A Jesus Kristo a Klisichir a Roungalek

Mla er a Elder Dieter F. Uchtdorf

Er a Chelechad er a Teruich me a terung el Apostol

Mngusuterir a rengelekiu el toketekii a klaumerang er tir er a Jesus Kristo, el mo oubeltik el reng er a ebangkelio er Ngii ma Ikelesia er Ngii, el keldmokl el mora llemalt el telbiil er a klengar.

A tara klebesei, ea chedam a merolang el mora miting er a klebisop. A eua a rekil ngelekel redil a mocha dechor er medal, loubail a bilel er a cheliuaiu e beldoel er a Cheldecheduch er a Babier ra Mormon.

“Ngera uchul me ke mora miting?” ngii a uleker.

“Ele ngak a counselor er a klebisop,” a chedam a ulenger.

“Eng di kau a demak!” a ngelekel a millekoi.

Ngkal chedam a mocha outubaruach er medal. “Rungalek” ngii a millekoi, “Ak medengei el soam a bo kunguiu el mo er kau me bol sebechem el mo mechiuaiu, eng di chelechal kesus eng kirek el mo olngeseu er a bisop.”

A ngelekel a ulenger, “Ngkal bisop ng diak a demal el sebechel ngoseuir el mo mechiuaiu?”

Aki meral mereng a sulir tirkel betok el rechedal a ikelesia el blak a rengrir el mesiou er a Ikelesia er a Jesus Kristo er a bek el sils. A uldersem a meral chedaol.

El di ua ngkal ngalek el sebechel mtebengii, eng dirrek el ngarngii a osisiu e chedaol—el diak a mtechir—a sel roungalek a omekeroul er a ngalek. Tiang a di osisiu mesel meruul er a babeluades .¹ A Demad er a Babeluades, el Chedaol Demad, a mera loldeu ra rengul sel Rengelekel a mosisechakl e mukeroul er a roungalek er tial beluulechad²

Roungalek, ko mesulang er a rokui el moruul el lomekeroul er a rengelekiu. Kemiu a rengalk, ko mesulang er a ikel moruul el mo er a rechad er a blimiu, leng uaisei el bek loungalek a medengei, kede suub a betok er a rengeleked el kirel a klaumerang me a urunguled, me a bliochel beltikereng er a ikel tir a suub er kid!³

A Roungalek a Ngarngii a Chedaol Ngerchelir

Ngarngii a tal momtab el kirel sel klou el ringel el Demad er a Babeluades a mo chemau ngii sel bek el taem el Ngii a odureklii a ngalek el mei er a beluulechad? Tirka a Rengelekel el sechal ma redil er a Reng. Ng diak el telkael a klisichir. Ng sebecheir el mo ungil chad er a ungil omeruul, krasia, ma klemerang. Me te merma er a beluulechad el diak el sebechir mekerang, te bai di lemangel sel lousbech a ngeseu. A uriul er a cherellir eng diak lodengei el kmo te mlara babeluades lobengkel a Dios, luldimukl er a klemedengei el kmo te techang e mo ua ngera el chad. Ng morngii a klemedengei er tir ra klengar, beltik el reng, Dios, ma Moktek lultuil ra ikel ues er a rechad el meliuekl er tir—tokuni a rechad er a blirir, el tir, a mera er ngii, a dirrek el mesuub el kirel a tekoi loruul.

A Dios a mla mesterir a roungalek a “chedaol ngerachel el mo omekeroul er a rengelekir loba beltik el reng ma llemalt, e mesterir a ikel lousbech el kirel a klechad ma chedaol tekoi, e mo osisechekelterir el mo … oltirakl a llechul a Dios.”⁴

Tiang a medeel lobteterir tirkel dirrek el ungil loungalek me tedi mekar el diak el sebechir mo mechiuaiu.

A klemechek el mora roungalek a tiakid:

A Rubak a betik a rengul er kemiu!

