Molatk Ra Kot el Klou a Belkul
Sel kot el klou a belkul a sel deleuill er kid ma Demad ra Babeluades ma Betikrarengul Ngelekel, deleuill ra telungalk er kid, ma retonari er kid e dirrek el mecherei a Chedaol Reng melomekrael er kid.
Chelecha el dolatk er tial sils ra Osobel er sel ongasireng el sisebelel el mo tmuu ra Jerusalem ra uchei ra bol tongetengii a Klengarengii, e ak mo lmatk aikel Tekingel ra oureng ma ongeload: Ngak a okiis era kodall, e ngar: ngkel mo omerang er ngak, altang eng mla mad, eng di mo ngar.1
Ng betik a renguk er Ngii. Ak kumerang er Ngii. Ak olecholt a klaumerang er ngak el kmo Ngii a Okiis ra Kodall e ngii a Ngar.
Tial klaumerang a mle chelodek e klisichek ra ikal mla momerek el eua ma derengel rak ra bechik el Barbara ra lemad. Ak melatk er ngii.
Ak blechoel melatk ra diak a ulebengelel chelbechilam ma klengar kemam el kmak.
Ak mla tal kuchais er serak kot el mesang a Barbra eak mlo meruul er sel tekoi el ksilubii er a klemisionari el kmo “lmuut el mong e omes”. Ng mle kirek el mereched el lmuut el mo er ngii ra uriul er ak kot el mesang leng mle klebokel dil e merael a chisel e dirrek el mle betok mechesengul leng betok a resechelil. Aki mle ngmanged er ngii leng mle ungil omerellel e beot a dongedecheduch er ngii. Ak mle chemat er a ungil lomerellel. Ak milchesuar el kmo ngii ma ngak kiram el kmak. Ng mle kora boet ra udesuek.
A Baraba ma ngak a mle kaseues, me a deleuill a mirael mo ungil, eng di ngii a dimlak lodengei el kmo chelbchiil a mo ungil er ngii.
Diak lungil dil ngak a medengei, a Barbra a kirel mo medengei. Ak mle medengei el kmo a kimdak el olsengerenger e meluluch el kirel tial tekoi, e a Barbra a sebechel nguu a nger ra babeluades.
Aki mlo diak kim dak sel sebadong ma sandai, meng sebechemam el olsengerenger e meluluuch el chad ma ngii el mo medengei. Ng mlo ungil merngak, le ngii a ngiluu a osisiu el ocholt el kngiluu. A aikel medechel, a ledung el kmo, eng reksi.
Sera Barbra ra lemedei, e a rengelekam a liluches ra debellel a betok el suobel el Barbra soal tir a lolatk. A tara suobel a “sel kot el klou a belkul a kiei el meketekt.”
Chelechal sils, ak mo ochais aikel ngara renguk ma udesuek el kirel aike el ngii a kot el klou a belkul.
A kot, a deleuill er kid ma Demad ra Babeluades ma Ngelekel,ra Rubak el Jesus Kristo, a kot el klou a belkul. Tial deleuill a sel kot el klou a belkul er chelechang ma diak ulebengelel klengar.
Ongerung, deleuill er a telungalek a dirrek el ta er sel kot el klou a belkuu tekoi.
Chelsel sera kulisechakl, e ak mlo oldingel a rebok el chad ma telungalek el tir a chemau a ringel ra telmellel a eanged ma chutem. Ng betok a mo diak a blirir, songerenger ma ngara dakt. Tousbech a tekoi ra ukeruul, kall, ma blai.
Te dirrek lousbech ra rechad ra telungalk er tir.
Ak mo melcheseuar ra rebebil el diak a kmeed er tir, mak kumasech ra rechad rechedad, sechelid ma rechad ra ikelesia el telungalek. Aikal deleuill a klou a ututelel el mora klisichel a bedenged me a rengud.
Aikal deleuill a sebechel meskid a beltikelreng, ongelaod,ungil reng, ma reng el chedal a cheldebechel.
Melisiich aikal meklou a ututelel el deleuill a dolilt. Ke melilt el mo tara telungalk el ngii a lousbech a kaiutuir, kllouelreng, ungil cheldecheduch, ma klausubes.2 Morngi a taem el bode kebosech a uldasu, e sebeched el uaisei e diak bo dol siseb er a uldesued. Chelsel a kaiuetoir ma chebechiil, eng diak bo doubeltikelreng ma lechub e bo lak doubeltikelreng dingii ma lou dama er kid. Kede melilt el lou beltikereng e melisiich er a ta ma tang. Kede meruul ra osisiu el mora deleuil ra aikel telungalek ma resechelid el tir a diual tarkid.
A chais er a telungalek a kmul uase, “tial uldasou el kirel a deureng a sobecheklii a deleuill er a telungalek meng melemolem e ruriul er a kodall. A chedaol ruoll me a telbiil el nga er a chelsel a templo a rullii meng mo sebechel a chad el lemuut el mo er a rengedel a Dios me a telungalek a lmuut el mo dmak el mo er a diak a ulebengelel.”3
A tara klou a belkul a olngegesenges er sel odbechel a Chedaol Reng ra chelsel aikal meklou a bekluul deleuill ma aikel omeruul lou beltikereng el mora tonari er kid el diuakid, luldimukl ra berrotel ma bleketakl el omesiou. Ak silubii tial suobel er ak dirk mle kekerei el chad e bisop er sel taem.
