Ettā n̄an Bōk im Ļoor
Ettā ej juon menin aikuj n̄an kōj n̄an pojak n̄an jepļaakļo̧k n̄an im̧aan mejen Anij.
Ilo fifth chapter of Alma, juon kajjitōk in etale kōj make ej ped: “Kom̧in ba ke, n̄e kar kūr kom̧ n̄an mej ilo iien in, ilo kom̧ make, bwe ebwe ami kar ettā?”1 Kajjitōk eo ej kalikkar bwe ettā ej juon menin aikuj n̄an kōj n̄an pojak n̄an jepļaakļo̧k n̄an im̧aan mejen Anij.
Aoleped jekōņaan ļōmņak bwe ebwe jon̄an ettā bōro eo ipped, ak jet en̄jaake ko ilo mour in rej kōm̧m̧an menin ad kile bwe piktokin, uteij bōro an em̧m̧aan ak kōrā ekkā an waļo̧k ippād.
Iiō ko remootļo̧k, ke leddik ro ruo nejimim rekar jokwe wōt ilo m̧weo, ikar kāālet n̄an kwaļo̧k n̄an er im kōrā eo ippa m̧ōn business eo inaaj eddoiki ilo company eo ij jerbal n̄ane.
Men̄e lukkuun jipadpad eo em̧ool ej n̄an kar kwaļo̧k n̄an er juon jikin, oktak jān m̧weo m̧ōm, aolep renaaj lukkuun kōm̧m̧ane ta eo inaaj kar kajjitōk ippāer n̄an kōm̧m̧ane ilo ejjeļo̧k kajjitōkin eō. Ke kōm ekar tōpar gate eo m̧aan, eo ej make peļļo̧k n̄e wa ej keipaake, ikar bwilōn̄ bwe ekar jab peļļo̧k iien eo. Ijjelo̧kin, juon security guard ijjan̄in kar loe m̧okta ilo mour eo aō ekar itok n̄an wa eo im kajjitōk ippa company ID eo aō.
Ikar ba n̄ane ke ijjan̄in kar aikuji juon ID n̄an deļo̧n̄e jikin eo kōn wa eo waaō innem ikar kajjitōk ippen juon kajjitōk an armej kōnebar: “Kwojela ke wōn eo kwoj kenono n̄ane?”
Eo im ekar uwaak, “Ekwe, kōnke ejjeļo̧k am̧ company ID, ijjab maron̄ jeļā wōn kwe, im ilo aō ped ilo gate in, ejjeļo̧k am̧ mālim n̄an dreļo̧n̄ jikin kein ilo ejjeļo̧k jim̧we in kalikkar wōn kwe”
Ikar ļōmņak in kalimjekļo̧k kūlaaj eo m̧aan n̄an lale ta eo leddik eo nejū ej kōm̧m̧an, ak ikar jeļā bwe leddik ro nejū rekar itok limoir!!!! Kōrā eo pāleeō ijo rājet ekar kajibouluul bōran ilo jab errā kōn tammū. Innem jekjek eo ekkar bwe in kōm̧m̧ane ej n̄an jeorļo̧k bōd n̄an guard eo im ba ij jeorļo̧k aō bōd kōn an nana aō kar kōm̧m̧an n̄ane. “Ejjeļo̧k am̧ bōd,”ekar ba, “ak an ejjeļo̧k am̧ company ID, kojjab maron̄ dreļo̧n̄ rainin!”
Innem ikar kadikdik aō ettōrļo̧k n̄an m̧weo n̄an bōk ID eo aō, bolen ekkatak katak in aorōk: n̄e jej kāālet n̄an ettā, jej oktak im jook.
Ilo Jabōn Kennaan, jej lo “Juwa an juon armej enaaj kōttāik e: a eo ettā būruon, enaaj jibadek nōbar.”2 N̄an ad maron̄ ettā bōro, jej aikuj meļeļe ta lukkuun meļeļein ilo gospel in.
