![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F67%2F28%2F6728be4c67cf76cd76157a6df19b7c1e017536bc%2F6728be4c67cf76cd76157a6df19b7c1e017536bc.jpeg/full/!250,/0/default)
O Lou Natura Paia ma le Taunuuga e Faavavau
Ou te valaaulia outou ina ia faatotonugalemu lou olaga ia Iesu Keriso ma manatua ia upumoni faavae i le autu a Tamaitai Talavou.
Tuafafine pele, faafetai mo le auai mai. Ua faamamaluina lava a’u e auai i lenei sauniga a tamaitai o le konafesi aoao. I nisi o taimi sa faamanuiaina ai foi a’u e auai i vasega a Tamaitai Talavou. Ae sei ou faailoa atu le mea manino lenei—ou te le talavou, ma e le o a’u o se tamaitai! Peitai, sa ou aoaoina, e itiiti so’u lagona o le le auai pe a mafai ona ou taulotoina ma tamaitai talavou le autu a tamaitai talavou. O le aoaoga faavae loloto o loo aoao i le autu a Tamaitai Talavou1 e taua mo tamaitai talavou, ae e faatatau i tagata uma, e aofia ai i latou e le o ni tamaitai talavou.
O le autu a Tamaitai Talavou e amataina, “O a’u o se afafine faapelepele a ni matua faalelagi, e i ai se natura paia ma se taunuuga e faavavau.”2 O lenei fuaitau e i ai ni upumoni taua se fa. Muamua, o oe o se afafine faapelepele. E leai se mea e mafai ona e faia—pe le faia—e mafai ona suia ai lena mea. E alofa le Atua ia te oe aua o oe o Lona afafine agaga. O nisi taimi tatou te le lagona ai Lona alofa, ae e i ai iina i taimi uma. E atoatoa le alofa o le Atua.3 Ae o nisi taimi e le mafai ona tatou lagonaina lena alofa.
E taua le matafaioi a le Agaga i le faailoa mai o le alofa o le Atua ia i tatou.4 Ae, o le uunaiga a le Agaga Paia e mafai ona ufiufi “i lagona malolosi, e pei o le ita, inoino, … [po o le] fefe … e pei o le taumafai ia iloa le tofo o se vine ao ‘ai se pepa jalapeño. … E matua faoa lava e le [tasi tofo] le isi.”5 O amioga foi e faataumamaoina i tatou mai le Agaga Paia, e aofia ai le agasala,6 e faafaigata ai ona iloa le alofa o le Atua mo i tatou.
E talitutusa lava, e ono faaitiitia lo tatou lagonaina o le alofa o le Atua e ala i tulaga luitauina ma ma’i faaletino po o le mafaufau, faatasi ai ma isi mea. I nei tulaga uma, e mafai ona matua aoga le fautuaga a ni taitai faatuatuaina po o ni tagata tomai faapitoa. E mafai foi ona tatou taumafai e faaleleia lo tatou taliaina o le alofa o le Atua i le fesili ifo ia i tatou lava, “Pe e tumau ea lo’u alofa mo le Atua, pe ou te alofa ia te Ia pe a ou maua ni aso lelei, ae faalētele pe a i ai ni o’u aso leaga?”
O le upumoni lona lua e faapea e i ai o tatou matua faalelagi, o se tama ma se tina.7 O le aoaoga faavae o se Tina Faalelagi e oo mai e ala i faaaliga ma o se talitonuga tulaga ese i le Au Paia o Aso e Gata Ai. Sa faamatala e Peresitene Dallin H. Oaks le taua o lenei upumoni: “O la tatou mataupu faalelotu e amata i matua faalelagi. O lo tatou faanaunauga aupito maualuga o le avea faapei o i la’ua.”8
E itiiti lava se mea o faaalia mai e uiga i le Tina o i le Lagi, ae o mea ua tatou iloa o loo otootoina i le gospel topic lea o loo maua i le tatou polokalama o le Gospel Library.9 E te faitau loa i mea o i ai iina, o le a e iloaina mea uma ou te iloa e uiga i le mataupu. Maimau pe ana tele nisi mea ua ou iloa. Atonu foi o loo i ai pea ni au fesili ma e te manao e saili nisi tali. O le sailia o le malamalama sili atu o se vaega taua o lo tatou atinaega faaleagaga, ae faamolemole ia faaeteete. E le mafai e le mafuaaga ona suitulaga i faaaliga.
