![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fc7%2Fb8%2Fc7b8eb2a1ae0a71a20bb12e32c3102ee7200f72a%2Fc7b8eb2a1ae0a71a20bb12e32c3102ee7200f72a.jpeg/full/!250,/0/default)
Osischeklel a Jesus Kristo
Kede olab a chedaol llechukl lomekrael a klengar kid. A klemechek er a chelechal sils a ngellitel el tekingel a Osobel—el kirel aikel Ngii a dilung.
Kede oumera er a Kristo. Sel de chedal a Ikelesia er a Jesus Kristo er a Uriul-klebesei el Santo, e kid a mengull er Ngii e oltirakl a osischeklel el ngara chedaol llechukl.
Uchei er a Rebet, ea Demad er a Babeluades a milngedecheduch er a Adam me a Eva. Uriul, e a Chedam a ulcehotii a Di Chimol Ngelekel, el Jesus Kristo, el Osobel e Osobeled e dilu er kid el mo ‘Rongesii.”1 Ngara tiaikid el tekoi e kede momedengei el uasei a chedaol llechukl el tekingel a “Dios” a lechub a “Rubak” a blechoel tekingel a Jehovah, el mla mekiis el Rubak, el Jesus Kristo.2
Kede olab a chedaol llechukl lomekrael a klengar kid. El uai a profet Nephi el ulsisechakl er kid el kmo, ng kired el , omekeek er kid er a tekingel a Kristo; le momes, a tekingel a Kristo a mo ouchais er kau a rokui el kirem el meruul.3 Oumesingd er a chedaol llechukl el mesaod a urerel a Jesus er a beluulechad a mesaod aikel Ngii a miruul. A klemechek er a chelechal sils a ngellitel el tekingel a Osobel el kirel aikel Ngii a dilung. Aika tekoi llechukl er a Beches el Renged (luldimukl a dechelel a tekingel a Joseph Smith) me a Babier er a Mormon. Oumseingd er a ikang a ngara blechebechel a tekoi el Osobel a millekoi.
“E chelechang, ng uaisei, ak dmu er kemiu el kmo, a chad a lak le mechell er a ralm ma Chedaol Reng e ngidak el sebechel el soiseb er a rengedel a Dios.”4
A Jesus a ulsisechakl el kmo ngeltengat tirkel el mo songerenger e meched a rengrir el kirel a llemalt, le te mo mui er a Chedaol Reng.5
“Te ngeltengat a re meruul a budech: ele Dios a mo omekedong er tir el kmo te ngelekel.”6
“Ko mla remenges a tekoi er a rechuodel el kmo, Lak bol melaok a rengum:
“Eng di ak dmu er kemiu el kmo, Ngike lomes er a redil e nguibes er ngii a mla mor a laokreng er a chelsel a rengul.”7
“Ko mla remenges el kmo, Ko moubeltikereng el mo er a tonari er kau, e ouketui er a cherreuem.
“Eng di ak dmu er kemiu el kmo, Moubeltik el reng ra re cherarou, mo mekngeltengat ra melebiakl er kemiu, moruul a ungil el mo er a rouketui er kemiu, e moluluuch el mo er tirkel mekngit e lousbech er kemiu, e omekcharem er kemiu;
“Me bom ngelekel a Demmiu er a eanged: ele ng meruul er a sils er ngii me ng dmiich el mor a re chad el di osisiu a re mekngit ma re ungil, e oltengel er a chull el mor a remeruul a ungil ma re meruul a mekngit.”8
“A lsekum me kede ousubes a kngterir a rebebil, e a Demad er a Babeluades a dirrek el mo ousubes er kid:
“Eng di a lsekum eng diak mousubes a kngtil a tang, e a Demmiu a diak lousubes a kngtmiu el bla mruul.”9
“Omko kom ngelekel a beluulechad, e a beluulechad a soal kemiu: eng di kemiu el diak mngelekel a beluulechad, le ngak a mla melilt er kemiu, a uchul e a beluulechad ouketui er kemiu.”10
“A leuaisei, e lak mosiik a kloklel a beluulechad e bai kot e moleketek er a rengedele a Dios, e mteketekii a llemalt er ngii, e a rokui el tekoi a di mo klungioliu.”11
“A leuaisei e a rokui el tekoi el soam a chad a loruul el mo er kau e dirrek el moruul el mo er tir: le tiaikid a llach er a reprofet.”12
“Bom kerekikl er a remekngit el profet, el me duum er kemiu loubail a bilel a sib, le tirka tirkel tebelik el lbolb.
