Aiboojoj an Laļ ko
Ewōr juon Jemedwōj Ilan̄ em̧m̧an eo enaaj lale bwe jen bōk aolep kōjeraam̧m̧an im aolep em̧m̧an me ikdeelel ko ad im kāālet ko ad rej kōtļo̧k.
Ro uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata emakijkij kajitikin er, “Ekōjkan an kabun̄ eo ami oktak jān kabun̄ in ko jet an Rikūrijin?” Ibwilijin uwaak ko jej liļo̧k ej tarlep in katak eo an Kraist. Eo aorōk tata ibwilijin katak eo ej m̧ool eo bwe Jemedwōj Ilan̄ elukkuun in iakwe ajri ro Nejin jon̄an E ekōņaan bwe jen aolep mour ilo juon aiboojoj in laļ indeeo. Eļapļo̧k, E ekōņaan bwe jen mour Ippān im Nejin, Jisōs Kraist, n̄an indeeo. Karōk eo An ej letok n̄an kōj katak ko im iien eo em̧m̧an n̄an kōm̧m̧ani kāālet ko me renaaj jiron̄ kōj mejān kajjik eo im mour eo jej kāālete.
I.
Jān revelesōn eo raan kein jejeļā bwe mejān kajjitōk eo āliktata an aolep ro me rej mour ioon laļ in ejjab ļōmņak eo ejabwe an lan̄ n̄an eo ejim̧we im en̄taan ko indeeo an hell n̄an aolep. Karōk eo em̧m̧an an Anij n̄an ajri ro Nejin ekitbuuj m̧ool in kar katakin jān ad Rilo̧mo̧o̧r, Jisōs Kraist: “Ilo im̧ōn Jema elōn̄ jikin ko.”1
Katak eo kar kwaļo̧k an Kabun̄ eo kōjepļaaktok an Jisōs Kraist im Armej ro Rekwojarjar ilo Raan-ko Āliktata ej katakin bwe aolep ajri ro nejin Anij—ijello̧kin ro naaj jilkinļo̧k er ewōr oraer—naaj āliktata jolete juon iaan aiboojoj in laļ ko jilu, jekdo̧o̧n eo edik tata iaan ro rej “eļļāļo̧k jān aolep jeļā.”2 Ālkin juon tōre eo me eo ejjab pokake ej en̄taan kōn jerawiwi ko aer, eo en̄taan eo kōpooj er n̄an ta eo ej itok ālkin, aolep renaaj jerkakpeje im etal n̄an Ekajet eo Āliktata an Irooj Jisōs Kraist. Ijōņ, ad Rilo̧mo̧o̧r em̧m̧an, eo, kar katakin kōj, “kaibjoojoj Jemān, in kōjparok aolep jerbal ko an Pein,”3 naaj jilkinļo̧k aolep ro nejin Anij n̄an juon iaan aiboojoj in laļ kein ekkar n̄an ikdeelel ko rej waļo̧k kōn kāālet ko aer.
Bar juon katak im iminene ejej uwaan an Kabun̄ eo kōjepļaaktok ej waļo̧k eo an kien ko im bujen ko me rej leļo̧k n̄an aolpe ro nejin Anij jim̧we eo ekwojarjar an karbōb n̄an aiboojo eo eutiej tata ilo laļ eo an celestial. Mejān kajjik jab in eutiej tata—mour ijo eutiej tata ilo laļ eo an celestail—ej jibadbad eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata.
Jān revelesōn eo raan kein, Armej ro Rekwojarjar ilo Raan-ko Āliktata ewōr ippād jeļā in ejej uwaan kōn karōk in m̧ōņōņō eo an Anij n̄an ro Nejin. Karōk jab in ej jino kōn mour ko ad āinwōt jetōb ko m̧okta jān ad kar ļotak, im ej kwaļo̧k jibadbad eo im jekjek ko an iaļ eo ad kar kāālet ilo mour in im mejān kajjiōk eo kar ikdeelel kake ālkin.
II.
