Ol Merikel blong Gospel blong Jisas Kraes
Mi save se gospel blong hem i save karem kam long yumi, hop, pis, mo glad, i no naoia nomo, be bae i blesem ol narawan long fiuja jeneresen.
!Mabuhay! Mi laekem blong karem lav mo ol wom smael we i kam long ol naesfala Sent long Filipin. Yia ia i makem 60 yia stat long taem we ol fas misinari oli kam long ol aelan blong Filipin. Tedei, i gat 23 misin mo i gat moa long 800,000 memba blong Jos long 123 stek. Naoia i gat seven tempol we i stap wok, oli stap wokem o oli anaonsem. Hemia i wan merikel. Yumi stap luk ol profesi insaed long 2 Nifae 10:21oli stap kam tru: “Be ol promes blong Lod oli bigwan long olgeta we oli stap long ol aelan blong solwota.”
Merikel ia i wan profesi tu we i stap kam tru long wan prea we Elda Gordon B Hinckley taem hem i stap long Manila long 1961. Long prea ia, Elda Hinckley i talem:“Mifala i askem blesing blong Yu, long ol pipol long kantri ia, se bae oli stap olsem ol gudfala fren mo oli lukaotem gud mo stap kaen mo stap glad long olgeta we bae oli kam long ples ia, mo bae plante, yes Lod, mifala i prea se bae i gat plante, plante taosen, we bae i kasem mesej ia mo bae i kasem blesing. Bae yu blesem olgeta wetem wan maen we i open mo wan hat we bae i save andastanem, mo wetem fet blong risivim, mo strong tingting blong laef folem ol prinsipol blong gospel” (dedikesen prea long American Cemetry, Philippines, Apr. 28, 1961).
Long ol plante, plante taosen fetful Lata-dei Sent, merikel blong gospel i karem wan gudfala jenis, long kantri, mo ol pipol blong hem. Mi, mi wan witnes long hem ia. Mi bin gat sikis yia taem we papa mo mama blong mi i joenem Jos long saot aelan long Mindanao. Long taem ia, i gat wan misin nomo long ful kantri mo i nogat eni stek. Mi talem tangkyu tumas long strong tingting blong mama mo papa blong mi’, paoa blong oltaem gohed blong folem Sevya. Mi givim ona long olgeta mo ol paeonia blong Jos long Filipin Olgeta oli openem rod blong ol jeneresen we i stap kam blong oli blesem olgeta.
King Benjamin insaed long Buk blong Momon i talem: “Mo antap long samting ia, mi wantem se yufala i tingbaot gudfala mo hapi ples blong olgeta we oli holem ol komanmen blong God. From luk, Lod i blesem olgeta long evri samting, ol samting blong laef ia tugeta wetem blong spirit” (Mosaea 2:41).
Taem mifala stap laef mo obei long ol prinsipol mo ol odinens blong gospel, oli blesem mifala, jenis mo jenisim laef blong moa olsem Jisas Kraes. Hemia nao olsem wanem gospel i jenisim mo blesem ol Sent blong Filipin, wetem famli blong mi. Gospel hem i wei ia nao blong yumi gat fulap long laef mo stap hapi.
Fas prinsipol blong gospel hem i fet long Lod Jisas Kraes. Plante long ol man Filipin oli biliv long God. Hem i isi long mifala blong trastem Jisas Kraes mo save se bae mifala i save kasem ol ansa long ol prea blong mifala.
Obedoza famli i wan gudfala eksampol long hemia. Brata Obedoza hem i branj presiden blong mi taem mi bin wan yang man. Brata mo Sista Obedoza oli gat strong tingting ia blong sil wetem famli blong olgeta long Manila Tempol. Olgeta oli stap long Jenerol Santos siti, 1000 mael (km) longwe long Manila. Blong wan famli blong naen, rod blong go long tempol i fasfas we. Be semmak olsem bisnisman we i bin go blong salem evri samting we hem i gat blong pem wan perel we praes blong hem i hae (luk long Matiu 13:45–46), kapol ia i bin plan blong salemaot haos blong tufala blong pem trip blong tufala wetem ol pikinini blong tufala, blong oli save sil olsem wan famli we i no save finis. Sista Obedoza i bin wari from taem bae oli kambak, bae oli nomo gat haos. Be Obedoza i bin talem wetem tras hem se bae Lod i soem rod.
Oli bin sil olsem wan famli blong taem naoia mo blong taem we i no save finis long tempol long 1985. Insaed long tempol oli faenem glad ia we oli no komperem—perel blong olgeta we i nogat praes. Mo tru long ol toktok blong Obedoza, Lod i bin soem rod. Taem oli kambak long Manila, ol gudfala fren oli bin givim olgeta ples blong stap, mo afta oli faenem haos blong olgeta wan. Lod bae i tekem kea long mo i blesem olgeta we oli soem fet blong olgeta long Hem.