Ngii a obengkemiu.

Ngii a olngeseu er kemiu.

Ngii a klisichiu lomekrael er a rengelekiu el mo melilt er a melemalt el tekoi.

Mkengei er tial techall ma ngerachel loba klisiich ma deurreng. Lak moba tial luchul a klengeltengat er a babeluades el mora ngodech el chad. Ngokiu a urerel a teletelel a ebangkelio ma osisechakl, eng ngerchelem el mo omekrael er a ngelekem er a chelsel a klengar er ngii. Mngusuterir a rengelkiu el toketekii a klaumera er tir er a Jesus Kristo, el mo oubeltik el reng er a ebangkelio er Ngii ma Ikelesia er Ngii, el keldmokl el mora llemalt el telbiil er a klengar. Ng uasiei, tiang sel moktek er a Dios el mora roungalek.

A Diablong a mo omtok er kemiu, mengesang er kemiu, e mo mengitechut a rengmiu.

Eng di a rebek el ngalek a mla nguu a Llemesel a Kristo sel ngii a omak er tir el mora babeluades. Ea Osobel a mo ngosukemiu, omekrael er kemiu, e melisiich a rengmiu. Bo mosiik a Ngelsuil. Bo moker er a Rubak!

El di uai a Jesus Kristo el klisichir a rengeasek, a Jesus Kristo a dirrek el klisichir a roungalek.

Ngii a Melisiich a Beltik el reng

A le bebil er a taem e kede omdasu a lsekum a tara chad locha bai ungil mo omekrael e olisechakl er a rengeleked. Meng diak el iior sel momelchesiu el kmo ng diak el sebechemiu a ikal tekoi, eng di kemiu a ngarngii a omeduch er ngii: sel beltkil a rengum el mora ngelekem.

A beltkil a rengul a oungalek el mora ngalek a kot el mesisiich el tekoi er tial beluulechad. Ng tara ikel mekesai el tekoi er tial beluulechad el ngii a sebechel ngarngii el mo cherechar.

Chelechang, ke locha omdasu el kmo a deleuill er kemiu ma ngelekiu a diak el sal lungil a teletelel. Tiakid e sel klisichel a Osobel a me soiseb. Ngii a omekungil er a smecher, e Ngii a sebechel lomekungil a deleuill. Ngii a riruul a blauang ma ngikel el mo betok, e Ngii a sebechel rullii a beltik el reng ma deurreng el mo klou er a chelsel a delengchekliu.

A beltkil a rengmiu el mora rengelekiu a rullii a ungil basio ra osisecheklel a klemerang ma teketekel a klaumerang. Mrellii a blimiu el blai er a nglunguuch, omesuub, ma klaumerang; blai er a deurreng, basio el borngii; e blil a Dios.⁵ E “moluluuch el mo er a Edam lolab a rokui el klisichel a rengum, me [kau] bo mui er a beltik el reng er [Ngii], el bla le [besterir] a … loltirakl er a Ngelekel, Jesus Kristo.”⁶

Ngii a Melisiich a Mekerei e Beot el Omeruul

A tara klisiich el omobang el, roungalek, a sel techall er a bek el sils, el ngarngii a omrellii. Resechelei, resensei, ma rechad ra media a mei e mo diak. Eng di kemiu a tirkel mo blechoel el ngara chelsel, el klisichel a klengar er a rengelekiu.

