Mour ilo Raan eo ilo Kraist
Jisōs Kraist ej kōm̧m̧an bwe en pidodo n̄an kōj n̄an “mour ilo raan eo.”
Ekar juon raan obrak kōn būrabōļ ko rekajju im ejjeļo̧k kajjitōk kaki, raepokpok, ilo m̧wilaļ in katak. Ālkin leļo̧k juon kauwe em̧ōrā kōn ro im keidi er āinwōt “wūliej ko re mouj, ko rem̧m̧an bōtata ilikir, a ilowaan re lōn̄ kōn di in armej im nana otemjej,”1 Jisōs eaar bar kwaļo̧k jilu būrabōļ ko n̄an pojak ilo jetōb im āinwōt rikaļoor ro. Juon iaer eaar kōn barubōļ eo kōn virgin ro jon̄oul.
“Ilo iien eo aelōn̄ in lan̄ enaaj āinwōt jon̄oul virgin ro, rej bōk lamp ko aer, im ilo̧k bwe ren wōnm̧ae ļeo pālele.
“Im ļalem iaer re mālōtlōt, im ļalem iaer re bwebwe.
“Bwe ro rebwebwe ke rej bōk lamp ko aer, re jab bōk oil ņa ippāer:
“A ro re mālōtlōt rej bōk oil ilo aer kein ettein̄ ņa ippān lamp ko aer.
“Ke ļeo pālele e ru mwij tok, er otemjej rej mejki im kiki.
“Im n̄e lukkuun bon̄, juon lam̧ōj, Lo, ļeo pālele! Kom̧win itōn wōnmae e.
“Innām virgin ro otemjej rej jerkak, im kōm̧m̧ani lamp ko aer.
“Im ro re bwebwe re ba n̄an ro re mālōtlōt, Kom̧win letok n̄an kōm jān ami oil, bwe lamp ko am re nan̄in kun.
“A ro re mālōtlōt re uwaak im ba, Bōlen; kōm jāmin bwe kake: a kom̧win ilo̧k n̄an ippān ro rej wia im wiaik ami.
“Im ke raar ilen wiaik, ḷeo pālele ej itok; im ro rej dedeḷọk rej deḷọñ ippān ñan kwōjkwōj in pālele: im e kiil aor.
“Tokālik virgin ro jet rej barāinwō itok im ba, Irooj, Irooj, kwōn kapeļļo̧k n̄an kōm.2
“A e uwaak im ba, Em̧ool Ij ba n̄an kom̧, Kom̧ jaje n̄a.3
“Innām kom̧win ekil, bwe kom̧ jaje raan eo ak awa eo.4
Būreejtōn Dallin H. Oaks ekar kwaļo̧k ļōmņak in kajjitōk ko rej m̧ōttan ļo̧k itok eo an ļeo pālele:5 “Ta eļan̄n̄e raan in itok eo An en kar ilju? Eļan̄n̄e jejjeļā ke jenaaj ioone Irooj ilju—ilo ad m̧ōkaj mej m̧okta ak kōn itok eo jejjab kōtmene—ta eo jen kar kōm̧m̧ane rainin?”6
Em̧ōj aō katak jān en̄jake eo aō make bwe m̧aanjāppopo ilo jetōb n̄an itok eo an Irooj ejjab aorōk wōt ak ej iaļ eo wōt n̄an loe m̧ool in aenōm̧m̧an im m̧ōņōņō eļap.
Eaar juon raan ekar m̧ōļo̧ ke ikar m̧oktata ron̄ naan ko “ewōr am̧ kāānjer.” Kom̧ro kar ļeo ippa bwilōn̄! Ke kōm ej tūraip n̄an m̧weo ilo ikōn̄, im meļeļe ņuuj ko, būruwō eaar inepata kōn ļaddik ro jilu nejim̧.
Ilo ļōmņak eo aō ikar kajjitōk Jemedwōj Ilan̄, “inaaj mej ke?”
Jetōb Kwojarjar eaar unoojdikdik, “Aolep men renaaj EM̧M̧AN.”
Innām ikajitōk, “Inaaj ke mour?”
Bar juon alen, eaar itok uwaak, “aolep men renaaj EM̧M̧AN.”
Iaar pok. Etke iaar bōk ejja uwaak eo wōt n̄e imour ak imej?
