Era Gadrevi na Dautataro
E tiko vei iko na galala mo digitaka na veileti se veivakaduavatataki. Au vakamasuti iko mo digitaka mo dua na dautataro, edaidai kei na veigauna kecega.
Kemuni na taciqu lomani, sa ka marautaki me’u tiko kei kemuni. Ena loma ni ono na vula sa oti, ko ni sa dau lewe tu ni noqu vakanananu kei na noqu masu. E noqu masu me na tukuna vei kemuni na Yalo Tabu na ka e vinakata na Turaga mo ni rogoca niu vosa vei kemuni ena gauna oqo.
Ena gauna au a vulica tiko kina na veisele ena vuqa na yabaki sa oti, au a vukea edua na dauveisele ka musuka tiko edua na yava ka sinai tu ena nana. E a dredre na veisele oya. Me ikuri ni leqa, edua na lewe ni timi a cakava vaka ca edua na itavi, ka tubu vakasauri kina na cudru nei dauniveisele. Ena loma ni nona cudru, e a kolotaka na nona isele ni veisele ka tauva tu na manumanu ni mate. E a tau sara ga e ligaqu!
O iratou kece ena rumu ni veisele—vakavo ga o dauniveisele cudrucudru—a domobulataka na rerevaki ni voroki ni lawa ni veisele oqo. A ka ni marau, niu a sega ni tauvimate. Ia na ka sotavi oqo a dau lewe tu ni noqu vakanananu me dua na gauna balavu. Ena auwa vata oqori, au a yalataka vei au se cava e yaco ena noqu rumu ni veisele, au na sega vakadua ni laiva na yaloqu me rawai au. Au a yalataka talega ena siga oya meu kakua ni kolotaka edua na ka e dela ni cudru—se isele ni veisele se vosa.
Ena gauna mada ga oqo, ni oti e tinivakacaca na yabaki, au se vakataroga tu ga se isele duka ka tau e ligaqu a gaga vakalevu cake mai na veileti gaga ka curuma tu na veivosaki vakaitikotiko kei na vuqa na veimaliwai vakayadudua ni kua. Na veidokai kei na veirokorokovi e sa vaka me mai yali ena itabagauna oqo ni vakaduiduile kei na duiyaloyalo kaukauwa.
Na ivakarau ca, veibeitaki, kei na vosavakacacataki ira na tamata sa kune vakalevu. E vuqa na kenadau, daunipolitiki, dauvakatasuasua, kei ira na dauveivakayarayarataki tale eso era dau vosataka na veivosa ca e veigauna. Au kauwai sara vakalevu ni vuqa na tamata era vakabauta ni sega ni ca me vakalewa, vakacacana, ka tabaka sobu e dua ga e sega ni duavata kei ira. E levu era kusa me vakacacana na kena irogorogo e dua tale ena veivosa lolovira ka mosimosi!
Na cudru e sega ni dau veivakayarayarataki. Na veisaqasaqa ena sega ni vakavinakataka e dua. Na veileti e sega vakadua ni veimuataki ki na iwali e veivakauqeti. E ka ni rarawa, ni da dau raica ena so na gauna na itovo ni veileti ena lotu. Eda rogoci ira era vosabeci ira na watidra kei na luvedra, ka ra vosa vakacudrucudru mera lewai ira kina na tani, kei ira na totogitaki ira na lewe ni vuvale ena nodra “galuvi.” Eda rogoci ira na itabagone kei na gone era veivaqaseni kei ira na tamata cakacaka ka ra vosa vakacacataki ira era cakacaka vata.
Kemuni na taciqu kei na ganequ lomani, e sega ni dodonu me yaco na veika oqo. Ni da tisaipeli i Jisu Karisito, meda ivakaraitaki vinaka ni veimaliwai kei ira na tani—vakabibi ni tiko na duidui ni vakasama. Edua na sala rawarawa duadua me kilai kina edua ka muri Jisu Karisito dina sai koya na ivalavala ni nona qaravi ira na tani ena yalololoma na tamata oya.
