![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fd4%2Fb4%2Fd4b43ae2e79046c85adbba4fa4153a9a9c232b9d%2Fd4b43ae2e79046c85adbba4fa4153a9a9c232b9d.jpeg/full/!250,/0/default)
Hosanna el mora Dita el Ngarbab el Dios
A Jesus Kristo el ngiluu a klou el omengull er a sisebellel el mora Jerusalem me a milkedmokl er seikid el sandei a ocholt a suobel el sebeched el moltirakl er a klengar er kid er chelechal sils.
Mla medung er chelechal sils, kid a obengterir a re Keristiano el liueklii a beluulechad el mo mengull er a Jesus Kristo er chelechal Baskua. Ng kmeed el erul telael rak ra memong el Baskua a mlo uchelel sel mong meng ulebongel sandei er a losiou a Jesus Kristo er a beluulechad. Tia sel kot el mle klou a ultutelel el sandei er a reski er a rechad.
Ng ulemuchel er a olechotel a Jesus Kristo el telbill el Mesiah el mle klou a sisebellel mora Jerusalem e ual blol merkui er a Kerus me a Okiis.1 Ngokiu a chedaol uldasu, e sel tengetengel er a tngakireng a mlo rokira urerel tial beluulechad, e rulii meng sebeched el mo kiei lobengkel a Demad er a Babeluades el mo cherechar.
A chedaol llechukl a ouchais er kid el kmo seikid el sandei a ulemuchel a klou el seked el dilechor er a siseball er a beluu el mo omes er a “Jesus el prophet er a Nazareth er a Galilee.”2 Te “ngilai a llel a lius, e milrael el mo omtech er ngii, e lilangel: Hosanna: Klengeltengat le bora King er a Israel el ngii a mei el ngara ngklel a Rubak.”3
Tiaikid el dilubech el ngara Bibilia er a kmal ngara mong a mekletkak er ak kurreor el chedal a Ikelesia el mora Takoradi, Ghana. Me tia mle Baskua, er ak ngar sei.
Ng mle kirek el mo omii er a Takoradi Ghana Stake e omekdubech er a Mpintsin Ghana Stake. Chelecha el sils, e ngarngii a betok er a dart el telael el chad el chedal a Ikelesia er a Ghana.4 (Kede mengemedaol er a Ga Mantse, His Majesty King Nii Tackie Teiko Tsuru II er a Accra, Ghana, lobengked er chelechal sils.) A ongdibel lobengteir a re Santo, e ak mlo melchesuar er a klou el beltik el reng me a omelktir el mora Rubak. Ak ulechotii a beltkil a renguk el mo er tir me a dirrek el Merredel er a Ikelesia el betik a rengul er tir. Me bo domes er a tekingel a Osobel el blel lechesii a Johanes: “Me bom kaubeltikelreng, el uaingak el mla oubeltik er reng er me er kemiu.”5 Te milsang tiang el “Betik a renguk er kau el ongdibel.”6
Sera kumes el bedul bitang el mora bitang er tirkal rodam me a rodos me a telungelek er tir el ngara ikelesia, e ak milsa er a mederir e medidiich el klaumera er tir er a Jesus Kristo. A kumelchesuar er a rengrir el sorir el ngara ulecherangel el tebedechel a Ikelesia er Ngii el ngar cheroid. E sera bo longitakl a rechad ra chelitakl, e te milngitakl el di ua reanghel.
Ng kmal di ua sel Baskua er a rechuodel, el roltirakl er a Jesus Kristo mle kldibel el ngar omelatk el Kirel el di uai tirkel mlara siseball el mora Jerusalem el mle, beldoid a llel a dui, e millekoi el kmo, “Hosanna …: Ngeltengat ngii el mlei el ngara ngklel a Rubak.”7
Dirrek tirkel chedal a ikelesia el kmeed er tir a mle mengull er a Baskua. Sera kdechor er a medal e mengedecheduch, e a kulemes er a mado el mo rrikl e milsterir el ngara deureng el merael er a rael lomirioi ra chimorir ikal llel a lius, el kmal diua tia el siasing. Ng tekoi el kilsang el dirkak a ta me kubes er ngii—kemam el rokui er seikid el sils el mengull er ngikel King ra re king.
A President Russell M. Nelson a mla mellach er kid el mo nguu a Baskua meng “meral chedaol lokiu omeletked, el diak el dil llel a dui el momiroi el mengull er a sisebellel a Jesus el mora Jerusalem, ng bai okiu a omeletked er a chereuel a Chimal.” A President Nelson a dilli tia el kirel a Isaiah, el millekoi el kirel a yaksok er a Osobel, “Ngak a meral diak bo kubes er kemiuI,“ el okiu a ikal tekoi: “Mesang, a kmla metkau er a cheruel a chimak.”8
A Rubak a ungil medengei el kmo a klengar ra beluulechad a meringel. A telemall er a bedengel a mekletkid el kmo Ngii a “mlengai el meriou er a… rokui”9 me Ngii bol sebechel tukeklid sel bo de charm e bol okesiu el merkid me bo “moutekangel el ngara rael,”10 el Ngii a rolel, el “Dios a mo [obengked] el diak a ulebengelel.”11
A Baskua a diak el dil tara tekoi el mlo er ngii, tara llechukl el ngara reski el llechukl a sils, taem, me a basio. A Jesus Kristo el ngiluu a klou el omengull er a sisebellel el mora Jerusalem me a milkedmokl er sikid el sandei a ocholt a suobel el sebeched el moltirakl er a klengar er kid er chelechal sils.
