O Le Filemu o le Tagata Lava Ia i Taimi Faigata

Saunia e Elder Quentin L. Cook

O Le Korama a Aposetolo e Toasefululua

E lei i ai se taimi muamua na sili ona taua ai le sailia o le filemu o le tagata lava ia.

Sa tofia talu ai nei a’u e faapaia se vaega o Navu lauiloa. E avea o se vaega o le tofiga, sa mafai ona ou asiasi i le Falepuipui o Liperate i Misuri. A o ou matamata i le falepuipui, sa ou mafaufau loloto i mea na tutupu ai na avea ai o se vaega iloga o le talafaasolopito o le Ekalesia. Sa faamata’uina soifua o le Au Paia ona o se poloaiga o le fasiotiga tele na tuuina atu e le kovana o Misuri. E le gata i lea, sa faafalepuipuia ma le lē tonu le Perofeta o Iosefa Samita ma nai isi paaga iloga i le Falepuipui o Liperate. O se tasi o mafuaaga o le matautia o le tete’e i o tatou tagata o le tete’e o le toatele o i latou i le faia o pologa.¹ O lenei sauaga ogaoga o Iosefa Samita ma ona soo e aofia ai se faataitaiga soona faaaogaina ma le amioletonu o le faitalia e mafai ai ona aafia tagata amiotonu. O le taimi o Iosefa i Liperate ua faapupula mai ai o puapuaga e le o se faamaoniga o le lē alofa o le Alii po o se aveesea mai o Ana faamanuiaga.

Sa ou matuai ootia lava a o ou faitauina le mea na augani atu ai le Perofeta o Iosefa Samita a o nofo ai i le Falepuipui o Liperate: “Le Atua e, o fea o i ai oe? Ma o fea o i ai lou faapaologa ua ufi ai lou afioaga lafi?”² Sa fesili Iosefa pe o le a le umi o le a “mafatia ai [le nuu o le Atua] i nei sese ma sauaga lē tusa ai ma le tulafono?”³

O Elder Cook o loo asiasi atu i le Falepuipui o Liperate

A o ou tu ai i le Falepuipui o Liperate, sa matua tuia lo’u loto a o ou faitauina le tali a le Alii: “Lo’u atalii e, ia filemu lou agaga; o lou tiga ma ou puapuaga o le a nao sina minute laitiiti; ma ona oo lea, a fai e te talitalia lelei, o le a faaeaina oe e le Atua i lugā.”⁴ Ua manino o le tetee po o le faafeagai e mafai ona faamamaina i tatou mo se taunuuga e faavavau faaselesitila.⁵

O afioga taua a le Faaola “Lo’u atalii e, ia filemu lou loto”⁶ ua taalililili pea ia te a’u lava ia ma ua taua tele mo o tatou taimi. Ua faamanatu mai ai ia te a’u Ana aoaoga i Ona soo i le taimi o Lana galuega i la le tino.

A o lumanai mafatiaga o Keriso i le Faatoaga o Ketesemane ma i luga o le satauro, sa Ia poloaiina Ana Aposetolo ia “fealofani; e pei ona ou alofa atu ia te outou”⁷ ma sosoo ai ma le faamafanafanaina o i latou i upu nei: “Ou te tuuina atu ia te outou le filemu; o lo’u filemu ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”⁸

O se tasi o faalaniga aupito taua o lo tatou Alii ma le Faaola, o Iesu Keriso, o le “Alii o le Filemu.”⁹ I le iuga o le a faatuina Lona malo e aofia ai le filemu ma le alofa.¹⁰ Tatou te tulimatai atu i le nofotupu faameleniuma o le Mesia.

E ui i lea faauigaga o le nofotupu faameleniuma, a ua tatou iloa lava e le o i ai le filemu ma le nofolelei i o tatou taimi.¹¹ I lo’u olaga atoa, ou te le’i vaai lava i se taimi na sili atu ona le mafaufau tagata. O loo tulai mai pea gagana o le ita ma le faafinau ma faatinoga faatosina ae faataumaoi e lepeti ai le filemu ma le sologa lelei.