Jet armej rej kapok ettā bōro ippān jet men ko āinwōt, n̄an waanjon̄ak, jeram̧ōl. Bōtaab elōn̄ ro rejarm̧ōl im uteej buruōer im barāinwōt elōn̄ ro rem̧weie im ettā būruweer. Ro jet rejookok ak ewōr pere ilo aer kalimjek er make remaron̄ wōr jekjek in ettā itulik bōtaab itulowa relukkuun uteej buruweer jet iien.
Kiin ta in ettā bōro? Ekkar n̄an Preach My Gospel, ej juon “ikdeelel eo n̄an leļo̧k ad n̄an Ankilaan Irooj. … Epidodo katakin. … [Ej] juon men aorōk em̧ōkaj n̄an eddōkļo̧k ilo jetōb.”3
Elōn̄ iien ko rem̧m̧an n̄an ad aolep em̧m̧anļo̧k ilo m̧wil in an Kraist. Ikōņaan m̧okta lale eo jon̄an ad ettā bōro, ak jej aikuj, n̄an ļoor kapilōk eo an rikanaan eo ad. Juon pop quiz n̄an kajjojo iaad emaron̄:
-
Jej ke ba likio in etan Kabun̄ in ilo aolep ad iiaio? Būreejtōn Russell M. Nelson ekar ba, “N̄an joļo̧k etan Irooj jān Kabun̄ eo An ej juon anjo̧ eļap n̄an Setan.”4
-
Jej ke kōtļo̧k an Anij anjo̧ ilo mour ko ad ilo ad bōk jejjōt in kūr in an rikanaan eo? “Rainin ij kūr n̄an aolep membōr ro ad ijoko jabdewōt n̄an joļo̧k m̧wiļ im m̧akūtkūt ko renana n̄an kalikjōkļo̧k.”5
-
Jej ke anjo̧ jān laļ in, lōke katak eo an Kraist eļapļo̧k jān katak ko an armej, āinwōt an rikanaan eo ad katakin?6
-
Em̧ōj ke ad erom̧ rikōm̧m̧an aenōm̧m̧an ro, rej ba men ko rem̧m̧an n̄an im kōn armej? Būreejtōn Nelson ekar katakin kōj menin ilo kar kweilo̧k eo elap m̧oktaļo̧k: “Eļan̄n̄e ewōr jabdewōt men wānōk, karbōb, ak em̧m̧an ekkōnono kake ak nebare en̄in jemaron̄ ba kōn bar juon armej—men̄e jiron̄ļo̧k mejān ak ba ilo an jab jeļā—en̄in ej aikuj ad jon̄ak in ekōnono.”7
Men kein rej men pidodo bōtaab rej kōm̧eļeļe ko rekajoor. Kemeemej, aolepen armej ro an Moses rekar aikuj kōm̧mane bwe ren mour rekar aikuj kalimjek jedpānit eo ekar lelōn̄ļo̧k.8 Ak “kōnke eaar ļam waan iaļ in, ak kōn pidodo eo an, elōn̄ ro raar mej.”9
Ilo iien kweilo̧k in eļap em̧ōj ad ron̄ im jenaaj bar ron̄ naan in kapilōk eo ejjab likjab an rikanaan ro ad im rijilōk ro. Ej juon iien eļap ejjejōt n̄an kōļapļo̧k ettā bōro im kōtlo̧k bwe meļeļe ko ad rekajoor ren wōraņļo̧ki jān juon kam̧ool eo ekajoorļo̧k wōt bwe Irooj ej ekōnono n̄an ritōl rein em̧ōj kāleti.
Ilōn̄in aolepmen, ilo ad kōļapļo̧k ettā bōro, jej aikuj bar meļeļe im errā bwe jejjab maron̄ anjo̧ jān apan̄ ko ad ak tōpar likkuun piktokid em̧ool jān kijejeto ko ad make. Rikōnono ro rej kōketak, rijeje ro, coach, im influencer ro ipeļaakin laļ in, eļaptata ilo digitial platform ko, renaaj ba bwe aolep men rej pedped wōt iood make im kōm̧m̧an ko ad. Laļ in ej tōmak ilo maron̄ eo an kanniōk.
