Kajoor eo an Jisōs Kraist ilo Mour ko ad Aolep Raan
Kein jipan̄ n̄an kajoor en ad ej tōmak ilo Jisōs Kraist ilo ad kappukōt n̄an itok n̄an E kajjojo raan im aolep raan.
Ro jeiū im jatū jitenboro, en̄in ej Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ej juon menin aō lan̄lōn̄ ilo ad koba ippān doon ilo Kabun̄ in An. Ij kam̧m̧olol bwe Bureejtōn Russell M. Nelson ekar kakeememeje kōj bwe en jim̧we ad ba etan Kabun̄ in an Irooj bwe jen keememej an wōn Kabun̄ in im an wōn katak ko jej loori.
Būreejtōn Nelson eaar kwaļo̧k: “Ilo raan kane rej itok, jenaaj lo kajoor eo elap an Rilo̧mo̧o̧r me laļ in ejjan̄in kar loe. … Enaaj kwaļo̧k jim̧we ko ejjeļo̧k jon̄an, kōjeraam̧m̧an ko, im kabwilōn̄lōn̄ ko ioon ro rej tiljek.”1
Juon iaan men ko eļap am jeram̧m̧an kake kōn n̄a im kōrā eo ippa, Renee, ej n̄an jelā kajjien Armej ro Rekwojarjar ro kōm̧ro ej jerbal ippāer. Kōm̧ro ej ron̄ bwebwenato ko aer, kōm̧ro ej loe ta ko rejako, kōm̧ro ej kwaļo̧k am̧ro būromōj ipper, im kōm̧ro ej m̧ōņōņō kōn tōparak ko aer. Emōj ad kam̧ool kōn elōn̄ kōjeraam̧m̧an ko im kabwilōn̄lōn̄ ko Rilo̧mo̧o̧r ekar likuti ioon ro retiljek. Emōj am̧ro ioon armej rot en rej ioon men ko jab maron̄i, ro rar en̄taan kōn men ko eben ļōmņak kaki.
Jekkar bar loe kajoor eo an Riilo̧mo̧o̧r ippān juon kōrā eo leo ippān ekar jako ilo aer kar kōm̧m̧ane jerbal eo an Irooj ilo Bolivia.2 Jekkar bar lo ippān juōn jiron̄ in Argentina me ekar wōtļo̧k n̄an iumwin juōn train im ar jako neen, kōn wōt an armej eo kar kōnaan koote cell eo nejin.3 Im jemen eo me ejelok ippān, e eo im kiō ej aikuj jipan̄ im kōkajoor leddik eo nejin ālikin juon m̧wil enana epen kōmeļeļeik. Jej loe ippān baamle ko me ar jako m̧ōko m̧weir im men ko m̧weier ilo kar kijeek ko ilo Chile ruo raan mokta jen kar Kūrijmōj eo ilo 2022.4 Jej bar loe ippān ro rej en̄taan ālikin juon jepel eo enana im ro ejeļo̧k ruweer rej ioon kakkure ko.
Ta eo ej lelok kajoor n̄an aer maron̄ jelmae men rot kein repen? Ta eo ej lelok bar juon kajoor eļapļo̧k n̄an waanmaanļo̧k elan̄e aolep men rejino jako?
Ij loe ke mottan kajoor in ej itok wot jen tomak ilo Jisōs Kraist ilo ad m̧ool in kappukōt n̄an itok n̄an E kajjojo im aolep raan.
Rikanaan Jacob ekar katakin, “Im E ej itok ilo laļ in bwe en maron̄ lo̧mo̧o̧ren aolep armej n̄e renaaj eo̧ron̄ ainikien; bwe lo, eaar en̄taan kōn metak ko an aolep armej, aaet, metak ko an aolep mennin mour, em̧m̧an, kōrā, im ajri, ro rej jān nokwe eo an Adam.”5
Jet iien, tōmak ilo Jisōs Kraist emaron̄ juon men jejab maron̄e, im maron̄ pen dāpij tōmak in. Jemaron̄ ļōmņak ke n̄e jej itok n̄an Kraist jej aikuj maron̄ eo, kajoor im weeppān eo ejeļo̧k ippād im jej jab maron̄ loe kajoor eo n̄an kōm̧m̧ane aolepen. Ak men eo ij katak jān aolep armej rein bwe ilo ad tōmak ilo Jisōs Kraist enaaj kōm̧m̧an bwe en wōr ad kajoor n̄an jino ial in. Jet iien jemaron̄ ļōmņak, “Ij aikuj kajimwe mour e aō mokta jen aō itok n̄an ippān Jisōs,” ak lukkuun m̧ool eo ej bwe jej itok n̄an ippān Jisōs n̄an kajim̧we mour ko ad ilo E.
