Eo e Jerwaan im Iaļ eo Ej Tōl Ļo̧k N̄an M̧weo
Kālet ko reppen remaron̄ in bōk lo̧k eok jen Rilo̧mo̧o̧r im Kabun̄ eo An, Maajta in Kemour eo ej jutak ilo iaļ eo ej tōl ļo̧k n̄an m̧weo, kauruwainene eok.
Juōn Armej Ewōr Ruo Nejin Ļaddik
Jet rekōn kūr bwebwenato eo em̧m̧antata ekadu kar kwaļo̧ke.1 Kōnke emōj ukōte n̄an to̧ujin kajin ko ipeļaakin laļ, menin emaron̄ bwe ilo kar ruo to̧ujin iiō ko remoot ļo̧k, Al eban tulo̧k n̄e ejjeļo̧k ekōnono kōn bwebwenato in juon jikin ilo laļ in.
Menin kar bwebwenato kake jān Jisōs Kraist, ad Rilo̧mo̧o̧r im Ripinmuur, eo im eaar itok n̄an laļ “n̄an lo̧mo̧o̧ren ta eo eaar jako.”2 E ej jino kōn kōn naan kein re pidodo: “Juon em̧m̧aan eo ewōr ruo nejin ļaddik.”3
Kiiō jej ekkatak kōn juon aetwerōk eo erubbōro. Likao eo juon4 ej jiron̄ ļo̧k jemān ke ejemļo̧k an mour ippān ilo m̧weo. E ej kōņaan anemkwoj eo an. E ej kōņaan likūt ilik manit eo im katak ko ro jinen im jemān. E ej kajitōk m̧ōttan jemļo̧k ko—kiiō.5
Komaron̄ ke kōļmenļo̧kijen kōn ta eo jemān ekar en̄jaake ke ekar ron̄ menin? Ke e ekar jeļā bwe ta eo nejin eaar kōņaan eļapļo̧k jān jabdewōt men eaar aikuj bwe en likūt baam̧le eo im bōlen jamin bar jepļaak?
Karōk eo Eļap
Eo nejin ekar bōlen kar en̄jaake juon irūj lo̧jjie eļap im ekaitoktok. Āliktata, e eaar etal make ļo̧k iaan. anemkwoj jān pedped in katak ko im kien ko an manit in jodikdik eo an, e emaron̄ kar ilo āliktata kōm̧m̧ane kālet ko an make ijelo̧kin kar kipel jen ro jinen im jemān. Ejjeļo̧k bar bōd. E emaron̄ in kar pād wōt ilo an bōk e juon lōmņak in-āinwōt jukjukin amnake im mour kōn jon̄ak ko an make.
Tōpar ilo juon aelōn̄ eo ettoļo̧k, e ekar m̧ōkaj in kōm̧m̧an jerā kāāl im jino mour kōn mour eo im eaar baj ettōņake aolep iien. E emaron̄ kar juon eo ej makmake iaan elōn̄, bwe e eaar joļo̧k jāān lo anemkwoj. Ro jeran rekāāl—ri bōk jolet in an e jerwan—kar jab ekajet e. Rekar keemem, kapokpoke, im rie kālet ko an.6
Eaar ke wōr social media ilo tore eo em̧ool, e emaron̄ in kar kanni peij ko kon pija in man̄ka ko in an ro jeran ettōn̄ dikdik: #Livingmybestlife! #Neverhappier! #Shouldhavedonethislongago!
Juon N̄ūta
Ak bade eo eaar jab jemļo̧k—ejeja an kain eo. Ruo men ko raar waļo̧k: moktata, e eaar maat an m̧ani, im kein karuo, juon n̄ūta eaar pedjake āneeo.7
Ke ej ļapļo̧k būrablōm̧ eo, e ekar loļn̄o̧n̄. Bar juon alen jab bōjrak, lan̄lōn̄ eļap kiō ejjab maron̄e juon m̧ōn̄ā, jen make e ļo̧k juon jikin im jokwe. Ekōjkan an naaj mour?