Jejeļā jān revelesōn eo raan kein bwe “aolep aelōn̄ in kiin̄ ko em̧ōn̄ leļo̧k n̄an er juon kien”4 im bwe aiboojoj an laļ eo jej bōke ilo Ekajet eo Āliktata ej kōmlet jān kien ko jej kāālet n̄an ļoor ilo iaļ eo ad ilo mour in. Ium̧win karōk jab in em̧m̧an, elōn̄ aelōn̄ in kiin̄ ko—elōn̄ jikin ko—bwe aolep ro nejin Anij renaaj jolete juon aiboojoj in laļ eo kien ko remaron̄ ineem̧m̧an ilo “pokake.”
Ilo ad kōmeļeļeik paotok eo im men ko aikuji an kajjojo aelōn̄ in kiin̄ ko jilu ilo karōk eo an Jemed, jej jino kōn eo eutiej tata, eo ej jibadbad eo an kein ko rekwojarjar im kain̄i ko an Anij kar kwalo̧ki kōn Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo aiboojoj an “celestial”5 ewōr jilu jon̄ak ko,6 eo eutiej tata ej mour ijo eutiej tata ilo laļ eo an celestial. En̄in ej jikin jokwe eo an “ro rekar bōk dipiio eo an, im an aiboojoj” kōn menin, “er rej anij, em̧ool ļaddik ro [im leddik ro] nejin Anij ”7 im “jokwe ilo im̧aan mejān Anij im an Kraist indeeo im indeeo.”8 Kōn revelesōn, Anij ekar kwaļo̧k kien ko indeeo, kain̄i ko, im bujen ko me rej aikuj pokaki n̄an kōļapļo̧k piktok ko an anij remenin aikuj n̄an kile kōjatdikdik in ekwojarjar. Kabun̄ eo an Jisōs Kraist im Armej ro Rekwojarjar ilo Raan Ko Āliktata ej mije men kein kōnke kōttōpar eo an Kabun̄ in em̧ōj an jepļaaktok ej n̄an kōpooj ro nejin Anij n̄an lo̧mo̧o̧r ilo aiboojoj an selestial im, eo eļap tata, n̄an mour ijo eutiej tata ilo jikin eo eutiej tata.
Karōk eo an Anij, kar ejaak ioon m̧ool indeeo, ej aikuj bwe mour ijo eutiej tata en maron̄ bōke wōt kōn tiljek n̄an bujen ko an juon m̧are indeeo ikōtaan juon em̧m̧aan im juon kōrā ilo tampeļ eo ekwojarjarj,9 eo m̧are eo enaaj ilo jem̧ļo̧kin pād n̄an aolep ro retiljek. En̄in ej etke jej katakin bwe “oktak in ānbwinid jān doon ej juōn jōkjōk eo eaorōk n̄an kwaļo̧k kadkad in kajjojo ilo mour eo m̧okta, im kadkad in kajjojo ilo mour in, im kadkad eo ejjeļok jemļokin im unleplepin.”10
Juon katakin eaorōk im ejeņo̧ļo̧k n̄an jipan̄ kōpooj kōj n̄an mour ijo eutiej tata ej 1995 kean̄ eo an kōn baam̧le.11 Kean̄ eo an ej kalikkar menin aikuj ko an me ej kōpooj kōj n̄an mour ippān Anij Jemed im Nejin, Jisōs Kraist. Ro rejjab lukkuun meļeļe karōk eo an Jemed eo ej iakwe n̄an ro Nejin emaron̄ lale kean̄ eo an baam̧le eļap jen baj kakien in ennaan eo eaikuj in oktak. N̄an keidi, jej kapene bwe kean̄ eo kōn baam̧le ej kōmeļeļeik jemjerā eo an baam̧le ilo mour in ijo me m̧ōttan eo aorōk tata an eddōkļo̧k indeeo eo ad emaron̄ waļo̧k.
