem long plan blong Papa long Heven. Hao yumi groap long bodi mo spirit i stat long ol step, mo i develop sloslo taem yumi kasem eksperiens we i folem step.
Alma i givim wan strong toktok abaot fet—i yusum eksampol blong wan sid, we, sapos yumi lukaotgud mo fidim gud, i givim kru nao i gro i kam olsem wan big tri, we i fulwan we i givim ol gudfala frut (luk long Alma 32:28–43). Lesen ia, i we, bilif blong yu bae i kam bigwan moa taem yu givim ples blong sid ia, mo fidim sid ia—o tok blong God—insaed long hat blong yu. Bae bilif blong yu i kam bigwan moa taem toktok blong God i stap blong i “solap insaed long jes blong yu” (ves 28). Hem i “stap solap, mo i givim kru, mo i stat blong gro,” (ves 30) i wan samting we yu save luk mo i tijim yu. Hem i folem step tu.
Lod i tijim yumi wanwan folem paoa blong yumi wanwan blong lanem samting mo hao yumi lanem samting. Hao yumi groap, i dipen long hamas yumi wantem gro, hamas yumi wantem save samting, mak blong bilif mo andastaning blong yumi.
Nifae i kasem tijing abaot wanem bae Josef Smit i lanem long Ketlan, Ohaeo, ova 2,300 yia afta: ““From luk, olsem ia nao Lod God i talem: ‘Bae mi givim long ol pikinini blong ol man tijing folem tijing, rul folem rul, smol long ples ia mo smol longwe; mo oli kasem blesing, olgeta ia we oli lisin long ol rul blong mi, mo oli lisin long ol advaes blong mi, from bae oli lanem waes tingting” (2 Nifae 28:30).
Blong yumi lanem samting “tijing folem tijing, rul folem rul, smol long ples ia mo smol longwe,” bakegen, i folem step.
Tingting long olgeta toktok we yumi bin harem plante long laef blong yumi: “Ol fas samting fastaem,” o “fidim olgeta wetem melek bifo yu givim mit.” ?Weswe long “Yu wokbaot fastaem bifo yu ron”? Wanwan long ol toktok ia, oli tokbaot wan samting we i folem step.
Ol merikel oli wok folem wan oda we i folem step. Ol merikel oli hapen, taem we, fastaem yumi praktisim fet. Fet i kam fastaem long merikel.
Ol yang man, oli odenem olgeta long ol ofis blong Aronik Prishud, i folem step, folem yia blong hem we oli odenem hem: dikon, tija, mo afta pris.
Ol odinens blong fasin blong sevem man mo kam olsem wan god oli folem step tu. Yumi kasem baptaes bifo yumi kasem presen we i Tabu Spirit. Ol tempol odinens oli folem step tu i semmak. I tru, olsem we fren blong mi, Ned Brimley i waes blong tijim mi, sakramen i folem step—i stat wetem bred, mo i folem wetem wota.
“Mo taem we oli bin stap kakae, Jisas i bin tekem bred mo i bin brekem bred, mo i blesem bred, mo i bin givim long ol disaepol blong hem, mo i talem: “Yufala i tekem, yufala i kakae; hemia bodi blong mi.
“Mo hem i tekem kap, mo afta we hem i talem tangkyu, hem i givim kap ia long olgeta; mo evriwan i bin dring long kap ia.
“From we hemia blad blong mi, we i blong mekem promes blong God i stanap, [we bae] i ron blong tekemaot ol sin blong plante man” (Matiu 26:26–28).
Long Jerusalem mo long Ol Amerika, Sevya i statem sakramen long stret semmak oda.
“Luk, haos blong mi i wan haos blong oda, Lod God i talem, mo i no wan haos blong tingting i fasfas” (Doktrin mo Ol Kavenan 132:8).
Fasin blong sakem sin, i folem step. Hem i stat wetem fet long Jisas Kraes, iven wan smol pis nomo. Fet i askem fasin blong gat tingting i stap daon, we i wan stamba pat blong gat wan “hat we i stap daon mo wan spirit we i wantem sakem sin” (2 Nifae 2:7).
I tru, ol fas fofala prinsipol blong gospel, oli folem step. “Mifala i biliv we ol fas prinsipol mo odinens blong Gospel oli: nambawan, fet long Lod Jisas Kraes; nambatu, Sakem Sin; nambatri, Kasem Baptaes andanit long wota blong kam klin long ol sin; nambafo, Putum han long hed blong kasem presen we i Tabu Spirit” (Ol Toktok blong Bilif 1:4).
King Benjamin i tijim ol pipol blong hem long saed blong impoten trutok ia: “Mo yufala i luk se oli mekem ol samting ia long waes tingting mo long oda; from i no gat nid blong wan man i ron moa kwik bitim paoa we hem i gat. Mo bakegen, i nid blong hem i wok strong wetem strong tingting oltaem, blong mekem se hem i save winim praes; from hemia, evri samting i mas hapen long oda” (Mosaea 4:27).
Bae yumi laef folem wan laef we i gat oda, mo lukaot blong folem ol step we Lod i aotlaenem blong yumi. Bae yumi gat blesing taem yumi stap lukaotem mo folem ol paten mo ol step we Lod i stap tijim, we oli impoten moa long Hem. Long tabu nem blong Jisas Kraes, amen.