A ureriu a locha kora di mekekerei a belkul sel mongaisisiu el morsel klou el ngor el rengelekiu a orrenges er tial beluulechad. Ngarngii a taem e komo melchesuar el diak a kmal ngerang el bla mketmeklii. Eng di bo motebengeii el kmo “a mekekerei el tekoi er a Rubak, a klou a rellii el me er kid.”⁷ Chimol temel a telungalek, chimol cheldecheduch er a ebangkelio, a lechub a chimo el okesiu a diak el ngedechii a klengar er a ngelekiu el di mereched, el uai a ngerngir el diak a rellii ra dellomel mel mereched el mo klou. Eng di sel di mekekokil e melemolem el meruul a mekekerei e beot el tekoi, er a bek el sils, a ngosuterir a rengelekiu el bai kmal mo ungil ra bai ikel meklou el omeruul el dersta el ngarngii.⁸

Tiaikid sel rolel a osisecheklel a Rubak. Ngii a mengedecheduch el mo er kemiu ma rengelekiu loba chelelakl, e kekerei el ngor, e diak el ngerel a derumk.⁹ Ngii ulmekungil ra Naaman el dimlak lokiu a “meringel el tekoi” ngbai okiu a beot, e lomelekl el teletelel a omelcholb.¹⁰ A rengelekel a Israel a uldeu a rengrir el mengang a quail er a le ngara orreomel, eng di sel luchul e te mlo suobel sel kekerei e beot el ongasireng ra blauang—el kelir er a bek el sils.¹¹

Rodam ma rodos, a blauang el uai ea losisechakl er a bek el sils a kmal lungil sel meruul el mekang ra blai. A klaumerang ma olechotel a klaumerang a ungil meruul er sel ngii a teletelel, e mekekokil a blekeklel, el oba kekerei e beot a temel, er a bek el sils.¹²

A bek taem a temel a olisechakl. A bek lomelkingiu me a omerelliu a sebechel mo ulekrael el kirel aikel molilt.¹³

Ng locha diak eldil mereched el mes a ikel mo dubech el lokiu a ureriu. Lak ko mkimer. A Rubak a dilu el kmo a rokui el tekoi a mor sel moterekokl el temel. Melak bo el mesaul a rengmiu er a ungil omerelliu, e le kau a bai omuchel er a dodai er a tial klou el lureor.¹⁴ Ngera el ureor a bai klou a belkul er sel bai molngeseu er a re mekreos el ngelekel a Dios el mesuub el mo medengei el kmo tir te ua techang e meleketek a klaumerang er tir er a Jesus Kristo, ma ebangkelio er Ngii, ma Ikelesia er Ngii? A Jesus Kristo a mo omekngeltengat e melisiich a ureriu.

Ngii a Oldars a Ocholt

A tara mesisiich el teletael el Rubak a olngeseu er a roungalek a okiu a sengk er a chedaol locholt. A Dios a semeriar el mo mesterir a Chedaol Reng er Ngii el mo omekrael er a roungalek.

Me sel mngara nglunguuch e omelchesiu er a Chedaol Reng, e Ngii a mo mengelechel er kemiu er a ikel berrotel el kengaol tekoi .¹⁵ Ngii a mo ouchais a ikel sengk, klisiich, ma ikel le simbai el tekoi el kirir a rengelekiu.¹⁶ A Dios a mo ngosukemiu el mesterir a rengelekiu el uai Ngii a lesterir—el diak eldil lomes er a ikrir e bai omes er a chelsel a rengrir.¹⁷

Omoba ngesuil a Dios, eng sebechemiu el mesuub el mo medengelterir a rengelekiu loba klikiid el teletelel a babeluades. Ak kulengit me mkengei er sel ongtil a Dios el mo omekrael er a telungalek er kemiu loba chedaol locholt. Mosiik a ulekrael er Ngii er a nglunguchiu.¹⁸

Mesisiich el Bult

A locha tara kot el klou a ultutelel el ngeseu el Jesus Kristo a odersii el mora roungalek a sel “klou el bult” er a chelsel a el rengmiu.¹⁹ Ngii a ongasireng el kid el rokui a ousbech er ngii.