O mafaufauga taumatemate o le a le taitai atu ai i se malamalama sili atu faaleagaga, ae e mafai ona taitai atu i le taufaasese pe liliuese ai la tatou taulaiga mai mea ua faaalia.10 Mo se faataitaiga, na aoao e le Faaola Ona soo, “Ia tatalo atu pea i le Tama i lo’u igoa.”11 Tatou te mulimuli i lenei mamanu ma tatou tapuai sa’o atu i lo tatou Tama Faalelagi i le suafa o Iesu Keriso ma e lē tatalo i le Tina Faalelagi.12
Talu mai lava ona tofia e le Atua perofeta, ua faatagaina i latou e saunoa e fai ma Ona sui. Peitai latou te le folafolaina atu aoaoga faavae na gaosia mai “o [latou] lava manatu”13 pe aoao atu mea e le’i faaalia mai. Mafaufau i upu o le perofeta o le Feagaiga Tuai o Palaamo, lea na ofoina atu i ai se totogi ina ia fetuuina tagata Isaraelu ia manuia ai Moapi. Fai mai Palaamo, “Afai e foaiina mai e [le tupu o Moapi] ia te a’u o ario ma auro e tumu ai lona fale, ou te le mafaia ona soli le afioga a Ieova lo’u Atua e fai se mea itiiti, po o se mea tele.”14 E faapena foi ona taotaomia ai perofeta o aso e gata ai. O le manaomia faamalosi mai o faaaliga mai le Atua o le faasausili ma e le aoga. Ae nai lo lena, ia tatou faatalitali i le Alii ma Lana taimi e faaali mai ai Ana upumoni e ala i auala ua Ia faatuina.15
O le upumoni lona tolu i le parakalafa amata o le autu a Tamaitai Talavou e faapea e i ai so tatou “natura paia.” O se vaega taua lea po o ai i tatou. O se “kenera” faaleagaga e tuufaasolo mai i o tatou matua faalelagi,16 ma e le manaomia ai sa tatou taumafaiga. O so tatou faasinomaga sili ona taua lea, e tusa lava po o le a se isi mea tatou te filifili e faailoa ai i tatou. O le malamalama i lenei upumoni loloto e taua mo tagata uma aemaise lava mo tagata taitoatasi o loo i ai i ni vaega o e sa faaesea, sauaina, pe na faatoilaloina. Manatua o lou faasinomaga sili ona taua e faatatau i lou natura paia o se atalii/afafine o le Atua.
O le upumoni lona fa e faapea e i ai so tatou “taunuuga e faavavau.” O sea taunuuga o le a le faamalosia ia i tatou. A mavae le oti, o le a tatou mauaina le mea ua tatou agavaa ai ma “olioli i [na o] mea ua [tatou] loto e talia.”17 O le iloaina o lo tatou taunuuga e faavavau e faalagolago lea ia tatou filifiliga. E manaomia ai le osia ma tausia o feagaiga paia. O lenei ala o feagaiga o le ala lea tatou te o mai ai ia Keriso ma e faavae i luga o upumoni atoatoa, ma le tulafono e faavavau ma e le masuia. E le mafai ona tatou foafoaina lo tatou lava ala ma faamoemoe i taunuuga o folafolaga a le Atua. O le faamoemoe i Ana faamanuiaga ae le mulimuli i tulafono e faavavau o loo faavae ai i luga18 o se mea sese, e pei o le mafaufau e mafai ona tatou pa’i atu i se ogaumu aasa ma “filifili” e aua le mu ai.