O le filemu i le lalolagi e le o folafola maia pe faamautinoa mai, seia aulia le Afio Mai Faalua o Iesu Keriso. Sa faatonuina e le Faaola Ana Aposetolo faapea o le a le ausia e Lana misiona i le lalolagi le filemu lautele. Na Ia aoao mai, “Aua tou te manatunatu ua ou sau e avatu le filemu i le lalolagi.”¹² O le filemu lautele sa le o se vaega o le uluai misiona a le Faaola i la le tino. E le o i ai le filemu lautele i le taimi nei.

Ae peitai, o le filemu o le tagata lava ia e mafai ona maua tusa lava pe i ai le ita, finauga, ma le fevaevaeai lea o loo pagatia ma faatama’ia ai lo tatou lalolagi i ona po nei. E lei i ai se taimi muamua na sili ona taua ai le sailia o le filemu o le tagata lava ia. O se viiga fou matagofie ma le taua, na tusia mo talavou o aso nei e Uso Nik Day e faaulutalaina, “Filemu ia Keriso” na folafola mai “Pe a leai se filemu i le lalolagi, o loo i ai le filemu ia Keriso.”¹³ Na faamanuiaina i tatou i le i ai o lenei viiga ae lei pine ae oo mai le faama’i oti o le KOVITI-19 i le lalolagi atoa.

E atagia mai i lenei viiga i se mamanu matagofie, le naunauga mo le filemu ma ua talafeagai le faamamafa mai ai faapea o le filemu e taula i le soifuaga ma le misiona a Iesu Keriso. Na tautino mai e Peresitene Iosefa F. Samita, “E le mafai ona i ai i le lalolagi lena lagona o le filemu ma le alofa … seiloga e maua e tagata uma le upu moni a le Atua ma le savali a le Atua …, ma iloa e paia lona mana ma lana pule.”¹⁴

E ui o le a tatou le malolo lava mai a tatou taumafaiga ia ausia le filemu lautele, ae ua faamautinoa mai e mafai ona tatou maua le filemu o le tagata lava ia e pei ona aoao mai Keriso. O loo faamatala mai lenei mataupu faavae i le Mataupu Faavae ma Feagaiga: “Ae ia iloa o ia o lē e faia galuega o le amiotonu o le a maua lona taui, o le filemu lea i le lalolagi lenei ma le ola e faavavau i le lalolagi a sau.”¹⁵

O a nisi o “galuega o le amiotonu” o le a fesoasoani ia i tatou e taulima ai fevaevaeaiga ma faaitiitia ai finauga ma maua ai le filemu i lenei lalolagi? O aoaoga uma a Keriso e faasino i le itu lea. O le a ou ta’ua ni nai mea ou te talitonu e faapitoa le taua.

Muamua: Alofa i le Atua, Ola i Ana Poloaiga, ma Faamagalo Atu i Tagata Uma

Na avea Peresitene Siaosi Alapati Samita ma Peresitene o le Ekalesia i le 1945. Sa lauiloa o ia i ona tausaga na avea ai ma Aposetolo, o se taitai‑e fiafia i le filemu. I tausaga e 15 na sosoo ma le avea ai ma Peresitene, sa i ai luitau ma tofotofoga o se pau tele o le tamaoaiga i le lalolagi atoa, ma sosoo ai ma le oti ma le faatama’iga a le Taua Muamua a le Lalolagi, ma sa leai se filemu.

