Tingbaot Ol Sent blong Yu we Oli Stap Safa, O God blong Mifala
Blong stap obei long ol kavenan, i openem doa long paoa blong atonmen mo sakrifaes blong Jisas Kraes, blong i givim long yu paoa mo iven glad long huia we i stap safa.
Plan blong hapines blong Papa long Heven i tekem tu eksperiens ia blong kasem mo fesem ol tes blong laef.1 Faef yia i pas, oli bin faenemaot se mi gat kansa. Mi bin filim mo stap filim yet bodi i soa afta long operesen, paoa blong ol meresin mo ol tritmen i stap spolem mi. Mi bin gotru ol filing blong harem nogud, safa mo no stap slip gud long naet. Medikol ripot i faenemaot se bae mi save lego laef blong wol ia eli bitim we mi stap ting long hem, mo stap lego biaen, blong wan smol taem, wan famli we i minim evri samting long mi.
Nomata long weaples yu stap laef long hem, blong stap safa long saed blong filing o bodi, long ol defdefren tes mo ol wiknes long laef blong wol ia, i bin stap, i stap, o bae wan dei bae i stap olsem wan pat blong laef blong yu.
Safa long saed blong bodi i from taem yumi stap kam olfala, ol sik we yumi no tingting long ol, ol defdefren kaen aksiden, hanggri o no gat haos; o abius, fasin blong faet mo wo.
Blong stap safa bigwan long saed blong filing, i kam tru long wari mo sik blong tingting i fasfas, taem i nomo gat tras long hasban o waef, papa mo mama, o wan lida; lusum wok o mane, ol narafala i stap tokbaot yumi, ol joes blong ol fren, ol pikinini o ol narafala memba blong famli; abius long ol defdefren wei; ol mared laef we i no wokaot o pikinini; ol bigfala strong sik, o harem nogud from olgeta we yumi lavem oli ded kwik; o plante narafala hadtaem.
?Olsem wanem nao i posibol blong yu save stanap strong long ol safaring we i defren long ol narawan, mo samtaem i mekem man i kam slak, we i stap kam long yumi wanwan?
Tangkyu tumas se i gat hop we i kam long gospel blong Jisas Kraes mo hop i save kam pat tu long laef blong yu. Tedei mi serem fofala prinsipol insaed long skripja, ol tijing blong ol profet, plante visit blong givhan mo blong helt tes blong mi we i stap gohed yet. Ol prinsipol ia i no blong yusum nomo, be blong yu yusum dip insaed long laef blong yu.
Faswan, blong stap safa, i no minim se God i no glad wetem laef blong yu. Tu taosen yia i pas, ol disaepol blong Jisas oli luk wan blaen man long tempol mo askem: “Tija, taem man ya i bon, hem i blaen. ?Be from wanem? ?From sin blong hem, no from sin blong papa mo mama blong hem?”
Ol disaepol oli andastanem rong, mo tu, plante pipol tedei, evri hadtaem mo ol safaring blong laef, i wan risal blong sin. Be Sevya i ansa: “Ae blong man ya i blaen, be i no from sin blong hem, mo i no from sin blong papa mo mama blong hem, be i blong God i save soemaot paoa blong hem long laef blong hem.”2
Wok blong God i blong mekem man i nomo save ded mo i kasem laef i no save finis.3 ?Be weswe long ol tes mo safaring—speseli taem wan narawan i mekem yumi safa from sin we hem i mekem tru long rong joes blong hem?4—?long en, i muvum wok blong God, o no?
Lod i talem long ol kavenan pipol blong Hem: “Mi bin klinim yu … ; mi bin jusum yu long oven blong faea blong hadtaem.”5 Nomata wanem i stap mekem yu safa, Papa blong yu long Heven i save daerektem olgeta blong klinim sol blong yu bakegen.6 Olgeta sol we oli klinim bakegen, oli save blong karem ol hevi samting blong ol narawan blong oli nomo hevi, wetem wan tru filing long hat, mo wetem lav mo sore.7 Olgeta sol we oli klinim bakegen, oli bin “kamaot long bigfala trabol” mo rere wetem bigfala glad blong laef long ples we God i stap long hem, blong oltaem, mo God bambae i ravemaot wota blong ae blong olgeta.”8
Nambatu, Papa long Heven i save gud ol safaring blong yu. Taem long medel blong ol tes long laef ia, yumi save tingting rong se God i stap longwe long yumi mo no wari long ol harem nogud blong yumi. Iven profet Josef Smit i bin serem filing ia long taem blong ol hadtaem blong hem. Taem hem i stap long kalabus long Libeti, mo taem we ol Lata-dei Sent, oli bin sakemaot olgeta long ol hom blong olgeta, Josef i lukaotem save tru long prea: “O God, ?yu yu stap wea? mo ?wehem nao bigfala tapolen we i kavremap ples we yu stap haed long hem? Hem i endem wetem toktok ia: “Tingbaot ol sent blong yu we oli stap safa, O God blong mifala.”9
Ansa blong Lod i mekem hat blong Josef, mo hat blong olgeta we oli safa, i kwaet.
“Boe blong mi, bae pis i stap long sol blong yu; ol samting we oli kam agensem yu mo ol hadtaem blong yu, oli blong smol taem nomo;
Mo afta, sapos yu mekem gud blong stap strong, God bae i leftemap nem blong yu long heven.”10
Plante Sent we oli stap safa oli bin serem wanem oli bin filim wetem mi, olsem wanem oli bin filim lav blong God long taem blong ol tes long laef. Mi save luk klia eksperiens blong miwan taem mi bin faet agensem kansa, taem ol dokta oli no bin faenemaot stret wanem i stap mekem bigfala soa long bodi blong mi. Mi sidaon wetem waef blong mi, stap wantem prea from lanj blong mitufala. Be mi no save mekem nomo, mi stap krae, “Papa long Heven, plis helpem mi. Mi sik tumas.” Blong nekis 20 o 30 seken, mi fulap long lav blong Hem. Mi no kasem wan ansa blong sik ia, no gat wan bes ansa mo soa ia i no stop. Mi bin filim klin lav blong Hem, mo hemia nomo i inaf.