Nambatu prinsipol blong gospel, hem i fasin blong sakem sin. Fasin blong sakem sin hem i blong yu tanem yu i go longwe long sin mo tanem yu i go long God blong askem fogivnes. Hem i wan jenis long maen mo hat. Olsem we Presiden Nelson i tijim, hem i “paoa blong mekem mo stap gud moa evri dei” (“Yumi Save Mekem Gud Moa mo Stap Gud Moa,” Liahona, Mei 2019, 67).
Fasin blong sakem sin i olsem wan sop. Olsem wan man we i jes stat wok olsem kemikol enjinia, mi wok long wan faktri blong sop long Filipin. Mi lanem olsem wanem blong mekem sop mo olsem wanem i wok. Taem yu miksim ol oel wetem wan bes blong alkalae mo ademap ol samting blong kilim bebet, hem i krietem, wan samting we i gat paoa blong i save kilim ol bebet mo vaeres. Olsem sop, fasin blong sakem sin i olsem wan tul blong klinim samting. Hem i givim janis ia long yumi blong karemaot ol fasin we i no klin mo ol sin blong yumi blong bifo, mekem se yumi klin inaf blong stap wetem God, from se i no save gat wan samting we i doti i save kasem kingdom blong [God]” (Alma 11:37).
Tru long fasin blong sakem sin yumi yusum paoa blong kam klin tru long paoa blong Jisas Kraes. Hemia, fasin blong sakem sin i wan ki pat blong rod ia blong jenisim laef. Hemia i wanem i hapen long Ol Man blong Antae‑Nifae‑Lihae insaed long Buk blong Momon. Olgeta oli Ol Man blong Leman we oli jenisim laef blong olgeta fulwan se oli “neva foldaon i go lus” (luk long Alma 23:6–8). Oli bin berem ol tul blong faet blong olgeta mo oli neva tekemaot ol tul ia bakegen. Olgeta i wantem ded bitim we oli brekem kavenan ia. Mo oli bin pruvum. Yumi save se sakrifaes blong olgeta i karem ol merikel i kam; plante taosen we oli faet agensem olgeta oli sakem ol tul blong faet blong olgeta mo oli jenisim laef olgeta. Plante yia afta, !ol boe blong olgeta, we yumi save long long olgeta olsem ol tu taosen yang strong soldia, God i protektem olgeta long taem blong wo!
Famli blong mi mo plante Ol Sent blong Filipin i folem sem rod ia blong oli jenisim laef blong olgeta. Taem we mifala i akseptem gospel blong Jisas Kraes mo joenem Jos, mifala i jenisim ol wei blong mifala mo kalja blong mifala blong i go wetem hemia blong gospel. Mifala mas lego fulap long ol rong kastom . Mi luk hemia long papa blong mi,taem hem i lanem abaot gospel mo i sakem sin. Hem i wan man we i smok plante, be hem i sakem sigaret blong hem, mo i neva tajem bakegen. From desisen blong hem blong jenisim laef, fo jeneresen blong hem afta, i bin kasem blesing.
Fasin blong sakem sin i lidim yumi blong mekem mo kipim ol kavenan tru long ol tabu odinens. Fas odinens blong fasin blong sevem man mo blong kam olsem god i, blong kasem baptaes andanit long wota blong kam klin aot long ol sin Baptaes i letem yumi kasem presen ia we i Tabu Spirit mo blong go insaed long kavenan ia wetem Lod. Yumi save riniu kavenan we yumi mekem long taem blong baptaes evri wik, taem yumi stap tekpat long sakramen. !Hemia tu i wan merikel!
Ol brata mo sista. Mi invaetem yu blong karem merikel i kam long laef blong yu. Kam long Kraes mo jusum blong praktisim fet blong yu long Hem, sakem sin, mo mekem mo kipim olgeta kavenan we oli stap long ol odinens blong fasin blong sevem man mo kam olsem wan god. Hemia bae oli letem yu blong yu angka wetem Kraes blong kasem paoa mo blesing olsem hemia blong wan god (luk long Doktrin mo Ol Kavenan 84:20).
Mi testifae se Jisas Kraes i ril mo Hem i stap laef mo i lavem wanwan long yumi. Mi save se gospel blong hem i save karem kam long yumi, hop, pis, mo glad, i no naoia nomo, be bae i blesem ol narawan long fiuja jeneresen. Hemia nao i mekem se ol Filipino Sent oli gat ol naes smael. Hem i merikel blong gospel mo doktrin blong Kraes. Mi testifae abaot hemia long tabu nem blong Jisas Kraes, amen.