Metik er a Budech
Ak meluluuch me bo betik a budech, e mngusuterir a rebebil el mo metik er ngii, e omerk er ngii.
Kemiu el rodam me a rodos er ngak, kede mla mukngeltengat er a meang el osisechakl me a klebokel chelitakl el mla remutech a rengud er chelechal uchelel tial klou el ongdibel. Aki oureng a suliu er a omereliu me a kaumerang er a kemiu.
Chelechal sils e ak mo mengedecheduch er a bla ksubii el tekoi el kirel a skel a budech, er a ngii di el teletael el de ngara chelsel. A Osobel a medengel el kmo a rokui el ngelekel a Chedam er a Babeluades a semeriai losiik er a budech, e Ngii a mla dmu el kmo Ngii a sebechel meskid. Kom dobedebek a tekingel a Jesus Kristo llehukl er a hong er a Johanes: “A budech ak beskemiu, budech er ngak ak beskemiu: ng diak el beluulechad a meskemiu, ngak a nguu el meskemiu. Bol chelellakl a rengmiu e lak louedikel, me a diak komedakt.”1
A lolekoi er ngii el budech e mekera Ngii a lebeskid a mocholt er tirkel tir a Rirngesii er a lolekoi aika el tekoi. Ka morrenges er a cheldecheduch el ngara hong er a Johanes el kirel a urerel a Kristo er a beluulechad. Mesisiich el klisichel a cherarou a mle er Ngii e dirrek el mocha er a roltirakl er Ngii.
Aikakid a tekingel Osobel:
“A le betik a rengmiu er ngak, e moltirakl a llechuk.
“E ak meluluuch el mo er a Chedam, e ngii a mo meskemiu a tara Ongelaod, el mo kiei lobengkemiu el mo cherachar;
“El ngii a Reng er a klemerang; el beluulechad a diak lenguu, leng diak lesang, me a diak lodengelii: eng di kemiu a medengelii; leng ngara rengmiu e mo kiei lobengkemiu.
“Ng diak chitau me mcheloit: Ak mei er kau.
“Ng di telkib el taem, e a beluulechad a mo diak lesekak; eng di kemiu a medengelkak: le ngak el ngar, me ko mo ngar el dirrek.
“Seikid el sils e ko mo medengei el kmo ngak obengkel a Chedam, e kemiu obengkek, me ngak obengkemiu.
“Ngike lolab a llechuk, e oltirakl, a ngii a betik a rengul er ngak: e ngike el betik a rengul er ngak a Chedam a mo betik a rengul er ngii, me ngak meng mo betik a renguk er ngii, e mo chemolt er ngii.
“Me a Juda, diak le ngike el Iskariot, a dula er ngii el kmo, Rubak, ke mekera e mo chemolt er kemam, e diak bom cholt er a beluulechad?
“Ma Jesus a dilu er ngii el kmo, Ngikel betik a rengul er ngak, a mo oltirakl osisecheklek: e ngak ma Demak a mor ngii maki kiei el obengkel.
“Ngikel diak le betik a rengul er ngak a diak loltirakl a osisecheklek: e a osisechakl el bla mrenges a diak losisecheklek, ng bai osisecheklel a Chedam el ngikel ulderchak.
“Ak dima ouchais er kemiu a ikang er chelechal dirk kubengkemiu.
“Ngikel Olengeseu, el Chedaol Reng, el bo loderchii a Chedam el mei el oba ngklek, a mo osisecheklemiu er a rokui el tekoi e mo omeklatk er kemiu er a ikel bek el bla kdu er kemiu.
“A budech ak beskemiu, budech er ngak ak beskemiu: ng diak el beluulechad a meskemiu, ngak a nguu el meskemiu. Lak louedikel a rengmiu, e lak ko medakt.”2
Ak mla suub a kleim el klemerang er aikal osisecheklel a Osobel.