Ak kōn gospel eo em̧ōj jepļaaktok, em̧ōj ad katak bwe eļap ad pedped ioon tūriam̧o eo an Jemedwōj Ilan̄ im Pinmuur eo an Rilo̧mo̧o̧r eo ad, Jisōs Kraist, “bwe kōm jeļā bwe ej jān jouj jej mour, ālkin aolep ijo jemaron̄ kōm̧m̧ane make.”10 En̄n ej unin an ļap an aorōk n̄an kōm̧m̧an im kejparok bujen ko ippān Anij, ilo ad kōm̧m̧ane menin naaj letok n̄an kōj tarlep in maron̄ eo n̄an kōmour, kōmaron̄, im kwoweppān kajoor eo an Jisōs Kraist kōn Pinmuur eo An.
Kobaļo̧k ilo kweilo̧k in kwojkwoj eo kajjojo wiik im kabun̄jar ilo tampeļ eo aolep iien n̄an kobaļo̧k ilo kain̄i ko im n̄an bōk im kōkāāl bujen ko ej juon kōkaļļe bwe jej kile ad pedped ioon Jemedwōj Ilan̄ im ad Rilo̧mo̧o̧r Jisōs Kraist. Menin enaaj karuwainene kajoor eo Aer n̄an mour ko ad n̄an jipan̄ kōj ilo aolep ad problem im āliktata kakūrm̧ool jon̄an piktokid.
Jejjo iien ko remootlok kar bar idajon̄jon̄e ettā bōro eo aō im meļeļe eo aō kōn lōke eo aō ilo Irooj. Ikar ped ilowaan juon taxi jibadōkļo̧k airport eo n̄an kelak n̄an juon jikin ijo ekar wōr juon jekjek eļap an ben n̄an kōm̧adm̧ōde. Taxi driver eo, eo ekar jab membōr in Kabun̄ in, kar kalimjōk eō ilo kilaaj eo im ba, “Ij loe bwe ejjab em̧m̧an am̧ mour rainin!”
“Kwoj loe ke?” Iaar kajjitōk.
“Aaet,” ekar ba. Inne ekar ba naan rot in, “Ealikkar an nana am̧ mour ilo paaktokūm̧!”
Ikar kōmeļeļeiki bwe ewōr juon jekjek eben ij kōm̧admōde, innem ekar kajjitōk ippa, “Em̧ōj ke am̧ kōm̧m̧ane aolep men ilo am̧ kajoor n̄an kōm̧m̧ane menin?”
Ikar uwaak ke em̧ōj aō kōm̧mane aolep men imaron̄e.
Innem ekar ba juon men iban meļo̧kļo̧k, “Ekwe kōtļo̧ke n̄an luubren pein Anij, im aolep men renaaj em̧m̧an.”
Ij kwaļok m̧ool bwe ikar tōn po n̄an kajjitōk ippen, “Kwojeļā ke wōn eo kwoj kenono n̄ane?” Ak ikar jab! Men eo ikar kōm̧m̧ane ikar kōttāik eō make ilo jar im̧aan Irooj ilo aolepen awa in kelak eo, kajjitōk jipan̄ ekwojarjar. Ke ikar etal jān baļuuņ eo, ikar ekkatak bwe jekjek eo eben n̄an kōm̧m̧ane em̧ōj kōm̧m̧ane im bwe aō ped ejjab kar menin aikuj.
Ro jeiū im jatū, kakien eo, kūr eo im kallim̧ūr eo jān Irooj ealikkar im ekaenōm̧m̧an: “Ettā im Irooj Anij enaaj tōl ļo̧k e kōn pein, im leļo̧k uwaak in jar ko an.”11
Bōlen jej aikuj ettā n̄an ļoor kapilōk eo an rikanaan ro ad im jeļā bwe Anij wōt im Jisōs Kraist remaron̄ ukot kōj—kōn kain̄i ko im bujen ko bōki ilo Kabun̄ in An—n̄an em̧m̧anļo̧k eo ilo kōj make ilo mour in im, juon raan, kōm̧m̧an bwe jen weppān ilo Kraist. Ilo etan Jisōs Kraist, amen.