Mi witnes se Papa blong yumi long Heven, we i save evri smosmol pijin ia, i save ol safaring blong yu.11
Nambatri, Jisas Kraes i givim paoa blong Hem blong helpem yu blong gat paoa blong stanap strong tru ol harem nogud blong yu. Paoa ia we i kam blong Kraes, i kam tru long Atonmen blong Hem.12 Mi fraet se plante memba blong Jos oli tingting se, sapos oli strong moa, bae oli save go tru smol moa long eni safaring blong olgeta, olgetawan. Hemia i wan had wei blong laef. Wanem paoa we yu gat naoia, yu neva save komperem wetem paoa blong Sevya, we i no gat en we i stap kam long yumi, blong mekem sol blong yu i kam moa strong.13
Buk blong Momon i tijim se Jisas Kraes bae i “tekem long hem” ol soa blong bodi mo ol sik, mekem se Hem i save helpem yumi.14 ?Olsem wanem yu save tekem long yuwan paoa ia blong Jisas Kraes we Hem i givim long yu mo blong i givim paoa long yu long ol taem we yu stap safa? Ki, hem i blong fasem yuwan i go long Sevya, taem yu stap obei ol kavenan we yu bin mekem wetem Hem. Yumi save mekem ol kavenan ia taem yumi kasem ol odinens blong prishud.15
Ol pipol blong Alma oli kam insaed long kavenan blong baptaes. Biaen, oli safa olsem ol slef mo blokem olgeta blong wosip long pablik o iven blong prea laod. Yet, oli kipim ol kavenan blong olgeta wetem evri paoa we oli gat blong stap krae bigwan long hat blong olgeta. Olsem wan ansa, tabu paoa i bin kam. “Lod i mekem olgeta oli kam strong moa blong mekem se oli save karem ol hevi samting blong olgeta isi nomo.”16
Long dei blong yumi, Sevya i stap invaetem yumi blong, “Lukluk long mi long evri tingting blong yutufala; no gat tu tingting, no fraet.”17 Taem yumi kipim sakramen kavenan blong yumi blong oltaem tingbaot Hem, Hem i promes se Spirit blong Hem bae i stap wetem yumi. Spirit i givim yumi paoa blong stanap strong long ol tes blong laef mo mekem wanem we yumi no save mekem yumiwan. Spirit i save hilim yumi, olsem we Presiden James E. Faust i bin tijim se nomata: “Sam long ol hiling ia bae oli tekem ples long narafala wol.”18
Yumi kasem blesing tu tru ol kavenan mo odinens blong tempol, ples ia “i gat paoa we i olsem hemia blong God, i kamaot.”19 Mi bin visitim wan woman we i lusum wan yangfala gel blong hem long nogud aksiden, mo afta, man blong hem long kansa. Mi askem hem olsem wanem hem i save safa mo go tru long wan harem nogud olsem. Hem i ansa se, paoa long saed blong spirit blong stap talem bakegen abaot famli we i no save finis, long taem blong wosip long tempol. Olsem promes ia, ol odinens blong haos blong Lod i givim hem tul blong faet we i paoa blong God.20
Nambafo, jusum blong stap glad evri dei. Olgeta we oli stap safa, oltaem oli filim se ol naet i longfala mo i gohed oltaem, mo dei laet bae i neva kam. I oraet blong krae.21 Be yet sapos yu stap long ol tudak naet blong safaring, taem yu jusum fet, yu save wekap long ol naesfala moning blong stap glad.22
Eksampol. Mi bin visitim wan yang mama we oli bin tritim hem from kansa, i stap sidaon long jea blong hem, mo stap smael wetem glad nomata long soa blong bodi o hea we i folfoldaon. Mi mitim wan medel yia kapol, we tufala i stap glad blong stap givim seves olsem ol lida blong ol yut, nomata tufala i no save gat pikinini. Mi sidaon wetem wan dia woman—wan yang bubuwoman, mama mo waef—we bae oli lusum tufala, be yet, long medel blong wota long ae, i gat ol laflaf mo glad i stap olsem ol memori.
Ol Sent ia we oli stap safa, oli eksampol blong wanem we Presiden Russell M. Nelson i bin tijim:
Hem i talem: “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.
“Taem we, long laef blong yumi, yumi stap lukluk nomo long plan blong God blong fasin blong sevem man … mo Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi.”23
Mi testifae24 se Papa long Heven i tingbaot ol sent we oli stap safa, i lavem yu mo i save gud evri samting we yu stap go tru long hem. Sevya blong yumi i save wanem yu stap filim. “I tru se hem i bin tekem ol soa long hat blong yumi mo hem i bin tekem ol harem nogud blong yumi.”25 Mi save—olsem wan we i kasem evri dei26—se blong stap kipim ol kavenan i karemaot lok long paoa blong atonmen mo sakrifaes blong Jisas Kraes we i pem praes, blong i givim paoa mo iven glad long yu we yu stap safa.
Long evriwan we i safa, mi prea, “bae God i mekem ol hevi samting blong yu oli nomo hevi, tru long glad blong Pikinini blong hem.”27 Long nem blong Jisas Kraes, amen.