“Ko mo medengelterir lokiu omerellir. A chad ng mengudel a techodulik, a lechub a ultelchetoched?
“A le uaisei a bek el ungil kerrekar a meskau a ungil rodech; e a mekngit el kerrekar a meskau a mekngit el rodech.”13
“Ng diak el rokui el mo omekedong el kmo, Rubak, Rubak, a soiseb er a rengedel a babeluades; e ng di tirkel tir a meruul a soal a Chedam el nga er a babeluades.”14
“Mei er ngak, kemiu el rokui el chorma er a beraod, e ak mo meskemiu a ulengull.
“Mnguu a chelngelek, e mosuub er ngak; le ngak a medemdemk e ngariou a renguk: me ko mo metik a ulengull er a rengmiu.
“Le chelngelek a beot, me a berraod el ngar ngak a kebekakl.”15
“A lsekum a ngii di el chad a mo oltirakl er ngak, e bo likrii a klechad er ngii, e le nguu a kerus er ngii, e bo loltirakl er ngak.
“Me chelecha e a chad el nguu a kerus er ngii, a mo diak loruul a ngii di el mekngit, me a ngibesereng er a beluulechad, e mo oltirakl a llechuk.”16
“A leuaisei, bo mikrii a beluulechad, e bom sobel; le ngerang rulii er a chad, a bo lungil besul er a kloklel a beluulechad, e lak bol sobel? A lechub e ngerang sebechel a chad el nguu el techil a klengar ngii?”17
“A lsekum a chad a meruul a soal, eng mo medengelii a osisechakl, el kmo ngara Dios, a lechub eng di tekingek.”18
“Ak dmu er kemiu el kmo, Molengit, me lekong; mosiik, me bo betik; molengod, me lobkais leko er kau.
“Le bek el tirkel lolengit a mo ngmai; e tirkel losiik a mo metik; e ngike el melengod a mo obok el kirel.”19
“Bebil er a cheremek el sib el diak el teloi er kemiu: a dirrek el bo kuldingel er tir, me te mo rongesii a ngerek; me bol cheldull, el chimong a mengkerengir.”20
“A Osobel a dilu er ngii, Ngak a okiis er a kodall, e klengar: ngike el loumera er ngak, eng mlad, e ngii a lemuut el mo ngar:
“E ngike el kiei loumera er ngak a diak bol riid.”21
“[A ngarbab el llach a kmo:] Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.
“Tiaikid a kot el ngarbab el llach e kot el klou a belkul.
“E a ongeru el klou a belkul a di uai ngii, Bo le betik a rengum er a ngar bita er kau el ua le betik a rengum er kau.
