14:20

Sel kot el Ungil el Cheldechedechal a Baskua el mla Medung

Mla er a Elder Gary E. Stevenson

Er a Chelechad er a Teruich me a terung el Apostol

Momes e ra Babier ra Mormon lokiu ra beches el llomes e momtab a ikel tmolech el lolechotel el louchais el kirel sel meral lokisel a Kristo.

Babier er a Baskua el mlara Kot el Presidency

Kom locha rirengesii a babilengir a rengara Kot el Presidency el milechuiu er a ikelesia er kemiu ra bebil re sandei ra memong. Seikid el babier a uluuchais el kmo a merael mei el Sandei—Baskua el Sandei—ea rokui el rechelel a ikelesia a di mo ngara ongdibel er a chedaol belsoil e merkong, me bol ngarngii a sesel taem el bo dengara omengull er a rekeblid el telungalek el mo odersii tial klou a ultutelel el chedaol sils.¹

Tial babier er a Kot el Presidency a kmal kbiltebengii, meng rirellak el momes aikel kemam el telungalek a outkeu sel le Baskua er a ikal morko el rak. Sel tal bo kumtab a ikal kim mulruul loutkeu, e ak mo melbedebek el kmo kemam a dimlak ki modengei e ngosengesii sel meral belkul tial chedaol sils, e tia sel kmal ngara rengrir a rokui loumerang er a Jesus Kristo.

Siukang er a Kurismas me a Baskua

Aikal uldasu a milkrolak el mo omtab er a klekakerous er a kim outkeu er a Kurismas e mengaisisiu er a Baskua. Sel December, e ng uaia ki moldak a somam el meruul el reua “Jingle Bells,” stocking er a Kurismas, me a beresent lobengkel a bebil, er a lmuut el dmolech el siukang—el ua omekerreu ra re ngesool, mengitakl a somam el chelitakl er a Kurismas me a ikelesia, me a dirrek el obangel a chedaol llechukl e menguiu er a cheldecheduch er a Kurismas el ngara Luke 2. A bek el rak el kimonguiu er tial soad el cheldecheduch el ngara klou e chuodel el Bibilia, ea telungalek er kemam a locha di ua telungalek er kemiu el—omail a btelmam ma cholengchelam er a taor e milemam er a bail ra omelechong e leko ki Josef, Maria, me a tirkel betok el mlei el mengull er a tolechoi el Jesus, a ki meruul aikal luruul lokiu sel mekreos el cheldechedechal a cherellel a Osobel.

Aikel siukang er kemam loutkeu er a temel a Baskua, a, telkib el mla mengodech. A kumdasu ea telungalek er ngak a mle klou el ultuil er a “mora ikelesia” er seikid el tokubets el Sandei el mo melai er sel klou a belkul, el kot-a Kristo el tebedechel a Baskua; e okor a kemam el telungalek, a mo kldibel el mo dmak el meruul a ikel bebil er a kuk siukang er kemam el kirel a Baskua. Ng kmal mle soak lomes er a rengelekam e chelechang e te kuk rengelekir el osiik a ngais er a Baskua e oltuu chimorir er a chelsel a sualir er a Baskua.

Engdi tial babilengir a rengara Kot el Presidency a milkereklid. Ng dimlak el di lolengit er kid el mo rulii tial kot el ngarbab a ultutelel tekoi el milkedmokl er tial beluulechad—el Tngakireng me a Okisel a Jesus Kristo—a mo uldimukl er ngii a omengull me a omelengmes el Rubak a kirel ngmai, te dirrek el mileskid a klou el taem lobengkel a telungalek er kid me a resechelid er a Sandei el Baskua el mo meruul er ngii.

Aikakid el tekingel a Profet Joseph Smith a lmuut el dochel a bebil el morsel klou el tekoi el kirel a Baskua: “Aikel ngarbab el osisecheklel a klechelid er kid me a klaumerang er a re Apostol me a re Profet, el kirel a Jesus Kristo, el kmo Ngii a mlad, e mildakl, e liluut el mekiis er a ongedei el klebesei, e mlengai el mora babeluades; me a rokui telengtengil tiang el ngii a kirel a klechelid er kid a rokui el lobengkel.”²

A Lesa me a ngak a mla kadecheduch el kirel a bebil ra rael el telungalek er kemam a sebecham el remuul el moungil er sel sils ra Baskua. Alta ea ker el bla doker rengii e ra delongeled a tekoi el de rokui el mo omdasu el kirel: Ng mekera a bo lokesiu a ikel losisecheklel ma deurreng er a Okisel a Jesus Kristo, cheldechedechal a Baskua loba tabesul, cherrungel, ma dmolech el siukang er a klechelid el kirel a cherellel a Jesus Kristo, sel cheldecheduch er a Kurismas?

