Iakwe Ro Rūtrum̧
Tūriam̧okake ej juōn mwilin Kraist. Ej kōmour iakwe n̄an ro jet ilo ejjeļo̧k jon̄an.
Jibbon̄in, ij karuwainene eok n̄an kobatok ippa ilo iaļ in an riAfrica. Koban elolo ļaion, zebra, ak elbōn, ak bōtaab, ilo jemļo̧kin iaļ in, kwonaaj lo an elōn̄ taujin ro uwaan Kabun̄ eo an Jisos Kraist im armej ro Rekwojarjar ilo Raan Ko Āliktata kōm̧m̧an n̄an kien eo eļap kein karuo an Kraist “yokwe ri turōm̧”(Mark 12:31).
Ba ļōmņak m̧ōk jidik, kōn jikin ko, eo eburōrō bwidejen ilo Africa. Kwoj loe jen an mōrā im mej kein ikkan ko ke etar jen jon̄an an to an jan̄in wōt iumin elōn̄ iiō. Kau ko rej pinej iaļ eo am̧ eļap dik jen kanniōk rej tōlļo̧k kōn juon buļankōj kalbubu Karamojong eo ilo neen ej ekōņak sandel, im ej kate ilo kōjatdikdik bwe enaaj elolo leen wōjke im dān.
Ilo am̧ etal ilo ial in enana im edōkeke, kwoj lo jet kurup in ajri ro rōm̧m̧an im bwilōn̄ etke rejjab jikuuļ. Ajri ro rej ettōn̄ waj im kotak peier, im kwōj barāinwōt kotak ļo̧k peium̧ kōn dānnin kōmjaaļaļ im ettōn̄ dikdik. Ratimjuonn̄oul-ruo bōjjen in ajri ro kwōj lo er ilo ilowan ial in rej mour kin n̄ūta, im būruōm̧ ekar būrom̧ōj.
M̧aanļo̧k, kwōj lo juōn m̧am̧a ej kōkkōm̧anm̧an wōt an door juōn ļalem-kōllan (19 L) in dān ioon bōran im juon ilo pein. Ej e wōt jen aolep m̧oko ruo ilo meļan in me kōrā ro, dik im rūtto, rej etetal 30 minit etal itok, kajjojo raan, n̄an ijoko ewōr dān ie n̄an baam̧le ko aer. Juon en̄jake in būrom̧ōj eitok ioom̧.
Ruo awa emootļo̧k im kwōj jikirōk ļo̧k ilo juon melaaj eaelorlor im ejeja an armej iļo̧k n̄ane. Im̧ōn kōppād in ejjab juon lukkuun em̧ ak ej juon em̧ nuknuk epād ium̧win juon wōjke eo ej kaļļo̧re jen māāņāņ in al. Ilo jikin in, kwojjab ellolo dān, ejjeļo̧k jarom̧, ejjeļo̧k im̧ōn kōppojak. Kwoj reito reitak im jeļā kwoj pād ilubwiljin armej ro rej iakwe Anij, im em̧ōkaj am̧ en̄jake iakwe eo an Anij n̄an er. Rar aiin doon n̄an bōk jipan̄ im kōjatdikdik, bwe kwoj ilo̧k im leļo̧k.
Ejja āinwōt kar tūrāāp eo am̧ro Sister Ardern, ippānļo̧k Sister Camille Johnson, Būreejtōn eo ad Eutiej an Doulul eo an Kōrā ro im ļeo ippān Doug im Sister Sharon Eubank, eo ej eddoik Jerbal in Jipan̄ ko an Kabun̄ in, ke kōm kar ito-itak ilo Uganda, juon laļ eo ewōr 47 milien armej ijoko ilo Africa. Ilo raan eo, ium̧win aelolor in wōjke ko, kōm eaar loļo̧k juon brojāāk in taktō ilo jukjukinpād eo me ej jipan̄ jen Humanitarian Service ko an Kabun̄ in, UNICEF, im ra eo an Jikin Ājmour ilo Uganda. Doulul in jipan̄ ko kōjatdikdik kaki, lukkuun lale bwe en jim̧we kōjerbal jāān im menin jipan̄ ko jān membōr ro an Kabun̄ in.
Ilo an kabūrom̧ōjm̧ōj ilo an jabwe ōōn n̄an ajri ro bwe en waļo̧k nan̄inmej in tibi, malaria, im pidodo, innām eaar itok n̄an kōm kajjojo n̄an kōļapļo̧k kōjatdikdik n̄an ilju eo em̧m̧anļo̧k n̄an ro kōm kar ioon er.