Na iVakabula a vakamatatataka na ka oqo ena Nona ivunau vei ira na muri koya ena yasa ni vuravura ruarua. “Kalougata ko ira sa dautataro,” e kaya o Koya.1 “Ia kevaka e dua sa sabica na balumu imatau, golea talega vua na yasana kadua.”2 Ka qai solia talega na ivakaro ka veibolei vei keda vakayadua: “Lomani ira na nomudou meca, dou vosavinakataki ira sa rukaki kemudou, dou cakavinaka vei ira sa cati kemudou, ka masulaki ira sa vakalialiai kemudou, ka vakacacani kemudou.”3
Ni bera Nona mate, a vakaroti iratou na Nona iApositolo e Tinikarua na iVakabula me ratou veilomani me vaka na Nona lomani iratou.4 A qai vakuria o Koya, “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”5
E matata na itukutuku ni iVakabula: O ira na Nona tisaipeli dina era veitarai cake, veilaveti, veivakayaloqaqataki, veivakayarayarataki ka veivakauqeti—se mani vakacava na dredre ni ituvaki. O ira na tisaipeli dina i Jisu Karisito era sa dautataro.6
Ni kua na Sigatabu ni Curu Vakatui. Eda vakavakarau tiko me vakananuma na ka lagilagi ka bibi duadua ka volaitukutukutaki e vuravura, sai koya na Veisorovaki kei na Tucaketale ni Turaga ko Jisu Karisito. E dua na sala uasivi eda rawa ni rokova kina na iVakabula sai koya meda yaco meda dautataro.7
Na Veisorovaki ni iVakabula e vakayacora me rawa kina vei keda meda ra-wa na ca kecega—oka kina na veileti. Oqo na ka dina: na veileti e ca! O Jisu Karisito e tukuna ni o ira sa tiko vei ira “na yalo ni veileti” era sa sega ni Nona ia sa “nona ga na tevoro, ni sai koya na tama ni veileti, ka [na tevoro] sa dau vakauqeta na yalodra na tamata me ra veileti ka veicudruvi.”8 O ira era tokona na veileti era sa cakava tiko na cakacaka i Setani, se ra kila tiko se sega. “Sa sega ni dua na tamata sa qarava rawa e rua na turaga.”9 Eda sega ni rawa ni tokoni Setani ena noda veivakacacani ena vosa ka nanuma ni da se rawa tikoga ni qarava na Kalou.
Kemuni na taciqu kei na ganequ lomani, na ivakarau eda cakava veikeda vakaikeda e ka bibi dina! Na ivalavala ni noda vosa vei ira se baleti ira na tani e vale, e valenilotu, e vanua ni cakacaka, se ena mona livaliva e ka bibi dina. Ni kua, au vakamasuti keda meda veimaliwai kei ira na tani ena sala cecere, ka vakalou sara. Yalovinaka vakarorogo matua. “A ka kecega e savasava, na ka e totoka, se rogorogo vinaka se daudokai”10 ka da rawa ni tukuna me baleta edua tale na tamata—se e matana se ni yali—oqori e dodonu me noda ivakatagedegede ni veivosaki.
Ke dua na veiwatini ena nomu tabanalevu erau veisere, se vakasukai koso mai edua na daukaulotu gone, se dua na itabagone e vakatitiqataka na nona ivakadinadina, era sega ni gadreva na nomu vakalelewa. Era gadreva mera vakila na loloma i Karisito ni vakaraitaki ena nomu vosa kei na ivalavala.
Ke dua na itokani ena mona livaliva e kaukauwa nona ile vakapolitiki se vakaveimaliwai ka saqata na veika kece o vakabauta, ena sega ni veivuke edua na vosa ni cudru, se sega ni loloma mai vei iko. Na tarai cake ni veimaliwai vinaka ena gadrevi kina e levu na ka mai vei iko, ia oqori sara ga na ka e gadreva na nomu itokani.