Rijilōk Paul ej kōmeļeļeik aiboojoj ko jilu, keidi er n̄an aiboojoj ko an aļ, allōn̄ , im ijo ko.12 E ej ņa etan eo eutiej tata “celestial” eo kein karuo “terrestrial.”13 E ekar jab ņa etan eo ettā tata, bōtaab juon revelesōn n̄an Josep Smith kar kobaiktok etan: “telestial.”14 Bar juon revelesōn ej barāinwōt kōmeļeļeik paotok eo an armej ro naaj kappeik er n̄an kajjojo ilo aiboojoj an laļ kein. Ro me rejjab kāālet “pokake kien eo an aelōn̄ in selestial”15 naaj jolete aiboojoj in laļ eo juon, ettāļo̧k jān selestail bōtaab karbōb n̄an kien ko raar kāālet im maron̄ ineem̧m̧an lo “pokake.” Naan eo jutak ņaeekanooj emakijkij ilo jeje ko rekwojarar, ej meļeļe in juon jikin ejokne.16 N̄an waanjon̄ak, ro ilo aelōn̄ in kiin̄ eo an terrestrial—keidi n̄an katak eo an lan̄ aolep armej rejeļā—“rej bōk iiaio eo an eo Nejin, ak jab jān dipiio jān Jemān.”17 Raar “armej rem̧m̧an in laļ, ro rekar pilo jān m̧ōņ an armej raņ,”18 bōtaab “jab kajoor ilo naan in kam̧ool kōn Jisōs.”19
Kōmeļeļe in kwaļo̧k tok kōn ro kappeik er n̄an aiboojoj in laļ ko rettā tata, telestial, ej “e eo ej jab maron̄ pokake kien … eo an aelōn̄ in terrestrial.”20 Ej kōmeļeļeik ro me rejjab bōk Rilo̧mo̧o̧r im kar jab dāpij m̧wil eo aer n̄an dettan eo ekwojarjar kar kwaļo̧k kōn m̧wil ko m̧wilier. En̄in ej aelōn̄ in kiin̄ eo ijo ro renana rej jokwe ie, ālkin aer en̄taan kōn jerawiwi ko aer. Errein rej ro kōmeļeļeik ilo revelesōn eo raan kein āinwōt “rej ro rekar jab bōk gospel eo an Kraist, im jab bōk naan in kam̧ool kōn Jisōs. …
“Errein er ro rej ririab, im rianijnij, im rilōn̄, im rijuwaļōn̄ļōn̄, im jabdewōt eo ej iakwe ej kōm̧m̧an juon riab.”21
Kōnono kōn aiboojoj in laļ ko jilu kōn visōn in rikanaan eo an, Būreejtōn Russell M. Nelson kiiō epaak ekar je: “Tōreen mour in ekanooj in dik keidi ippān mour indeeo. Bōtaab men̄e laļ in ekadu bōtaab elukkuun aorōk! Kanooj ļōmņak kōn ekōjkan an jerbal: Ilo tōreen mour in kwoj kāālet ewi wōt kien ko kwoj m̧ōņōņō in pokaki—ko an aelōn̄ in selestial, ak terrestrial, ak telestial—im, kōn menin, ilo eo aiboojoj in laļ eo kwonaaj mour ie indeeo. Juon karōk em̧m̧an! Ej juon karōk me ej lukkuun kautiej anemkwoj in kāālet eo am̧.”22
III.
Rjilōk Paul ekar katakin bwe katak ko im kein ko an Irooj kar litok bwe jen aolep maron̄ bōk “jon̄an rūttoun an Kraist obrak.”23 Eddōkļo̧k jab in ej aikuji eļapļo̧k jān bōk jeļāļo̧kjeņ. Em̧ool ejjab bwe n̄an lōke gospel eo; jej aikuj jerbale im ļōmņak bwe jekar oktak kōn e. Ilo keidi n̄an kwaļo̧k eo juon, eo ej katakin kōj n̄an jeļā juon men, gospel eo an Jisōs Kraist ej idajon̄jon̄e kōj n̄an erom juon men.
Jān kain katak kein jej kōjem̧ļo̧ke bwe Ekajet eo Āliktata ejjab baj juon etale in juon koba in aolep jerbal em̧m̧an im nana jim̧or—ta eo jaar kōm̧m̧ane. Ej pedped ioon ajāliklik in jerbal ko im ļōmņak ko ad—to eo jaar erom. Jej karbōb n̄an mour indeeo kōn juon jekjek an oktak. Āinwōt kar kōjerbale ijin, naan in elōn̄ meļeļe ej kwaļo̧k juon oktak in paotok ekajoor. Ejjab bwe n̄an jabdewōt n̄an kōm̧m̧ane juon men ilo jab ļōmņak kake. Kien ko, kain̄i ko, im bujen ko an gospel eo rejjab juon laajrak in menin aikuj ko me juon raan naaj aikuji būki. Gospel eo an Jisōs Kraist ej juon karōk eo me ej kwaļo̧k n̄an kōj ekōjkan ad erom ta eo Jemedwōj Ilan̄ ej ikdeelel bwe jen erom.24
IV.
