oldingel
Mei e bo dodersid e domekerreu el uaia Osobeled, oumesingd el mo er tirkel mla moterekokl el kired loldingel tir loba beltikereng.
Kemiu el rodam me a rodos er ngak, resechelid, ak mengemedaol er kemiu el mei er a klou longdibel!
Uriul er tial mlo merek el klou el ongdibel er a Ongeteruich el buil, e a Sister Gong me ngak a mirrael lomais er a Conference Center loudkeu e orrenges obla moruul er a ebangkelio.
A rechedal a ikelesia el chad er a Mexico a millekoi el kmo, “Hoy es el tiempo de Mexico.”
Aki mlo medengei el kmo a Gilly me a Mary a sechelei el chad er a England. A Mary er a bol chedal a Ikelesia, eng mlo dik er a delengcheklel. A Gilly a ngiluu a Mary el me kiei lobengkel. Me ngulba klou el klaumerang, e a Gilly a kmo, “Ng dimlak a ta me kuumededenger el kmo a Rubak a obengkek.” Tiaikid el klou longdibel, e a Gilly mlo kebetech ngii me a re mle misionari el redil el tir a ulsisechakl er ngii sera okeua me a euid el rak er a memong.
A Jeff me a bechil, er a Melissa, a mla er a klou el ongdibel e tia ketengel a Jeff. A Jeff a semmong er a klekool er a yakiu (el mle catcher) e chelecha eng toktang lomekeuad a ringel er a re mo er a botk. Ng dilu er ngak el kmo, “Ng mengasireng, e le ak mochu melai er a techolbechelid le kumelchesiu el tia ea kot el bleketakl e melemalt el rael er a klengar.”
Uchei, e a Melissa mle ayamar el mo er a odam loldingel er a Jeff, “A Jeff a diak el soal a roubail a ‘becheleleu el bail’ el mei er a blimam.” Ngika lodam loldingel a dilu el kmo, “Msall a kusiik rolel.” Chelecha e ngii me a Jeff a kmal ungil sechelei. Sera techolbechelid er a Jeff, e ak milsa klou el seked er a Ruriul-klebesei el Santo el Jeff, Melissa, me a ngelekir redil, er a Charlotte, a kmal betik a rengrir er tir.
Kid loltirakl er a Jesus Kristo, a osiik el mo oldingel er a rebebil el diuai Ngii e le a klengar a mengiil el mo mengodech.
A Peggy er a louchais er ngak el kmo a bechil er a, John, el mla mo okedei me a tal rak el bechiil, a mo metecholb, e a kuleker el kmo ngera ngildechii.
A Peggy a dilu el kmo, “A John me ngak a milsuub er a Uodel Renged er sel hong el Mei, e Moltirakl Ngak, e a John a uleker el kirel osischakl er a Ikelesia.”
A Peggy dilu el kmo, “Msall e dolai er a remisionari.”
A John a dilu el kmo, “Ng diak molai er a remisionari—a lak el mei a sechelik.” Ng betok er a terucih el rak, el odam loldingel er a John a kmal mla mo ungil sechelil. (Ak mlo omdasu, omko a John a mlo diak el bo loldingel ruruil ra le kot el mong, malechub sel ongerung, ma lechub eng sel ongetiu el rak?)
A John a ulerrenges. Ng kmal mle blak a rengul choiuii a Babier er a Mormon. A remisionari er a le siotai er a John el mo metecholb, eng kilengei. A Peggy a dilu el kmo, “ak di rirebet er a kingellek e longelang.”
A John a millekoi, “Ak milengodech sera kulkeed er ngak er a Rubak.” A uriul, e a John me a Peggy a mlo bechiil er a chelsel a chedaol templo. Tial mlo merek Longeteruich me a ongeru el buil, e a John a mlad el mle oketiu me a eru rekil. A Peggy mellekoi el kmo, “A John a di mla ungil chad, eng di milengodech lokiu a klebokel teletael ruriul er a le metecholb.”