Kōjatdikdik in eaar waļo̧k, jidikin, kōn jouj eo an ro uwaan Kabun̄ in jān pelakin laļin ro rej leļo̧k iien im jāān n̄an jiparpar ko n̄an libjōrjōre menin jipan̄ an Kabun̄ in. Ke iaar lo rinan̄inmej ro im ro rej ban kōn jipan̄ n̄an kotak er, iaar badikdik ilo kamm̧oolol. Ilo iien eo, eaar em̧m̧anļo̧k aō meļeļe kōn ta eo Kiin̄ in kiin̄ raņ, eo ekar ba:
“Itok, kom̧ rimōņōņō an Jema, jolōt aelōn̄ eo ear pojak n̄an kom̧ … :
“Bwe I ar kwole im kom̧ ar naajdik Eō: I ar maro, im kom ar kaidaak Eō: I ar ruwamāejet, im kom̧ ar kadeļo̧n̄ Eō” (Matu 25:34–35).
Akweļap eo an Rilo̧mo̧o̧r ej bwe “En romaak ami meram im̧aan mejān armej, bwe ren lo ami jerbal ko rem̧m̧an, im nōbar Jemami i lan̄” (Matu 5:14–16; bar lale eoon 14–15). Ilo jikin ko rettoļo̧ktata ilo turājet in laļin, jerbal ko ami rem̧m̧an raar kōmeram ļo̧k mour im komerāik ļo̧k eddo ko an armej ro eļap aer pād ilo aikuj, n̄an aiboojoj eo an Anij.
Ilo raan ne eļap an bwil im būn̄aln̄al, ikar kōņaan bwe kwom̧in kar ron̄ jar ko aer kōn mōnōnō eļap n̄an Anij. Rekōņaan bwe in ba ba waj n̄an kom̧ ilo kajin eo aer make Karamojong, “Alakara.” Kom̧m̧ool.
Iaļ in ad ej kakeememej eō kōn bwebwenato eo an ri Sameria eo emman, eo eaar etal ilo ial eo ebwin̄ln̄al, eoktak jen eo ij kōmeļeļeik kake, ial eo ej etal jen Jerusalem n̄an Jeriko. Ri Sameria in ejouj ej katakin kōj ta meļeļein “yokwe ro ri turōm̧.”
Eaar loe “juon armej … [eo] im e pooļ kōn ri rakimi ro, rej utūk nuknuk ko an, im kakinejnej e, im ilọk, im likūt e kōptata an mej” (Luk 10:30) Ri Samaria eo “ear tiriamo kake”(Luk 10:33).
Tūriam̧okake ej juōn mwilin Kraist. Ej kōmour iakwe n̄an ro jet ilo ejjeļo̧k jon̄an. Jisōs, Rilo̧mo̧o̧r eo an laļ, ej waanjon̄ak ewāppen an tūriam̧okake. Ilo ad riit bwe “Jisōs eaar jan̄” (Jon 11:35), jej kam̧ool, āinwōt Mari im Marta, kōn tūriam̧okake eo An bwe en E eo m̧oktata n̄ijļo̧k ilo jetōb im buromōj (lale Jon 11:33). Ilo Bok in Mormon ej kōmeļeļeik an Kraist tūriam̧okake, Jisōs eaar waļo̧kļo̧k n̄an jarlepju eo im ba:
“Ewōr ke ami jabdewōt riakā, ak ripilo, rikwōle, rilulu, riajimakeke, im rimōk… ak ro rejarron̄ron̄, ak ro rej m̧ōjņo̧ ilo jabdewōt wāween otemjeļo̧k? Kom̧in bōktok er ije im Inaaj kōmour er, ewōr Aō tūriam̧okake kom̧. …
“… Im eaar kōmour er kajjojo” (3 Nipai 17:7, 9).
Jōkdo̧o̧n kate ko ad, kwe im n̄a jeban kōmour aolep ak kajjojo iaad jemaron̄ juon eo ej kōm̧m̧ann oktak n̄an em̧m̧anļo̧k eo ilo mour an juon armej. Ekar juon ļaddik jidikdik, eo ekar bōktok ļalem pilawe im ruo ek n̄an najdik ļalem taujin eo. Jemaron̄ kajjitōk kōn menin leļo̧k eo ad, āinwōt Andrew rikaļoor eo eaar kōm̧m̧an kōn bplawe ko im ek ko, “Ewi tokjān men kein?” (Jon 6:9) Ij kam̧ool n̄an kom̧: ebwe n̄an am̧ leļo̧k ak n̄an kōm̧m̧ane ta eo kwomaron̄e im kōtļo̧k bwe Kraist en kwaļo̧k kate eo am̧.