E ekar lukkuun jouj n̄an ro jeran—renaaj ke jipan̄ e kiō? N̄a imaron̄ in loe e ej kajitōk kōn jiddik jipan̄—tōrein—mae iien e enaj bar make ūn̄n̄are pein.
Jeje ko rekwojarjar rej jiron̄ kōj, “Ejjeļo̧k armej eaar leļo̧k n̄an e.”8
Bōbweer n̄an pād im mour, e ekar lo juon ri kallib eaar kōjerbal e n̄an naajidik piik.9
Lukkuun kwōle kiō, kar jojoļāār im ajjimakeke, likao in bōlen eaar ļōmņak kōn wāween an men ko maron̄ kar etal im nana, lukkuun bōd.
Ekar jab baj wōt juon lo̧je ejjeļo̧k kobban im eaar kainepataik e. Ekar juon jetōb eo ejjeļo̧k an̄ūn. E eaar lukkuun m̧ool bwe m̧our kōn ikdeelel ko an laļ remaron̄ in kar kam̧ōņōņō e, bwe kien ko re wānōk raar menin la tipn̄ōl n̄an m̧ōņōņō eļap. Kiō e ekar jeļā. Im o, ta wōņeen eo ekar kōļļāiki n̄an jeļā eo!10
Ke ej ļapļo̧k an kwōle ilo mour in kanniek im jetōb, ļōmņak ko an rekar ro̧o̧l n̄an jemān. E emaron̄ ke jipan̄ e ālkin aolepen ta eaar waļo̧k? Men̄e eo ettā tata iaan ri jerbal ro an jemān ewōr kijen m̧ōn̄ā im im̧ōn jen ļan̄ ko.
Ak bar jepļaak n̄an jemān?
Jāmin n̄an Jidik.
Kwaļo̧k n̄an armej in jikin eo an bwe e eaar joļo̧k m̧weiuk ko an?
Ejjab maron̄.
Jelm̧ae ro rūturin ro rekar kakkōl e ke e bwe e eaar kajook baam̧le eo an im rube būruwōn ro jinen im jemān? Bar jepļaak ļo̧k n̄an ippān ro jeran rōrūtto ālkin kar kōnbar kōn wāween an kar anemkwoj?
Jab maron̄e.
Ak kwole, ajimakeke, im make iaad enaaj jipan̄ kōj—mae iien.”11
Ekar jeļā ta eo ej aikuj kōm̧m̧ane.
Bar Jepļaaktok
Kiiō jen kōtļo̧k bwe ren etal n̄an ippān jemeer, m̧aajta eo erub-būruwōn an m̧weo. Jete bukwi, bōlen taujin, in awa ko ekar joļo̧k n̄an inepata kōn likao eo nejin?
Jete ko iien e ej erreilo̧k n̄an ejja iaļ eo wōt likao eo nejin ekar bōke im mour im kememej jako eo ekar en̄jaake ke likao eo nejin eaar etal jene? Jete ko jar ekar wujlepļo̧k ilo bon̄, kajitōk ippān Anij bwe likao eo nejin en jab maron̄ jorrāān, bwe e en maron̄ loe m̧o̧o̧l, bwe e en maron̄ bar jepļaak?
Innām, juon raan, eo jemān ekar erreilo̧k n̄an iaļ eo eajjimakeke—iaļ eo tok n̄an m̧weoim kar loe juon jekjek in armej ej itok n̄an e.
Menin emaron̄ ke?
Men̄e kajjojo raar juon iaļan ilo̧k reļap, eo jemān ekar m̧ōkaj an jeļā ke ej ļaddik eo nejin.