A Sister Gong me ngak a mlo kebetech kemam me a Meb me a Jenny lokiu a video er sera taem er a COVID. (Aki mla kaseues kemam me a re kmal ungil obekel me a re derstal chad lokiu a video er a taem er a COVID, el dersta er tir a ki blo modengelterir lokiu a re merredelel a stake er tir.)
A Meb me a Jenny a uluchais el kmo a sebekreng er a klengar tir a rirelterir el mo oumededenger el kmo a chebechielir er a templo ng sebechel mesebechakl ea le sebechel, e ngera rolel. Te ulumerang er a Tngakireng er a Jesus Kristo me a blakereng er tir er a telbilir a sebechel ngosuterir.
Ak mlo mui er a deureng el kirel a Meb me a Jenny er a lengai a beches el babilengir er a mo er a templo meng mlo sebechir lemuut el mo er a blil a Rubak. Uriul ea Meb a kilo ng mad. Ng klou el klengeltengat el Meb me a Jenny a liluut el smisichii a deleuill er tir lobengkel a Rubak me tir el terung, e melchesuar a beltikereng lokiu odingel er a rebetok el ngara bita er tir el chad.
Ngii di leker el kbo er ngii, e ak mereng a saul er a ikel ksuub er tirkel tir oldingel e omekerreu el uaia Osobel.
A kuk beluu er a Peru, e a Sister Gong me ngak a mlo kebetech lobengkel a Salvador me a rebebil er ngii.1 A Salvador me a rebebil er ngii a ngelekel a kabelment. Ng mle tansiobi er a Salvador. A roungerachel er a Ikelesia me a rechedal el mle blak a rengrir loldingel er tial telungalek a chilsir a renguk. “A meral bliochel klechelid a tiakid, Mo oldingel er a re diak a redemerir me a re mla melakl,”3 “mesebechakl er a remechitechetong, me a rechormang”4
Ngara beluu er a Hong Kong, e a merredel er a chelechad ra re elders ouchais el kirel a ureor longedmokl er ngii el dart el basent el cheldecheduch el kirel odingel. “Aki ngara nglunguuch el mengederoder er a remo dmak loldingel mel sebechir a rokui el chad el mo kaukerreu,” ng melekoi. “A ki blechoel loker er a rebek el dmak loldingel el kirir tirkel chad loldingel er tir. Ng diak ki molecha tengetang er a baks; aki oldingel er a roldingel el tir omekerreu er a rechad.”
Ngara beluu er a Kinshasa, Dominican Republic er a Congo, e a President Bokolo ouchais er ngii me a telungalek er ngii er a bol chedal a Ikelesia er a beluu er a France. A tara klebesei, er a longuiu er a klengeltengat er a patriarch er ngii, e a Chedaol Reng a milklemesii a Brother Bokolo el nguu a telungalek er ngii e lmuut el mo er a DR Congo. A Brother Bokolo mle medengei el kmo te kmal mo chemau a betok el ringel a luut el mong. E a Ikelesia er tir, el Ikelesia er a Jesus Kristo er a Uriul-klebesei el Santo, a dirkak le bo er ngii er a Kinshasa.
Eng di, ngultuil er a klaumera er tir, el uaia rebetok el chad, e a telungalek er a Bokolo ultireklii odbechel a Reng er a Rubak. Sera le bo er a Kinshasa, e te uleldingel e ulemekngeltengat er a rebetok el chad, e mlo selbechakl er a ringel, e ngilai a klengeltengat er a chedaol tekoi me a tekingel a klechad. Chelechal sils, e te ngara deureng el kirel a blil a Rubak el mla mo dechor er a belurir.4
A mla obult el chad a mlodingel lokiu okesiul er a tang. Sera lengeasek, eng klou el temel a di dengchokl er a chelechol. A tara klebesei, ngii a millekoi, “Ak milsa tal klebokel el dil loubail a ungil bail er a omengedub.” Ng mlo mechas a rengul, meng merola el mong e okere el kmo ngera ma klebokel dil oubail er a ungil bail er a omengedub. Ng kal dil a mle chedal a Ikelesia er a Jesus Kristo er a Uriul-klebesei el Santo e uleker ngii el kmo, “Ng diak el soam el mei er a ikelesia er chelechal Sandei?” Ng kilengei.
