Valaaulia Keriso e Taitai Lau Tala
Ia avea lau tala o se tala o le faatuatua, e mulimuli i lou Faataitaiga, o le Faaola o Iesu Keriso.
Ou te amata i le faia o ni nai fesili, na faatatau mo le manatunatu ia te oe lava:
-
O le a le ituaiga o faamatalaga patino o loo e tusia mo lou olaga?
-
Pe o sa’o le ala o loo e faamatalaina i lau tala?
-
Pe muta ea lau tala i le mea na amata ai, i lou aiga faalelagi?
-
Pe o i ai se faataitaiga i lau tala—ma o le Faaola ea o Iesu Keriso?
Ou te molimau atu o le Faaola “o lē na te taitaiina ma lē na te faaatoatoaina lo tatou faatuatua.”1 Pe o le a e valaauliaina o Ia e avea ma taitai ma faaatoatoa o lau tala?
Na te silafia le amataga mai le iuga. O Ia o le Foafoa o le lagi ma le lalolagi. E finagalo o Ia ia tatou toe foi atu ia te Ia ma lo tatou Tama Faalelagi. Ua ia te Ia mea uma ua teuina ia i tatou ma e finagalo ia tatou manuia.
O le a sou manatu o mea e taofia ai i tatou mai le liliu atu o a tatou tala ia te Ia?
Atonu o lenei faataitaiga o le a fesoasoani i lau iloiloga faaletagata lava ia.
Ua iloa e se loia mataalia o le faamasinoga faapea o le suesueina, e seāseā ona e fai atua se fesili i se molimau ae te lē iloaina le tali. O le faia o sea fesili o le valaaulia lea o le molimau e ta’u atu ia te oe—ma le faamasino ma le faamasinoga—o se mea e te lei iloaina lava. Atonu e te maua se tali e faateia ai oe ma e feteenai ma le faamatalaga ua e atiina a’e mo lau mataupu.
E ui o le fai atu o se fesili e te le iloaina le tali i se molimau e masani lava ona lē atamai mo se loia o le faamasinoga, o le faafeagai e moni mo i tatou. E mafai ona tatou fai atu ni fesili i lo tatou Tama Faalelagi alofa, i le suafa o lo tatou Faaola alofa mutimutivale, ma o le molimau e taliina a tatou fesili o le Agaga Paia, o lē e molimau mai i taimi uma i le upumoni.2 Talu ai e galue le Agaga Paia i le lotogatasi atoatoa ma le Tama Faalelagi ma Iesu Keriso, ua tatou iloa ai o faaaliga a le Agaga Paia e faatuatuaina. Aisea la, ua tatou tetee ai i nisi taimi i le ole atu mo lenei ituaiga o fesoasoani faalelagi, e faaali mai le upumoni ia i tatou e ala i le Agaga Paia? Aisea tatou te tuuese ai le faia o se fesili lea tatou te le iloa le tali pe afai o le molimau e le gata ina agalelei ae o le a ta‘u atu i taimi uma le mea moni?
Atonu ona e le o ia i tatou le faatuatua e talia ai le tali atonu tatou te mauaina. Atonu ona o le tagata natura i totonu o i tatou e tetee atu i le liliuina atoatoa o mea i le Alii ma faalagolago atoaatu ia te Ia. Atonu o le mafuaaga lena tatou te filifili ai e pipii i faamatalaga ua tatou tusia mo i tatou lava, o se lomiga toafimalie o la tatou tala e le‘i faasa’oina e le Taitai Sili. Tatou te le mananao e fai atu se fesili ma maua se tali e le fetaui lelei i le tala o loo tatou tusia mo i tatou lava.
O le mea moni, e toaitiiti i tatou o le a tusia i a tatou tala ia tofotofoga e faaleleia ai i tatou. Ae tatou te le fiafia ea i le tumutumuga mamalu o se tala tatou te faitau i ai pe a faatoilaloina e le tagata autu le tauiviga? O tofotofoga o elemene ia o mea e tutupu i le tala lea e avea ai a tatou tala e fiafia i ai e faatauanau, faavavau, siitiaina o le faatuatua, ma agavaa mo le faamatalaina. O tauiviga matagofie ua tusia i a tatou tala o mea ia e faalatalata atili atu ai i tatou i le Faaola ma faaleleia ai i tatou, ma avea atili ai i tatou e faapei o Ia.