A kot, a sengk er a budech a mei er sel uriul a le borngii a klaumerang er kid el mo oltirakl a Llechul. Mo er tirkel chad er a telbiil el chedal a Ikelesia er a Rubak, a olngesenges a ngii sel bla de yaksok el mo meruul er ngii.
Ongerung, a Chedaol Reng a mei e mo obengked. A Rubak a dilu el kmo, sel bo dolemolem el mui er a klaumerang, ea Chedaol Reng a mo obengked. Tiang sel yaksok el ngarsel nglunguuch er a sakrament el Chedaol Reng a mo kldemed, e kid mo omelchesuar a chelsel a rengud ma uldesued , a Ongelodel.
Ongedei, a Osobel a yaksok el kmo sel doltirakl a telbiled, e kede mo omelchesuar er a beltkil a rengul a Chedam ma Ngelekel el mora rebebil me kid. Kede mo melchesuar er tir el ngara cheslel a klengar er kid, el di uai sel bo de mukngeltengat el mo Obengterir el mo cherechar.
Ongeuang, otireklel a llechul a Rubak a kirel ngarngii a lmuut el doruul ng diak el dil kirel a olngesenges. Ng kired el mo oubeltik el reng el mora Dios loba rokui el rengud, klisiched, uldesued, ma reng.3
Tirkel diak loubeltik el reng el mo er Ngii a diak loltirakl a Llechul. Ma leuaisei eng diak bo le nguu a sengk er a budech er tial klengar ma sel merael mei el beluulechad.
Ongeim, ng bleketakl el kmo a Rubak a betik a rengul er kid meng mlo kmekad a kngtid me bo el sebeched—lokiu a klaumera er kid er Ngii e douchel a rengud, lokiu a Tngakireng er Ngii—me bo denguu a sengk er a budech el “diak el sebechel a chad el mo cherrungel medengelii,”4er tial kengar e Obengkel mo cherechar.
A bebil er kemiu, a lechub e te betok er kemiu, a locha diak el lomelchesuar er a budech el Rubak a mle yaksok er ngii. Kom locha miluluuch el kirel a budech el kuk di morkau ma chedaol ongelaod. Me kom locha omdasu el kmo a babeluades a diak el renges a ongtim.
Ngarngii a chereuel a delbengiu el diak el soal kemiu, ma rebetik ra rengmiu el mo metik a budech. Ngii a diak el loldeu a rengul kirel. Ngii a oureor el mo olekebai er kemiu meng diak kobetik er sel budech el Osobel ma Chedam er a Babeluades a sorir obo mnguu.
A urerel a Diablong a uchul a ouketui ma mondai el meliuekl er kid a di merael mo meklou. Kede mes a teletelel el mla dubech er a beluu ma bouai, ordomel, media, el meliuekl er a beluulechad.
Engdi ngarngii a uchul meng ngarngii a urunguled: el ngii a sel Llemesel a Kristo el ngara bek el ngalek sel mechell. Obang tial sengk el Llemesel a Kristo e kede omelchesuar a llemalt, e ngarngii a rengud el mo oubeltik el reng e mo omelchesuar a beltik el reng. Ngarngii sel llemalt ma klemerang el ngara bek el ngelekel a Dios sel ngii a mer tial beluulechad.
Sel urunguled el kirel a budech el mo er tirkal ngalek a ultuil er a rechad el lomekereu er tir. A lsekum tirkel lomekeroul er tir a mla oureor el mo nguu tial sengk er a budech el mlara Osobel, eng sebechir, lokiu a okesiu ma urerir, el lomekduch a klaumera er a ngalek me bo sebechel nguu tial ngarbab el sengk er a budech.
A chedaol llechukl olisechakl, “Molisechakl er a ngalek er sel meral rolel a klengar e ng mo melatk er ngii er a klengar er ngii.”6 Ng mo ultuil er a ngkel loungarchel er a urekurulel me bol sebechel nguu a sengk er a budech.