Atonu tou te silafia sa ou vaaia ni gasegase e faaletonu fatu. O a latou taunuuga sili na maua i le mulimulitaia lea o ni fuafuaga faavaeina ua faamaonia mo togafitiga. E ui i le iloaina o lenei mea, ae sa taumafai lava nisi gasegase e soalaupule se isi fuafuaga mo togafitiga. Sa latou fai mai, “ou te le manao e inu ni fualaau se tele naua,” po o le “ou te le manao e faia le tele o suesuega tulitatao.” O le mea moni, sa saoloto gasegase e faia a latou lava filifiliga, peitai afai latou te o ese mai fuafuaga mo togafitiga sili ona lelei, e pagatia o latou taunuuga. E le mafai e gasegase e faaletonu fatu ona filifili se auala faatauvaa ona tuuaia lea o o latou foma’i fatu mo taunuuga faatauvaa.
E moni foi lena mea mo i tatou. O le ala faatonuina a le Tama Faalelagi e tau atu i taunuuga sili e faavavau. Tatou te saoloto e filifili, ae e le mafai ona tatou filifilia taunuuga o le lē mulimuli i le ala ua faaalia mai.19 Ua fetalai mai le Alii, “O ia o lē solia se tulafono, ma lē ola i le tulafono, ae saili e avea ma se tulafono ia te ia lava, … e lē mafai ona faapaiaina i le tulafono, pe i le alofa mutimutivale, faamasinotonu, po o le faamasinoga.”20 E le mafai ona tatou o ese mai le ala a le Tama Faalelagi ona tuuaia lea o Ia mo taunuuga faatauvaa.
O le parakalafa lona lua i le autu a Tamaitai Talavou e faitauina faapea: “I le avea ai ma se so’o o Iesu Keriso, ou te tauivi ina ia avea e faapei o Ia. Ou te saili atu ma faatino e tusa ma faaaliga faaletagata lava ia ma auauna atu i isi i Lona suafa paia.” E mafai ona tatou atiina a’e se molimau ia Iesu Keriso e ala i le faatinoina i le faatuatua.21 E mafai ona tatou maua le meaalofa faaleagaga o le “iloa o Iesu Keriso o le Alo o le Atua, ma sa faasatauroina o ia mo agasala a le lalolagi.” Pe e mafai foi ona tatou maua le meaalofa e talitonu ai i upu a i latou ua silafia,22 seia tatou iloa mo i tatou lava. E mafai ona tatou mulimuli i aoaoga a le Faaola ma fesoasoani i isi ia o mai ia te Ia. I lenei auala, e mafai ai ona tatou ‘aufaatasi ma Ia i Lana galuega.23
E faaauau pea le autu a Tamaitai Talavou, “O le a ou tu e avea ma se molimau a le Atua i taimi uma ma i mea uma ma i nofoaga uma.” E manaomia tagata uma o le Ekalesia e avea o ni molimau a le Atua,24 e ui o Aposetolo ma Fitugafulu ua tofia o ni molimau faapitoa i le suafa o Keriso.25 Vaai faalemafaufau i se taaloga soka lea e na o le leoleofaatini e puipuia le tini. A aunoa ma le fesoasoani a isi tagata o le ‘au, o le a le mafai e le leoleofaatini ona puipuia lelei le tini ma o le a faiaina ai pea le ‘au. E faapena foi, ona manaomia tagata uma i le ‘au a le Alii.26
O le parakalafa faaiu o le autu a Tamaitai Talavou e amataina, “A o ou tauivi e agavaa mo le faaeaga, ou te faatauaina le meaalofa o le salamo ma saili ia lelei atili i aso taitasi.” Ona o le taulaga togiola a le Faaola, ua mafai ai ona tatou salamo, aoao mai a tatou mea sese, ma lē tausalaina ai. Na aoao mai e Peresitene Russell M. Nelson, “Ua toatele naua tagata e mafaufau i le salamo o se faasalaga. … Ae o lenei lagona o le faasalaina e mafua mai ia Satani. E taumafai o ia e poloka i tatou mai le vaai atu ia Iesu Keriso, o lē tu mai ma aao mafola, ma le faamoemoe ma le naunautai e faamalolo, faamagalo, mulumulu, faamalosia, faamamā, ma faapaiaina i tatou.”27