Me bodomes a bebil er a diak el ngemed el suobel el delibuk er a rokir el Omesiungel el mo merkui er ngii er a Jerusalem.
Kot, ulaoch. Tia kid okesiul, a Old Testament el profet Zechariah a ulemlaoch er a klou el omengull el mora Jesus Kristo er a sisebellel el mora Jerusalem, dirrek el melsaod el kmo ng mo ngara donkey.12 A Jesus a ulemlaoch er a Okisel er sera longedmokl er ngii el mo soiseb er a beluu, el melkoi el kmo:
“Mesang, kid a mora Jerusalem; ea Ngelekel a chad a mo motelechakl el mora ngarbab el priest me a re scribe, me tir a mo dobeklii el mora a kodall.
“E tir a mo nguu el mesterir a re Isentale me bol motuub, e le mechellebed, el kursengii: e a ongedei el klebesei e ngii a mo lmuut el mekiis.”13
Ongerung, sel kldemel a Chedaol Reng A Joseph Smith ulsisechakl, “Ng diak a chad el sebechel medengei el kmo a Jesus a Rubak, eng di ta el Chedaol Reng.”14 A Osobel a mle yaksok er a roltirakl er ngii15 er sel Ulebongel el Belsoil16 er a chelsel a delmerab el mla er bab,17 “Ng diak bechikemiu me lak obengkemiu.”18 Ng diak di bol di tir loba klemerang er a ebangkelio el mong te bai mo obang ra rengrir a sengk er a Chedaol Reng el mo omekrael er tir. “A budech ak beskemiu, budech er ngak ak beskemiu,” Ngii a mle yaksok; “ng diak el beluulechad a meskemiu, ngak a nguu el meskemiu.”19 Me ngokiu a sengk er a Chedaol Reng, e ke doba ngii el osisiu el tekoi; el kid a—mo blechoel loba Reng er ngii el [obengked]”20e “okiu a klisichel a Chedaol Reng e [kid] a momedengei a rokui el tekoi.”21
Ongedei, chad el loltirakl. A chad el meral oltirakl a diak loiit a kirel meruul, oltirakl a llach, me a beltik el reng el mora Dios, el kot el ngarbab ra rokui. Ng diak el mesim. Tirkel betok el chad el mlo kobkelii lolab a dui a mle odersii el Messiah. Tiaikid a meral mle Ngii. Te mle mengai el bedul Ngii, ongasireng er Ngii, me a osisecheklel. Engdi a rengrir el mo er Ngii a dimlak el meketeket. A rebebil el dirk uleldiu el kmo, “Hosanna,”22 a di mle mereched el obult e oldiu “Mkersengii.”23
Ongeuang, sel Tngakireng er a Jesus Kristo.24 Aikel mle ulebongel el sils er Ngii, ruriul er a Baskua, eng mlo kudmeklii sel ongasireng el Tngakireng er Ngii, el mlara ringel er a Gethsemane el mora otuub er a kerrekeriil er Ngii, omekcharm er Ngii er a kerus, me a omelakl er Ngii er a luleng er ngii el debull. Ng dimlak el dil ber tiang el mekerong. Ngokiu sel klisichel ngarbab el ngerchelel el Osobelir a rokui el ngelekel a Chedam er a Babeluades, eng edei el klebesei ruriul eng ulemakes el me tuobed er a olekull, el mla mekiis ra kodall25el di uaikel ble lomlaoch.
Kid kede melemolem el mui er a saul el kirel sel diak a mekesiur el Tngakireng er a Jesus Kristo? Kid kede melchesuar er sel lomiich el klisichel, er chelechang? Tiaikid a uchul ea Jesus Kristo, a ngii a Uchelel e mo Merkui er a Osobeled, a mlora Jerusalem, el mo olsobel er kid el rokui. Aika el tekingel a Alma ng rutechii a rengum: “Alsekum e komla mo melchesuar er a bult reng, komla mo melchesiu er kemiu el somiu el mengitakl er a cheliteklel a beltik el reng er a Osobel, meng soak loker, komo melchesiu re ngii er chelechang?”26 Ng sebechek el meral melekoi el kmo, tirkel chad er a chelitakl er a Takoradi er sel sils ra Baskua a mlengitakl er a “cheliteklel a beltik el reng er a Osobel.”
