![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F56%2F2a%2F562a31f54cc9c457be4bc7a43159ab5f82fa7ff6%2F562a31f54cc9c457be4bc7a43159ab5f82fa7ff6.jpeg/full/!250,/0/default)
Roltirakl er a Prince er a Budech
Sel dolasm el meruul a blekerdelel Osobel, eng sebeched el mo uchul a budech er Ngii er a beluulechad.
Sel otutel a ulaoch el mlo er a Sekaria,1 ea Jesus a mlo soiseb er tial Chedaol Beluu el ngara donkey, el ngarsel omesuub er a “chuodel el olechotel ngarbab el kleblillel a re Jew,”2 el kmal ungil atter sel tekoi el kmo King er a re king e Prince er a Budech.3 Ng mle ileuekl er a rebetok el ungil a rengrir loltirakl el ulmerk a bilir, llel a palm, me a bebil er a dellomel er tial rael luleak ngii a Jesus. Te oldanges er a Dios, el oba klou el ngor, “Ngeltengat ngkel King el mei el ngara ngklel a Rubak: budech el ngara babeluades, me a odanges el kot el ngarbab.”4 E liluut el melekoi, “Le modanges a Ngelekel a David: A Dios bo lomekngeltengat er ngikal mermang el oba ngklel a Rubak; A odanges le bor a Dios.”5 Tial klamiokel omeruul, el doutkeu er ngii er tial sils el dodengelii el kmo Palm Sandei, a mle ungil klebesei ruchei er a ikel meringel el teletael el mlo duubech er sel sandei er a Osobel a bol medeel ma sel ongasireng el debull el bechachau eleng okisel er a kodall.
Ma sel doltirakl er Ngii, e kid a ngellitel el Chedal, el mla mokedong el mo ouchais er a kldung er Ngii,6 e chad el oldubech a budech lokiu Ngii ma tngakireng er Ngii. Tial budech a sengk el blel yaksok er ngii el mo er tirkel tir a mult a rengrir el mo er a Osobel e kiei loba llemalt; tial budech a meskid a klisiich loldeu a rengud er tial klengar e rulid meng sebeched el outekangel a ringel er tial omerolled.
Sera 1847, a Rubak a milsterir a bleketakl osisechakl el mo er tirkel re Santo, el lulsbech a budech e melolem el chelelakl a rengrir el ta rengerir sel bo lechau a ringel el di kiul dubech er tial omerollir el bedul a ngebard. Uldimukl er a bebil er a tekoi, a Rubak a ulsisechakl er a ruchelel a re Santo melak el kauketuub e lak lolekoi a mekngit el kirir a rebebil.”7 A chedaol llechukl a melisiich el kmo tirkel meruul a ureor ra llemalt e melasm el merael loba delmedemek el Reng er a Rubak a blel yaksok a budech el mo er tir el lousbech er ngii el mesebechakl er tir er a ikel sils er a nglemuu el kid a kiei er ngii er a chelechang.8
Me sel doltirakl er a Prince er a Budech, e kede mla mosisechakl el mo kiei el “rengud a mo dmak el di mo tang e oubeltik el reng el mo er a tang me a tang.”9 A betik er a rengud el profet er kid el, President Russell M. Nelson, a dirk dilu el kmo, “A uldikel a tomall a rokui el tekoi el Osobel a ullab e ulsisechakl.”10 A profet er kid a dirrek el milekoi el kmo bo dolasm el mo torob a uldikel el ngara chelsel a rengud ma klengar er kid er a chelechal taem.11
Me bo domtab aikakid el osisechakl el oltirakl er a klikiid el beltkil a rengul a Kristo el merkid me, sel kid a oltirakl er Ngii, a dirrek el meruul el mo er a rebebil. A chedaol llechukl ouchais er tial teletelel a beltik el reng el bliochel el beltik el reng.12 Sel domdasu el kirel a bliochel el reng, ea uldesued a obult el mora ikel ungil teletael ma omeruul el mo oldobes a ringel kirir tirkel chemau a ringel er a tech, klalou a lechub a reng. Ng uaisei, a bliochel el beltik el reng a diak el dil sel doruul a ungil el mo er a tara chad, ng bai sel teletelel a Osobel el sebechel mo telengtengil a blekerdeled. Ng diak el mechas a rengud sel Rubak a mla osisecheklid el mo milid er a uak er a bliochel el beltik el reng, el ngii el uak a cherrungel e budech.”13 A lak a bliochel el beltik el reng, e kid a diak de ngerang,14 e mo diak el sesbeched el mo er sel basio el Rubak a mla kudmeklii el kired el ngarsel blil a Demad er a Babeluades.15