Innām ejjab etto aolepān aō ekar obrak kōn aenōm̧m̧an ke iaar keememej: Jejjab aikuj in katakin ajri ro nejid ewi wāween jar. Raar jeļā kilen būki uwaak ko im aenōm̧m̧an jān jar. Kōm kar jab aikuj in kaiurļo̧k n̄an m̧weo n̄an katakin er kōn jeje ko rekwojarjar ak naan ko an rikanaan ro remour. Naan ko kar meļeļe kaki ko rej unjen kajoor im jeļāļo̧kjeņ. Jejjab aikuj kaiurļo̧k n̄an m̧weo n̄an katakin er kōn ukweļo̧k, Jerkakpeje eo, Jepļaaktok eo, karōk in lo̧mo̧o̧r, baam̧le ko indeeo, ak lukkuun katak eo an Jisōs Kraist.
Ilo iien in aolep katak ko an nokin in jota an baam̧le, iien ekatak jeje ko rekwojarjar, leļo̧k jar in tōmak, leļo̧k kōjeraam̧m̧an, jeere naan in kam̧ool, kōm̧m̧an im kōjeparok bujen, pād ilo m̧weo imōn Irooj, kōjeparok raan in Sabbath eaorōk—o, ewi aorōkin! Eaar ejjeļo̧k iien n̄an aer maanjappopo ilo jetōb n̄an aer ekajet. Jej aikuj aolep pillil rej wōtlo̧k, im jej aikuj menin kiiō!
Kōn wōt Jisōs Kraist im gospel eo An em̧ōj an bar jepļaaktok, n̄e ikar mej, baam̧le eo aō emaron̄ kar ineenōm̧m̧an, kajoor, im juon raan bar ro̧o̧ltok. N̄e imour, imaron̄ in bōk kajoor eo eļaptata ioon laļin n̄an jipan̄ leļo̧k, rejetak, im kemour eō. Ilo jem̧ļo̧kin, kōn wōt Jisōs Kraist, aolep men remaron̄ EM̧M̧AN.
Jej ekatak jān ad katak kōn Katak im Bujen ko ta meļeļein an naaj “EM̧M̧AN” āinwōt:
“Im ilo raan en, n̄e Inaaj itok ilo Aō wōj, būrabōļ in enaaj kūrm̧ool eo Iaar kōnono kake kōn virgin ro jon̄oul.
“Bwe ro remālōtlōt im rekar bōk m̧ool eo, im rekar bōk Jetōb Kwōjarjar bwe en aer ritōl, im rekar jab po ilo m̧oņ—em̧ool Ij ba n̄an kom̧, rejamin naaj juoklaļļo̧k er im joļo̧k er ilo kijeek eo, ak renaaj mour ilo raan eo.”7
Jisōs Kraist ej kōm̧m̧an bwe en pidodo n̄an kōj n̄an “mour ilo raan eo.” Mour ilo raan eo ejjab meļeļein kaļapļo̧k oran men ko jej kōtmāne in kōm̧m̧ani. Ļōmņak m̧ōk kōn juon baikūlaaj. Kōttōpar eo an menin ejjab n̄an kōm̧m̧an an men ko kilepļo̧k. Emaron̄ aiinitok bwe en kōm̧m̧an an meramļo̧k. Jej aikuj kapidodoiki, mije wōt jerbal ko ad, im erom̧ ro rej aiintok meram in Jisōs Kraist. Jej aikuj kwojarjarļo̧k n̄an bōk revelesōn.
Kajjien northwestern in Israel ej juon tōļ eaiboojoj emakijkij ņaetan “Toļ evergreen.” Toļ Karmel8 ej pād wōt im emaroro aolep-iiō kōn an ļap an em̧ōļo̧wiwi. Naajdik ej bōk jikin aolep raan. Āinwōt “m̧ōļo̧wi ko Karmel,”9 ilo ad kapukōt n̄an naajdik ad “kōn men ko rej dien reweeppān,”10 “men ko reddik im reļam waan,”11 naan in kam̧ool ko ad im naan in kam̧ool ko an ajri ro nejid renaaj mour!