Ina ia faatoilalo e Tavita ia Koliata, sa tatau ai i le taulealea ona tau ma le sau’ai. O le faamatalaga lagolelei mo Tavita o le toefoi lea e tausi mamoe. Ae nai lo lena sa ia mafaufau i lona aafiaga i le laveaiina o tamai mamoe mai se leona ma se urosa. Ma i le fausiaina i na faatinoga lototoa, sa ia maua ai le faatuatua ma le lototele e tuu atu ai i le Atua e tusi lana tala, ma tautino atu, “O Ieova na ia laveai ia te au nai le lima o le leona ma le lima o le urosa; e faapea foi lena Filisitia.”3 Faatasi ma se manao e faamuamua le Atua, ma le faalogo i le Agaga Paia ma se naunautaiga e tuu atu i le Faaola e avea ma taitai ma le faaatoatoa o lana tala, na faatoilalo ai e le taulealea o Tavita ia Koliata ma laveaiina lona nuu.
Ioe, o le mataupu faavae paia o le faitalia e mafai ai ona tatou tusia a tatou lava tala—semanu e mafai lava e Tavita ona toefoi atu i le fale, e toe tausi mamoe. Ae ua tu saunia Iesu Keriso e faaaoga i tatou o ni meafaigaluega paia, ni penitala ma’ama’ai i Lona aao, e tusi ai se galuega taulima sili! E naunau o Ia ma le alofa mutimutivale e faaaoga a‘u, o se penitala vaivai, o se meafaigaluega i Ona aao, pe a ou faatuatua e tuu atu ia te Ia, pe afai ou te tuu atu ia te Ia e avea ma taitai i la’u tala.
O Eseta o se tasi lea o faataitaiga matagofie o le faamuamua o le Atua. Nai lo le tumau ai i se faamatalaga faaeteete o le faasaoina o ia lava, sa ia faatinoina le faatuatua, ma liliu atu atoa o ia lava i le Alii. Sa taupulepule e Hamanu le faatafunaga o tagata Iutaia uma i Pesia. O Moretekai, le aiga o Eseta, na iloa le taupulepulega ma tusi atu ia te ia, ma uunaia o ia e talanoa ma le tupu e fai ma sui o lona nuu. Sa ia toe faamatala atu ia te ia e faapea, o se tasi e alu atu i le tupu e aunoa ma le valaauina e tatau ona oti. Ae i se faatinoga maoae o le faatuatua, sa ia talosagaina ai Moretekai e faapotopoto tagata Iutaia ma anapopogi mo ia. “O a’u foi, ma lo’u galu teine matou te anapopogi faapenā,” sa ia fai atu ai, “e faapena foi ona ou alu atu ai i le tupu o le mea e le tusa ma le tulafono; afai ou te oti ai, oti ai pea ia.”4
Sa naunau Eseta e tuu atu i le Faaola e tusi lana tala e ui, e ala i tioata o le olaga faaletino, atonu e malaia ai le iuga. O le mea na faamanuiaina ai, sa talia e le tupu ia Eseta, ma sa faaolaina tagata Iutaia i Pesia.
Ioe, o le maualuga o le lototele o Eseta e seasea ona talosagaina mai ia i tatou. Ae o le faamuamuaina o le Atua, o le avea o Ia ma taitai ma lē e faaatoatoaina a tatou tala, e manaomia ai ona tatou tausia Ana poloaiga ma feagaiga ua tatou osia. O la tatou tausiga o poloaiga ma feagaiga o le a tatalaina ai le laina o fesootaiga mo i tatou e maua ai faaaliga e ala mai i le Agaga Paia. Ma e ala mai i faaaliga a le Agaga o le a tatou lagonaina ai le a’ao o le Matai, o loo tusia a tatou tala faatasi ma i tatou.