Kid er rokui a uai a di dolasem. A kumes er a merael mo klou el blak el reng er a re Uriul-klebesei el Santo el nguu a Kristo-el mo kot ruchei sel Baskua. Tiang a uldimukl er ngii a mo ungil lomdasu e mesa sel Llel a Lius er a Baskua me a Ungil Ongeim Lureor el loruul a rebebil er kid ra re Keristiano. Ng dirrek el locha sebeched el ngmai a ikel tabesul siukang me a omeruul el nguu a Kristo-el mo kot sel Baskua el debetik ra siukang me a loruul er a beluu er a beluulechad.

A ngarbab el chad er a omesubel a Beches el Renged el N. T. Wright a melekoi: “Ng kired el omakes el mo outkeu er a Baskua lokiu a beches el teletael el mengedechuul: lokiu a art, literature; klokolir a rengalek, poetry, chelitakl, ngloik, ungil klebesei, kambalang, tokubets el ongdibel ra chelitakl. … Tiaikid sel kot el klou lungil klebesei er kid. Ka mnguu a Kurismas el oridii, e sel de nguu er a tekoi er a Bibilia e kede mla chemoit a eru el bliongel el ngara uchelel a Mateus me a Lukas, e diak a ngodech. Ke oridii a Baskua, eng diak ke mobang a Beches el Renged; kuriid e ra kle Keristino.”³

Baskua, Bibilia, me a Babier er a Mormon

Kid a soad a Bibilia ma ikel rokui el lolisechakl er kid el kirel a cherellel, omesiungel, Kodellel ra Kerus, me a Okisel a Jesus Kristo. Ng diak a kldei el tekoi el msa urungulir me a omeridm a rokui el chad lokiiu a ikal tekoi el tilobed er a ngerel a anghel ra babeluades sera tutau er a Baskua er a Garden Tomb: “Ng mla mekiis.”⁴ Ke doba tmolch lomereng el saul el kirel a Beches el Renged el lulebang a cheldecheduch er a Baskua me a omesiungel er a beluulechad a Osobel er a Iudea me a Galilee.

A Lesa me a ngak a millemolem lomdasu a rolel e a ki kilungii a deurreng er a Baskua el mo chemau-a Osobel, a ki milsaod el kmong ngera el omengiuel a chedaol llechukl a ki bo modars el mora telungalek er kemam—di uai sel ngara Lukas 2 el di mo osisiu el mora Baskua.

Meng uaisei aki silubii a subelam el mlara babeluades: Ng mo uldak a ikal meklou a ultutelel bades el kirel a Baskua me a Beches el Renged, e kid el Uriul-klebesei el Santo a mla nguu a chedaol e ngarbab el sengk er a Baskua! Ng sengk er a diak a uai ngii el bedengel a sioning, el ngii a tara olechotel a ongasireng er a Baskua el ngarngii ra chelsel alta sel kot el klou a ultutelel el chedaol llechukl el kirel a Baskua er a chelsel a rokui el bedengel a Klechelid. Ngak a mesaod el kirel a Babieir er a Mormon, tokuni, morsel cheldechedechal a Jesus Kristo el mlo duum er a re kiliei er a Beches el Beluulechad, el Ngii a mla mekiis el oba klebkall.

A Profet Joseph Smith a milsaod er a Babier er a Mormon el “kot el melemalt er a rokui el babier,”⁵ e lomuchel er a 3 Nephi 11, eng ouchais er a klebokel el cheldechedechal a mla mekiis el Kristo el mlo oldingel er a rechedal a Nephi, ea Osobel a mesiou e ra Baskua. Aikel chedaol llechukl er a Baskua, a di lungil, a olecholt er a rekord er a mla Mekiis el Rubak el Jesus Kristo.