Na veileti ena vakasava tani na Yalo—e veigauna. Na veileti e tokona na nanuma cala ni veivala esala duaduaga me wali kina na duidui; ia e sega ni vakakina. Na veileti e dua na digidigi. Na dautataro e dua na digidigi. E tiko vei iko na galala mo digitaka na veileti se veivakaduavatataki. Au vakamasuti iko mo digitaka mo dua na dautataro, edaidai kei na veigauna kecega.11
Taciqu kei na ganequ, eda rawa ni veisautaka vakaidina na vuravura—dua na tamata kei na dua na veitaratara dua na gauna. E caka vakacava? Ena vakaraitaki ni sala me vakatulewataki kina na duidui ni vakasama ena veirokorokovi dina kei na veivosaki ena veidokai.
Na duidui ni vakasama e tiki ni bula. Au cakacaka e veisiga vata kei ira na italai yalodina ni Turaga ka sega ni tautauvata na nodra rai me baleta edua na leqa. Era kila niu vinakata meu rogoca na nodra nanuma kei na veika dina era vakila me baleta na veika kece keimami veivosakitaka—vakabibi na kena e tara na yalo.
Oi rau na noqu daunivakasala vakaturaga, o Peresitedi Oaks kei Peresitedi Eyring, erau ivakaraitaki vinaka ena sala erau dau vakaraitaka kina na veika erau vakila—vakabibi ni dau tiko na duidui. Erau vakayacora ena loloma savasava vei rau vakairau. E sega ni dua vei rau edau tukuna ni kila vakavinaka cake ka dodonu kina me taqomaka vakaukauwa na nona ile. E sega ni dua vei rau e dau vakaraitaka na kena gadrevi me rau veiqati vakataki rau. Baleta ni rau sinai ruarua ena loloma uasivi, “na loloma taucoko i Karisito,”12 sa rawa kina ni dusimaki na neitou veivosaki mai vua na Yalo ni Turaga. Sa dua na ka na noqu lomani rau ka rokovi rau na turaga dokai e rua oqo!
Na loloma uasivi sai wali ni veileti. Na loloma uasivi sai koya na isolisoli vakayalo ka vukei keda meda biuta tani na tamata vakavuravura, e daunanumi koya ga, dau vakadonui koya, qaciqacia, ka dau vuvu. Na loloma uasivi sai koya na itovo ni bula bibi duadua ka kilai kina ni dua sa daumuria vakaidina na Karisito.13 Na loloma uasivi e vakatakilakilataka edua na dautataro.
Ni da vakamalumalumutaki keda vua na Kalou ka masu ena yaloda taucoko, na Kalou ena solia vei keda na loloma oqo.14
O ira era vakalougatataki ena isolisoli vakalou oqo era sa dauvosota vakadede ka yalovinaka. Era sega ni dau vuvutaki ira na tani ka sega ni dau vosa doudou. Sa sega ni dau vakacudrui vakarawarawa ka sega ni dau nanumi ira vaka ca na tani.15
Taciqu kei na ganequ, na loloma uasivi i Jisu Karisito sa iwali ni veileti ka vakaleqai keda tu ni kua. Na loloma uasivi e vakauqeti keda “meda colata vata na noda icolacola”16 ka kua ni vakabibitaka na noda icolacola yadua. Na loloma uasivi i Karisito e vakatara meda “tu ka vakadinadinataka na Kalou ena veigauna kecega kei na veika kecega”17—vakabibi ena vei ituvaki dredre. Na loloma uasivi e rawa kina vei keda meda vakaraitaka na nodra ivakarau ni vosa kei na ivalavala o ira na tagane kei na yalewa era nei Karisito—vakauasivi ena gauna era vakalewai vaka ca sara kina.
Ia oqo, au sega ni vosa tiko me baleta na “veisaututaki ka caka ga me rawa”18 Au vosa tiko me baleta na noda ivakarau vei ira na tani me salavata kei na maroroi ni veiyalayalati o cakava ni o vakayagataka na sakaramede. O yalataka mo dau nanuma tikoga na iVakabula. Ena vei ituvaki dredre sara ka sinai ena veileti, au sureti iko mo nanumi Jisu Karisito. Masuta me tiko na yalodoudou kei yalomatua me cavuti se vakayacori na ka ena cakava o Koya. Ni da muria na Tui ni Sautu, eda na yaco meda Nona dautataro.