Kōnke kōn Jisōs Kraist im Pinmuur eo An, n̄e jej likjab ilo mour in, jemaron̄ ukweļo̧k im bar kobaļo̧k ilo iaļ in bujen eo me ej tōlļo̧k n̄an ta eo Jemedwōj Ilan̄ ej ikdeelele n̄an kōj.
Bok in Mormon ej katakin bwe “mour in ej iien eo n̄an [kōj] bwe ren m̧aanjāppopo n̄an iioon Anij.”25 Bōtaab dettan eo me epen n̄an “mour in” kar leļo̧k juon kōjatdikdik (diktata n̄an jet wāween n̄an jet armej) kōn ta eo Irooj ekar kwaļo̧k n̄an Būreejtōn Joseph F. Smith, kiiō kar ļo̧o̧ke ilo Katak im Bujen Ko jekjōn 138. “Iaar lo,” rikanaan eo ekar je, “bwe elder ro retiljek an tōrean bōk eddo in, n̄e rej ilo̧k jān mour in, rej wōnm̧aanļo̧k wōt jerbal ko aer ilo kwaļo̧k gospel in ukeļo̧k eo im lo̧mo̧o̧r, kōn katok eo an eo Nejin Emake Keotak in Anij, ilubwiljin ro rej pād ilo marok im ium̧win korak an jero̧wiwi ilo laļ eo eļap an jetōb ro an ro remej.
“Ro remej im rej ukeļo̧k renaaj bōk lo̧mo̧o̧r, kōn pokake n̄an kain̄i ko an m̧weo im̧ōn Anij,
“Im ālikin aer kar kōļļāiki bakkiin̄ in bōd ko aer, im kar kwaļ er erreo, renaaj bōk juon wōņāān ekkar n̄an jerbal ko aer, bwe er rej rijolōte lo̧mo̧o̧r.”26
Ilo kakobaba, jejeļā bwe ilo Mellenium, taujin iiō ko me ālkin Itok eo Kein Karuo an Rilo̧mo̧o̧r, naaj erom juon iien n̄an kōm̧m̧ani kain̄i ko remenin aikuj n̄an ro me raar jab būki ilo mour ko aer ioon laļ.27
Ekanooj ļap ijo jejjab jeļā kake kōn jilu tōre in iien ko reļļap ilo karōk in lo̧mo̧o̧r im jem̧jerā eo aer n̄an doon: (1) laļ eo an m̧okta an jetōb ko, (2) mour in, im (3) mour eo tok juon, im kadkad eo aer n̄an doon. Bōtaab jejeļā m̧ool kein indeeo: “Lo̧mo̧o̧r ej juon men eo eaorōk n̄an kajjojo armej, mour ijo eutiejtata ej juon men eaorōk n̄an baam̧le.”28 Ewōr juon Jemedwōj Ilan̄ em̧m̧an eo enaaj lale bwe jen bōk aolep kōjeraam̧m̧an im aolep em̧m̧an me ikdeelel ko ad im kāālet ko ad rej kōtļo̧k. Jej barāinwōt jeļā bwe E ejjamin naaj kipel juon n̄an juon jemjera jiiļ ņaen kōņaan eo an ļeo ak liio. Kōjeraam̧m̧an ko an juon jemjerā jiiļ rej kam̧ool n̄an aolep ro rej kōjparok bujen ko aer bōtaab jamin jān kilep juon jemjerā jiiļ iion bar juon armej me ejjab erreo ak jab kōņaan.
Ro jeiūim jatū rejitōnbōro, Ij kam̧ool kōn m̧ool eo an men kein. Ij kam̧ool kōn ad Irooj Jisōs Kraist, “rijeje im rikadedeļo̧k an tōmak eo [ad],”29eo Pinmuur eo an, ium̧win karōk eo an Jemed ilo Lan̄, ekōm̧m̧an an pidodo, ilo etan Jisōs Kraist, amen.