Kam momdasu er tial omeruul: Kom ngara ikelesia, e orrenges a cheldecheduch el kirel a retelungalek. Ngkal mengedecheduch a mesaod er a cherrungel delengchokl luldimukl er a cherrungel el telungalek. A obekl a diak el kauteketok. A rengalek a mo merek el menguiu a chedaol llechukl sel bocha el temir elmo meruul a urerir er a skuul. Ea chelitakl el “Moubeltik el Reng el Mora Tang” ²⁰ a merael. Ea uchei er ngkal mengedecheduch a bor sel telengtengil el kirir a rokui el chad el lungil a rengrir e dmak el mo melatech er a olchelubel, e ke omdesuang el kmo, “A telungalek er ngak a diak a urungulir.”

Rodam me a rodos, bom chelelakl! A rokui el chad el ngar tial seked a omdasu er a osisiu el tekoi! Ng klemerang, el rokui el roungalek a simbai el kirel a ikel ngii a diak lungil er ngii.

Ng klengeltengat, leng ngarngii a chedaol ngeseu el mora roungalek: El ngii a Jesus Kristo. Ngii a uchul a mesisiich el bultel er a rengud.

Me sel bo molekeed el mora Osobel ma Osisecheklel, e Ngii a mo ocholt a ikel chelitechetemiu. Sel multuil er a Jesus Kristo loba ngariou el reng, e Ngii a remuul a chelitechetum el mo klisichem.²¹ Ngii a Dios er a ongasireng.

Me tiang belkul a kemiu ma telungalek er kemiu a ungil el diak a klechitechetemiu? Ng diak. Engdi ko merael el mo ungil. Ngokiu a krasia er a Osobel, el mekekokil, e kemiu a mo remuul a lmuut el teletael el roungalek a ousbech: el beltik el reng el mora Dios me a Rengelekel, kllouerreng, bekerurau, delemedemek, e bekeu el mo meruul a melemalt el tekoi.

Jesus Kristo Oldars a Ngeseu lokiu a Ikelesia er Ngii

A ureor el mo meleketek a klaumerang el ngara Jesus Kristo a sel osisechakl er a blai, el kirel a dersta el chad. El lokiu a ngesou er a Ikelesia. Nguldekial a chedaol llechukl ma tekingir a re profet, ea Ikelesia er a Osobel a ngarngii a betok el klekedall el mo olngeseu er a roungalek ma rengalek el melilt el mo meruul a llemalt.

• Kirel klisichir a Rengeasek:Ngesou el Kirel Omelilt a diak el beskau a beldukl el moruul me a diak ke moruul. Ng olisechakl a diak a ulebengelel klemerang el lolngeseu a molilt el lultuil er a klengar me a osischeklel a Jesus Kristo. Monguiu er ngii lobengterir a rengelekiu. Bechiteterir mel losaod el kirel. Mngesuterir el ngmai aikal diak a ulebengelel e chedaol klemerang el mo omekrael aikel lolilt el meruul.²²

• Ongdibel er a FSY a dirrek el tara ungil klekedall. A kureng ma rokui el ngeasek a mo er ngii. Ak siotai er kemiu el ngeasek el mesobil meklou el chad me bora ikal ongdibel el sensei ma re counselor. Ak siotai er a roungalek mel teketekii sel chedaol klisiich el ngeasek rengelekir a nguu mera blirir el mlara ongdibel er a FSY.

• A rengalek ma rengeasek er a Ikelesia er a Jesus Kristo er a Uriul-klebesei el Santo a ngarngii a resensei , rolngeseu, er tir ma remerredelir. Ng blechoel el bom soiseb er a chelsel a klengar er tirkal ngeasek el ngii sel kmal klou a ultutelel taem el tir a meleketek e melisiich a klaumerang ma olechotel a klaumerang er tir. A bebil er kemiu a mesobil meklou el chad. Ea rebebil a dirrekak el bo loungalek. A ikal ungil lomesiungiu el mora rengelekel a Dios a chedaol ra osengel a Dios.²²

Lak Mkimer er a Ongasireng

Resechelik, rodam ma rodos er ngak, a teketekel a klaumerang er a ngalek a di uai sel dolngeseu lomekeroul a bung. Ng diak el sebechemiu el mengurs er a chelchedal me bol kemanget. Ng diak el sebechemiu el mekengii sel tiul me bol mereched el lomung. E diak el sebechemiu el di mecherei tial bung mel dil ngii e mongerchir er ngii el merael mo klou ma lechub el mellekulek.