Betok el rak er a memong, er sera kimdak el ngara oderuchel, e a Elder L. Tom Perry a uluchais el kirel ngii me a kldemel er a le blechoel loldingel er a tal odos el kiliei er a diak el sal ungil basio er a beluu er a Boston. A Elder Perry me a kldemel er a tara kuk lebochang, e ngika lodos a dulang, “Motuu a babier kemiu er a templo er a cheungel a chesimer.” Ng di sel lesa babier er a templo e ngii a ngmai a kmo ng tela el chesechesel a chesimer e mekengii.5 Eng di, ngak a diak du el uase kede ousbech a babier er a mo er a templo el mo oldingel. Eng di ng soak sel uldasou el kmo tirkel loltirakl a telbiil loldingel, a blai a obok me a chesmerel a reng obkais.
A ELder Perry a dirrek e meskid a ungil uldasou. Ng dilu el kmo “Besterir a re kaukledem loldingel a klebech lochur er a rechad loldingel er tir, el ngara chimol basio a lsebechel me lak el mechoit a klou el taem er a omerael,” Ng millelech, “Momuchel er tirkel tir a kmal ousbech odingel. Moldingel er tirkel tir a semeriar e mengemedaol er a re me oldingel.” Ng milngesimer er a tekingel kmo, “A blakereng er a omeruul e blechoel a meskid ongasireng.”
A ngarbab e chedaol odingel6 a mei sel doluluuch lolengit er a “bliochel el beltikereng er a Kristo”7 e doltirakl er a Chedaol Reng. Ng dirrek el mei sel sekum a remerredelel a chelechad er a re elders me a Relief Society, lokiu a dereder er a bisop, a omes er a urerel odingel, luldimukl tirkel kaukledem e merael loldingel. A kulengit me besterir a rengeasek el sechal me a redil a techall el mo teloi e obengterir a remeduch loldingel el rodam me a rodos. E dirrek lolengit me a rengeasek el telcheroll er chelechang bo lolngeseu el kldemir a rodam me a rodos.
A bebil er a basio er a Ikelesia, a ngarngii a chemars er a tekoi er a odingel. Ng sebeched el kmo te oldingel e diak a roldingel er tir. Ng diak el soad el mo simbai el kirel a melecha tengetang. Eng di ng kired lomes lengelakl er sel di ounged er a rechad er a chelsel a blai a lechub e kede kuk di kmo “ngerang sebechek el ngosukau er ngii?” sel omkaseues er a rikl. Ng betok a basio, el sebeched lolngeseu, e mo ungil medengelterir a rebebil, e meleketek a deleuill sel de blechoel loldingel er a rechad er a rekeblirir. A ulekrael lungil tekoi er a ongit a ngmodech a klengar. Sel sekum ongit a ngosukid el remuul e oltirakl a chedaol telbiil, e ng sebeched lolkeed el mo er a Rubak me a ta me a tang.