Sekid el oberaod el sandei er a omesiungel er tial belulechad, ea Jesus Kristo a ulechais ra cheldechedechal a reteruich el klikiid er redil.27 Ng ulsisechakl el kirel a Luut er Ngii el mo er tirkel kldmokl el mo melai er Ngii, el diak el beldoel a llel a lius e bai olab a llomes er a ebangkelio el ngar tir. Ngii a ulesbech a siasing er a olbidel el kmard, el ngarngii a medechel el cheluchul el mo omkard er a ngau, el mesaod el kirel a rengud el soal loltirakl a Teletelel, klemera er Ngii, e omerk er a Llomes er Ngii.
Ko medengelii tial cheldecheduch. Tirka el teruich el klikiid el dil a omtechei er a rechedal a Ikelesia, ea sechal el mo bechiil a omtechei er a Jesus Kristo.
Tirka el teruich el klikiid el redil a ngilai a olbdelir e “mirrael el mo olsiuekl er a mo bechiil”28 A rteim a mle ungil lomdasu, mle kldmokl el ngarngii a cheluchul a olbdelir me a bebil el medechel, ea rteim a dimlak lungil lomdasu, le olbdelir a dimlak a kerdel e diak a chelucherir el mle medechel. Sera lemei a okedong “Mesang, ng merma mo bechiil; morael el mo osiueklii,”29tirkel teim el me “ungil lomdasu a [mla] ngmai a klemerang, e [mla] nguu a Chedaol Reng el mo omerael er tir,”30mle kldmokl el mora “king er tir el oltobed a llach”31me a “klebkellel bol [sebechel] nga er tir.”32 Tirkel bebil er a rteim a mlo meriked losiik a cheluch. Engdi mla mo diak el sebechel. A omerael a mirrael el moruchei el dimlak lobengterir. Sera lolengod ra chesimer lolengit el mo tmuu, ea Rubak a ulenger, “Ng diak ku dengelkemiu.”33
Ngera kede mo melchesiu alsekum meng kmu er kid el kmo, “Ng diak ku dengelkau!”
Kid, el kmal diua tirkal teruich el klikiid el redil, a ngarngii a olbdeled; engdi kid ngarngii a cheluchud? Ak suebek a renguk le te ngarngii a rebebil el kmal di ousbech kung ra telkib el cheluch, te mla morimel ra chelsengul a beluulechad e dikea lungil kldmokl. A cheluch a mei lokiu a oumerang e meruul loltirakl a ulaoch me a tekingir a re kiei el profet, tokuni a President Nelson, re Counselor er ngii, me a re Teruich me a terung el Apostol. A cheluch a mekekii a rengud sel de rengesii e domelchesiu er a Chedaol Reng e ouedikel el kirel sel chedaol el ulekrael. A cheluch a mochubel el mora rengud sel sekum aikel dolilt a chochotii a beltkil a rengud el mora Rubak e soad a ikel Ngii a soal. A cheluch a mei lokiu a ouchel reng e osiik er a omekungil el Tngakireng er a Jesus Kristo.
A lsekum e kosiik a mo melechel a “soam el mo meruul,” tiakid ea ngii: Mokekii a baketengem ra cheluch lolab a ngar el ralm er a Jesus Kristo,34aika omtechei er a klengar er Ngii me a osisecheklel. Sel kuk tara omeruul, e sel dolecha tengtang er a ikel beluu el ngar cheroid el de bla de borngii me a meklou el ongdibel a diak bol cherrengelii a rengum ma lechub e bol mesubed a rengum; ng bai kiei loltirakl a suobel lulsisechakl a Jesus Kristo a sebechel. Ak millekoi ruchei: bo mousbech a ulaoch me a osisechakl lokiu a ulaoch, mouedikel kirel a odbechel a Chedaol Reng, bo mera loltirakl, e mosiik er sel lomekungil el klisichel a Tngakireng er a Rubak. Aikel beldukl el soam el momeruul a mo ngoikau el mo ra kmo ngker el kau a soam el mo er ngii—el lmuut el mora Demam er a Babeluades.
Sel Baskua er a Takoradi e mle tokubets el teletael merngak e le kulebengterir a re blak a rengrir el ongibel er a rodam me a rodos. E uaisei el dirrek er a meklou el beluu me a iuns el liueklii a belulechad. A renguk me a bedengek el di uai kemiu, a oureng loldiu, “Hosanna el mora Dita el Ngarbab el Dios.”35
Me kid a diak de dechor er a siseball el mora Jerusalem er chelechal sils el bldoel a llel a lius, ng di a taem a mei leng, ngara ulaoch er a Ocholt, “el klou el seked, dimlak a chad el sebechel mechur a idisir el rokui, bek el beluu, bek el kebliil, bek el bedengir a rechad ma omelekoi, [e dilechor] er medal a kingall, ma medal a Ngelekel a Sib, el bliull er a becheleleu el bail e olab a llel a dui er a chimorir.”36
Ak meskemiu a klengeltengat el Apostol er a Jesus Kristo el kmo ngmo blak a rengmiu el kiei lokiu a llemalt e mo obengterir kirkel tir, a beldoel a llel a dui, el mo olsisbech er a Ngelekel a Dios, el Ngii a Ngarbab el Osobeled el rokui. Loba ngklel a Jesus Kristo, amen.