E eaar ettōr n̄an e, eaar atbokwoje im kar mejān maiki.12
“Jema,” eo nejin eaar ba ilo naan ko eo eaar ekkatak ālij in ba juon to̧ujin katten, “I ar kōm̧anm̧an nana ņae jimor lan̄ im kwe. Ij patkake bwe ren likūt eō nejim. Aolep aō kajitōk ej bwe kwōn bōk eō einwōt juon am ri jerbal.”13
Ijoke jemān ekar leļo̧k wōt jiddik iien bwe en kadedeļo̧k. Dān in kōmjalaal ilo mejen, ej kakien ro rikarejeran: “Bōktok liboro eo em̧m̧antata ilo m̧ween im likūti ņae ioon aeran nejū. Likūt juon riin̄ ilo addiin pein im sandal ilo neen. Kōm̧m̧ane juon iien m̧ōn̄ā n̄an kemeeme. Nejū ekar jepļaaktok!”14
Juon Kemeem
Ilo opij eo aō ej etoto juon uno pija jen rijin̄n̄a in German eo Richard Burde. Harriet im N̄a em̧m̧an ippemro jin̄a in. Menin ej pijaik juon iien eo epidodo jen būrabōļ eo an Rilo̧mo̧o̧r ilo juon kōļmenļo̧kjeņ emwilaļ.
Tōre eo etin aolep rej lan̄lōn̄ kōn jepļaaktok eo an eo nejin, juon ekar jab—eo jein erūtto.15
E ekar ineek juon pakij in en̄jaake.
E ekar pād ijen ke eo jatin ekar kajitōk e jolet eo an. E ekar kam̧o̧o̧l jinoin tata eddo eo eļap in būrom̧ōj an jemān.
Jen iien eo jatin ekar jako, e ekar kajjieon̄ in bo̧ur eddo ko an jemān. Aolep raan, e ekar jerbal n̄an bar kōro̧o̧l tok bōro erub būruwōn jemān.
Im kiō, ajri jabde in ear ro̧o̧l tok, im armej rejjab maron̄ bōjrak aer eļļo̧k n̄an in jatin im eaar jum̧ae.
Aolepen iiō kein, ej jiron̄ jemān, “ejjeļo̧k juon iien I ar m̧akoko in kōm̧m̧ane juon men kwar kajitūkin eō. Ejjeļo̧k ilo aolep iien, kwoj jan̄in kar kemeeme eō.”16
Jemān ekar uwaak, “Nejū, men otemjej aō am̧! Menin ejjab kōn keid jinōkjeej ko ak kemeem ko. Menin ej kōn kemour. En̄in ej iien eo kōj wōj eaar kōjātdikdik n̄an aolepen iiō kein. Jatim eaar mej im ebar mour! E eaar jōbwābwe ak kiiō em̧ōj loe!17
Juon Būrabōļ n̄an Iien in Ad
Ro jeiū im jatū rejitōnbōro, ro jera, aolepen būrabōļ ko an Rilo̧mo̧o̧r, menin ejjab baj wōt kōn armej ro raar mour etto. Ej kōn kwe im n̄a, rainin.
Wōn ilubwiljid ejjan̄in kar ilok jen iaļ in kwojarjar, bwebwe an ļōmņake ke jej maron̄ pukōte eļapļo̧k m̧ōņōņō n̄e jej kōm̧m̧an kōņaan ko ad make?
Wōn ilubwiljid ejjan̄in kar en̄jake ettā bōro, bōro-erub, im kōņaan jeorļo̧k bōd im tiriamo?
Bōlen jet remaron̄ kar ļōmņak, “ej ke maron̄ bar jepļaak tok? Inaaj ke jon̄jon̄ n̄an indeeo, dike, im makokoki jen ro jera mokta. Em̧m̧an ke pād wōt im baj jebwābwe? Elemen en̄jaake eo an Anij elan̄n̄e Ij kajjieon̄ in bar jepļaak tok?”
Būrabōļ in ej letok n̄an kōj uwaak eo.
Jemedwōj Ilan̄ enaaj ettōr n̄an kōj, Būruwōn elutōk ļo̧k kōn iakwe im tiriamo. E enaaj atbo̧kwōje; kalibbubu aerad kōn m̧ōttan nuknuk, juon riin̄ ilo adiin peid, im sandal ilo need; im kean̄, “Rainin jej keemem! Bwe ajiri in nejū, eo im eaar mej, eaar bar ro̧o̧l tok n̄an mour!”