Kede mla rongesii el tekoi el kmo tirkel meral loba reng e oldingel a blechoel betok a lekedmokl, e tirkel diak a kesai a lekedmokl. Mei e bo doruul a betok, el uaia Osobeled. El uai sel chelitekled, el kmo“klengeltengat er a ngerachel me a beltikelreng.”8
Ward council, chelechad er a re elders me a Relief Society, a kulengit me mrengesii a Ungil Mengkar a Sib e mngesouir “losiik er tirkel mla remiid, … tirkel mla touchakl er a rael, … e msemechokl a telemall, … e mesterir a re smecher.”9 Alta kede mengedecheduch er a “re anghel e diak dodengei”10 sel doruul er a delmerab er a chelsel a Lengiil el blai el mora rokui.11
A ulekrael lodingel omekngeltengat a telungalek me a dersta el chad; ng dirrek el smisiich a ward me a branch. Momdasou a ward a lechub a branch er kemiu el uaia le chimol chelechad er a blil chedaol tekoi. Sel cheldecheduch er a Babier er a Mormon el kirel a kerrekar el olive, e a Merredel er a sers me a remesiungel a ulab a mekreos el rodech e millisiich a dersta el dellomel el mlo oldekdak a rokui el kerrekar.12 A Merredel er a sers me a remesiungel a mle blechoel loker, “Ngera dirk sebechek el rulii?”13 A bol dak, e te omekngeltengat a reng me a blai, ward me a branch, lokiu a ulekrael, e blechobech lodingel.14
A oldingel—mengkar—a rulii a sersed meng mo “chimol chelechad”15—el chedaol sers. A dersta el kerrekar er a sersed a ngar el kerrekerul a telungalek. El rais me a rachel a cheluchaus. A odingel omekngletengat a bek el telcheroll. A lusbechall a ngesou, e a remeduch el bisop me a chelechad er a re elders me a roungerachel er a Relief Society a oker, “Te ngerang tirkel dmak loldingel el rodam me a rodos?” A ward council me a cheldecheduch el kirel odingel a diak di loker el kirel a ringel me a mondai kede dirrek el ngmai osenged e ngara deureng el kirel chubechub er a Rubak er a klengar kid sel doldingel el uai Ngii.
A Osobeled a ngii a cherrungel lokesiu.16 E leng Ngii lungil, le Ngii el sebechel el merael el meruul a ungil.17 Ng omekngeltengat er ngkel imong me a tirkel oketiu me a tetiu. Ng okesiul a dosiou. Kede merael mo uaia Jesus Kristo sel doruul el mo er “tirkel … ngesool” el uaia doruul mo er Ngii,18 sel doubeltikereng el mo er a odam er kid,19 e de “kaubeltikerneg er a delongeled; el uai ngii el betik a rengul er kid,”20 e dirrek el “ngikel ngarbab er kau, bo lemesiungem.”21
A Jesus Kristo oldingel. Me a re anghel me te oldingel.22 A roltirakl er a Jesus Kristo a “oldingel er a ta me a tang,”23 “ngara deureng lobengterir a rengara deureng, e ngara klengitelreng lobengterir a rengara klengitelreng,”24 “e omes [e] … melisiich [er a rechad] er a ikel ungil tekoi,”25 “e melatk … er a remechebuul me a rengesool, me a rsmecher me a rengara ringel,”26 e a Ngklel bo el modanges er a chelsel a urered.27 Me sel doldingel el uai Ngii, e kede sioning ongasireng er Ngii, me a klengeltengat.28 Kede mo nguu a “lmuut el chetengakl ureor.”29
Ng locha mo mesaul a bedenged. Eng di a omesiunged el Kirel a diak el kired el mo “mesaul a rengud er a ungil lomeruul.”30 Kede blak a rengud loureor el mo er sel tkul er bab el sebeched, el kuk diak dengelakl er sel sebeched,31 el uai osischeklel a Apostol Paulus, el kmo “A Dios a medengelii ngike loba deureng e oldars a ngesou.”32 Ele a Dios “omsa a tane el mora melalem e tir el terung el mengedmokl a blauang el mo kelem, e omdois a tane el medalem.”33 Ng belkul a kmo, a Dios a rullid “el mo bekerredechel er a rokui el tekoi.”34 Tirkel, “dualem a betok el dellomel a betok el rodech a bo loridm.”35
Ngii di el ker el de ngarngii er chelechal Baskua, bo doldingel e domekerreu el uaia Osobeled, oumesingd tirkel mla moterekokl el kired loldingel tir loba beltikereng. Me sel doruul uaisei, e dolkeed el mo er a Jesus Kristo me a ta me a tang, el merael mo uai Ngii e oltirakl er a Jesus Kristo er sel Ngii a soal a derta er kid a bol uai ngii. El ngara chedaol el Ngklel, el Jesus Kristo, amen.