Ngara ikal bliongel, ea Kristo a ulemekedong er a re Teruich me a terung el Apostol, e ulsisechakl er a rekldibel a oumesind er a ikel mlara Osisechakl el ngara Bukl, e uluuchais el kmo Ngii a mla urrengelii a llechul a Moses, e ulemlaoch el kirel a omengideb er a uriul-klebesei er a Iserael. Ngomekungil er a rsmecher e meluluuch el kirir a rokui el chad el meral mle klebokel meng “diak a ngor el sebechel dmung, malechub el meluches er a chad, malechub el sebechel a rengrir a rechad lotekau a ngarbab e klebokel el tekoi er sera kim ues e ki morrenges er a Jesus el melekoi; e diak a chad el sebechel melchesuar sel deureng el milekeek a rengmam er sera taem el loluluuch el kiram el mora Chedam.”⁶

Jesus Kristo el mocha duum er a rechedal a Nephi

Tia el Baskua, ea telungalek er kemam a mo omes a ikel kot el 17 el bades er a 3 Nephi 11el kemiu a medengei. Ke lotkii seral betok el chad a iliuekl er a templo er a beluu er a Bountiful el rirengesii a ngerel a Dios el Chedam e milsa Jesus el miltengel er a babeluades el mlo odersii sel kot el klebokel el ongit el kirel a Baskua:

“Bekiis e morael el me er ngak, … me bo mrutech a ultil a deel er a chimak me a ochik, me bo modengei el kmo ngak ea Ngii … el Dios er tial rokir el beluulechad, el mlora kodall el kirel a kngtil a beluulechad.

“Me a… rokui el chad a milrael el mong, … louderta er tir … e miles er a mederir e omelechesiu er a chimorir, … e mlora rekord, el kmong meral ngii, …

“Me… te lilangel el mle ta ngerir, el melekoi el kmo:

“Hosanna! Klengeltengat el mo er a ngklel ngike el Kot el Ngarbab el Dios! Me te mlo terrob er medal a Jesus, e mlo oldanges er ngii.”⁷

Ka momdasu: el Nephites a ngara templo el merutech er a chimal a mla mekiis er Rubak! Aki somam el melai aikal bliongel er a 3 Nephi el mo tebedechel a siukang er kemam er a Baskua el uai a Lukas 2 el kuk siukang er a Kurismas er kemam. Ea mera re ngii, ea Babier er a Mormon a olecholt er a kot el ngarbab el cheldecheduch er a Baskua el ngii a mla medung. Mei e lak de becherei me lungil el cheldecheduch er a Baskua el dirkak a tang mel morenges.

Ak olengit er kemiu el mo omes er a Babier er a Mormon lokiu a beches el llomes e momes er sel dmolech el sioning lolecholt er a meral mla mekiis el Kristo me a dirrek el ngarbab e dmolech el osisechekelel a Kristo.

A Babier er a Mormon a Dirrek el Ouchais el Kirel a Jesus Kristo

Kede locha mo oker, Ng mekera omengiued er a bades ra Babier er a Mormon el kirel a Baskua a le beskid a klengeltengat ma rebetik er a rengud el ngii a mo klou a ultutelel merkid? Ng betok er a imong a mo mesang. Ngidil taem el donguiu e dosuub er a Babier er a Mormon, eng sebeched el mengerchir a klungiaol el mei.

Lesa me a ngak, a dirk ke mlara kemeldillel a sechelimam, el redil er a klaumerang el klengar er ngii a mle di mereched el meterob leng secher a uchul. A ki mlo kldibel lobengterir a telungalek er ngii me a rekmeed el sechelil, e mle kaiueiuid a ungil lomerellel ngikal klebokel el dil el mle smisiich a klengar er kemam.

Sera kim dechor e ra teklib el cheroid er a kahol el mengedecheduch er a rebebil, e ak milsterir a rteru el rekrir a ngara-Primary el redil el mirael mora kahol e mlo melebitutk—a mederir a di kirel a bebul—el mo melmesumech er a betik ra rengrir el anti er tir. Ng dimlak a chad el kmeed, me a Lesa milrael mong e mlo reborb er bita er tir el mo mengelaod e olisechakl er tir. Nguleker el kmo te uangerang e tir te medenge el kmo a anti er tir ngar ker er chelechang. Te uluuchais a kngtil a rengrir, engdi tirka el mekreos el ngelekel a Dios, e mle meklou a rengrir el deues er a mederir, a dilu el kmo te medengei el kmo a anti er tir a ungil a rengul er chelechang, e locha obengkel a Jesus.