I le faaiuga o le Taua Muamua a le Lalolagi, i le taimi o lana uluai konafesi aoao i le avea ai ma Peresitene ia Oketopa 1945, sa faamanatu mai ai e Peresitene Samita i le Au Paia le valaaulia a le Faaola ia alolofa i o latou tuaoi ma faamagalo atu i o latou fili ona ia aoao mai lea, “O le agaga lena e ao i Au Paia uma o Aso e Gata Ai ona sailia ia maua, pe afai o latou faamoemoe e i ai se aso e tutu atu ai i ona luma ma maua mai ia te ia se faafeiloaiga mamalu i le aiga.”¹⁶

Lona Lua: Saili Fua o le Agaga

Ua faatuina mai e le Aposetolo o Paulo, i lana Tusi i Kalatia, le eseesega i le va o galuega a le amiotonu ia e faaagavaa ai i tatou e fai mo tatou tofi le malo o le Atua ma galuega e mafai ona faaleagavaaina ai tatou e aunoa ma le salamo. Faatasi ai ma na mea e faaagavaaina ai i tatou, o fua o le agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, [ma le] le gaoiā.”¹⁷ O loo faaaofia ai foi e Paulo le fetausoaa’i o avega a le tasi ma le isi ma ia le vaivai i le faia o mea lelei.¹⁸ Faatasi ai ma na galuega e lē amiotonu na ia faaaofia ai le inoino, ita, ma le fefinaua’i.¹⁹

O se tasi o lesona sili i le vaitau o le Feagaiga Tuai e faatatau ia Tamā Aperaamo. O Aperaamo ma Lota, le atalii o lona uso, sa maumea ae sa lei mafai ona la nonofo faatasi. Ina ia aveesea le fe’aina’i, sa faataga e Aperaamo ia Lota e filifili le laueleele e manao ai. Sa filifili e Lota le fanua lafulemu o Ioritana, lea sa lelei le vai e maua ai ma matagofie. Sa ave e Aperaamo aluna o Mamere e gaoā ma e lē lafulemu. Fai mai le mau ona faatu ai lea e Aperaamo lona faleie ma fau ai “le fata faitaulaga ia Ieova.²⁰ A o Lota i se isi itu, “ua faatuina ai lona fale ua oo atu i Sotoma.”²¹ Ina ia maua ni sootaga toafilemu, e manino le lesona: e le tatau ona tatou naunau e fetuutuunai ma tuu le feitaga’i e faatatau i mataupu e le aofia ai le amiotonu. E pei ona sa aoao mai le Tupu o Peniamina, “O le a lē i ai ia te outou se manatu, e faamanu’a i le tasi, ae outou nonofo i le filemu.”²² Ae e uiga i amio e fesootai i le amiotonu ma matafaioi faaleaoaoga faavae autu, e manaomia ona tatou tumau mausali ma le lē maluelue.

A tatou mananao e maua le filemu, le taui o galuega o le amiotonu, o le a tatou lē faatutuina o tatou faleie e faasasaga i le lalolagi. O le a tatou faatutu o tatou faleie e faasasaga i le malumalu.

Lona Tolu: Faaaoga le Faitalia e Filifili ai le Amiotonu

O le filemu ma le faitalia e fesootai vavalalata o ni elemene e tatau ai o le ata o le faaolataga. E pei ona faamatala mai i le autu o le talalelei e uiga i le “Faitalia ma le Tali Atu,” o le “Faitalia o le gafatia ma le avanoa ua tuuina mai e le Atua ia i tatou e filifili ma faatino ai mo i tatou lava.”²³ O lea la, ua taoto le faitalia i le fatu o le tuputupu a’e patino ma le poto masani lea e faamanuiaina ai i tatou pe a tatou mulimuli i le Faaola.²⁴

O le faitalia o se mataupu autu i le Fono i le muai olaga i le Lagi ma le feteenaiga i le va o i latou o e sa filifili e mulimuli ia Keriso ma e na mulimuli ia Satani.²⁵ O le lafoai o le faamaualuga ma pulea ma filifili le Faaola o le a mafai ai ona maua Lona malamalama ma Lona filemu. Ae o le filemu o le tagata lava ia o le a luitauina pe a faaaoga e tagata lo latou faitalia i ala faatamaia ma faatiga.

