Kanus-a Ka Angay nga Makadawat og Patriyarkal nga Panalangin

Ni Elder Kazuhiko Yamashita

Sa Seventy

Kon madawat ninyo ang inyong panalangin, inyong maamgohan ug mabatyagan kon giunsa kamo sa paghigugma sa Langitnong Amahan ug ni Jesukristo ug sa unsang paagi kamo Ilang matutokan sa tinagsa-tagsa.

Kagahapon ang pinangga nakong higala nga si Elder Randall K. Bennett naghisgot mahitungod sa patriyarkal nga mga panalangin. Talagsaon kadto nga mensahe ug midasig kanatong tanan. Minahal kong kaigsoonan, mahimo bang maghisgot usab ako mahitungod sa patriyarkal nga mga panalangin? Mga patriyarka, samtang nagkadaghan ang mga hangyo alang sa patriyarkal nga mga panalangin, manghinaot ko nga ang Ginoo mopanalangin kaninyo samtang padayon kamong mobuhat sa inyong calling.

Samtang miadto ko sa mga komperensiya sa stake, makig-istorya ko kanunay sa patriyarka sa stake ug sa iyang kapikas. Ang mga patriyarka malumo, masulundon, ug talagsaong mga lider nga tinawag sa Dios. Mosugilon sila kanako og daghan nga maanindot kaayong mga kasinatian nga espiritwal. Pangutan-on nako sila pilay edad sa kinamanghoran ug kinatigulangang tawo nga ilang nahatagan og panalangin. Sa pagkakaron ang kinamanghoran 11, ug ang kinatigulangan 93.

Nakadawat ko sa akong patriyarkal nga panalangin sa bag-o pa kong miyembro sa Simbahan, sa edad nga 19, duha ka tuig human ko nabunyagan. Ang akong patriyarka labihan na katigulang. Nagpasakop siya sa Simbahan sa tuig 1916 ug usa ka pioneer sa Simbahan sa Japan. Kadto usa nako ka dakong dungog nga makadawat sa akong patriyarkal nga panalangin gikan nianang talagsaon nga disipulo sa Ginoo. Ang iyang Hinapon lisod og gamay para nako nga sabton, apan puno sa gahom.

Ang mga patriyarka nga akong nahimamat mosulti nako nga daghang indibidwal makadawat sa ilang patriyarkal nga mga panalangin sa hapit na ang pagserbisyo nila og misyon. Minahal kong batan-ong mga lalaki, batan-ong mga babaye, mga ginikanan, ug mga bishop, ang patriyarkal nga mga panalangin dili lamang preparasyon sa pagserbisyo og misyon. Ang takos nga binunyagang mga miyembro makadawat sa ilang patriyarkal nga panalangin kon ang panahon husto na alang kanila.¹

Minahal nga hingkod nang mga miyembro, pipila kaninyo wala pa makadawat sa inyong patriyarkal nga mga panalangin. Hinumdomi, nga walay maximum nga edad.

Ang akong ugangan nga babaye aktibo kaayo nga miyembro sa Simbahan, nga nagserbisyo nga magtutudlo sa Relief Society hangtod nga namatay siya sa edad nga 91. Naguol ko sa pagkahibalo nga wala siya makadawat og patriyarkal nga panalangin. Nakasinati siya og daghang kalisdanan sa iyang kinabuhi, ug tungod kay walay naghupot sa pagkapari sa iyang panimalay, wala siya makadawat og daghang panalangin sa pagkapari. Ang patriyarkal nga panalangin tingali nakahatag unta niya og kahupayan dihang siya nagkinahanglan kaayo niini.

Kamong mga hingkod, kon wala pa mo makadawat og patriyarkal nga panalangin, palihog ayaw kabalaka! Ang espirituhanon nga panahon sa matag usa managlahi. Kon ikaw 35 o 85 ug duna kay tinguha, sultihi ang imong bishop mahitungod sa pagdawat sa imong panalangin.

Bag-ong mga miyembro sa Simbahan, nakadungog na ba mo og patriyarkal nga mga panalangin? Wala koy nahibaloan mahitungod sa oportunidad sa pagdawat og usa niini dihang mipasakop ko sa Simbahan, apan ang minahal nakong bishop misulti nako mahitungod sa patriyarkal nga mga panalangin ug miawhag nga mangandam ko sa pagdawat og akoa human sa akong bunyag. Minahal kong bag-o nga mga miyembro, makadawat usab kamo og patriyarkal nga panalangin. Ang Ginoo motabang ninyo nga maandam alang niining sagrado nga oportunidad.

Atong ikonsiderar kining duha ka katuyoan alang sa patriyarkal nga panalangin:

Ang patriyarkal nga panalangin maglakip og personal nga tambag gikan sa Ginoo para kaninyo.²
Ang patriyarkal nga panalangin magdeklarar sa inyong kaliwat sa balay ni Israel.

Ang inyong patriyarkal nga panalangin usa ka mensahe gikan sa inyong Langitnong Amahan ug lagmit nga maglakip og mga saad ug dinasig nga tambag nga mogiya kaninyo sa tibuok ninyong kinabuhi. Ang patriyarkal nga panalangin dili maoy mapa sa inyong kinabuhi o tubag sa tanan ninyong mga pangutana. Kon wala man kini maghisgot og importanting hitabo sa kinabuhi, ayaw hunahunaa nga wala kamo niana nga oportunidad. Sa samang paagi, dili garantiya nga ang tanang anaa sa inyong panalangin mahitabo niining kinabuhia. Ang patriyarkal nga panalangin mahangtoron, ug kon magpakabuhi kamong takos, ang mga saad nga wala matuman niining kinabuhia ipatuman sa sunod.³

Kon madawat ninyo ang deklarasyon sa kaliwat, inyong mahibaloan nga gikan kamo sa balay ni Israel ug sa binhi ni Abraham.⁴ Aron masabtan ang kahulogan niini, tutoki ang mga saad sa Ginoo nga gihimo ngadto sa balay ni Israel pinaagi kang Abraham.