Ng mekngit a rengud, ele kede mla melchesuar a ringel el rengalek el mukeroul er a rungil roungalek—a lebebil er a taem ngkuk di chimol chad a omekeroul—a melilt er a rolir, er a uriul er sel klaumerang ma budech, e te bai nguu sel rael er a klengit el reng.
Me sel bol ngarngii a klengit el reng, ea urungulek a kuk mo bedul a bebil er a sengk el mlara Rubak. E tiai kid: e Ngii omekrael er a rebetok el chad er a budech er a delongelir a re oltirakl er Ngii. Te mla melchesuar er a budech ma beltkil a rengul a Dios. A Chedaol Reng a ngara chelsel a rengrir, ma Rubak a omekrael er tir el mo er tirkel mla mo er cheroid.
Ak mla mes er a chelsel a klengar ngak ma beluulechad. Kemiu me kom dirrek el mla mes. A le bebil er a taem, e sel mukrael el mo olngeseu, eng uai kud di ngera mle dubech.
Mle tal taem, e ak kuleker er a tara chad el ki ble mkasues er a omerollam el kmo, “Ng sebechem el telkib louchais er ngak el kirel a telungalek er kau?” Tial cheldechedemam a uchul e ak kuleker me kisang a siasing er a klou el ngelekel redil el ngara ringel. Ng meral mle rau a renguk er a ungil reng el mle chemolt er a medal er a ngkel redil er a chelsel a siasing. Ak mlo melchesuar el loker er a email address er ngii. Ngkal ngelekel redil er sel taem a mle uriid e ulemedasu a lsekum a Dios a ngarngii a klemechel mo er ngii. Ng mlar er ngii. El tiakid: “A Rubak a betik a rengul er kau. El di blechoel. A Rubak a soal omluut el mo er ngii. A klengeltengat el blel yaksok el mo er kau a dirk ngarngii.”
A rechedal a Ikelesia a mla omelchesuar sel sengk er a budech er a Rubak. Ngii a melisiich er a rokui el chad el mo olngeseu er a rebebil me bol ngarngii a techellir el mo er Ngii me bol sebechir nguu a osisiu el budech. E uaisei, e sel lobult. e te mo tibir el mo osiik er a ulekrael me bo lodengei el kmo te mekerang e olecholt er tial sengk el mora rebebil.
Tirkal telcheroll ra chelechang a mo omecheliu er tirkel merael mei el telcheroll. A urerir a mo obdois el mo uchul a ongasireng. Ng mo oberk e merael mo klou, ea rengedel a Rubak el ngara beluulechad a mo keldmokl el mo osus er Ngii el melekoi el kmo hosanna. Ng mo ngarngii a budech er a beluulechad.
A kuuchais er a ultebechel sioning er ngak el kmo a Osobel a ngar e Ngii a mengetikaik er tial Ikelesia. Ak mla omelchesuar er a Beltkil a rengul er a chelsel a klengar er ngak ma Beltkil a rengul ma uldesuel el kirel a rokui el rengelekel a Chedam er a Babeluades. A siotai er a Osobel el mo er Ngii a tengetengel a budech.
A President Russell M. Nelson a ngar el profet er a Dios er tial beluulechad el rokir. Ng dilu, “Ak smisichiu el kmo ng diak el belkul a teletael er a beluulechad ma omeruul el kau a chemau, e kau a bai sebechem el mo chemau a ngarmedal taem loba klaumera ma deurreng.”6
Ak kuchotii a beltkil a renguk el mo er kemiu. A klou el klaumerang ma beltkil a rengmiu a mora rechad meng mo sebechel a Rubak el mult a rengrir meng rulleterir el mo sorir el mesterir a rebebil a sengk er a budech el diak el sebechel a chad el mo cherrungel el medengelii.
Ak meluluuch me bo betik a budech, e mngusuterir a rebebil el mo metik er ngii, e omerk er ngii. Ng mo ngarngii a budech er a chelsel a klebokel el telael el rak er sel luut el mei a Rubak. Aika kdung el oba deurreng el ngara ngklel a Jesus Kristo, amen.