Sel sebechiu el meruul el kirir tirkal telecheroll el merael mo meklou el chad a bai besterir a ungil chedaol basio, el lousbech ra ulekurulir el sebecherir el ngmai a ngeseu er a babeluades. Mchoroid a ikel mekngit el teletael el sebechel tomer a dichel babeluades. Mruul a ikel kot el lungil lomeruul el kirel a ungil ulekeroul. E bol meklou a rengmiu el mechetiterir tirkal telecheroll el merael mo meklou el chad me bo loruul a ulekrael el omelilt, e becherei a Dios me loruul a ikel longasireng el Lurellel. E sel modubech ruriul a meral mo klebokel e kmal kot lungil e mui er a deurreng ra bai ngidil ngerang el di mle kau el meruul.

Sel moktek er a Chedam er a Babeluades, a deleuill er a telungalek a kirel ngarngii el diak a ulebengelel. Tiakid a uchul, e sel doungalek, eng diak el kiriu el kimer, a lsekum eng diak el lungil a rengum el kirel a ikal mla meruul ra mla memong.

Lobengkel a Jesus Kristo, el Mastang ra Omekungil e Osobel, eng sebechel mo blechoel ngarngi a beches el luchelel; e Ngii a blechoel meskid a urungulel.

A Jesus Kristo a klisichir a retelungalek.

A Jesus Kristo a klisichir a rengeasek.

A Jesus Kristo a klisichir a roungalek.

Aikang a kuuchais el loba ngklel a Jesus Kristo, amen.

Uleklatk

1. “Meng ngarsel chelsel a bek el roungalek el ngarngii a rengrir el mo olisechakl er a rengelekir el kirel a teletelel a kldung. Tiang a telengtengil el longasireng er a moktek er a Chedam er a Babeluades. Ng soal a Rengelekel el mei er a beluulechad, el loltirakl er sel diak a ulebengelel el teletelel a telungalek el ngarngii er a babeluades. A telungalek a sel dai er a diak a ulebengelel beluulechad, me Ngii a soal tir a le dirrek el bol dai er a beluulechad. Meng locha telungalek er a beluulechad a diak el cherrungel, e te mengemedaol er a rengelekel a Dios el mera beluulechad el di oba tal beltik el reng el ngii a telkib el kmeed el uaisel dulmelchesiu er ngii er a babeluades—sel beltik el reng ra roungalek. A retelungalek a tara kot el ungil teletael el mo meruul e oleiuid a teletael ra kldung ma klemerang el olisechakl el ngii a mekrolid el lmuut el mora rengedel a Dios” (Henry B. Eyring, “Gathering the Family of God,” Liahona, May 2017, 20).

2. Ng uaisei, e kede medengei el kmo a moktek er a Dios a diak el blechoel el mekedmokl “er a beluulechad, el uai a le mekedmokl er a babeluades” (Mateus 6:10). A roungalek er tial klengar a diak el osisiu me sel uldesuel a Dios el kirel a roungalek. Ngii a ungil mesa el uaisei. Ng locha lemangel el kirel a ikel klengit el reng el ngara chelsel a deleuill er a telungalek. Eng di, Ngii a diak el kimer er a telungalek. E Ngii a diak el kengei, le Dios a kiltmeklii a klebkall el luldasu el mora diak e ulebengelel el klengar el mora Rengelekel. Esel ngarsel rengul seikid el luldasu a telungalk.