Kadtong mga saad naglakip nga:

“Ang iyang kaliwat modaghan pag-ayo (tan-awa sa Genesis 17:5–6; Abraham 2:9; 3:14).
“Ang iyang binhi, o mga sumusunod, makadawat sa ebanghelyo ug makahupot sa pagkapari (tan-awa sa Abraham 2:9).
“Pinaagi sa pagpangalagad sa iyang binhi, ‘ang tanan nga mga banay sa yuta [paga]panalanginan, gani uban sa mga panalangin sa Ebanghelyo, diin mao ang mga panalangin sa kaluwasan, gani sa kinabuhi nga dayon’ (Abraham 2:11).”⁵

Isip mga miyembro sa Simbahan, mga anak kita sa pakigsaad.⁶ Madawat nato ang mga panalangin sa saad sama kang Abraham kon kita motuman sa mga balaod ug mga ordinansa sa ebanghelyo.

Ang pag-andam alang sa inyong patriyarkal nga panalangin makatabang ninyo nga madugangan ang inyong pagtuo sa Langitnong Amahan ug kang Jesukristo. Ug kon madawat ninyo ang inyong panalangin ug basahon ug pamalandongan kini, matutokan ninyo Kini sa mas kanunay nga paagi.

Si Presidente Thomas S. Monson mipasabot nga, “Ang sama nga Ginoo kinsa mihatag og Liahona alang kang Lehi naghatag kanimo ug kanako karon og usa ka talagsaon ug bililhon nga gasa sa paghatag og direksiyon sa atong mga kinabuhi, sa pagbutang og timaan sa mga kapeligrohan ngadto sa atong kahilwasan, ug sa pagplano sa dalan, bisan sa luwas nga agianan—dili ngadto sa gisaad nga yuta, apan sa atong langitnong puloy-anan.”⁷

Minahal kong mga bishop, mga ginikanan, mga presidente sa korum sa mga elder ug sa Relief Society, mga ward mission lider, tigpangalagad nga mga brother ug mga sister, palihog awhaga kadtong mga batan-ong lalaki ug mga batan-ong babaye, hingkod nang mga miyembro, ug bag-ong mga miyembro nga wala pa makadawat sa ilang patriyarkal nga panalangin sa pagtinguha sa direksiyon sa Ginoo ug tabangi nga maandam ang ilang kaugalingon sa paghimo niini.

Ako kanunay ug mainampoong mobasa sa akong patriyarkal nga panalangin; kanunay kining maghatag kanako og kadasig. Akong giila unsa ang gilaoman sa Ginoo kanako, ug nakatabang kini aron makahinulsol ko ug magmapaubsanon. Kon akong basahon ug pamalandongan kini, magtinguha ko sa pagpakabuhing takos sa pagdawat sa gisaad nga mga panalangin.

Sama sa mga kasulatan nga nabasa na nato sa daghang higayon dunay bag-ong kahulogan ngari nato igkadugaydugay, ang atong patriyarkal nga panalangin adunay lahi nga kahulogan ngari nato sa managlahing panahon. Ang akoa dunay lahi nga kahulogan karon kay sa kaniadtong nag-30 ug dihang nag-50 ko. Wala magpasabot nga nausab ang mga pulong, apan makita nato kini sa lahi nga paagi.

Si Presidente Dallin H. Oaks mipahayag nga ang patriyarkal nga panalangin “gihatag pinaagi sa inspirasyon sa Balaang Espiritu ug kinahanglang basahon ug hubaron ubos sa impluwensiya sa mao gihapon nga Espiritu. Ang kahulogan ug kamahinungdanon sa patriyarkal nga panalangin itudlo pagtulon-an human sa usa ka pagtulon-an sa pagdagan sa panahon pinaagi sa gahom sa susama nga Espiritu nga nagdasig [niini].”⁸

Mga kaigsoonan, mohatag ko sa akong pagsaksi nga ang Langitnong Amahan ug ang Iyang Hinigugma ug Bugtong Anak, nga si Ginoong Jesukristo, buhi. Sila nahigugma kanato. Ang patriyarkal nga mga panalangin sagradong mga gasa gikan Kanila. Kon kamo makadawat sa inyong panalangin, inyong maamgohan ug mabatyagan kon giunsa Nila kamo sa paghigugma ug giunsa Nila nga matutokan kamo sa tinagsa-tagsa.

Ang Basahon ni Mormon lain nga tugon ni Jesukristo. Ug mapasalamaton ko nga naggiyahan og usa ka buhing propeta, nga si Presidente Russell M. Nelson.

Mapasalamaton kaayo ko sa atong Manluluwas, nga si Jesukristo. Niining Dominggo nga Pasko sa Pagkabanhaw magtutok ako Kaniya ug sa Iyang Pagkabanhaw, ug simbahon Siya ug magpasalamat sa Iyang sakripisyo. Nasayod ko nga nag-antos Siya sa hilabihan tungod kay Siya nahigugma kanato sa hilabihan. Nasayod ko nga nabanhaw Siya tungod sa Iyang gugma kanato. Siya tinuod. Ako mopamatuod gayod niini sa ngalan ni Jesukristo, amen.