Ilo meļeļein, Elder Jeffrey R. Holland eaar kūr kōj, “m̧weie ak jeram̧ōl, … n̄an ‘kōm̧m̧ane ta jemaron̄e’ n̄e ro jet rej pād ilo aikuj.” Innām eaar kam̧ool, ilo aō kōm̧m̧ane, bwe Anij “tōl kom̧ ilo jerbal in meanwōd ko an rikaļoor” (“Jejjab Ke Aolep Ruwo̧o̧r Ke?,” Liaona, Nob. 2014, 41).
Ilo laļ en, raan eo iban meļo̧kļo̧ke, iaar jutak im kiiō ij jutak āinwōt juon rikam̧ool kōn jetōb im mour in oktak kōn tūriamokake an membōr ro an Kabun̄ in, jim̧or m̧weie im jeram̧ōl.
Bwebwenato eo kōn riSamaria eo emman ilo an “kūtimi kinej ko kijjen [em̧m̧aan eo] …im bōktok e n̄an im̧ōn ruwamāejet” (Luk 10:34). Kate ko ad kōn menin jipan̄ ko an Kabun̄ in ekōm̧m̧an an lukkuunn mōkaj ad bōk kuņaad ilo jorrāān ko jen oktak in mejatoto n̄an kūtimi kinej in nan̄inmej ko, kwole, ajri ro reddik, jabwe ōōn, jojolāār, im ebweer eo ekkā ad iione, inepata, im ebweer.
Innām riSamaria eo ej “bōk ruo sillin̄ im leļo̧k n̄an ri lale m̧weo, im ba n̄an e, Kwōn lale e” (Luk10:35). Āinwōt juon kabun̄ jej m̧ōņōņō ilo ad kobaļo̧k ippān “ro jet” ak doulul ko āinwōt Jerbal in Jipan̄ eo an Catholic, UNICEF, im Red Cross/Red Crescent n̄an jipan̄ ilo jibadbad ko ad. Kōmij kam̧m̧oolol ilo am̧ letok “ruo pence” ak ruo euros, ruo pesos, ak ruo sillin̄ me rej joļo̧k eddodo ko me elōn̄ ilo laļin rej ineeki. Ejjab alikkar eļan̄n̄e kwonaaj jeļā wōn eo enaaj jeraam̧m̧an kōn iien ko am, kōn jāān, im jāān dikdik ko, kōnke tūriam̧okake ejjab kipeļ bwe jen jeļā wōn er ej kipeļ bwe jen iakwe er.
Kom̧m̧ool, Būreejtōn Nelson, n̄an kakeememej kōj bwe “n̄e jej iakwe Anij kōn aolepān būruwōd, Ej ukōt buruwōd n̄an em̧m̧anļo̧k eo an ro jet” (“Kien eo Kein Karuo im Eļaptata,” Liaona, Nob. 2019, 97). Ij kam̧ool bwe kajjojo iaad enaaj ļapļo̧k an m̧ōņōņō, aenōm̧m̧an, im iakwe ilo ad kōm̧m̧ane kūr eo an Būreejtōn Nelson ej n̄an ukōt būruwōd n̄an em̧m̧an eo an ro jet im n̄an Josep Smith ej akweļap n̄an “naajdik ro rukwōle, kanuknuk ro rej keelwan, kake aikuj ko an ro emej pāleer, kōmōrāik kōmjaaļaļ an ro ejjeļo̧k jemeer, [im] kaenōm̧m̧an ro rej ban, emaron̄ ilo Kabun̄ in, ak jabdewōt ro jet, ak emaron̄ jab ilo kabun̄, jekdo̧o̧n ia [jej lo] er” (“Editor’s Reply to a Letter from Richard Savary,” Times and Seasons, Mar. 15, 1842, 732).
Aolep allōn̄ ko m̧okta ļo̧k, kōm kar lo ro rōkwōle im ilo ijoko rōmōrā im bwin̄aln̄al im kōm kar kam̧ool ilo an mejeer lukkuun aikuj jipan̄. Ilo iaļ eo am ļo̧k, kōm kar ellotaan ilo jetōb im kar inepata (lale John 11:33), ak en̄jake kein rekar jako ke kōm kar loe tūriam̧o im jouj an membōr ro an Kabun̄ in ke rej naajdik ro rekwole, ro ejjeļo̧k pāleer rekar leļo̧k aer aikuj, im ro rekar en̄taan rekar bōk kaeņōm̧m̧an im kam̧ōņōņōik ro rekar buromōj.
En jab jemļo̧k ad pukot jeraam̧m̧an eo an ro jet im kwaļo̧k naan im jerbal ko bwe “jej m̧ōņōņō n̄an ineek eddo ko an ro jet(Mosaia 18:8), n̄an “kwōre ro erub burueer” (Katak im Bujen Ko138:42), n̄an kōjparok kien eo an Kraist kein karuo n̄an “yokwe ri turōm̧” (Mak 12:31). Ilo etan Jisōs Kraist, amen.