3. MesaMateus 18:1–5; Mosiah 3:19.

4. The Family: A Proclamation to the Worldmesa el dirrekDoctrine and Covenants 68:25–28

5. Mesa “Learning at Home Is Founded on Relationships,” Teaching in the Savior’s Way: For All Who Teach in the Home and in the Church (2022), 30–31; mesa el dirrek Doctrine and Covenants 109:8.

6. Moroni 7:48

7. 1 Nephi 16:29; mesa el dirrek Alma 37:6–7.

8. Mesa “Learning at Home Consists of Small, Simple, Consistent Efforts,” Teaching in the Savior’s Way, 31. President David O. McKay a ulsisechakl: “Lak domedasu el kmo, a bebil er a [tekoi] … a locha mekekerei e diak a belkul, meng [diak] el meklou a ultutelel. A klengar, a, meruul er a mekerei el tekoi. A klengar er kid, klechad er kid, a meral, meruul er a mekekerei el melkedukm el rengud. Obecherei tial kekerei el melkedukm el ulud el mo diak el lolkedukm, ea klengar er tial beluulechad a mo diak. A sils a ngii a klou a klisichel er tial beluulechad, engdi kede ngmai a klengeltengat er a [ikel] didichel eleng merkid el mekerei el diich, el, ngii a mo dmak el mo klou, e tmichii tial rokir el beluulechad loba dichel a sils. A ilekolk el klebesei a meruul er a mekerei el dichel a btuch; ea mera el klemerang el klengar er a Kristiano a meruul raikel mekerei el teletael el uai teletelel a Kristo er a chelsel tial sikang, tial bung, el ngara blai” (Teachings of Presidents of the Church: David O. McKay [2003], 219).

9. Mesa Helaman 5:30.

10. Mesa 2 Kings 5:9–14.

11. Mesa Exodus 16.

12. Mesa “Preparing Your Children for a Lifetime on God’s Covenant Path,” Come, Follow Me—For Individuals and Families: Beches el Renged 2023, appendix (digital only).

13. Mesa “Learning at Home Can Be Planned but Also Spontaneous,” Teaching in the Savior’s Way, 31; 1 Petrus 3:15.

14. Doctrine and Covenants 64:32–33.

15. Mesa Mateus 2:13.

16. Mesa Alma 40:1; 41:1; 42:1.

17. Mesa 1 Samuel 16:7.

18. Mesa 1 Nephi 15:8.

19. Alma 5:13.

20. “Love One Another,” Chelitakl, no. 308.

21. Mesa Ether 12:27.

22. “Mesel kirir a rengalek, ea ngerachel er a omsterir a ulekrael a ngara roungalek. Te medengei a teletelir, klemedengei, ma llemesir a dersta el ngalek. A roungalek a chemoit a temir el mo meruul e melemolem lungil kadecheduch lobengterir a rengelekir. Tir a ngarsel lungil deruchall el mo meruul a meklou a belkul luldasu ra keldung el kirel omengedmeklir ma ulekurulir a rengelekir” (James E. Faust, “The Weightier Matters of the Law: Judgment, Mercy, and Faith,” Ensign, Nov. 1997, 54).

23. Teblong er a klekedall el kmal lungil douchais el kirel: Sel digitial version er tial rak er a Mei, Moltirakl er Ngaka klekedall el dirrek luldimukl er sel beches el bliongel el dai er ngii a “Preparing Your Children for a Lifetime on God’s Covenant Path.” Ng ocholt a beot, el uldasu er a omesuub el ngara blai el mo olngeseu er a rengalek el mengedmokel er tir kirel a techolbechelid ma bebil er a telbiil ma chedaol ruoll. Me sel beches el Teaching in the Savior’s Waya ngarngii a bliongel el dai er ngii a “Home and Family” el ouchais el kmo ng mekerang ea olisechakl el uai ea osisecheklel a Kristo a sebeched el meruul er a blid (mesa pages 30–31).