Kiiō, bōlen kwomaron̄ ļōmņak “Ak Sister Wright, kwojjab jeļā kajjien baam̧le eo aō. Jej lukkuun kakkōt im jab kalimjek jabdewōt men āinwōt in.” Kwoj m̧ool. Ijjab jeļā kajjien baam̧le eo am̧. Ak juon Anij in iakwe, turiamo, kajoor, jeļāļo̧kijeņ, aiboojoj ejeļā.
Kajjitōk ko kwomaron̄ in kajjitōkin kake rej jen bōro ijo emetak emwilaļ in ilowaam. Ejja kajjitōk ko rej waļo̧k ilo jeje ko rekwojarjar:
“Maajta, kwō jab ļōmņak kōn an jako [baam̧le e aō] ke?”12
“Ewi aō kōjatdikdik?”13
Ta [inaaj] kōm̧m̧ane, bwe kōdo̧ in maron̄ in en em̧m̧akūt jān kaliboboik [eō]?”14
“Ewi ijo jenaaj lo mālōtlōt ie? im ewi jikin jeļāļo̧kjeņ?”15
“Ekōjkan an maron̄ bwe [in] maron̄ kūkki im dāpdep ioon men otemjej em̧m̧an?”16
“Irooj, ta eo kwoj kōņaan bwe in kōm̧m̧ane?”17
Innām eaar itok ukook ko rem̧m̧an:
“Kwōj tōmak ke ilo kajoor an Kraist n̄an lo̧mo̧o̧r?”18
“Irooj Eaar ke jiron̄ jabdewōt bwe ren aikuj jab bōk leen em̧m̧an eo An?”19
“Kom̧ro tōmak bwe [Ej] maron̄ kōm̧anm̧an men in ke?”20
“Kwōj tōmak ro ri kanaan ke?”21
“Kom̧ij ke tōmak ilo lo̧mo̧o̧ren an eo eaar kōm̧anm̧an kom̧?”22
“Eo ej Irooj in ekajet n̄an aolepen laļ E jāmin kōm̧m̧an wānōk ke?”23
Ro m̧ōtta rejitenbōro, jejjab maron̄ jeere oil ko ad, ak jemaron̄ jeere An meram. Oil in lamp ko ad rekar jab jipan̄ wōt kōm “mour ilo raan eo” ak maron̄ bareinwōt kōmeram iaļ eo ej tōl ro jej iakwe er n̄an ippā Rilo̧mo̧o̧r eo, eo eaar jutak “kōn pā ko repeļļo̧k n̄an bōk” er.24
“Āndein an Jeova ba; Dāpij ainikiōm jān jan̄ im mejām jān dānnin kōmjaaļaļ: bwe enaaj wōr oņān jerbal ko am̧, … im renaaj ro̧o̧ltok jān āne in ri kōjdat.
“Bwe ewōr kōjātdikdik n̄an am̧ ilju im jekļajJeova ej ba, im ro nejim̧ renaaj ro̧o̧ltok n̄an tōrerein ko aer.”25
Jisōs Kraist ej “kōjātdikdik n̄an am̧ ilju im jekļaj.” Ejjeļo̧k men ippād ak kar kōm̧m̧ane eļļe jān maron̄ tōpare m̧ool eo An im katok eo ej n̄an indeeo. E ej wūn eo bwe en jab jem̧ļo̧k bwebwenato in ad.26 Kōn menin jej “aikuj bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e [je] naaj bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin, lo, āindein Jemān ej ba: [je] naaj bōk mour indeeo.”27
Mour indeeo ej m̧ōņōņō indeeo. M̧ōņōņō ilo mour in, kiiō—mekarta mālijjon̄ ko ad rainin ak kōn wōt jipan̄ an Irooj n̄an ekkatak jāni im n̄an anjo̧ ioon—im ejjeļo̧k jon̄an m̧ōņōņō eo ilo mour eo ej itok. Dānnin kemjaaļal naaj kōm̧ōrāik, bōro ko rerub naaj maron̄ karben, ta eo ekar jako, im ej waļo̧k, men ko jej kea kaki naaj ņa mejļaer, baam̧le ko naaj bar koba, im aolep men ko an Jema naaj ad.28
Reilo̧k n̄an Anij im mour29ej aō naan in kam̧ool ilo āt eo ekwojarjar im ejitōnbōro “Seperd eo im Ri lale [ad],”30Jisōs Kraist, amen.