Pe a tatou salamo faamaoni, e leai se ma’ila faaleagaga e tumau, e tusa lava po o a mea sa tatou faia, pe matuiā, po o le a foi le tele o taimi tatou te toe faia ai.28 O le faatele ona tatou salamo ma saili le faamagaloga ma le loto i ai, e mafai lava ona faamagaloina i tatou.29 E maeu le ofoofogia o le meaalofa mai lo tatou Faaola, o Iesu Keriso!30 E mafai e le Agaga Paia ona faamautinoa mai ia i tatou ua faamagaloina i tatou. A o tatou lagonaina le olioli ma le filemu,31 o le a tafiesea le tausalaina,32 ma ua le toe faatigaina i tatou ia tatou agasala.33
Peitai, e tusa lava pe ua uma ona salamo faamaoni, e mafai lava ona tatou tautevateva. O le tautevateva e le faapea ua le lava le salamo ae atonu e atagia ai vaivaiga faaletagata. E maeu le mafanafana o le iloaina “e ese le silasila a le Alii i vaivaiga nai lo Lona [silafia] o le fouvale.” E le tatau ona tatou masalosalo i le gafatia o le Faaola e fesoasoani ia i tatou i o tatou vaivaiga aua “pe a fetalai le Alii e uiga i vaivaiga, o taimi uma lava e fetalai mai ma le alofa mutimutivale.”34
E faaiuina le autu a Tamaitai Talavou faapea, “I le faatuatua, o le a ou faamalosia ai lo’u aiga ma le auaiga, osia ma tausia feagaiga paia, ma maua ia sauniga ma faamanuiaga o le malumalu paia.” O le faamalosia o le aiga ma le auaiga e ono faauigaina o le fausia o le uluai sootaga i se filifili o le faamaoni, tauaveina o se talatuu o le faatuatua, po o le toefuataiina.35 Po o le a lava, e oo mai le malosi e ala i le faatuatua ia Iesu Keriso ma i le osia o feagaiga paia.
I le malumalu, tatou te aoao ai po o ai i tatou ma le mea sa tatou i ai. Fai mai le faifilosofia Roma o Cicero, “O le lē iloa o le mea na tupu ae e te le’i fanau mai o le a tausalaina ai e ola e pei o se tamaitiiti.”36 O le mea moni, sa ia faasino atu i talafaasolopito faalelalolagi, ae o lana matauga poto e mafai ona faalauteleina. Tatou te ola o ni fanau e faavavau pe a fai tatou te lē malamalama i le vaaiga e faavavau e maua i totonu o malumalu. O iina tatou te tuputupu a’e ai i le Alii, “maua ai le atoatoaga o le Agaga Paia,”37 ma tuuto atoatoa atili atu ai o ni soo o le Faaola.38 A o tatou tausia a tatou feagaiga, tatou te maua le mana o le Atua i o tatou olaga.39
Ou te valaaulia outou ina ia faatotonugalemu lou olaga ia Iesu Keriso ma manatua ia upumoni faavae i le autu a Tamaitai Talavou. Afai e te loto i ai, o le a taialaina oe e le Agaga Paia. E finagalo lo tatou Tama Faalelagi ia avea oe ma Ona suli ma maua mea uma ua ia te Ia.40 E le mafai ona Ia ofoina atu nisi mea ia te oe. E le mafai ona ou folafola atu nisi mea ia te oe. E sili atu Lona alofa ia te oe nai lo lou iloa ma e finagalo ia e fiafia i lenei olaga ma i le olaga a sau. I le suafa o Iesu Keriso, amene.