A Jesus a ungil olechotel sel belkul a obang a bliochel el beltik el reng el Teletelel, tokubets er sel taem er a lechau a meringel omeruul er a uchei er a Kodellel. Ka momdasu el kmo a Jesus ngkol uangerang a lulchesuar sera lolatech a ocherir a roltitrakl er Ngii, e mle ungil medengei el kmo a tar tir a mo oterur er sel kesus.16 A lechub ea uriul ra sesei el sikang, ea Jesus, a mo omekungil er a dingal ngkel chad el lulbengkel a Judas, ngkel Lulterur, el mo Nguu el mora kelbus.17 A lechub sera ldechor Osobel, er a medal a Pilate, e mlotelechakl er a tirkel chief priest ma re elders, e Ngii a dimlak a ngera lolekoi el kirel a ikal blulak lotelchakl el Kirel, meng chilas a rengul ngkal Roman govenor.18
Ngokiu a ikakid el edei el meringel omeruul, a Osobel, el milngol a oberaod el klengit el reng ma ringel, a ulsisecheklid lokiu a okesiul el kmo “a bliochel el beltik el reng a klou a rengul, e bekokuii; … diak le mechechei; … diak le mead, e le kedidai a rengul, diak le debsochel, diak el bechelechelingaol a rengul, diak el bekongesengasech a rengul, [e] diak longemekl.”19
A tara klou a ultutelel el desisichii, e ngarngii a rellii el kirel a otirekled e mekerang a doldubech a budech er a Osobel, a sel teletelel a blekerdeled el mora rebebil. Sel uchelel a Urerel et tial beluulechad, ea osisecheklel a Osobel—a mle kirel a kldung er a beltik el reng, bliochel el beltik el reng, kellou el reng, ngariou el reng, ma klechubchub—el meklou a belkul teletael el mortirkel sorir el mo kmeed el mo er Ngii e oldubech er a budech er Ngii. Aikal teletael a sengk el mlara Dios, me sel dolasm el meruul, e kede mocha mes aikel ngeldengodech ma chelitecheterir a rekmeed er kid loba beltik el reng, klemedengei el reng, omengull, e kaiuerenges. Sel kmal kot el olechotel el kmo kede merael mo kmeed er a Osobel e merael mo uai Ngii a sel beltik el reng, kellou el reng, ma ungil omerolled el mora rebebil, el ngara ngidil omeruul.
Kede blechoel mesterir a rechad el melekoi a mekngit el tekoi el kirel a ikal teletael, chelitechut, ma uldesuir el kirir a rebebil, el tokuni sel ikal blekeradel ma uladsu a ngodech a lechub eng ngomtok a ikel blekerdelir ma uldesuir. Ng blechoel teletael el desterir tirkal chad el melekoi a ikal tekoi el mora rebebil, el di omelekl a ikel rirenges e bai diak lodengei a ikel meral dilubech. Ng kerior, e le social media a mengesuseu a ikakid el blekeradel ele te kmo ng klemerang e de kmal ungil mes. Eleng diak a merrob aikang, a omengedecheduch er a digital a blechoel uchul a rechad a oltuub e meringel kaumondai, el uchul a klengit el reng, telemall el reng, e olecholt a mekngit el blekeradel.
A Nephi a ulemlaoch el kmo a chelsel a ikel uriul klebesei, ea cheraro a mo ngmasech a rengul e rulterir a rechad el mo ouklsiberreng lomtok a ikel ungil.20 A chedaol llechukl a olisechakl el kmo “a rokui el tekoi el ngii a mengususeu e olechau el mo meruul a ungil, el mo oubeltikelreng el mo er a Dios, el mo mesiou er Ngii, a nga er a Dios.”21 E sel kuk bitang, “a ikel mekngit a mei el ngar er a diablong, le diablong a cherreuel a Dios, me ngoldechelakl er ngii el blechoel, lomekedong e mengususeu el mo er a mekngit, el mo blechoel meruul a ikei el ngii a mekngit.”22
Mesel domtab a osisecheklel tial ulaoch, eng diak el mechas a rengud el kmo a tara omeruul el cheraro a ousbech er ngii a rullii a kaucheraro ma ouketui el mora chelsel a rengrir a rengelekel a Dios. Ngii a oldeu ra rengul sel lesterir a rechad el kedaes, melenguul, e oltuub er a ta ma tang. Tial blekeradel a sebechel tomelii a teletelel a chad, deruchellel, ma klaumera er ngii, tokuni sel ngara chebirukl el omerritel. Ng klou a belkul el detetkii el kmo sel debecherei tial blekeradel el mera chelsel a klengar er kid, eng morngii a basio er a chelsel a rengud el cheraro a mo dolmii sel tane er a klautok er a delongeled, meng bai mo sebeched el lobedikl er sel bedeklel.