Ng mle tal osoi e mle mekelkolt, e mle winter, e ak mlara obis er a bisop lekok merolung e ak mlo ngarngii a mesisiich el uldasuek el mo otngelii a tal uodel el mla melakl chedal a ikelesia. Ak kumes er a temek—eng teruich el klok ra klebesei. Ak kulemdasu el kmo ng kmal mla mo osoi el temel a odingel. El muut ekung, mle ngarangii a snow. Ak tilbir ra renguk el mo oldingel er ngika el odos ra di tutau meng diak bo kungesang er ngii er tial mla mo osoi. Ak kulemekall el mo remei and mlo mechiuaiu, eng di ak ulmitch er ngak el tal kesus leng Chedaol Reng a milngesang er ngak.
Di mle tutau ma bolkuk, ak kulmekall el mora blil ngikal mechas. A ngelkel redil a ngiluu a chesimer e lmangel e kmo, “Oi Bisop, ke mesualng el mei. A Delak a mlad er a mla momerek el erul sikang”—Ak meral mlo mekngit a renguk. Ng meral diak kubes aikel ble kumelchesiu ra renguk. Ak lilnagel. Ngkal melakl el dil ng diak el sal kmal kirel a bisop er ngii lorreked ra chimal, e longelaod e lebesa sel ulebongel klengeltengat el morngii? Ak miltom er tial techall e le ngak el dimle ngak e melib el choitii tial chodbechel a Reng.4
Rudam ma Rudos, rengeasek el sechal ma rengeasek el redil ma rengalek ra primary, ak sioning el kmo a otireklel a odbechel a Chedaol Reng a tara kot el klou a belkul ra chelsel a rokui el deleuill.
Ea ulebongel, chelechal el Chedaol dui el Sandei, eak sioning el kmo sel debult a rengud el mora Rubak, e douichais ra klaumerang er kid er Ngii, e dirrek el dosiou er Ngii ea aika a dirrek el tara meklou belkuu el tekoi.
A klaumerang el ngara Jesus Kristo a ledchor er ngii a klaumerang er kid. A klaumerang a ocholt ma lechub eng klaumedengei el kirel diak a ulebengelel klemerang el ngii a denguu lokiu a Chedaol Reng el mera chaidi rengud ma reng er kid. A klaumerang ra Jesus Kristo, el mlengai e mlisiich lokiu a Chedaol Reng,a melodech a klengar—leng melodech a teletelel a domdasu ma teletelel a klechad er kid. A klaumerang a omekrael el bedul a Demad er a Babeluades ma chedaol el Ngelekel.
A Alma ulsisechakl:
“Ea, akmal louchais er kemiu el kmo, ak ungil medengei el kmo a ikal tekoi el blak dung a klemerang. A omomdasu ea kmekerang e mo medengei el kmo ng klemerang?
Ka morrenges, ak subedemiu, aikang a mlo chemolt el mer ngak er a Chedaol Reng er a Dios. Ka mosang, ak mlo olsengerenger e melluluuch el betok el klebesei, me bol sebechek el mo medengei a ikal tekoi. Me chelechang ea kmal medengei el kmo ng klemerang; le Rubak el Dios a mla cholt er ngak loeak Chedaol Reng er Ngii me tiaia reng er a ocholt el ngar re ngak.5
A le ngarngii a di klaumerang e merkong a diak el di ngii el lungiang. Tial omult el mora Jesus Kristo lorael mo klou, e kid a mo beot e soad el sioning er Ngii—ra ungil Rengul, beltkil a Rengul ma ungil blekerdelel.
Sel Sundei er a sengerenger er a testimony miting, e kede blechoel rongesii a tekoi el kmo “Ak mereng a saul” ma lechub eng “Ak betik a renguk” el kuk betok ra derenges el tekoi el kmo “Ak medengei” ma lechub “Ak kumerang.”
Ak siotai er kau el mochotii a klaumerang er kau ra Jesus Kristo el mekdekudem. Mochotii klaumerang ra aikel modengei ma omoumerang ma ngera aikel kau a melchesuar. e diak dil ikel oumoureng a saul el kirel. Mochotii ra klengar er kau aikel oblamsiseb erngii el mlo medengelii e oubeltikelreng ra Osobel, me sel Klisichel el mengikiid e mlelisiich er kau. Sel mochotii a klaumerang ra aikel modengei, momerangma molchesuar, ea Chedaol Reng a mo ochotii a klemerang el mortirekel tir a ungil lorrenges ra klaumerang er kau. Te momeruul leng tir el mesekau el mla mo ngara budech el loltirakl ra Jesus Kristo. Te momes el kmo ngara beklul a oltirakl er Ngii. Te dirrek el mo melchesuar ra kmungerang el dirkak a tal lolchesuar ra uchei. A klikiid el klaumerang e mengai ra mla mengodech el reng ma el lokiu a klisichel a Chdaol Reng el mengai el mora rebebil el mla mok a rengrir el mo melai.
Tirekel mlo melchesuar ra kmung ngerang leng kau el mle sioning a mo oker ra Dios ra nglunguchir el mochotii a klemerang er sel klaumerang er kau. E tir a ditir el momengdengei.
Rodam me a rodos, ak kuchais e sioning el mor kau ra Jesus Kristo a Osobel e ra beluulechad. Ngii a ngar. Ngii a mla mekiis ra kodall el Ngelekel a Dios, ma tiang a Ikelesia er Ngii, el loruurt er ngii a profet ma re apostol er Ngii. Ak meluluuch ma sel taem el kbor sel tara beluulechad, e ak mo merael loba mesisiich el klaumerang er ngak
Ngar tial omesiou er ngak, e ak mlo subii a sel kot el klou a belkul el deleuill er kid ma Demad el ngara Babeluades ma Betikrarengul Ngelekel, ma telungalk ma de kautonari er kid, e dirrek el mesa techellel a Chedaol Reng ra Rubak el mo omekrael er kid ra aikal deleuill meng sebeched el sioning ra kot el klou a bekul mel bol meketeket. El ngara a ngklel a Jesus Kristo, amen.