Lan̄ enaaj lan̄lōn̄ ilo jepļaaktok eo ad.
Lan̄lōn̄ ilo Eḷap Jān Maron̄ in Ba im E Obrak kōn Aiboojoj
I maron̄ ke bōk juon iien kiō im kōnono n̄an kom kajojo?
Jekdo̧o̧n ta eo emaron̄ kar waļo̧k m̧okta ilo mour eo am̧, ij ainikien im kean̄ kōn naan ko an jera eo ejitōnbōro im Rijjilōk Elder Jeffery R. Holland: “Menin eban maron̄ n̄an am̧ rumļo̧k laļ jen romaak in meram eo ejjeļo̧k jemļo̧kin an pinmuur im katok an Kraist.”18
Kālet ko reppen remaron̄ in bōk lo̧k eok jen Rilo̧mo̧o̧r im Kabun̄ eo An, Maajta in Kemour eo ej jutak ilo iaļ eo ej tōl ļo̧k n̄an m̧weo, kauruwainene eok. Im kōm āinwōt membōr ro an Kabun̄ eo an Jisōs Kraist kōmij kappukōt n̄an ļoor waanjon̄ak ko An im bokwōj eok āinwōt am būratōr im jejtōr, āinwot jeram. Jej lan̄lōn̄ im kememe ippam̧.
Jepļaaktok eo am̧ ejjāmin joļo̧k kōjeramman ko an ro jet. Bwe jinōkjeej an eo Jemān ejjeļo̧k jemļo̧kin, im ta eo leļo̧ke n̄an juon eban joļo̧k jiddik in maanje eo an ro jet.19
Ij jab ba bwe bar ro̧o̧l tok ej juon men epidodo n̄an kōm̧m̧ane. Ij maron̄ kam̧o̧o̧l kōn menin. Menin emaron̄, ilo m̧o̧o̧l, einwōt juon kālet eo epen tata kwonaaj kōm̧m̧ane.
Ak ij kam̧o̧o̧l bwe iien eo wōt kwoj kālet n̄an bar jepļaak im etetal ilo iaļ in an Am̧ Rilo̧mo̧o̧r im Ripinmuur, kajoor eo An enaj deļo̧n̄e mour eo am̧ im ukote.20
Enjeļ ro ilo lan̄ rej lan̄lōn̄.
Im barāinwōt kōj, baam̧le eo am̧ ilo Kraist. Ālkin aolep men, jej jeļā wāween rōt n̄an āinwōt juon eo e jerwaan. Jej aolep kajojo pedped ion ejja wōt kajoor in pinmuur eo an Kraist. Jej jeļā iaļ in, im jej naaj etetal ie ippam̧.
Jab, iaļ in ad eban anemkwoj jen būromōj, en̄taan, liajlōļ. Ak kōj ar jab tōprak tok ijin “jān naan an Kraist kōn tōmak edim ilo E, atartar wōt ioon tōllo̧ke ko an Eo ekajoor n̄an lo̧mo̧o̧ren.” Im ippān doon jej “aikuj bun̄m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im [armej] otemjeļo̧k.”21 Ippān doon, jej naaj “lan̄lōn̄ kōn lan̄lōn̄ eļap jān maron̄ in ba im e obrak kōn aiboojoj,”22 bwe Jisōs Kraist ej ad kajoor!23
En̄in ej jar eo aō bwe kajojo iaad wōj en maron̄ ron̄, ilo būrabōļ in emwilaļ, anikien Jemen ej kūr kōj n̄an deļon̄e iaļ ej tōl ļo̧k n̄an m̧weo—bwe kōj jen maron̄ bōk peran n̄an ukweļo̧k, bōk jeorļo̧k bōd, im ļoor iaļ eo ej tōl lik ļo̧k kōj n̄an ippen Anij eo ej tiriamo. Jān menin ij kam̧ool im likūt ippāmi kōjeram̧m̧an ko aō ilo etan Jisōs Kraist, amen.