Alsekum eng diak de kerekikl a uldesued, omelkinged, me a omerelled, eng sebeched el ruebet er a chelbeldil a cherarou, el tomelii a deleuill er kid me a rechad me a rebetik er a rengud.
Rodam me a rodos, kid el ngellitel el chedal a Rubak e oldubech er a budech er Ngii, eng diak el sebeched el mechei aika el ongetikaik er a cherarou me lesiseb er a rengud. Ng diak el sebeched el meche ikal merruud a reng el teletael, mel temall a deleuill er kid, me a dirrek el klengar. A ebangkelio a olchotel a ungil chais er a klou el deureng.
Ng uaisei, ng diak a ta er kid el cherrungel, meng, ngarngii a taem e kede mechetikaik el mo meruul a ikakid el mekngit lomeruul. Chelsel sel cherrungel el beltkil a Rengul, ma mui el klemedengei el kirel a blekerdelir a rechad, ea Osobel a blechoel mengelechel er kid el kirel a ikal kengaol tekoi. Ng ulsisecheklid el kmo, “Ele Dios a mo oukerrekeriil er kemiu el di ua iser cho moukerrekeriil er a rechad; ng mo meruul el ekor kemiu a ikel muruul el mor a rechad.”23
Rodam ma rodos er ngak, sel dolasm el meruul a blekeradel el uai a teletelel a Osobel, eng sebeched el mo dongu er a budech er Ngii er a chelsel tial beluulechad el uai sel teletael el Ngii a ulechotii. Ak siotai er kemiu el mo osiik a teletael el mo mengodech er kemiu el mo olngeseu er a rechad, rechad el ngarngii a rengrir el mo medengelterir a rebebil e ousubes er tir, rechad el lomes er sel lungil ngara chad, e blechoel melatk el kmo “a lsekum ngar ngii a kldung, ma klamiokel, malechub e ngungil tekoi malechub eng odengesall, ea ikaikid el tekoi aki mosiik.”24
Ak yaksok er kemiu el kmo sel dosiik e doruul aikakid el ungil blekeradel, e kede merael mo bekesechelei e medengei a ikel usbechall ngesou el kirir a rebebil24 e mo nguu a deurreng, budech, ma chedaol ulekeroul.26 Ng merang, a Rubak a mo medengei a ikel urered e mo meskid a sengk el dousbech el mo ungil mora rebebil e mo klou a rengud kirel aikel klekakerous er kid ma rebebil, klechitechut, ma ikel diak de cherrungel er ngii. Lmuut el bebil, eng mo sebeched el otngakl a kelsib el reng a lechub eng diak dolngasech a rengrir er tirkel melemall er kid . El di uai a Osobel, sel ngarngii a rengud el mo ousubes er tirkel diak lungil a blekerdelir el merkid malechub te melekoi a mekngit el kired a bai merael mo mesisiich e mo telengtengil a blekerdeled.
Me chelecha sils, er a Baskua, e bo domerk a beltkil a rengud ma bliochel el beltik el reng, el oltirakl a okesiul ngkal Prince er a Budech e mengedmokl er kid er tial ungil klebesei, er tial merael mei el Sandei, el sel ongasireng er a debull el bechachau. Sel de rodam e rodos er a Kristo, “Le modanges a Ngelekel a David: A Dios bo lomekngeltengat er ngikal mermang el oba ngklel a Rubak; A odanges le bor a Dios.”27
Ak ouchais el kmo a Jesus Kristo a ngar ea cherrungel el Beltkil a Rengul, a chemolt lokiu sel Tngakireng er Ngii, a modars el mor tirkel rokui el ngarngii a rengrir el mo oltirakl a Okesiul ma Osisecheklel e oba budech er Ngii el ngar tial beluulechad ma merael mei el beluulechad. Ea ikang a kulekoi loba chedaol ngklel a Osobel e mo Olsobel el Jesus Kristo, amen.