Ou te talitonu o le faamautinoaga toafilemu tatou te lagonaina i o tatou loto sa faamalolosia i lo tatou malamalama i le mea o le a faataunuuina e le Faaola o le lalolagi mo i tatou. Ua matagofie le fofola mai i le, e pei ona faamatalaina i le Tala’i La’u Talalelei: “A o tatou faalagolago atu i le Togiola a Iesu Keriso, e mafai ona Ia fesoasoani ia i tatou ina ia tatou onosaia o tatou faigata, ma’i, ma tiga. E mafai ona faatumulia i tatou i le olioli, filemu, ma le mafanafana. O mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.”²⁶

Lona fa: Fausia Siona i o Tatou Loto ma Aiga

O i tatou o fanau a le Atua ma o se vaega o Lona aiga. O i tatou foi o se vaega o le aiga lea ua tatou fananau mai ai. O le faalapotopotoga o le aiga o le faavae lea o le fiafia ma le filemu. Na aoao mai i tatou e Peresitene Russell M. Nelson—ma i le taimi o lenei faama’i oti, ua tatou aoao ai—e faapea o faatinoga faalelotu e faatotonugalemu i le aiga ae lagolago e le Ekalesia, e mafai ona “tatala mai ai le mana o aiga … e faaliliu ai [o tatou] fale i se nofoaga paia o le faatuatua.”²⁷ Afai e i ai lenei faatinoga faalelotu i o tatou fale, o le a tatou maua foi le filemu o le Faaola.²⁸ Ua tatou iloa o le toatele o outou e le o maua faamanuiaga o ni aiga amiotonu ma tauivi ai e le aunoa ma i latou o e filifili le amioletonu. E mafai e le Faaola ona saunia se puipuiga ma le filemu e i’u ina taiala ai oe i le saogalemu ma le malutaga mai afā o le olaga.

Ou te tautino atu ia te outou o le olioli, alofa, ma le faamalieina lea maua i totonu o aiga fealofani, ma amiotonu e fua mai ai le filemu ma le fiafia. O le alofa ma le agalelei o loo i le totonugalemu o le i ai o Siona i o tatou loto ma aiga.²⁹

Lona lima: Mulimuli i Apoapoaiga Talu Ai Nei a Lo Tatou Perofeta

E matuai faateleina lo tatou filemu pe a tatou mulimuli i le perofeta a le Alii, o Peresitene Russell M. Nelson. E le o toe mamao ona tatou maua lea o se avanoa e faalogologo atu ai ia te ia. Sa saunia o ia mai lava i le faavaega o le lalolagi mo lenei valaauga. Sa matuai sili ona ofoofogia lana lava tapenaga patino.³⁰

Na ia aoao i tatou e faapea e mafai ona tatou “lagonaina le filemu tumau ma le olioli tusa lava i taimi galuā,” pe a tatou tauivi ia avea atili e faapei o lo tatou Faaola, o Iesu Keriso.³¹ Na ia fautuaina i tatou ia “salamo i aso taitasi” ia maua le “mana faamama, faamalolo, ma le faamalosiau” o le Faaola.³² O a’u o se molimau patino na maua faaaliga ma o loo faaauau pea ona maua mai le lagi e lo tatou perofeta pele.

E ui ina tatou faamamaluina ma lagolagoina o ia o lo tatou perofeta, ae tatou te tapuai i lo tatou Tama Faalelagi ma lo tatou Faaola, o Iesu Keriso. O loo faamafanafanaina i tatou e le Agaga Paia.

Ou te tautino atu ma tuu atu la’u molimau patino faa-aposetolo o Iesu Keriso, le Faaola ma le Togiola o le lalolagi, o loo ta’ita’ia ma faatonufolauina Lana Ekalesia toefuataiina. O Lona soifua ma le misiona togiola o punavai moni o le filemu. O Ia o le Alii o le Filemu. Ou te tuuina atu la’u molimau paia o loo soifua o Ia. I le suafa o Iesu Keriso, amene.