Jejjab itok n̄an ippān Jisōs kōnke jeweppān. Jej itok n̄an E kōnke jej likjab im ilo E jemaron̄ “in weeppān.”6
Elmen ad jino kwaļo̧k ad tōmak jidik kōn jidik kajjojo raan? N̄e baj n̄a ij jino in jibbon̄: Ke ij jerkak, ijjeļo̧k in aō lale telephone e aō, ij jar mokta. Men̄e juōn jar ekadu. Innām ij riiti juon eoon. Elukkuun jipan̄ n̄a ilo bujen ko aō kajjojo wiik ilo aō bōk kwojkwoj eo n̄an “keememej E iien otemjej.”7 N̄e ij jino raan eo aō kōn jar im jeje ko rekwojarjar, ekōm̧m̧an bwe in “keememej E” n̄e ij kalimjōke telephone eo aō. Ekōm̧m̧an bwe in “keememej E” ke ij jelmae būrablōm im aitwerōk ko, ij kajeon n̄an jelmae āinwōt an nej Jisōs jelmae.
N̄e ij “keememej E,” ekōm̧m̧an menin aō kōņaan oktak, im ukweļo̧k. Ij pukōte kein jipan̄ eo n̄an kōjparok bujen ko aō, im ij en̄jake im̧we eo an Jetōb Kwojarjar ilo mour eo aō “im kōjparok kien ko An ko Eaar liļo̧k n̄an [n̄a]; bwe jetōb eo An en maron̄ pād [ippa] iien otemjej.”8 Ej jipan̄ iō niknik n̄an jemļo̧kin.9 ak emaron̄ bar ilo jemļo̧kin juon raan. Im ilo raan ko ij likjab n̄an keememej E aolepen raan eo, E ej pād wōt ijōn, im iakwe wōt iō im ej ba ej, Em̧m̧an Wōt, komaron̄ bar kajeon ilju.
Mekarta jej jab weeppān ilo eo ad keememej E, Jemedwōj Ilan̄ eo eļap iakwe ippān ejjab likjab jān an keememej kōj.
Juon bōd ekkā ad kōm̧mane ej n̄e jej ļōmņak ke ko̧jparok bujen ko, ak kalimuur ko jej kōm̧m̧ani ippān Anij, ej āinwōt ne jej ba ej juon kōļļā jej kōm̧m̧ane Ippān: Ij pokake, im E ej kōjparok n̄a jān jabdewōt nana ko bwe ren jab waļo̧k n̄an n̄a. Ij kōļļā juon m̧ōttān jonoul, im iban luji jerbal eo aō ak kijeek eban kakkure m̧we mō. Innam n̄e men ko rejjab waļo̧k n̄an ta ko jekar kōtmeni, jej jan̄ n̄an Irooj, “Kwō jab ḷōmṇak kōn n̄a aō jako ke?”10
Bujen ko ad rejjab kein wia kake; rej jipan̄ kōj oktak.11 Kōn bujen ko aō ij bōk erreo, kajoor eo an Jisōs Kraist, eo ej kōtļo̧k bwe in erōm̧ juon armej ekāāl, n̄an jeorļo̧k bōd kōn ta eo epen jeorļo̧k bōd kake, n̄an anjo̧ ioon men ko jejjab maron̄. Kemeemej Jisōs Kraist kōn ikdeleel iien otemejej lukkuun kajoor; ej koba iki tok kajoor in ñan “kōjparok kien ko An ko Eaar liļo̧k n̄an [n̄a];.”12Ej jipan̄ iō bwe in jouj eļapļo̧k, ettōn̄dikdik ilo ejeļo̧k un ko, n̄an juon eo ej rikaeņōm̧m̧an,13jab eļļo̧k n̄an aitwerōk ko, n̄an kōtļo̧k bwe Anij en anjo̧ ilo mour eo aō.14
N̄e metak ko ad ak metak ko an ro me elukkuun lap ad iakwe rej ļap jān jon̄an eo jej jab maron̄ bōke, keememej Jisōs Kraist im itok n̄an E emaron̄ kamera eddo eo, kameeo̧eo̧ik bōro eo, im kadikļo̧k metak eo. Kajoor eo in ekar kōtļo̧k bwe juon baba eo en kōm̧m̧an eļā jan jon̄an eo emaron̄e n̄an kaketak leddik eo nejin ilo metak in anbwin im kōļmenļo̧kjen ilo an kar jako neen.