“A cherrengelel a llach me a osisechakl er a re profet a ultuil er a ikal eru el llach.”22
“Ngike el olab a llechuk, e oltirakl, a ngii a betik a rengul er ngak: e ngike el betik a rengul er ngak a Demak a mo betik a rengul er ngii, e ngak a mo betik a renguk er ngii, e mo duum er ngii.”23
“A budech ak beskemiu, budech er ngak ak beskemiu: ng diak el beluulechad a meskemiu, ngak a nguu el meskemiu. Bol chelellakl a rengmiu e lak louedikel, me a diak komedakt.”24
“Tiakid a llechuk, Komo kaubeltikerreng, el di uai ngak el betik a renguk er kau.”25
“Mues a chimak me a ochik, el ngara ngak: mretechak, e mesang; le reng a diak a bedengel er a tech me a chiuiis, el uai ngak.”26
“Morael mong, e molisechakl a rokui el beluu, el melcholb er tir el ngara ngklel a Chedam, me a Ngalek, me a Chedaol Reng:
“Molisechakl er tir el mo omtab a rokui el tekoi el blak du er kemiu: e ngak, a, di blechoel lobengkemiu, le mo er a ulebongel er a beluulechad.”27
Uriul er a osisecheklel er sel Chedaol Beluu, ea Jesus Kristo a mlo duum er tirkel mle mekedung el mla er a beluu er a Merikel. Aikakid a bebil er a tekoi el Ngii a dilu er sei:
“Oi, Ngak a Jesus Kristo el Ngelekel a Dios. Ak milebii a eanged me a chutem, me a rokui el tekoi el ngarngii. A kulbengkel a Chedam er a uchelel. Ngak a tang lobengkel a Chedam, me a Chedam obengkek; e okiu ngak e a Chedam a mla mekebkall a ngklel.”28
“Ngak a llomes e klengar er tia el beluulechad. Ngak a Alpha e Omega, luchelel e ulebengelel.
“E chelecha eng mo diak molenget a charm el mei er ngak; oi, a omelenget me a uldersiu a mo diak, leng diak kengei aika el uldersiu.
“Ko mo melenget el mei er ngak loba ngariou el reng me a ouchel reng. Le ngike el mei er ngak loba ngariou me a ouchel el reng, a ngii a mo nguu a techolbechelid er a ngau me a Chedaol Reng. …
“Ng uaisei, le ak mlei er a beluulechad el mo olsobel er ngii, lolsobel er ngii er a klengit.”29
“E dirrek el kdu er kemiu el kmo, bo mouchel a rengmiu, e bo metecholb er a ngklek, e bom uaia ngalek, le lak eng diak msiseb er a rengedel a Dios.”30
“A leuaisei ak mong me kau a mo cherrungel el di uai Ngak, me a lechub e ng Demam el ngara babeluades el ngii a cherrungel.”31
“Chelecha, e ak, kmal subedemiu, bom kerekikl e moluluuch me lak, mrebet er a klengit, el mo oltirakl er a mekngit.”32
“A leuaisei eng kiriu el blechoel el meluluuch el mora Chedam loba ngklek.”33
“A leuaisei, ngii di el ngera el moruul er ngii, e ko moba ngklek; me ko momekedong er a ikelesia el ngara ngklek.”34
“Ak mla meskemiu a ebngkelio er ngak, e tiakid a ebangkelio el blak beskemiu—el kmo ak mlei er a beluulechad el meruul a soal a Demak, le Demak uldureklak.
“Le Demak a uldureklak me bok mad er a kerus; e a uriul er a kmedeel er a kerus, me bol sebechek el ngoiteterir a rokui el mei er ngak … el mo mukerkeriil er a urerir, el kmo te mle ungil a lechub e te mle mekngit.”35
“Chelechang, e tiakid a llach: Mouchel a rengmiu, kemiu el ngara merkelel a beluulechad, e me rengak e bom metecholb lobang ngklek, me bo longikiid er kemiu a Chedaol Reng, me bom klikiid er medak er sel uriul sils.”36
Kede oumerang er a Kristo. Ak mo mengesimer lolab aikel el Ngii a dilung el kirel a klemedngei ma otireklel a Osischeklel:
“A Ongelaod, el ngii a Chedaol Reng, el Chedam a mo odureklii loak a ngklek, a mo olisechakl er kau ra rokui, e omeklatk er a kau ra rokui, er a ikel tekoi el blak dung er kau.”37
A kuuchais a klemerang er a ikal osisechakl loba ngklel a Jesus Kristo, amen.