Ia Aperila 2021, sa talosagaina ai i tatou e lo tatou perofeta, o Peresitene Russell M. Nelson, e mafaufau po o le a se mea e mafai ona tatou faia pe afai e tele atu lo tatou faatuatua ia Iesu Keriso. Faatasi ma le tele o le faatuatua ia Iesu Keriso, e mafai ona tatou fai atu se fesili tatou te le iloaina le tali—ole atu i lo tatou Tama oi le Lagi, i le suafa o Iesu Keriso, e auina mai se tali e ala i le Agaga Paia, o le e molimau mai i le upumoni. Afai e tele atu lo tatou faatuatua, o le a tatou faia le fesili ona naunau lea e talia le tali tatou te maua, e tusa lava pe le fetaui ma la tatou faamatalaga toafimalie. Ma o le faamanuiaga folafolaina o le a oo mai mai le faatinoina o le faatuatua ia Iesu Keriso o se faatelega lea o le faatuatua ia te Ia o lo tatou taitai ma le faaatoatoa. Na tautino mai e Peresitene Nelson e faapea, tatou te “maua tele le faatuatua e ala i le faia o se mea e manaomia tele le faatuatua.”5
O lea la, o se ulugalii e leai se fanau na mafatia mai le lē fanau, e mafai ona ōle atu i le faatuatua pe tatau ona la vaetamaina se tamaitiiti ma ia naunau e talia le tali, e ui lava o le faamatalaga sa la tusia mo i la’ua lava e aofia ai se fanau faavavega.
Atonu e fesili se ulugalii matutua pe ua oo i le taimi mo i laua e auauna atu ai i se misiona ma ia naunau e o, e ui lava o le faamatalaga sa la tusia mo i laua lava na aofia ai se taimi tele i le aufaigaluega. Pe atonu foi o le tali o le e “lei oo mai,” ma o le a latou aoao i mataupu mulimuli ane o la latou tala pe aisea na manaomia ai i latou i le fale mo sina taimi umi atu.
E mafai e se alii talavou po o se tamaitai talavou ona ole atu i le faatuatua pe sili atu le taua o le tulitulimatagauina o taaloga po o le faaakatemia po o musika ma ia naunau e mulimuli i uunaiga a le molimau atoatoa, o le Agaga Paia lea.
Aisea tatou te mananao ai ia avea le Faaola ma taitai ma le faaatoatoa o a tatou tala? Talu ai Na te silafia lelei o tatou gafatia, o le a Ia aveina i tatou i nofoaga tatou te le’i mafaufauina lava e tatou. E mafai ona Ia faia i tatou o se Tavita po o se Eseta. O le a Ia faalauteleina ma faaleleia i tatou ina ia avea atili e faapei o Ia. O mea o le a tatou ausia a o tatou galulue ma le faatuatua sili atu o le a faateleina ai lo tatou faatuatua ia Iesu Keriso.
Uso e ma tuagane, i le na o le tasi le tausaga talu ai na fesili mai ai lo tatou perofeta pele: “O e loto ea e faamuamua le Atua i lou olaga? … O e loto e faataga soo se mea o finagalo o Ia e te faia ia faamuamua i lo isi faamoemoega uma?”6 Ou te faaopoopo atu ma le lotomaualalo i na fesili faaperofeta: “Pe o le a e faatagaina ea le Atua e avea ma taitai ma faaatoatoa o lau tala?”
I le Faaaliga ua tatou aoao ai o le a tatou tutu i luma o le Atua ma faamasinoina mai tusi o le ola, e tusa ma a tatou galuega.7
O le a faamasinoina i tatou e la tatou tusi o le ola. E mafai ona tatou filifili e tusi se faamatalaga toafimalie mo i tatou lava. Pe e mafai foi ona tatou faatagaina le Taitai Sili ma le Faaatoatoa e tusi a tatou tala ma i tatou, tuu atu le matafaioi Na te manaomia tatou te faia e faamuamua nai lo isi faananauga.
Ia avea Keriso ma taitai ma faaatoatoa o lau tala!
Ia avea le Agaga Paia ma au molimau!
Tusi se tala o loo sa‘o le ala o e i ai, i luga o se ala e toe taitai atu ai oe i lou aiga faalelagi e nofo i le afioaga o le Atua.
Ia avea faigata ma puapuaga o ni vaega o tala lelei uma o se auala e te latalata atili atu ai, ma avea atili ai e faapei o Iesu Keriso.
Faamatala se tala e te iloa ai o loo matala le lagi. Fai atu ni fesili e te le iloaina ia tali, i le iloaina e naunau le Atua e faailoa mai Lona finagalo mo oe e ala i le Agaga Paia.
Ia avea lau tala o se tala o le faatuatua, e mulimuli i lou Faataitaiga, o le Faaola o Iesu Keriso. I le suafa o Iesu Keriso, amene.