Jenaj Kautej Nōn Eman Eo
Elap ad jeramman bwe jejālā aolep men jejālā kōn wōt Josep Smith, rikanaan eo ilo epepen in āliktata in iien.
Ro jeiū im jatū jitōn bōro, eļap aō ettā bwe imaron̄ pād ippāmi jibbon̄ rainin. Ij jar bwe Irooj enaaj kōjeram̧m̧an eō.
Māj kā meja rejjab āinwōt m̧okta. Ikar etal in lo taktō in māj, im iaar ba, “Ijjab maron̄ lo teleprometer eo.”
Im liin ekar ba, “Ekwe, mej kane mejam rōmor. Reban maron̄ naaj oktak.”
Ak inaj kōmane jon̄an wōt aō maron̄.
Ikōņaaan kwaļo̧k n̄an eok jet men ko eto aer pād ilo kōļmenļo̧kjen eo aō. Ilo jejjo allōn̄ ko remootļo̧k Rikanaan Josep ekar pād ilo kōlmenļo̧kjen eo aō. Ikar jijjōt im etale eddo eo an ekabwilōlōn̄ ilo an erom rikanaan eo an, tarlep in epepen in iien in.
Ij lōmnak kōn ewi jon̄an ad membōr ro an Kabun̄ eo an Jisos Kraist im Armej ro Rekwojarjar ilo Raan ko Ālikatata jeramman bwe Josep Smith, juon laddik eo ekar likkuun ikdelel n̄an jela ta eo ej aikuj kar kōmmane n̄an jeerlok in jerawiwi ko an, kar lo an peran n̄an etal n̄an bukun in wōjke ko rebake mweo imōn ilo Palmyra, New York, im ijo ear bukwelōlō im jar,im—jen naan ko an make—alen kein kajuon kwalok ainikien im jar (lale Josep Smith—Bwebwenato 1:14).
Ilo tōre eo, ke Josep ej door bukiien ijo jej na etan Sacred Grove, lan̄ ear pelļo̧k. Ruo armej, rōmeramļōk jen aļ ilo raelep, rar waļo̧k n̄ane. Juon ekōnono n̄an e im ba, “[Josep, en̄in ej Nejū Jitōnbōro. Ron̄jake E!” (Josep Smith—Bwebwenato 1:17). Āindein jinoin jepļaaktok eo an Tarlep in gospel eo ejeļo̧k jemļo̧kin an Jisōs Kraist.
Kōn Jisos, ad Rilo̧mo̧o̧r im Ripinmuur, kar konono n̄an laddik eo Josep im jinoe epepen in ilo tōreān in iien jej kiō mour ie, jej al kake, “Jenaj kautej nōn eman eo bwe ear konon ibben Jeova!” (“Jenaj Kautej Nōn Eman Eo,” Al ko Al in Ajri, no. 32). Jej kammo̧o̧lol Irooj kōn Josep Smith im kōn an peran n̄an etal n̄an bukun wōjke ko ilo 1820, ijo ebaake mweo imōn ilo Palmyra, New York.
Elap aō koļmenļo̧kjen kōn aolep men kabwilōn̄lōn̄ kein wōj jej jelā kaki im aolep men kein ewōr ipād. Ro jeiū im jatū jitōnboro, naan in kamool eo aō n̄an kom̧ ilo jibbon̄ in rainin ej kōn an lap ad likkuun jeram̧m̧an in jelā aolep men ko jej jelā kaki kōn wōt Josep Smith, rikanaan eo an epepen in āliktata in iien in.
Ewōr juon ad melele kōn unleplep in mour, kōn wōn kōj.
Jej jelā wōn in Anij; jej jelā wōn eo Rilo̧mo̧o̧r, kōnke ewōr ipād Josep, eo ear etal n̄an bukun wōjke ko āinwōt ļaddik, kapukōt, jeorļo̧k in jerawiwi ko an.
Ij lōmnak ej juon iaan men ko rekabwilōn̄lōn̄ im aiboojoj tata jabdewōt ion laļin remaron̄ jeļā—ke Jemedwōj Ilan̄ im Irooj Jisos Kraist raar kwalok er make ilo raan kein āliktata im bwe Josep eaar ruttoļo̧k n̄an an kōjeplaaktok tarlepen gospel eo an Jisos Kraist im ejjelok jemļo̧kin.
Ewōr ippād Bok in Mormon eo Ej juon menin letok emman tata im aiboojoj n̄an membōr ro an Kabun̄ in. Ej bareinwōt juon kamool, bar juon kallim̧ur bwe Jisos ej ri Kraist eo. Ej pād ippād kōnke Josep ekar wānōk in kar etal in bōk pileej ko, kar bōk im̧we jen lan̄ n̄an ukoti kōn menin letok im kajoor eo an Anij im n̄an kajedede bok in n̄an aolepen lalin.
