Faaavanoa se Taimi mo le Alii
Ou te ai’oi atu ia te outou i le asō ia faafetaia’ia mailei a le lalolagi e ala i le faaavanoa o se taimi mo le Alii i lou olaga—i aso taitasi ma aso uma.
O’u uso e ma tuafafine pele, mo le lua aso ua matuā lelei ona a’oa’oina i tatou e auauna a le Alii o ē sa saili atu ma le filiga ia iloa mea e finagalo o Ia latou te saunoa atu ai.
Ua tuuina mai ia i tatou lo tatou tiute mo le isi ono masina e sosoo ai. Ia, o le fesili la, o le a faapefea ona ese mai i tatou ona o mea ua tatou faalogoina ma lagonaina?
Ua faapupula mai e le faama’ioti le vave tele e mafai ona suia ai le olaga, i nisi taimi mai tulaga e lē mafai ona tatou puleaina. Peitai, e tele mea e mafai ona tatou puleaina. Tatou te faatulaga a tatou lava mea e faamuamua ma fuafua pe faapefea ona faaaoga lo tatou malosi, taimi, ma punaoa. Tatou te filifili pe o le a faapefea ona tatou taulimaina le tasi ma le isi. Tatou te filifili i latou o ē o le a tatou liliu atu i ai mo le upumoni ma le taitaiga.
O leo ma uunaiga a le lalolagi ua matua faatosina ma anoanoai. Ae ua tele na’ua leo e taufaasese, faatosina, ma mafai ona tosoesea i tatou mai le ala o feagaiga. Ina ia aloese mai le lotonutimomomo lē maalofia e mulimuli mai ai, ou te aioi atu ia te outou i le asō ia faafetaia’ia mailei a le lalolagi e ala i le faaavanoa o se taimi mo le Alii i lou olaga—i aso taitasi ma aso uma.
Afai o le tele o faamatalaga e te mauaina e sau mai faasalalauga faaleagafesootai po o isi ala faasalalau, o le a faaitiitia la lou tomai e lagona ai musumusuga a le Agaga. Afai e te le o sailia foi le Alii e ala i tatalo i aso taitasi ma le suesueina o le talalelei, ua e tuua oe lava ia e lamatia i filosofia e ono faatosina ae e lē moni. E oo lava i le Au Paia o ē faatuatua e mafai lava ona tosina atu i le manaia o le pa’ō o le faaili o tu’inanau o Papelonia.
O’u uso e ma tuafafine, ou te aioi atu ia te outou ia faaavanoa se taimi mo le Alii! Ia fai lou oe lava ia faavae faaleagaga ia mausali ma mafai ona tumau i taimi o tofotofoga e ala i le faia o mea na e faatagaina le Agaga Paia e faatasi ma oe i taimi uma.
Aua le manatu faatauvaa i le upumoni loloto e faapea “e tautala mai le Agaga … e uiga i mea e pei ona i ai moni lava, ma e uiga i mea e pei o le a i ai moni lava.”1 “O le a faaali mai e ia ia te outou mea uma e tatau ona outou faia.”2
E leai se mea na te valaauliaina le Agaga nai lo le tāmau o lau taulaiga ia Iesu Keriso. Tautala e uiga ia Keriso, olioli ia Keriso, taumafa i afioga a Keriso, ma fetaomi atu i luma ma le mausali ia Keriso.3 Ia fai ou Sapati ma aso fiafia a o e tapuai atu ia te Ia, taumafa i le faamanatuga, ma tausia le paia o Lona aso.4
E pei ona ou faamamafa atu i lenei taeao, faamolemole ia faaavanoa se taimi mo le Alii i Lona maota paia. E leai se mea o le a faamalosia lou faavae faaleagaga e pei o auaunaga i le malumalu ma tapuaiga i le malumalu.
Matou te faafetai atu i tagata uma o loo galulue i le fausiaina o a tatou malumalu fou. O loo fausiaina i le lalolagi atoa. O le asō ou te fiafia lava e faasilasila atu a matou fuafuaga e fausia nisi malumalu i po o le lata i nofoaga nei: Kaohsiung, Taiwan; Tacloban, Phillipines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; ma le toefaafouga o le Malumalu o Provo Iuta pe a uma ona faapaiaina le Malumalu o Orem Iuta.
Ou te alofa ia te outou, uso e ma tuafafine pele. E silafia e le Alii outou ma e alofa ia te outou. O Ia o lou Faaola ma lou Togiola. O loo Ia taitaia ma taialaina Lana Ekalesia. O le a ia taitaia ma taiala oe i lou olaga patino pe afai o le a e faaavanoa se taimi mo Ia i lou olaga—i aso taitasi ma aso uma.
Ia faatasi le Atua ma outou se’ia tatou toe feiloai foi, ou te tatalo ai i le suafa paia o Iesu Keriso, amene.