Ena gauna oqo o na rairai vakasamataka beka ni itukutuku oqo ena vukea vakaidina edua o kila. E rairai o nuitaka ni na vukei koya se tagane se yalewa me na vinaka cake na nona ivakarau vei iko. Au nuitaka ni na vakakina! Ia au nuitaka talega ni ko na dikeva vakatitobu na lomamu mo raica se tiko kina eso na ivovo ni dokadoka se vuvu ka tarovi iko tiko mo yaco mo dua na dautataro.19
Ke sa yalomu dina mo veivuke me vakasoqoni vata o Isireli kei na tarai cake ni veimaliwai e dei ki na tawamudu, oqo na gauna me biu vakatikitiki kina na yaloca. Oqo na gauna me muduki kina nomu vinakata me yaco ga na lomamu. Oqo na gauna me tarovi kina na vakayacori ni veika eso ka vakavuna vei ira na tani me ra dau qaqarauni de ra qai vakacudrui iko. Oqo na gauna me buluti kina na iyaragi ni valu20 Kevaka e sinai na nomu iyaragi-vakavosa ena veibeci kei na veibeitaki, oqo na gauna mo biuti ira tani kina vakatikitiki.21 O na duri cake me vaka edua na tagane se yalewa qaqa i Karisito.
Na valetabu ena rawa ni vukei keda ena noda ilakolako. Mai kea ena soli kina vei keda na kaukauwa ni Kalou, ka na rawa kina vei keda meda rawai Setani, na ivuvu kecega ni veileti.22 Vakasavi koya tani mai na nomu veimaliwai kece! Mo kila talega ni da cudruvi na meca ena veigauna kece eda walia kina edua na veilecalecavi se sega ni vakatara meda vakatarabetaki. Ia, eda rawa ni vakaraitaka na yalololoma ka ivakatakilakila ni tisaipeli dina i Jisu Karisito. O ira na dautataro era tarova na meca.
Meda qai yaco meda rarama dina ena dua na delana—na rarama “ka sega ni tabonaki rawa.”23 Meda vakaraitaka ni tiko edua na sala e veidokai me wali kina na veileqa vereverea kei na sala rarama me vakameyautaki kina na noda duidui. Ni o vakaraitaka na loloma uasivi ka ra bulataka o ira na muri Jisu Karisito ena yalodina, na Turaga ena vakalevutaka na nomu igu me uasivia na ka o rawa ni vakasamataka.
Na lawa va-kosipeli e lawa levu duadua ena vuravura. Na Kalou sa sureti keda kece meda lako mai ki Vua, “na tamata loaloa kei na tamata vulavula, bobula kei na galala, tagane kei na yalewa.”24 E tu na rumu me baleti keda kece. Ia, e sega kina na rumu ni vakanananu cala, veivakacacani, se veileti ena kena mataqali cava ga.
Kemuni na taciqu kei na ganequ, se bera tiko mai na veika uasivi vei ira era vakayagataka na nodra bula mera tarai cake na tani. Ni kua au sureti iko mo dikeva nomu bula vakatisaipeli ena rarama ni ivakarau o vakarautaka vei ira na tani. Au vakalougatataki iko mo cakava na veisau ka gadrevi me vakaturaga kina nomu itovo, veidokai ka matataka edua ka muri Jisu Karisito ena yalodina.
Au vakalougatataki iko mo vakaisosomitaka na veivakasaurarataki ena veivakamasuti, na veicati ena veikilai kei na veileti ena veisaututaki.
E bula na Kalou! Sai Jisu na Karisito. O koya e tu me ulu ni Lotu oqo. Eda sa Nona italai. Ena vukei keda o Koya meda yaco me Nona dautataro. Au sa vakadinadinataka ena yaca tabu i Jisu Karisito, emeni.