Ak ennaan in aō jibbon̄ in rainin epidodo, emwilal, im eobrak kōn iakwe n̄an Rikanaan Josep Smith im n̄an aolep, ro jeiū im jatū, ro raar rejtake e im kar mōnōnō in rejtake e ilo an kar jodikdik wōt.
Jibbon̄ in rainin ikōņaan kwaļo̧k aō nōbar n̄an jinen. Aolep iien ij koļmenļo̧kjen kōn jon̄an an em̧m̧an ke Josep eaar rool tok n̄an m̧weo jen en̄jake eo ilo Bukun Wōjke ko Rekwojarjar im kōnaanik jinen kōn ta eo ear walok, Lucy Mack Smith eaar tōmak e.
Ij kammo̧o̧lol kōn jemen im laddik im leddik ro jein im jatin im baamle eo an, ro raar rejetake e ilo eddo laplap in Irooj eaar door ion n̄an erom rikanaan n̄an kōjeplaktok tarlepen kojpel eo an Jisos Kraist ejjelok jemļo̧kin bar juon alen ion laļin.
Kōn menin kamool eo aō ilo jibbon̄ in rainin ej bwe Jisōs Kraist ej Rilo̧mo̧o̧r eo im Ripinmuur eo an laļ. Ij barāinwot jelā bwe Jemedwōj Ilan̄ im Irooj Jisos Kraist raar waļo̧k im kōnono n̄an Josep im kopooje n̄an an erom juon rikanaan.
Ij bwilōn̄, im ij tōmak bwe kom barāinwōt, kōn jon̄an ad jeram̧m̧an n̄an jelā kōn ta unleplep eo ad ilo mour, jej ta ijin, ta eo jej aikuj kajjeon̄ kōmmane im kadedeļo̧k ilo mour kein ad kajjojo raan. Jej pād ilo juon tōre n̄an kōbooj kōj make, juon raan iļo̧k juon, bwe jen emmanļo̧k, bwe jen joujļo̧k, bwe en ļapļo̧k ad bojak mae raan en, eo enaaj itok, elan̄e jenaaj bar jeplaakļo̧k imaan mejen Jemedwōn̄ Ilan̄ im Irooj Jisos Kraist.
N̄an n̄a ej ebaak tok wōt. Mōttan jidik inaaj 95. Ajiri rā neju rej jiron̄ iō rej kile aō likkuun rutto ļo̧k ilo ejja raan ko wōt, ak ej em̧m̧an wōt. Ij kajjeon̄ jon̄an wōt aō maron̄.
Ak iumin epaak 50 iiō ko, ro jeiū im jatū, iaar jeram̧m̧an n̄an toparļo̧k aolepen laļin ilo kur ko aō āinwōt Ritōl Eutiej ilo Kabun̄ in. Ekar juon kōjeram̧m̧an laplap. Ij lōmnak mōttan wōt kar jidik bwe in tōparļo̧k aolepen lalin. Iaar kweļo̧k ippen membōr ro an Kabun̄ in ilo aolepen lalin.
O, ewi jon̄an aō iakwe kom. Ekar juon en̄jake elap an kar emman—n̄an kalimjōk mejami, ped ijo kwōj pād ie, im en̄jake iakwe eo am n̄an Irooj im n̄an Jeplaaktok eo an kojpel eo an Jisos Kraist.
Jemedwōj Ilan̄ en mije wōt kōj kiiō im kōjeram̧m̧an aolepen wonmaanļo̧k ko ilo kweilo̧k in. Im bwe jen bōke Jetōb eo an Irooj ilo buruwōd, im bwe en wōr ad iakwe n̄an gospel eo an Jisos Kraist—Rilo̧mo̧o̧r eo ad jej iakwe, Irooj Jisos Kraist—en laplok ilo ad kajjeon̄ jerbal n̄ane im kōjparok kien ko An im en laplok ad āinwōt E jen wōt ad itok n̄an kweilo̧k in eļap. Ijoko otemjej komij pād ie ilo pelaakin laļin, Anij en kōjeramman kom. Jetōb an Irooj en pād ippemi wōj aolep. Jen en̄jake kajoor in lan̄ ilo ad jar ippen doon ilo m̧wen̄an in an kweilo̧k in eļap.
Ij likut aō naan in kamool im kamool bwe ijelā ke Jisōs Kraist ej ri Kraist eo. E ej ad Rilo̧mo̧o̧r, ad Ripinmuur. E ej juon m̧ōttad em̧man tata. Ilo āt eo ekwojarjar etan Jisōs Kraist, amen.