Ke Elder Soares ekar loļo̧k Argentina Juun eo ļo̧k im kajjitōk ippān Flavia kōn joreen eo eļap ekar waļo̧k n̄an e, ekar uwaak kōn m̧ool, “Ikar en̄jake pok, jab m̧ōņōņō, illu, im dike ke [ekar waļo̧k]. Juon men ekar jipan̄ n̄an ej ilo aō kar jab kajjitōk, ‘etke n̄a?’ ijeļo̧kin ikar kajjitōk ‘ta unin?’ … Menin ekar juon men eo ekar bokļo̧k n̄a bwe in epaakeļo̧k ro jet im Irooj. … Ijeļo̧kin aō katoļo̧k n̄a jān E, ikar aikujin dāpdāp ilo E.”15
Bureejtōn Nelson ekar katakin: “Nōbar eo kōn kōjparok bujen ko ippān Anij ej kajoor in lan̄—kajoor eo ej kōkajoor kōj n̄an jutak ņae apan̄ ko ad, kapo ko, im būrom̧ōj ko. … Aaet, rikōjparok bujen ro remaron̄ bōk kain kakkije.”16 Kain kakkije im aeņōm̧m̧an eo in ikar loe ilo mejen kōrā eo emej leo pāleen, mekarta metak eo ilo bōro ekar itok jān an burom̧ōj im emelļo̧k leo ippān aolep raan.
Kalim̧uur Ekāāl ej kwalok kōn juon iien Jisōs im Rikalo̧o̧r ro an rekar pād ioon juon tima:
“Im e buñ ñat, im ṇo ko rej juur ioon wa eo. …
“Im Ej … m kiki ioon pitōn: im rej kọruj E, im ba n̄an E, Ri Kaki, kwō jab ḷōmṇak kōn am jako ke?
“Im Ej jerkak, im kauwe kōto, im ba n̄an loṃaḷo, kwōn jab M̧akūtkūt, kwōn lur. …
“Im E ba n̄an er, Etke koṃij lōḷn̄ọn̄? im āinwōt koṃ jañin tōmak ke?”17
Aolep iien ej itok limoin n̄a kōn bwebwenato in. Irooj ekar ke kōtmene ke rej aikujin kar kōjerbale tōmak eo aer n̄an kalūr kōto eo? N̄an kapōjrak kōto eo? Tōmak ilo Jisōs Kraist ej en̄jake in aeņōm̧m̧an n̄an jutak ņae kōto ko, ilo an jeļā bwe jeban jako kōnke E eo ilo tima eo ipped.
En̄in ej kain tōmak eo jekar loe ilo am̧ro kar loļo̧k baamle ko ālikin kijeek ko ilo Chile. M̧ōko m̧weer rekar jako aolepeer n̄an laļ; ekar jako aolep m̧weieer. Ak ilo iien eo jekar etetal ilo kar ijoko m̧ōko m̧weer ekar pād ie im rekar ba n̄an kōm̧ kōn en̄jake ko aer, jekar en̄jake bwe jekar jutak ilo ijoko rekwojarjar. Juon iaan sister ro rekar ba n̄an kōrā eo ippa, “Ke ikar loe ke m̧ōko itūrimim kar urur, ekar lōn̄ aō en̄jake ke m̧weo im̧ōm enaaj kar urur, bwe kōm̧ enaaj luji aolep kain. Ijeļo̧kin an kar ļap aō būromōj, ikar en̄jake juon en̄jake epen kōmeļeļeik kōn aeņōm̧m̧an. Ilo jabdewōt wāween ko, ikar en̄jake bwe aolep men renaaj em̧m̧an.” Ļōke Anij im kōjparok bujen ko ad Ippān ej boktok kajoor n̄an ṃōjṇọ ko ad im aeņōm̧m̧an n̄an būromōj ko ad.
Ij kam̧m̧oolol kōn juon iien em̧m̧an Renee im n̄a ekar ioone jet iaan Armej ro Rekwojarjar eļap aer em̧m̧an, kōn elōn̄ waanjon̄ak ko aer kōn tōmak, kajoor, im kijejeto. Kōn bwebwenato in bōro ko rerub im reddo ma relukkuun ban pad ilo peij ko jinoin tata in juon newspaper ak reban ajeeded. Kōn pija ko rekar jab pijaki kōn dānnin kōmjaaḷaḷ ko im jar ko ālikin juon jako ak juon jepel ekabūromōjmōj; kōn post ko jab likūti kōn mijak, būromōj, im metak ko rekar erōm̧ meraļo̧k jidik itok wōt jān tōmak ko ilo Jisōs Kraist im Pinmuur eo An. Armej rein rekar kōkajoorļo̧k tōmak eo aō make, im kōn menin elukkuun ļap aō kam̧m̧oolol.
Ijeļā en̄in ej Kabun̄ eo an Jisōs Kraist. Ijeļā ke E ej pojak n̄an jutak n̄an kakwojarjar kōj kōn kajoor eo An elan̄n̄e jenaaj itok n̄an E kajjojo im aolep raan. Ilo etan Jisōs Kraist, amen.