Ng rekrir le temekekerei, engdi te metik er a budech er tial klou el uldasu er a deurreng meng, ngara teletelir a rengalek, e te ouchais el kirel tial dmolech el meral tekoi e beot e klebokel Okisel a Osobel. Te mle medengelii er a chelsel a rengrir e le ungil luldasu el kirel a osisecheklir el mlara roungalek er tir, telungalek, me a roungerachel er a Primary el melalem ra tane er a klaumerang er a Jesus Kristo me a diak a ulebengelel klengar. A llemesir a uldingerongel er a rekrir, el tirka el ngalek el redil a mle medengei a klemerang el mei er kid lokiu a klumech er a Baskua me a osisecheklel a mla mekiis el Osobel me a tekingir a re profet el mla medung er a chelsel a Babier er a Mormon.

Ak mla omes sel sekum a President Russell M. Nelson a odersii a Babier er a Mormon el mora tara chad el diak loumerang el uaikid, uldimukl ra remerredel er a bebil ra beluu, eng blechoel el mora 3 Nephi e menguiu er sera bol dum a mla mekiis ra kodall el Kristo el mora rechad er a Nephi. Sel loruul er tiang, e ngkal dirke kiei el profet eng cholecholt er a sioning er ngii el mora ngar el Kristo.

Ng diak el sebeched el dechor el sionig er a Jesus Kristo dil merekmo bol sebeched el lochotid el sioning er Ngii. A Babier er a Mormon a tara sioning er a Jesus Kristo e le ngokiu a ikal chedaol llechukl, ea derta er tirkal profet a ouchais el diak el dil kirel a Jesus el kmo ngmei, ng dirrek el kmo Ngii amlei.

Leng Ngii a Uchul

A kubang er a chimak a kot el llecheklel a Babier er a Mormon. Sel kuruul er tiang eng blechoel el rutechii a renguk. Rokir el klengar er ngak er sera bok klou el chad, e ak meral mechas a renguk, lolengeng, e melemolem lurrekodel a ikel luruul a kekerel chad el Joseph Smith el mo melai er tial chedaol babier el mo oleiuid e oltobed er ngii. A ikel ongasireng el milkedmokl a uldirkork a idisel sel bo domdasu.

Engdi tia diak luchul e tial babier a rutechii a renguk. E le tial babier, el ngarbab er a rokui el ngii a mla motobed er tial beluulechad, a sioning er a olechotel a klengar, omesiungel, osisecheklel, Tngakireng, me a Okisel ra Kodall a Jesus Kristo. Rodam ma rodos er ngak, a omesubel tial babier er a bek el taem el kirel a Jesus Kristo a mo ngodechii a klengar er kau. Ng mo mekengii osengem er a betok el techall er a klengar er kau. Ng mo mekekii a rengum er a omoureng el tekoi me a dmolech el beltikelreng. Sel kot el ngarbab er ngii, ng mo toketekii e smisichii a klaumerang er kemiu er a Jesus Kristo e nguu a klengeltengat er a meral klemedengei el kmo Ngii me a Demad a medengelkau, betik a rengrir er kau, e sorir obo betik er a rolem el lmuut el mo ra blim, el oba klou el B.

Rodam me a rodos, sel taem a mla mei, el mlulaoch er a reprofet er a re chuodel, “a klemedengei er a Osobel a mo oberk el mora rokui el beluu, klauchad, omelekoi, me a rechad.”⁸ Kede omes er a otutel tial lulaoch er a medad er chelechang, e lokiu ersel sioning ra Jesus Kristo el de betik er ngii e ra Babier ra Mormon.

Ng diak a babier lolecholt a lmuut el betok er a ikang:

Le uchul a Jesus Kristo, ea rokui a mla mengodech.
E le Ngii a uchul, ea rokui a lmuut el lungil.
E le Ngii a uchul, ea klengar a sebeched—tokuni a ikel meringel el taem.
E le Ngii a uchul, ea rokui a di sebechel.

Sel odngelel el mla mekiis el Osobel, el mluchais er a Chedam er a Babeluades, a kot el klebokel e ngarbab el klumech er a Baskua. Tia mo ngosuir a chedal a telungalek er kid el metik er a klaumerang er tir er a Jesus Kristo el Osobeled e Mengikiid, el ngii a mlo mesisiich er a lechetel a kodall.

Ak mengesimer lochotii a klaumerang er ngak er a klemerang er a Babier er a Mormon me a Jesus Kristo el Ngelekel a ngar el Dios. El ngara a ngklel a Jesus Kristo, amen.